United Pentecostal Church
of Mizoram

Rev Hc Lalthlamuana General Secretary chu ni 17 Zirtawpni zan atang khan Bethlehem Kohhran a Pathian Chawimawina ah thuhril rawngbawlna a nei a, Pathianni zan thleng hun a hmang ang.

Rev C.Ramsangvawra, Secretary General SS Department chu Saikhamakawn kohhrana Pathian chawimawinaah ni 17 Zirtawpni zan atang khan inkhawm kaihhruaiin, Pathianni zan thleng a hmanpui dawn a ni.

General Missions Department

General Missions Department Executive Board thutkhawm 142-na chu ni 17 Zirtawpni khan Conference Hall, General Headquarters Office-ah neih a ni.

Meeting hi Upa Sawihlira Chairman General Missions Dept chuan a kaihruai a, Puipaten an telpui bawk.

Missions hmalakna atana Support Campaign neihte, General Missions Dept hnuai a thawktute awmna hmun siksawi chungchangte, Missions Field leh enkawltute awmdan tur bakah Tirhkoh rawih chhunzawm zel chungchangte chu thurel langsar zualte an ni.

Executive Board meeting hi kumin atana vawikhatna a ni.

Tripura District

Tripura District chhungah mithar thahnem tak lawmluh a ni.

Kum 2019 Krismas leh kumthar inkarah, Tripura District chhunga Bial paruk atangin ringlo mi, mithar engemawzat Mizoram UPC ah lawmluh an ni a,

Kanchanpur bial ah-3, Darchawi bial ah-14

Monu bial ah – 4, Agartala bial ah- 3

Twikumba bial ah -6 leh Sabroom bial ah-3 te an ni.

Heng mithar lawmluhte hi Hindu sakhua betute an ni.

Kawnpui Bial

January ni 11 Inrinni khan Pastor K.Lalawmpuia thlahna Bial huap in Kawnpui Kohhranah buatsaih a ni a, Bial chhung Kohhranpui, Department hrang hrang leh mimal mi engemawzat ten ngaihhruina thilpek an hlan a ni.

Pastor K.Lalawmpuia hi kumin atang hian Champhai Bialtu a ni dawn a ni.

Siaha Bial

New Siaha kohhranah Ni 11 Inrinni zan khan Bialtu Pastor kalchhuak tur Pastor Hc. Lalthlamuana thlahna inkhawm hman a ni a, New Siaha kohhran,

Department hrang hrang leh mimal atangin thil pek an ni.

Pastor Hc.Lalthlamuana te chhungkaw thlahna hi Ni 12 Pathianni zan khan Bial huapin New Siaha Biak in ah neih chhunzawm a ni a, he inkhawm hi

Rev.H Halai chuan a kaihruai a, Bial aiawhin Upa J.Lalroliana, Treasurer Siaha Bial chuan thusawina hun a nei a ni.

Bialtu Pastor thlahna inkhawm ah hian Pastor. Hc Lalthlamuana chuan thuhril rawngbawlna a nei bawk.

Siaha Bialtu Pastor thlahna hi Lungzarhtum kohhran, Niawhtlang bial te chuan an telpui bawk a ni.

Pastor Hc Lalthlamuana hi kum 2020-2021 chhung a General Secretary atan ruat a ni a, General Headquarters Office, Tuikhuahtlangah a thu a nga,

Headquarters Kohhranah a lawi ang.

Ni 14 Thawhlehni zan khan Siaha Bialtu thar, Pastor Lalthakima lawmluhna hun New Siaha Kohhranah hman a ni bawk a, he inkhawm hi

Tk.Lalnunmawia, Bial Secretary chuan a kaihruai a,

Upa C.Lalropuia Bial Chairman chuan lawmluhna hunserh a hmang a ni.

He inkhawmah hian Siaha Bialtu Pastor thar

Pastor Lalthakima chuan thuhril rawngbawlna a nei nghal a ni.

Siaha Bialtu thar hi Thingfal Bial atangin mi engemaw zatin Siaha thlengin an thlah bawk.

January ni 15 Nilaini zan inkhawmah New Siaha East 2 Preaching point-ah mithar pahnih kohhran dang atangin lawmluh ani bawk.

Zemabawk

Zemabawk bial chuan ni 12 Inrinni khan Bialtu chhuak tur Rev.Rokhuma thlahna hun an hmang a, hemi ni vek hian Bialtu Pastor thar Rev.V.Rothuamluaia lawmluhna hunserh hman nghal a ni.

Rev.Rokhuma hi Kawnpui Bialtu Pastor thar a ni dawn a, Rev V.Rothuamluaia hi Area Secretary, Southern Zone kalchhuak a ni bawk.

Jiri Phaitol

Jiri Phaitol Kohhranah Sunday school day chu urhsun tak a hman a ni a, Sunday school day thuchah ngaihthlak a nih bakah, he mi ni hian puitling leh naupang ss ah lawmman sem ani.

SS Day ah hian Jiri Phaitol PYD te chuan ruai an buatsaih a, kalkhawm ten tlai lamah an kilho a ni.

Vairengte Bial

January Ni 12 (Pathianni) khan Vairengte Headquarters Kohhran Biak In ah, mithar lawmluh an ni.

Lawmluhte hi member pali chhungkaw khat ami an ni a, chhugkaw pa ber hi Unaupa Hmingthanzauva a ni a, Bialtu Pastor Rev HC Jacoba'n Lalpa Isua hmingin Mizoram UPC ah a lawmlut a ni.

LAWNGTLAI BIAL

Ni 12 Pathianni chawhnu khan Lawngtlai bial Kohhranpui hruaitute, Tualchhung tin Kohhran hruaitute leh Department-ti'n a bial hruaitute chuan Vengpui Kohhran sunday school hall-ah kumin atan a inhlan tharna hun neiin, joint meeting an nei.

He thutkhawm hi Upa Lalengzauva, Chairman Lawngtlai bial chuan a kaihruai a, Rev.R.Laldawngliana, bialtu Pastor-in hunserh hmangin, bial Secretary Upa Lh.Chungnunga leh bial Treasurer Upa K.Lalreia-te hnen atangin report ngaihthlak a ni bawk.

He hunah hian Department hrang hrang hruaitute atangin hmathlir an neihte ngaihthlak a ni.

General PYD buatsaih tur Live crusade Lawngtlai bial a nghah, Gen.PYD hruaitute'n a hun leh hmun ruahman tur a ngenna an siam chu Joint meeting-ah hian ngaihtuah a ni a, meeting chuan April thla chawlhkar vawithumna emaw vawi lina nise, Gen.PYD executive board-in remchang an tih zawk thlang fel mai se an ti a, a hmun atan Lawngtlai khawchhunga hall awmte chu an ruahman bawk.

Joint Meeting chuan LIVE Crusade atan a hmalak zel dan turah Bial PYD te chu thuneihna a pe a, General PYD te nen ruahmanna siam a, indawrna kalpui zel nise an ti a ni.

Heng bakah hian Bial Auditors hnen atanga bial kohhranpuiin ngenna an hmuh, account book vawn dan tur chungchanga rawtna awmte sawihoin, bial committee-in a tul anga hma la turin meeting hian a rel bawk.

DILKAWN BIAL

Mizoram UPC hnuai a Bial hrang hrangah, Kohhranpui leh Department inkhawmpui neih chho ani leh dawn a,

Dilkawn Bialah chuan Buang Kohhran in Bial Missions Department inkhawmpui a thleng dawn a, January Ni 24- 26 chhung hian neih a ni dawn a, Rev. Pc. Lalṭanpuia, Secretary General Missions Department chu Speaker-ah hman a ni ang.

Dilkawn Bial Ladies Auxiliary Department inkhawmpui chu Lianpui kohhranah February Ni 21-23 chhung hian neih a ni dawn a, Pastor Lalhmachhuana’n thuhril rawngbawlna a nei ang.

AIBAWK Bial

Aibawk Bial ah hetiang hian inkhawmpui hmanna turte ruahman a ni bawk.

Bial inkhawmpui- Aibawk kohhranah

SS Dept inkhawmpui – Falkawn kohhranah

LAD inhawmpui – Thiak kohhranah

PYD inkhawmpui – Sialsuk kohhranah leh

Missions Dept inkhawmpui – Chamring kohhranahte nghah a ni.

Sairang bial

January Ni 11 Inrinni Khan Sairang bial Kohhranpui Committee thutkhawm 123-na Dinthar kohhran SS hall-ah neih ani.

Bial Inkhawmpui March thla a Sairang Dinthar hmun a neih tur Programme duante,

Bial chhung a Preaching point pahnih a hmalak zel dan tur chungchangte chu thurel langsar zualte an ni a,

Meetingah hian Sawmapakhat, District leh Pastor Quarters Budget an neihte kohhran hrang hrangah an sem fel nghal a ni.

Ni 10 Zirtawpni zan khan Sairang Bial PYD Silver Jubilee Committee Office Bearer te Pastor Quarters-ah an thukhawm a,

Silver Jubilee pula a Jubilee logo design dan turte, Souvenir bu kalhmang tur leh thu ziak tuturte ruatna an nei a, sum tuak dan tur hrang hrang an ngaihtuah bawk a ni.

Sairang bial PYD chuan Silver Jubilee lawmna hi November ah buatsaih an tum a ni.

Mamit Bial

Mamit Bial chhungah mithar lawmluh an ni.

Phaizau Kohhran Mamit Bialah Ni 12 Pathianni zan khan mithar kohhran dang atangin mi panga chhungkaw 1 a mi chu Upa R.Lalchhunga Kohhran Chairman chuan Mizoram UPC ah a lawm lut a ni.

Phaizauah hian mimal ram chhungah Biak In sa hawhin, inkhawmna neih thin a ni a, ram nei tute lam atang a remchan lohna awm avangin tunah hian Biak In pangngai nei loin an awm mek a, mimal In Tirhkoh Quarters atan a hman mekah inkhawmna an nei thin a ni.

Phaizau kohhrante hian General atang a Biak In sak tanpuina an dawn hmangin Biak In ban tur phun kim a ni a, rokhawlhna a awm tak avangin chhunzawm theih a ni ta lo a ni.

Rabung Bial

Rabung Kohhrante chuan Sunday school day chu urhsun takin an hmang a, Puitling leh Naupang SS ten a huhoin biak in pui ah hmangin,

He inkhawm hi Upa K.Roliana chuan a kaihruai a, Pathianni chawhmaah

Bialtu Pastor, K.Zoramchhanthangan thuhril rawngbawlna a nei a,

Upa.K.Vanlallianan chawhnuah hun a hmang thung a,

Zan inkhawmah T.Upa.RTC.Vanlalvawna, NPSS Superintendent hnen atangin Pathian thuchah ngaihthlak a ni bawk.

NPSS department te chuan items hrang hrang, Recitation, solo, Action song leh zavai zai hmangin Pathianni zan atanga zan thleng, inkhawm apiangin hun an hmang bawk a ni.

SS Day ah hian kum hlui 2019 SS hming ziak, kum 70 chin chunglam mi 13 te hnenah chawimawina an hlan bawk.

BILKHAWTHLIR BIAL

Kum 2020 Bilkhawthlir bial Kohhranpui committee thutkhawm hmasa ber chu ni 9 (Ningani) khan Kualmawi Sunday School hall-ah neih a ni.

He meeting-ah hian bial chhung aṭangin rorel palai mi 18 an kal a, Upa PC. Lalmalsawma, Bial Chairman chuan a kaihruai a, thurel pawimawh tak tak zingah, Kum 2020 bial Inkhawmpui hun ruatna te, Saiphai Kohhranin Upa leh T. Upa post an dil belh chu an phalsak bakah Saiphai hmuna Preaching Point chu Saiphai Hmarveng Preaching Point tia hming thlak nise tihte a tel a ni.

Heng bakah hian Bial chhung atanga ATI lut thar tur mi pathum Committee chuan a recommend bawk a ni.

Ni 8 Nilaini khan Kualmawi Biak Inah General ruahmanna a Saiphai hmuna rawngbawl tur Tirhkoh Imanuel Lalthianghlima chu bial huapin lawmluhna inkhawm buatsaih a ni a, bialtu Pastor Lalrinmawia Varte chuan rawngbawltu hi a lawmlut a ni.

Saiphai Kohhran pawhin ni 9 zan Tirhkoh Imanuel Lalthianghlima lawmluhna inkhawm an buatsaih bawk.

January ni 2, 2020 khan unaupa Chuauthanga te chhungkua chuan ran talhin Pathian chawimawina an nei a, he hunah hian Speaker atan Pastor Lalrinmawia Varte hman a ni.

Ni 11 (Inrinni) khan unaupa Chuailova te chhungkua chuan Pathian chawimawina an nei a, Unaupa Lalnunpuia Zote, Bawngkawn chuan thuhril rawngbawlna a nei a ni.

Ni 18 Inrinni hian unaunu Ralziki te chhungkua chuan chawimawina an nei leh dawn bawk a, Speaker ah Pastor Lalrinmawia Varte, bialtu Pastor hman a ni ang.

Bilkhawthlir Bial chhung a kohhran 6 ah Sunday School Day tluang taka hman a ni a, Day thuchah chhiarchhuah anih bakah Sunday School kaihhnawih lawmman chi hrang hrang sem nan he ni hi hman a ni bawk.

Khawbung Bial

Khawbung kohhran ah mithar chhungkaw khat kohhran dang a mite chu bialtu Pastor Andrew Lalhruaizelan Mizoram UPC ah a lawmlut a, lawmluh chhungkaw pa ber hi a lawina hmasa kohhranah kum 10 chuang Kohhran Upa lo ni tawh a ni.

Serchhip Bial

January ni 11 (Inrinni) khan Serchhip bial Hebron tualchhung leh Zoar tualchhungah, kohhran mipuite thawhkhawmin ran talha Pathian chawimawina neih a ni.

Hebron Kohhranah hian Tirhkoh Vanlalrema chu Speaker-ah hman a ni a, Zoar kohhranah hian Tirhkoh Michael Lalramchhana, Tualbung chu Speaker-ah hman a ni bawk.

Zoar kohhranah hian T.Upa Zairema te chhungkua chuan Pathian chawimawina an neih chhunzawm leh dawn a ni.

January ni 12 (Pathianni) chawhnu inkhawmah Serchhip bial chuan bialtu kalchhuak tur Pastor Rev PC Laltanpuia thlahna hun Bial huapin an hmang a,

He inkhawm hi Upa T.Sangthanga, Bial Chairman chuan kaihruaiin, Upa C.Lalremchhunga, bial Secretary chuan thlahna thuchah a sawi a, Rev PC Laltanpuian thuhril rawngbawlna a nei bawk a ni.

Rev Pc Laltanpuia hi kum 2020-2021 chhung atan General Missions Department Secretary hna a chelh dawn a, General Headquarters Office-ah a thu ang.

Serchhip Bial Missions Department chuan China a Missionary unaunu Christina Lalremruati hman tur Electric Scooter lei nan Rs 50,000/- January ni 14 khan General Missions Dept Treasurer kutah an hlan bawk.

January ni 15 (Nilaini) zan inkhawmah, Pastor Lalnghinglova chu, Serchhip bialtu Pastor atan Upa T.Sangthanga Bial chairman chuan a lawmlut a, Pastor thar lawmluhna inkhawm hi Hebron Biak inah bial huap a hman a ni.

Khawzawl Vengpui Bial

Ni 14 Thawhlehni khan Khawzawl Vengpui Bial a Lungvar Biak In hmun tur chu Upa K. Lalthantluanga Aizawl Zonuam a mi chuan a thlawnin JCB hmang in a laih sak.

Khawzawl Lungvar hi Rabung lam kawt chhuah a awm, Vengpui atang a 1½ km a hla a awm an ni a, Vengpui kohhranah hian an lawi thin a ni.

Kum 2013 atang khan Biak In hmunram lei tur ngaihtuahin Planning & Financial Board-ah thlenin, kum 2019 khan Biak in hmun tur General in a lei sak a ni.

Khawzawl Vengpui kohhran kumthar committee chuan February ni 19 (Mizoram UPC Day) ah hian Lungvar kohhran chu indang turin ruahmanna a siam bawk.

Biak In hmun tur Upa K. Lalthantluanga'n a thlawna a laih sak hi Khawzawl Vengpui Bialte an lawm hle a ni.

Khawzawl Vengthar Bial

Khawzawl Vengthar Bial Chawngtlai kohhranah Upa Vanlalhnaia te chhungkua chuan Ni 11 Inrinni khan Pathian Chawimawina an nei a, Speaker ah Tk. J.Rinnaliana chu hman a ni.

Champhai lam atangin Naioth Team te chuan he chawimawina hi an telpui bawk.

Bial chhung atangin chawimawina hmang tur hian mi thahnem tak an kal khawm a, kohhran hoten hlimawm takin hun an hmang a ni.

Khawzawl Vengthar Bial a Kohhran hrang hrangte chuan SS Day urhsun takin an hmang a, thingpui ruai buatsaihin Naupang SS lamin hla an rem bawk.

Kohhran thenkhatah Kohhran thurin hmangin intihsiaknate buatsaih a ni a, Pathianni zan thleng SS Day pual hian inkhawmna buatsaih a ni.

Ni 14 Thawhlehni khan Dinthar kohhran a member thenkhatte chu, a tum hnihna atan Upa C.Lalchhandama huanah Kohhrana siamtharna a thlen theih nan riak lut lehin, he rawngbawlna hi Kohhran hoten an hlawkpui hle a ni.

CHALTLANG BIAL

Chaltlang Bialte chuan January ni 12, Pathianni zan khan term hmang zo va Chaltlang Bialtu pastor atanga kal chhuak ta Rev. C. Lalremsanga chu Chaltlang Biak Inah thlahna hun an hmang.

He thlahna inkhawm hi Upa Lalzirliana, Bial Chairman chuan kaihruaiin thlahna thuchah Tk. H. Lalrawngbawla, Bial Treasurer chuan a sawi a, tualchhung tin kohhran hruaitute leh mimal mi engemaw zatin Bialtu pastor kal chhuak tur thlah nan thu an sawi bawk.

Rev. C. Lalramsanga thlahna inkhawmah hian Chaltlang Bial aiawhin Upa Lalrinawma Sailo, Bial Secretary chuan ngaihhruina thilpek a hlan a, Bial Department hrang hrang te, Bial chhunga kohhran tin atangte leh mimal thahnem takin thlahna thilpek an hlan bawk.

Bialtu pastor kal chhuak ta Rev. C. Lalremsanga pawhin thuchah tawi sawiin Chaltlang Biala a awm chhunga an chhungkua leh Chaltlang Bialten malsawmna leh hmasawnna tam tak an dawn avanga a lawm thu te a sawi a ni.

Rev. C. Lalremsanga hi kum 2020-2021 atan General Superintendent-ah ruat ani a, General Headquarters Office-ah a thu anga, Chaltlang kohhranah a lawi chhunzawm ang.

January ni 13, Thawhtanni khan Chaltlang Bialtu Pastor thar, Rev. B. Kapmawia te chhungkua chuan Chaltlang Bial Pastor Quarters an luah lut.

Rev. B. Kapmawia hi Reiek bial atanga transfer niin Chaltlang Bial a lo luh ni hian Bial hruaitute bakah bial chhung mipui thahnem takin an lo hmuak a, Reiek bial atangin mi engemaw zatin an thlah bawk a ni.

Chaltlang Bialtu pastor thar lo luh ni hian Bial Chairman kaihhruaina hnuaiah Bialtu Pastor kalchhuak ta leh Bialtu Pastor thar turte hian charge inhlanna an nei a, tlai lamah pastor thar lawmna zanriah an kilho nghal a ni.

Chaltlang Bialte hian Pastor thar lawmluhna programme hi January ni 15, Nilai zan khan Chaltlang Biak Inah an hmang a, Upa Lalrinawma Sailo, Bial Secretary chuan inkhawm kaihruaiin Upa Lalzirliana, Bial Chairman chuan lawm luhna thuchah a sawi a ni.

Bialtu pastor thar lawm luh zan hian bial mipui thahnemtak inkhawmin Bialtu pastor thar, Rev. B. Kapmawia'n thuchah tawi a sawi a, thlarau lam hla nen hlim taka hun hmangin Inkhawm banah Pastor thar lawmna thingpui ruai tuihnai tak an kilho bawk a ni.

January ni 13, Thawhtanni zan vek khan Ramhlun Sports Complex PYD te chuan kum 2020 PYD inkhawm hmasaber zan an hmang.

He inkhawm hi Upa David Lalpartlana, PYD Adviser chuan kaihruaiin Upa H. Lalhmachhuana, General PYD Executive member chuan fuihna thuchah a sawi a, He hunah hian Zaithiam tak tak te zaiin, inkhawm an thahnem hle a ni.

KOLASIB VENGLAI BIAL

Ni 11 Inrinni khan Unaunu Lalthanzami te chhungkua Kolasib Venglai kohhran a lawi te chuan Pathian hnena lawmthusawina an nei a, he lawmthusawi na ah hian, Rev.Thangliansanga (ATI) Principal chu Speaker ah hmangin thuhril rawngbawlna a nei.

He chawimawina hi Pathianni zan thleng khan hman ani a, kohhran hote an hlimin an khamlo hle a ni.

Ni 12 Pathianni chawhma khan Sunday School day hman ani a, SS Naupang ten item chi hrang hrang hmangin hun an hmang bawk.

Pathianni chawhma inkhawmah hian mithar lawmluhna neih a ni a, Rev.P.Lalrinawma bialtu pastor chuan kohhran dang atangin mithar pakhat Kolasib Venglai Kohhran a lawi turin a lawmlut a ni.

Kolasib Venglai PYD huaihawtin, ni 17 Zirtawpni zan atang khan Kolasib Venglai Biakin ah Revival Crusade neih a ni a, unaupa John Zothansanga chu Speaker ah hman a ni.

THENZAWL BIAL

Thenzawl Vengpui Kohhranah Inrinni Ni 11 khan Unaupa Vanlalchamate chhungkua chuan Chawimawina an nei a, ni 13 ah Unaupa Lalchungnungate chhungkua chuan nei velehin,

Ni 14 Thawhlehni khan Kohhran chhungkua ten thawhkhawm lehin Chawimawina hi neih chhunzawm leh ani.

Chawimawi inkhawmah hian Kohhranin a ruatbik te chuan thuhril rawngbawlna an nei a ni.

Thenzawl Bial a Kohhran hrang hrangte (Vengpui,Kanan,PTS,Tualvungi Vengte) chuan Sunday School Day chu urhsun takin an hmang a, Day thuchah chhiarchhuahna te neiin, Theitui leh chhang semin SS Day an lawm a ni.

HNAHTHIAL BIAL

Hnahthial Bial chhung a Kohhran hrang hrangte chuan Missionary Day chu urhsun takin an hmang a,

Chanmari Kohhrante Bialtu Pastor Rualthanmawia'n hmanpuiin, awmni khamin inkhawmna an nei a, Inkhawm banah Ar sawhchiar an ei bawk a ni.

Chanmari Kohhran te hian zan lamah inkhawmna neih chhunzawmin, Upa Laltlingpuia te in ah zaikhawmna an nei bawk.

Electric Kohhran te chuan Zan lamah Inkhawmna neiin, Missionary day pual hian cheng ₹5000/- General missions Dept hnenah Missionary support-na atan an pe bawk.

Thiltlang kohhrante chuan ni 16 Ningani khan Missioanary Day pulain chawhma lamah inkhawmna an nei bawk a, kohhrante hian tlai lamah ruai an kilho a ni.

Pangzawl kohhranah pawh urhsun tak a hman a ni a, awmnikhamin kohhran hoten inkhawmna an buatsaih a, tlai lamah kalkhawmten sawhchiar an ei ho bawk.

Bawngkawn Bial

Bawngkawn Bial Thuampui veng kohhran chuan ni 15 Nilaini zan atang khan Missionary day pualin inkhawmna an nei a, Bialtu Pastor Rev.PB.Lalhmuliana’n thuhril rawngbawlna a nei.

Ni 16 Ningani khan awnmni khamin Missionary Day pual hian inkhawmna an neih chhunzawm bawk a, tlai lamah ruai an kilho bawk.

Hemi ni hian General Missions Department Chairman Upa.Sawihhliran a hmanpui a, Unaupa Rodingliana, Bawngkawn leh Emanuel Ramngaihawmi te chuan zai a rawngbawlna an nei bawk a ni.

Zan thleng khan inkhawmna neih chhunzawm a ni a, Upa J.Lalramliana chuan thuhril rawngbawlna a nei a,

Unaunu Lalhlimpuii leh unaunu Emanuel Ramngaihawmi te chuan zai a rawngbawlna an nei bawk.