United Pentecostal Church
of Mizoram

Mizoram UPC hnuaia Area hrang hrang inkhawmpui chu October ni 9 Zirtawp zan atang hian hman tan a ni dawn a, Ruantlang Bialah Tuichangral Area te chuan inkhawmpui hmangin, Thenzawl Bialah Serchhip Area inkhawmpui hman a ni bawk ang.

Serchhip Area inkhawmpui hmanpui tur hian General Superintendent Rev. Ngurthanpara Sailo chu a zin chhuak a, General Treasurer Rev. Rokhuma chuan Tuichangral Area inkhawmpui a hmanpui bawk.

Upa Lalzirliana Chairman, General Missions Dept chu October ni 8 Ningani khan Arunachal Field Conference hmanpui turin Senki View panin a zin chhuak a, ni 9-11 chhung hian Conference hi hman a ni ang. Upa Lalzirliana hi Rev. Pc Laltanpuia, Kolasib Diakkawn Bialtu leh Pastor C. Ramchhanmawia Barak valley Bialtu te chuan an tawiawm a, an cham chhung hian Tadunia leh Manja a kohhrante an tlawh ang a, October ni 13 Thawhlehni hian Aizawl an lo let leh dawn a ni.

SUNDAY SCHOOL DEPARTMENT

SS Dept GENERAL BOARD MEETING VAWI 30-NA NEIH A NI.

October ni 7, Nilani khan General Headquarters Office Conference Hall, Zonuamah Sunday School Department chuan General Board Meeting vawi 30-na an hmang a, Upa Lalnuntluanga Sailo, General Sunday School Department Chairman chuan a kaihruai. Kumin SS board meeting ah hian bial SS Chairman bakah, bial aiawh mi pakhat theuh intirh a ni a, mi 91 ten ro an rel a, Mizoram UPC Puipa ten an ho bawk.

SS General Board meeting-ah hian thu ngaihtuah tura chhawp chhuah Agenda 26 a awm a. Chung zingah chuan kum 2027 aṭanga hman tan turin General Board Fund bial tin budget Rs. 500/- ruahmante, SS Naupangte himna tur atana Drugs awareness leh sex awareness neihte, hmalakna atan naupangte hriat tur  lehkha chhiar chhuah tur a rang lama thawn chhuahte chu an thu rel langsar zualte an ni a, heng bakah hian ro relna hmasa in a lo pawm tawh Pre-Beginner syllabus chak zawk a buatsaihte leh Beginner leh Primary zirlaibu, naupang ten an hriat fiah awlsam zawk theih nana milem dah tel rawtna te chu an pawm a, hei hi kum 2028 atang a hman theih tur a rel a ni. SS General Board chuan Kum 2027 SS budget atan Rs. 34,28,400/- an pawm bawk a ni. General SS Dept ro rel inkhawmah hian Kum 2027 puitling Sunday School zir lai bu, ‘Kohhran leh a nih phúng’, Rev. P. Lalrinawma a ziak chu General Superintendent Rev. Ngurthanpara Sailo chuan a tlangzarh a, Zirlaibu man hi cheng 100/- a ni.

General PYD

PYD HLA BU THAR (TONIC SOLFA-A DAH) TLANGZARH A NI

October ni 2, Zirtawpni zan khan General Headquarters Conference Hall, Zonuamah Literature Committee, General PYD buatsaihin 'ZAI MITE NENA FAK ZAN' programme hman a ni a, zai mi thlan chhuah mi 14-te'n fak hla, kohhran huang chhunga hla sak tlanglàwn vak tawh loh nia lang leh hla sak làr sa ṭhenkhatte mawi takin an sa a ni. 'ZAI MITE NENA FAK ZAN' hun hi unaunu Vanlalthanpuii Pautu, member Literature Committee-in a kaihruai a, T. Upa Lalfamkima, Vice Chairman, Literature Committee chuan hun serh a hmang a, Upa Lalrinchhana, Vice President, General PYD leh Tk. R. Lalbiakdika, Chairman, Literature Committee-te hnen aṭangin thu sawi ngaihthlak niin, zai mite leh kohhran mipuite fuihna thu an sawi a ni. PYD HLA BU THAR (TONIC SOLFA-A DAH) chu T. Upa Mesak Vanlalthlana, Secretary, General PYD leh Ex-Officio, Literature Committee ni bawk chuan a duh apiang te lei theih turin a tlangzarh a, he mi zan hian Hla bu thar hi Tlangzarhna hmunah lei theiha pho chhuah nghal a ni. 'ZAI MITE NENA FAK ZAN' tih Programme hi Literature Committee, General PYD hnuaia PYD member zai mi registration ti te puala buatsaih a ni a, General PYD hruaitute'n an ho a ni.