United Pentecostal Church
of Mizoram

Upa Andrew Laldingliana Executive Chairman chu ni 26 Pathianni hian Salem Veng Kohhran, Bethlehem Bial a tlawh dawn a, thuhril rawngbawlna a nei ang.

Rev Hc.Lalthlamuana General Secretary chu ni 24 Zirtawpni hian Sialhawk Kohhran, Khawhai bial tlawhin a kal a, Sialhawk Kohhran Biak In thar a hawng ang.

General Secretary hi Pathianni thleng a cham anga, ni 27 Thawhtanni khian a lo let leh ang.

Rev Gospelthanga General Treasurer chu ni 22 Nilaini khan Jesus Name Pentecostal Church Conference hmanpui turin Enathu, Adoor Kerala panin a zinchhuak a, Rev Saienga Sailo Khawzawl Vengthar Bialtu chuan a tawiawm.

General Treasurer hi January ni 30 ah a lo let leh ang.

UpaSawihlira Chairman, General Missions Dept. chu ni 22 Nilaini khan Bishnupur Field, Manipur tlawhin a zinchhuak bawk.

Rev Pc.Laltanpuia Secretary, General Missions Dept. chu ni 24 Zirtawpni hian Dilkawn Bial inkhawmpui hmanpui turin Buang panin a zinchhuak a, ni 27 Thawhtanni hian a lo let leh ang.

M&PB

Media & Publicity Board meeting vawi 43-na chu January ni 20 Thawhtanni khan Conference Hall, General Headquarters Office-ah neih ani a,

Rev H.Lalrawnkima Chairman kaihhruai meetingah hian, M&PB in hmalakna tur hrang hrang a ruahmante chhawpchhuah a sawiho ani a,

Mizoram UPC hmalakna hrang hrang kohhran mipuite hriat atan a puangdarh tu tur Casual Announcer lak chungchangte, M&PB inkaihhruaina dan leh Social Media chungchanga Handbook buatsaihte chu thurel langsar zualte an ni.

M&PB hian kumtin Casual Announcer tur mi pali a la thin a, kumin 2020 atan hian Advertisement chhuah a mi pali lak turin meeting chuan a rel a, dilna hi February ni 3, 2020 ral hmain Secretary M&PB hnenah dilna plain paper-ah ziakin General Headquarters Office, Tuikhuahtlangah thehluh tur a ni.

Diltu chu zuk leh hmuam a fihlim, thiamna lamah HSSLC leh a chunglam a ni tur a ni a,

Casual Announcer lakna Interview hi February ni 4, 2020 hian Conference Hall, General Headquarters Office-ah neih tur a ruahman a ni bawk.

Mizoram UPC rorelna sang Exectuive Committee in thuneihna a pek angin, M&PB chuan Social Media hman dan chungchanga kohhran mipuite hriat tur a buatsaih a, M&PB inkaihhruaina Dan chuanna nen Handbook ah siamin, mipui hmuh theih atan peihfel thuai an tum bawk.

Media & Publicity Board meeting kumin atan a hmasaber hi, Puipate atangin Rev C.Lalremsanga General Superintendent, Rev Hc.Lalthalmuana General Secretary leh Rev Gospelthanga General Treasurer te chuan an telpui a ni.

GENERAL PYD

Ni 17 (Zirtawpni) zan khan General PYD Executive Board vawi 185-na, kumin atan a hmasa ber chu T.Upa Lalroenga, Vice President, GPYD te in Bungkawnah an thukhawm a, Upa Vanlaldinthara, President, GPYD chuan meeting hi kaihruaiin, Puipate aṭangin Executive Chairman Upa Andrew Laldingliana, General Superintendent Rev.C.Lalremsanga leh General Treasurer Rev.Gospelthanga chuan meeting hi an telpui bawk a ni.

Meeting-ah hian General PYD Treasurer Unaupa F.Lalnuntluanga hnen aṭangin Kum 2019 Financial Report ngaihthlak a ni a, GPYD hnuai a Committee peng hrang hrang, Pentecost Meichher, Social Wing Committee leh Documentation Committee hnen atangin Financial Report ngaihthlak a ni bawk.

Kum 2019 GPYD Inkhawmpuiin "Pentecost ṭhalaite leh intodelhna" tih leh "Mipat hmeichhiatna kawnga thianghlimna" tih thupui hmang a Seminar neih nise a tih chu, GPYD Executive Board vawi 184-na in thupui thlansa buatsaih tur a ruat ten an peih fel tawh a, meeting-ah hian thlirho neih niin, rampum huap a zir atan meeting chuan a pawm a,

Seminar paper hi a ranglam a thawnchhuah nise an ti bawk.

General PYD chuan Paper buatsaih tute chungah lawmthu an sawi a ni.

GPYD in Lawngtlai hmun a Live Crusade a buatsaih turah meeting chuan ṭul leh pawimawh hrang hrangte a ngaihtuah a, Live Crusade neih hun atan April ni 18 (Inrinni) zan aṭanga ni 19 (Pathianni) zan chu ruahmanin, thuhril rawngbawlna neitu turte an ruat nghal bawk.

North Mizoram District

Ni 21 Thawhlehni khan North Mizoram District Committee thutkhawm vawi 74na chu Headquarter Biak Inah neih a ni.

Meeting-ah hian District hruaitu Rev. Pc Parliana, Distict Superintendent leh District Treasurer Upa Jh Chungliana Bazar bial te chu an term a tawp avangin an aiawih thlanna neih a ni a, District hruaitu thar thlanna hi General Superintendent Rev. C. Lalremsanga'n a kaihruai a, General Headquarters Office Staff ațangin Upa RD Rothanzauva, H. Zomuani leh Lalhmangaihzuali ten inthlanna an buaipui bawk.

Tluang tak a inthlanna neih niin,

District Superintendent atan Rev. H. Laltlankhuma, Aibawk bialtu leh

District Treasurer atan Upa Rohmingthanga, Secretary, Bethlehem bialte chu thlan an ni.

In thlanna neih zawh hian District Chairman Upa Lalnienga'n meeting a kaihruai a, District Auditor Sr. Upa T. Dolura term a tawp avangin, kum 2020-2021 chhung atan Upa Lalțanpuia Chawngthu, Treasurer, Bazar Bial chu District Jr. Auditor atan ruat a ni.

North Mizoram District Auditor-te chu

1.Sr. Auditor - Upa R. Lallawmzuala, Secretary, Hqtr bial (2019-2020)

2. Jr. Auditor Upa Lalțanpuia Chawngthu, Treasurer, Bazar Bial, (2020-2021) te an ni.

Meeting chuan District chhunga Tirhkoh te tana Seminar leh Training neih nise a ti a, Seminar Paper buatsaih turin, Rev. H. Lalrawnkima Hqtrs bialtu leh Rev. H. Laltlankhuma, District Superintendent te an ruat bawk.

Kumin 2020 North Mizoram District inkhawmpui chu Reiek bial ah nghah a ni a, Reiek kohhranten an thleng ang.

Haflong Bial

January ni 16-19 chhung khan Muallian kohhranah, Halflong Bial Inkhawmpui neih a ni a, Rev F.Lalnghakliana, Chairman General SS Dept. chuan a telpui.

Inkhawmpui chhung hian Chairman, General SS Dept chuan thuhril rawngbawlna a nei a, Speaker tawiawmtu Mimi Vanlalhriati, Kolasib Diakkawn chuan zai a rawngbawlna a nei bawk.

He inkhawmpuiah hian mi pariat (8) in sual ngaihdamna tui baptisma an chang a, an zinga pahnih hi kohhran dang an ni a, Mizoram UPC ah lawmluh an ni.

Ni 19 Pathianni zanah inkhawmpui hi a tiak a, Rev F.Lalnghakliana hi Tk. Vanlalsawma Zuangtui chuan a tawiawm bawk.

Lungpho Bial

Lungpho Bial PYD chuan Ni 17-19 Pathianni hmang khan Rullam kohhran ah inkhawmpui an hmang.

Ni 17 zanah Bial chhunga kohhran hrang hrang PYD te dinhmun leh hmalak dan report ngaihthlak a ni a, hemi zan hian Bialtu Pastor leh Bial Chairman-te buatsaih Leadership tih thupui zirhona neih a ni.

Inrinni nilengin rorel inkhawm an nei a, zan atangin revival inkhawm Pathianni zan thleng neih chhunzawm a ni bawk.

Lungpho Bial PYD inkhawmpuiah hian Kohhran tin atanga ruat bik ten thuhril rawngbawlna an nei a ni.

Ni 25 Inrinni hian Bialtu Pastor Vanlalruatate chhungkua chuan Pathian chawimawina an nei dawn a, Pastor Rualthanmawia Hnahthial Bialtu chu Speaker-ah hman a ni ang.

SAIRANG BIAL

NI 19 Inrinni khan Sairang bial Nazareth Preaching Station-ah Tirhkoh Liansanglura rawngbawlna kal zelah, mithar pathum chhungkaw khat kohhran dang a mi chu, Mizoram UPC-ah lawmluh an ni a,

Nghalchawm Kohhranah pawh Bialtu pastor C. Lalrosiama’n bial fang in, mithar pakhat Kohhran dangin atangin a lawmlut bawk.

W. Serzawl kohhran LAD te chuan ni 19 Pathianni hmang khan Bial pawn fehchhuahin, Lengpui kohhran an tlawh a, member thahnem tak kalin hlawk takin hun an hmang a ni.

Ni 21 Thawhlehni zan khan Sairang Bial PYD hnuai a Silver Jubilee Sub. Committee te chuan Dintharah meeting an nei a,

T. Upa H. Laltanpuia, Chairman, Silver Jubilee Sub.Committee chuan meeting hi a kaihruai a, Souvenir Bu kal hmang tur OB Meeting in a duan tawh chu thlirho na an nei a, siamrem ngaite siam thain, meeting chuan Souvenir pual hian Book Mark leh Pen siam ni se an ti a ni.

Silver Jubilee pual hian Sum tuak hnatlang neih an tum bawk.

Ni 22 Nilaini zan khan Bial LAD hruaitute chuan Bial fan Program neiim W. Serzawl kohhran an tlawh a, Bial hruaitute an kal kim hle.

W.Serzawl kohhran te nen hun hlimawm tak an hmang a ni.

Sairang Bial LAD hruaitute hian Inrinni ni 25 zan hian Sairang kohhran an tlawh bawk ang.

T. Upa Hk Lalrinkima, Chhinga veng te chuan, an pa K. Zathanga hriatreng nan Sihhmui Kohhranah Sound system thatak an pe a, kohhrante an lawm hle a ni.

SIAHA BIAL

New Siaha kohhranah chuan Krismas leh kumthar hlimna a la kal zel a, Pathian Chawimawina neih chhunzawm zel a ni a,

Ni 18 Inrinni khan unaupa F.Lalduhsakate chhungkua chuan Chawimawina neiin Tk.Lalnunthara, Thuampui Aizawl chuan thuhril rawnbawlna a nei a, Thingfal atanga Bialtu Pastor thar thlahtute mi engemawzat la chamin, Pathian chawimawina hi an telpui a ni.

Chawimawina atang hian thalrau Baptisma chang thar mi engemawzat an awm a,

Unaunu Pardawngite chhungkua chu chawimawina nei turin an inbuatsaih mek bawk a ni.

New Siaha East II kohhranah Ni 15 Nilaini zan khan mithar pahnih, Pastor.F.Lalthakima'n Mizoram UPC-ah a lawmlut a, New Siaha East II hi Preaching point atan a hawn thar a ni a, Siaha Bial Kohhran hoten rawngbawlna beihpui an thlak mek a ni.

Siaha Bial chhunga Kohhran hrnag hrnagte chuan Missionary Day ni 16 chu urhsun takin an hmang a, awmni kham a a lawmna hunt e hmangin, zan lam chauh a hmangte pawh an awm bawk.

VAIRENGTE BIAL

Vairengte Bial Missions Dept inkhawmpui tluang tak a hman zawh a ni.

January Ni 17-19 chhung khan Vairengte Bial Missions Dept Inkhawmpui chu Vairengte Headquarters Kohhran Biak In ah hman a ni a, he Inkhawmpui ah hian Kohhran hrang hrang atang a ruat bik Upa leh Bialtu Pastor ten thuhril rawngbawlna an nei a ni.

Inrinni ah rorel inkhawm neih a ni a,

Kum 2021 Inkhawmpui Headquarters Kohhran in an thleng leh dawn a, March Pathianni vawihnihna-ah an hmang dawn a ni.

Inkhawmpui apiang a kut thiamthil ken khawmte, kum 2020 chhung a Kawngthar Kohhran Biak In a Revival neihte chu rorel langsar zualte an ni a,

Bial Missions Dept rorelna chuan Pastor Quarters Budget ah Rs 5000/- dah nise an ti bawk.

Ni 20 (Thawhtanni) khan Unaupa Pachhungate chhungkua chuan Pathian hnen a lawmthu sawina Vairengte Headquarters Kohhran Biak In ah an nei a, Bialtu Pastor Rev HC Jacoba’n thuhril rawngbawlna neiin, zan thleng inkhawmna hun an nei a ni.

LUNGLEI 'S' BIAL

January ni 7 (Thawhlehni) khan Lunglei ‘S’ Bial, Pastor Quarters ah Bial LAD Board chuan meeting an nei a, Bialtu Pastor leh Bial Chairman te chuan an telpui.

Meeting hi unaunu K.Lalthanpuii, Bial LAD President chuan kaihruaiin, an thurel langsar zual zingah, February ni 14-16 chhung a, Bial LAD Inkhawmpui Electric VengKohhran a neih tur chungchangte leh inkhawmpui kaihhnawih pawimawh tak tak a tel a ni.

Board chuan Bial LAD inkhawmpuiah, Rev.Dr.Ngurthanpara Sailo, Area Secretary-Southern Zone chu Speaker-ah sawm nise an ti a, heng bakah hian Buhfaiṭham target meeting-ah hian an sem bawk a ni.

January ni 10 (Zirtawpni) zan khan T.Upa PC Lalawmpuiate In, Ramthar Vengah Lunglei ‘S’ Bial Missions Department Board an thukhawm a,

Tk.K.Lalfala, Bial Missions Department Vice Chairman kaihruai thutkhawmah hian, General Missions Department target an neihte Bial chhunga Kohhran hrang hrangah an sem a, Bial Missions Department Inkhawmpui lo awm tur thlirlawkna an nei bawk.

Ni 14 (Thawhlehni) zan khan T.Upa Ngaihlaithangpuiate In, SalemVengah Bial PYD Board an thukhawm bawk a, Bial Chairman leh General PYD Assistant Secretary ten an telpui a ni.

He Board meeting hi UpaJ.Lalzekima, Bial PYD President chuan kaihruaiin, March ni 27-29 chhung a Chanmari Kohhran a Bial PYD Inkhawmpui an hman tur chungchangte an ngaihtuah a, heng bakah hian March ni 4 (Nilaini) PYD Day hman dan turte an ruahman nghal a ni.

January ni 16 (Ningani) Missionary Day chu Lunglei 'S' Bial chhungah urhsun tak a hman a ni a,

Electric veng Kohhran te chuan zan lamah Inkhawmna neiin, Missions Department hruaituten Thuhril rawngbawlna an nei a ni.

Lunglawn Kohhranah pawh zan lamah Inkhawmna neih a ni a, Tk.K.Lalfala, Bial Missions Department Vice Chairman chuan thuhrilrawngbawlna neiin, Inkhawm banah thingpui leh Sawhchiar an kilho bawk.

Farm Veng Kohhrante pawhin zanlamah hun hmangin UpaH.Lalhmingthanga, Bial Missions Department Assistant Secretary chuan thuhrilrawngbawlna a nei a, Missionary day thuchah chhiarchhuahna neiin, inkhawm banah thingpui ruai an kil a ni.

Ramthar Veng Kohhrante chuan January ni 15 (Nilaini) zan aṭang khan Missioanry Day pual hian inkhawmna an buatsaih a, Upa PC Khawlkunga, UpaJ.Remsiama leh Upa LH Sawichhunga te chuan thuhril rawngbawlna an nei a, Missionary Day ni hian chawhma Inkhawmah Day thuchah chhiar chhuahn a nei bawk.

Ramthar Veng kohhran te hian ran talhin Ruai an buatsaih a ni.

CHALTLANG BIAL

January ni 20, Thawhtan zan khan Chaltlang Bial a Chanmari West PYD te chuan Inkhawm tam zan an hmang.

He inkhawm hi RD Lalremtluanga, PYD President chuan kaihruaiin, Upa K. Zothansanga, PYD Adviser-in thuhrilrawngbawlna a nei a ni.

Chanmari West PYD ah hian Member 83 awm mekin, Inkhawm tam zanah hian mi 45 lai an inkhawm thei a ni.

PYD inkhawm tam zanah hian Sr. Upa R. Lalthlamuana'n telpuiin, PYD inkhawm zawng zawngte hnenah thilpek hlan a ni bawk.

Inkhawm banah thingpui ruai kalkhawmten an kilho a ni.

January ni 21, Thawhlehni zan khan kum 2020 ChaltlangBial PYD Board meeting hmasaber chu Pastor Quarters-ah neih a ni.

He meeting hi T. Upa Eddie Hnehzova, Bial PYD President chuan kaihruaiin, kum 2020 Bial PYD inkhawmpui January ni 31 atanga February ni 2 chhunga Edenthar Biak In a hman tur chungchangah, ṭul leh pawimawh hrang hrangte rel a ni a, kum 2020 atana Bial PYD inkaihhruaina dan te an thlir ho bakah, hmachhawp hrang hrang an neihte, hmalak dan tur an sawiho bawk.

Meeting hi Bialtu Pastor Rev. B. Kapmawia leh Upa H. Lalhmachhuana Gen PYD EBM te chuan an telpui a ni.

January ni 16 Missionary Day chu Chaltlang kohhrante chuan zan lamah inkhawmna neiin urhsun takin an hmang a, Rev. B. Kapmawia, Bialtu pastor chuan thuhril rawngbawlna a nei a, inkhawm banah Day pualin thingpui ruai an kilho a ni.

Missionary Day ah hian Ramhlun Sports Complex kohhrante pawhin zan lamah inkhawmna Biak Inah an nei a, Unaupa Lalduhsaka Hnamte, Vice Chairman, Missions Department chuan Missions lam hawi thuhrilh rawngbawlna a nei a ni.

JIRI BIAL

Jiri Bial Missions Department inkhawmpui vawi-22 na tluang tak a hman a ni.

He inkhawmpui hi Bial Headquarters Phaitol hmunah neih a ni a, mikhual engenawzat rial lutin, Pathian thlarau awmpuina hnuaiah hlim takin hun an hmang.

Inkhawmpui chhung hian Bialtu Pastor K.Rohminhthanga, Bial Chairman Upa Jangkholet leh Tirhkoh ruat ten thuhril rawngbawlna an nei a ni.

Inkhawmpui chhung hian

General budget leh bial budget, Missions Bawm a pe thate hnenah lawmman sem a ni bawk.

Jiri Bial Missions Dept rorelna chuan General budget leh bial budget te khum ngei nise an ti a, Pastor Quarters budget te siamin, Bial chhunga kohhran la din lohna khuaah, kohhran din tur a beihpui thlak nise an ti bawk.

Kum 2021 Bial Missions Dept. Inkhawmpui chu Phaitol hmunah bawk nghah leh a ni.

KOLASIB VENGLAI BIAL

Kolasib Venglai Bial Committee chuan March ni 13-15 chhung a Kolasib Venglai Bialin Tumpui Kohhran a Bial inkhawmpui an neih turah hetiang hian ruahmanna a siam a, inkhawmpui chhung hian Rev P.Lalrinawma Bialtu Pastor chuan thuhril rawngbawlna a nei a nga, Upa Lalhmingthanga Bial Missions Chairman chuan inkhawmpui hlanna a nei bawk ang.

Meeting chuan ATI lut thar tur mipakhat leh 3rd year chhunzawm tur mipakhat te chu recommend nise an ti bawk.

Bial committee in ruahmanna a siam angin Ni 20 (Thawhtanni) khan Pastor Quarters ah kum 2019 chhung a Kohhran Sum neihte Audit a ni a, harsatna awmlovin tluang takin an zo fel thei a ni.

Kolasib Venglai Bial chhunga Saihapui 'K' Kohhran Biakin sak mek chu chak tak a chhunzawm zel a ni a, Planning & Financial Board atanga sum an hmuh hmang a sak niin, peihfel thawkhat a ni a, Bialtu Pastor leh Bial hruaituten tul leh pawimawhte ngaihtuahin, Bial chhunga mi tlawmngaite sum thawhkhawm hmangin chhunzawm mek zel a ni.

Tumpui kohhran committee chuan kum 2020 chhung a Building leh Christmas committee hruaitu turte an ruat thar a, Biakin an sak mek chu chak tak a chhunzawm an tum bawk.

Kohhranten Pathian malsawmna nasa tak an dawn avangin Tumpui Kohhran chuan Pathian hnen a Lawmthu sawina neih an tum bawk a, chumi atan chuan chhungkaw tinah mahni neih ang tawk theuh sum thawhkhawm turin ruahmanna an siam a ni.

BETHLEHEM BIAL

Ni 18 Inrinni khan, Upa R Vanlalruatate chhungkua chuan Bethlehem Kohhranah Pathian hnen a Lawmthu sawina an nei a, Bialtu Pastorin Inkhawm a kaihruai a, Rev, Hc. Lalthlamuana, General Secretary chuan thuhril rawngbawlna Pathianni zan thleng khan a nei a ni.

Pathian Chawimawina kal zelah

Bethlehem Kohhran ah hian hlimna nasa tak thlengin, chawimawina puan chhunzawm a ni a, Upa Biakngura Chhangte te chhungkua chuan ni 25 Inrinni hian Pathian Chawimawina an neih chhunzawm dawn a, Pastor Lalhmunngheta Dinthar Bialtu chu Speaker-ah hman a ni ang.