Kum 1930 vel a Mizoram a Thlarau Thianghlim malsawmna leh a hnathawh lo thleng chu kohhran awm saten an pawm theih loh avangin a dawngtu leh a chenchilhte chu a remchang ang ang in an inpawlkhawm thin a. Mizoram khawpui ber Aizawl ah chuan an khaipa ber Pu Zakamlova inah an inkhawm thin a. Pentecostal Assemblies of The World (PAW) in India rama Missionary hnathawk a an rawn tirh Roxie A R Telie Dover-I te nen an indawr fuh hlauh a. A awmna hmun Bhagalpur atangin Mizoram ah a lo kal a, January ni 16, 1949 ah a thleng a. Dover-I chuan Pathian pakhat chauh Lalpa Isua a nihziate leh chhandamna kawng dikte chu a kawhhmuh a, Pu Zakamlova leh a hote chuan an zawm ta a. Anni hi February ni 19 1950 ah United Pentecostal Church USA a miten India rama Missionary hnathawk a an tirh Rev. Ellis L.Scism chuan United Pentecostal ah a lawmlut ta a ni.
UPC chu India Hmarchhakah leh Central India-ah a darh ta zel a. kum 1962 March thlaah Mizoram UPC chuan India UPC te chu an zawm ve ta a, India UPC Manual Bye Law hmangin an inkaihruai ta a, an inkaihhruaina hmanlai mek chu an kalsan a. Hemi hnuah hian UPC of North East India chu kum 1969 ah a lo ding leh ta a ni.
Hetia Kohhran kalchho zelah hian khawvel tukverh lamah an lo dak nasa ta a, Trinitarian te nena dawhkan kilhonate an lo nei chho ta zel chu, mi tam takin an duh lova; tichuan, April ni 1, 1995-ah Office-te hawngin a tira Mizoram UPC insawrkarna anga kal thar leh Mizoram UPC chu dinthar leh a ni ta a ni. Tunah hian District 13 an awm a, Pastor Bial vawnglai nei hi mi 75 leh Bial neilo mi 10 an awm bawk a. India ram hmun hrang hrangah leh India ram pawnahte chanchintha hriltu an tirchhuak mek a ni. Khawvel khawihmun a mi pawh, an thurin ang ringtute nena thawhhona neih hi an tum lian tak a nih rualin, sakhaw dang leh Trinitarian-te nena thawhhona ang chi reng reng laka inthiarfihlim hi a kalphung pawimawhtak a ni.