M&PB meeting hi Puipate Rev C.Lalremsanga General Superintendent leh Rev Hc Lalthlamuana, General Secretary te chuan an telpui a ni.
Staff Meeting
Mzizoram UPC kohhran hnuai a Office Staff-ten kum 2020 chhung a a vawikhat nan February ni 6 Ningani chhun dar 12 khan meeting an nei.
He meeting hi Conference Hall, General Headquarters Office-ah neih a ni a, General Headquarters a Office Staff bakah, Bethani Childrens Home a thawktute nen mi 41 meeting-ah hian an tel a ni.
Rev C.Lalremsanga, General Superintendent chuan meeting hi a kaihruai a, SAM number 15-na chhiarin, Thawktute thawhhonaah, mimal tinin tih tur kan nei a, rinawmna nen taima tak a awmin Kohhran mite rawih kan nihna hrereng a, lawm chung a hna thawk tur kan ni, a ti.
Meeting-ah hian thawktute atangin harsatna an neih hrang hrangte leh hmasawn an ngaihna laite sawichhuah na hun hawn a ni a, thawktute thawhhona tha lehzual neih dan tur leh hnathawhna kawng a kalphung fel fai zawk neih a tul thute chu kalkhawmte tarlan tlangpui a ni.
ATI
Kum 2020 ATI Registration Day chu February ni 3 Thawhtanni khan Apostolic Theological Institute, Durtlangah hman a ni.
Rev.Thangliansanga Principal ATI chuan inkhawm a hruai a, Registration Day an ngaihpawimawh thu sawiin, Pucntuality khauh tak a kenkawh thin a ni, a ti.
Registration Day inkhawmah hian Rev HT Lalengmawia, Lecturer chuan Hunserh hmangin, Rev Zoramthara Dean kaihhruaina hnuaiah Zirtirtute leh Zirlai lut tharte inhmelhriattirna neih a ni a.
Mizoram UPC puipa atangin Rev C.Lalremsanga General Superintendent chuan thu sawiin, Mizoram UPC Bible zirna a lutte hi kan nun uluk lehzual a pawimawh a, he kohhran hmel timawi a tibal theitu kan ni tih kan inhriat reng a, fimkhur tak a awm a, thuawihna nun neih a pawimawh zia Zirlaite hmaah a sawi ani.
ATI zirtirtute atangin Rev C.Liansanga leh Rev Vanlalsipaia ten thusawina hun an nei bawk.
Registration Day chu harsatna awmlovin Thawhtanni khan tluang tak a neih zawh a ni.
Tripura District
January ni 30 Ningani a Tripura District committee thukhawm chuan District huap a programme buatsaih turte an ruahman a,
Tripura District chhung a Naupang Sunday School Dept. pualin, Darchawi Bialah Meet an buatsaih dawn a, heng bakah hian
District chhung a Upa leh Tual Upa te pualin Khumlung Kohhranah seminar neih an tum bawk.
Tripura District committee chuan District huap joint revival neih a rel bawk a ni.
Tripura State chhung a Mizoram UPC ti a kohhran hming hman chu, remchan zawkna avang a District inkhawmpuiin, Tripura Sorkar-ah United Pentecostal church of Tripura tih hmang a Registration dil nise a tih chu, District hruaituten chak takin an bawhzui mek bawk a ni.
Khawbung bial
January ni 27 Thawhtanni khan Pastor Andrew Lalhruaizela Khawbung Bialtu chuan Bial chhung fangin Thekpui kohhran a tlawh a, ni 28 ah Saikhumphai kohhran ah hun hmangin, ni 29 Nilaini khan Vaphai kohhran a tlawh a, Nau hlan rawngbawlna a nei a ni.
Unaupa Zakapvunga China a awm mek chuan Vaphai PYD te hnenah sum thanemtak a hlan bawk.
Kawnpui Bial
Kawnpui Bial LAD inkhawmpui chu tluang takin Khamrang kohhran biak In ah hman zawh a ni a, Inkhawmpui rorel langzar zual zingah,
Kum 2021 Bial LAD inkhawmpui Bualpui N kohhran a nghahte,
Bial chhung a buhtham, no 2500 chin thamte hnen a lawmman pekte,
LAD day March ni 12 bial huap a hmante, Pastor Quarters a phah tur Carpet leite chu rorel langsar zualte an ni a, heng bakah hian Kum 2020 chhunga Bial huap a seminar cum revival neihte an rel a ni.
Kawnpui BIal LAD inkhawmpui chuan, Kum puan thupui ‘Thianghlimna’ tih chu bial chhung kohhran ah zirho thin nise a ti bawk.
Kum 2020 Kawnpui Bial LAD budget atan, cheng nuaikhat singriat sawnthum pakhat (Rs 1,80,031/-) inkhawmpui chuan a pawm a ni.
Bairabi Bial
Bairabi bial LAD inkhawmpui vawi 24-na chu tluang takin Meidum Kohhranah hman zawh a ni.
He inkhawmpui hi January ni 31 Zirtawpni zan atangin revival inkhawm a bul tan a ni a, February ni 1, Inrinni khan rorel inkhawm an nei a,
Kum 2021 bial LAD inkhawmpui Bairabi Kohhran a hmante,
Kum 2020 chhung a Pastor Quarters budget atan cheng Rs 30,000/- dahte,
ATI ah chawhmeh pek nise tihte chu rorel langzar zualte an ni a,
Bairabi Bial LAD inkhawmpui chuan
Missionary support-na atan budget siamin, cheng 6000/- an dah bawk.
Bairabi Bial LAD inkhawmpui chuan kum 2020 Budget atan cheng nuaikhat singhnih sangnga zaruk (Rs.1,25,600/-) a pawm bawk a ni.
KHAWHAI BIAL
Khawhai Bial Lungtan Kohhranah February ni 2 Pathianni khan member thar lawmluh an ni.
Lawmluhte hi chhungkaw khat member pali awmna a ni a, chhungkaw pa ber hi unaupa Lalchhanhima a ni.
Khawhai Bial enkawl mektu Tk. Lalvensanga chuan lawmluh tak nupa te hi Baptisma a chantir a, an fate pahnih pawh Pathian hnenah a hlan nghal a ni.
SIAHA BIAL
February Ni 1 Inrinni khan Unaunu Pardawngi te chhungkua New Siaha chuan Pathian hnenah lawmthu sawina an nei a,
He inkhawm hi Pastor F.Lalthakima’n a kaihruai a, Tk. Lalnunthara Thuampui chuan thuhril rawngbawlna a nei a ni.
Lawmthu sawina inkhawm hian ni 2 Pathianni zan thleng a awh a ni.
February Ni 3 Thawhtanni khan New Siaha Biak In ah Siaha District Hruaitu thlanna neih a ni a, Rev.Dr Ngurthanpara Sailo, Area Secretary Southern Zone chuan a hmanpui.
District Superintendent atan Pastor C.Lalhmingsanga Niawhtlang Bial
District Treasurer atan Pastor F.Lalthakima, Siaha Bial
te chu thlan an ni a,
Executive Committee Member atan Upa B.Duhkima Cheural Bial chu thlan a ni.
Hruaitu thar inthlanna ah hian Siaha District Crusader Committee Treasurer atan Upa HC.Lalhmingsanga, Niawhtlang Bial chu ruat a ni bawk.
New Siaha Kohhranah ni 3 Thawhtanni zan khan inkhawm buatsaih chhunzawm a ni a, Rev.Dr Ngurthanpara Sailo chuan thuhril rawngbawlna a nei a ni.
Area Secretary hi Pastor Lalhmingchhuanga, Lunglei District. Supt. Lungsen bialtu leh Pastor Zionramngaia Lunglei North Bialtu te chuan an tawiawm bawk.
RABUNG BIAL
Rabung Bial PYD Inkhawmpui vawi 26-na chu January ni 31 aṭanga February ni 2 chhung khan Rabung Mizoram UPC Biak Inah tluang tak a hman a ni.
Bial PYD Inkhawmpuiah hian Rev. Saienga Sailo chu Speaker-ah hman a ni a, Pathian thuchah tha tak tak ngaihthlak thin a ni.
Inkhawmpui tan zan hian Bialtu Pastor K.Zoramchhanthanga'n Palai lawmna hun a hmang a, Kohhran hrang hrang aṭangin PYD report ngaihthlak a ni bawk.
Ni 1 Inrinni khan rorel inkhawm neih a ni a,
Kum 2021 Bial PYD inkhawmpui Aiduzawl kohhran a hmante,
PYD Day March ni 4 Bial huap a hmante,
kum 2020 chhung a Missionary Support-na atan Rs.2000 dah leh
Kum 2020 chhung a Bial PYD Revival hmante chu rorel langsar zualte an ni a,
Rabung Bial PYD inkhawmpui rorelna chuan Pastor Quarters ah Dawhkan dah nise an ti bawk.
Pathianni chawhnu inkhawmah Bial PYD buatsaih Bible ralchhan lawmman sem a ni a, unaupa Zairemthanga chu chhang tha ber a thlan a ni a, unaute Lallawmtluanga leh Lalrinfela te chu pahnihna leh pathumna an ni bawk.
Rabung Bialah hian PYD Member 204 an awm mek a, Kohhran pathum - Rabung, Aiduzawl leh Pamchung ah te PYD a ding mek a ni.
Lawngtlai Bial
Lawngtlai Bial Missions Department inkhawmpui vawi 14-na tluang tak a hman zawh a ni.
Inkhawmpui hi January ni 31 Zirtawpni atanga khan neih tan a ni a, Upa K.Lalrozika, Bial Missions Chairman chuan kaihruaiin,
Upa Lalnuntluanga (Vice Chairman, Bial Missions Dept), Upa.K.Lalrozika (Chairman, Bial Missions Dept), Rev.R.Laldawngliana (Bialtu Pastor), Upa.S.Sangduna (District Chairman) leh Upa Lalengzauva (Bial Chairman) te chuan inkhawmpui chhung hian thuhril rawngbawlna an nei a ni.
Inrinni ah rorel inkhawm an nei a, thurel langsar zual zingah,
Kum 2021 Bial Missions Dept. Inkhawmpui Lawngtlai Vengpui Kohhran Biak In-a hmante,
Home Missionary, Lawngtlai bial atanga rawngbawl a chhuakte leh Foreign Missionary -China leh Cambodia-a awmte Christmas thilpek hlan nise tihte a tel a,
Mizoram UPC Kohhran hnuai a Missionary-te pualin awmnikhama tawngtaina neihte,
Paithar tlangdung a khaw hrang hrang vil turin Tirhkoh rawih nise tihte leh
Lawngtlai khawpui chhungah thuthlung puanna mual inkhawm neihte chu inkhawmpui rorelna chuan a passed a,
Kum 2020-2021-chhunga Lawngtlai Bial Missions Department Budget atan cheng nuaikhat singli sangkua zanga (Rs. 1,49,500/-) ruahman ani bawk.
Lawngtlai Bial Missions Department inkhawmpui chu February ni 2 Pathianni zan khan a tiak a ni.
Serchhip Bial
Serchhip Bial Missions Department inkhawmpui vawi 17-na chu January ni 31 – February ni 2 chhung khan hman a ni a, Unaunu Christina Vanlalremruati, China Missionary chuan a hmanpui.
Inkhawmpui hi Upa K.Saitluanga, Chairman Bial missions Dept. chuan a kaihruai a, Pastor Lalnghinglova'n inkhawmpui Pathian hnen a hlanna a nei bawk.
Bial chhung atang a rawngbawltu ruat bikten inkhawmpuiah hian thuhril rawngbawlna an nei a ni.
February ni 1 (Inrinni) khan rorel inkhawm neih a ni a,
Foreign missions board leh General Missions board-a thlen tur Agenda engemaw zat an pass a ni.
Kum 2020 chhung hian Serchhip Bial-in Missions field-ah Biak In sak ni se an ti a, hemi atan hian budget cheng Nuaikhat leh Singnga (Rs. 150,000) inkhawmpui rorelna chuan a ruahman bawk.
Khawzawl Vengpui
Khawzawl Vengpui Bial Missions Department pawhin Tualpui kohhranah inkhawmpui tluang takin an nei.
He inkhawmpui hi January ni 31 Zirtawpni atang khan neih tan ani a, thupui thlan bik ‘Chanchintha hril tura koh’ tih hmangin hun neitute
Upa Lalmâra (Hmuncheng), T.Upa Lalherliana Vengpui,
Pastor J.Zothansanga Bialtu, T.Upa Lalrinawma Arro,
Upa Ramtharnghaka te chuan thuhril rawngbawlna a n nei a ni.
February ni 1 Inrinni khan rorel inkhawm neih a ni a,
Kum 2021 inkhawmpui Arro kohhran a hmante,
Bial hming a Kawlkulhah rawngbawltu rawih chhunzawmte,
Thlarau bote pual a chawnghei tawngtai vawi 3 neihte,
Lungvar khuaah Crusade neihte chu inkhawmpui rorel langsar zualte an ni a,
General Missions Dept. Board a thlen tur Agenda an passed bakah
Kum 2020 Khawzawl Vengpui Bial Missions Department budget atan ₹ 85,250 an ruahman bawk.
He inkhawmpui hi Ni 2 Pathianni zan khan a tiak a ni.
REIEK BIAL
Reiek Bial PYD Inkhawmpui vawi 25-na leh Silver Jubilee lawmna chu January ni 31 aṭanga February ni 2 Pathianni hmang khan Chungtlang kohhranah neih a ni.
Zirtawpni khan rorel inkhawm an nei a,
Kum 2021 Bial PYD Inkhawmpui Reiek kohhranah nghah a ni.
Pentecost Meichher sponsor zat tihpunte,
Bethani Children's Home-a tanpuina thilpek hlante,
Silver Jubilee pual a Rulpuihlim Sub-Centre a ṭhutthleng dahte leh
Kum 2020 chhung a Joba lehkhabu hmang a Bible Ralchhan neihte chu rorel langsar zualte an ni.
Zirtawp zan khan Silver Jubilee lawmna Variety programme hman a ni a,
Inrinni zingkarah Silver Jubilee pual vek hian Reiek Bial PYD te chuan Chungtlang khawchhung thenfai hnatlang an neih chhunzawm bawk.
Inrinni nilengin Silver Jubilee lawmna inkhawm neih a ni a, Tlaiah a lawmna ruai an kilho a ni.
He inkhawmpuiah hian T. Upa Dr. Zonunmawia, Secretary, General PYD chu speaker-ah hman a ni a, Unaupa Joseph Lalrelkima'n a ṭawiawm a ni.
Reiek BIal PYD inkhawmpui leh Silver Jubilee lawmna hi Rev. Zoramthara, Dean, ATI chuan a hmanpui bawk a,
Inkhawmpui chhung hian Unaupa H. Lalnunthara leh Unaunu Pc. Lalbiakdiki, Reiek te chuan zai rawngbawlna an nei bawk.
Reiek Bial PYD inkhawmpui chu Pathianni zan khan a tiak a ni.
February ni 1 (Inrinni), khan Reiek Bial LAD Board-te an thukhawm a, Bial LAD inkhawmpui leh Silver Jubilee lawm dan turte sawiho a ni.
Reiek Bial LAD chuan Inkhawmpui leh Silver Jubilee lawmna chu February ni 22-23 chhung hian Rulpuihlim kohhranah an nei dawn a, Tk. Michael Lalramchhana chu Speaker a ni ang.
Karbi Anglong Field
Karbi Anglong Bial Manja-ah ni 2 Pathianni khan Field Pastor thar lawmluhna neih a ni a, he mi ni vek hian Gangjang kohhran hruaitute chuan Pastor lawmluhna an nei bawk.
Gangjang LAD te chuan Pastor Quarters a hman tur Mattress an dah bawk a ni.
Pathianni zan khan Manja kohhranah member thar chhungkaw khat member pali (4) awmna chu Field Pastor, Nelson chuan Mizoram UPC-ah a lawmlut bawk.
NIAWHTLANG BIAL
January ni 31- February ni 2 Pathianni hmang khan Niawhtlang Bial LAD & PYD te chuan Inkhawmpui a rualin an nei.
He inkhawmpui ah hian mikhual riak lut an thanem hle a, Rev Dr Ngurthanpara sailo Area Secretary, Southern Zone chu Speaker-ah hmangin, thuhril rawngbawlna a nei a,
Sual ngaihdamna Baptisma Mi paruk in an chang bawk.
Speaker hi Pastor Lalhmingchhuanga (Lunglei District Superintendent) Pastor Zion Ramngaia Lunglei N bialtute chuan an tawiawm a ni.
Bial LAD inkhawmpui rorelna chuan,
Kum 2021 inkhawmpui Niawhtlang 3-ah a nghat a,
Bial huap a LAD Day March 4 Niawhtlang kohhran a hmante a rel bawk.
Niawhtlang BIal LAD & PYD inkhawmpui hi Pathianni zan khan a tiak a ni.
February ni 8 Inrinni hian Niawhtlang Bial a Rawngbawltute tan Intuaitharna Seminar neih a ni dawn a, Resource person Pastor C.Lalhmingsanga a ni ang.
Headquarters Bial
Headquarters Bial PYD Inkhawmpui vawi 53-na chu Bungkawn kohhranah January Ni 31 - February ni 2 Pathianni hmang khan tluang tak a neih a ni.
Inkhawmpui hi General Secretary Rev Hc Lalthlamuana, General Treasurer Rev Gospelthanga Pulamte leh Rev C.Ramsangvawra, Secretary General SS Dept. te chuan an hmanpui.
Inkhawmpuiah chhung hian Bialtu Pastor Rev. H. Lalrawnkima chu Speaker-ah hman a ni a,
Thalaite hriattur pawimawh tak tak, Mizoram UPC danglamna leh a lo pian chhuah dante Speaker hnen atang hian ngaihthlak thin a ni.
February Ni 1 Inrinni khan rorel inkhawm neih a ni a,
Kum 2021 bial PYD Inkhawmpui Headquarters kohhran a hmante,
Pyd day March ni 4 bial huap a hmante leh bial huap a Thenzawl bial tlawh a fehchhuahte chu rorel langsar zualte an ni.
Kum 2020 Headquarters Bial PYD inkhawmpui rorelna chuan, Missionary support neih nise a ti bawk.
Inkhawmpui hi Pathianni zan khan a tiak a ni.
RUANTLANG BIAL
Ruantlang Kohhran chuan January Ni 29 zan aṭang a February Ni 2 Pathianni zan thleng khan Crusade an nei a, Pastor Lalhmachhuana chu Speaker-ah hman a ni.
Crusade chhung hian Unaupa C. Biakhlirate chhungkua chuan February ni 1 Inrinni khan Pathian chawimawina atan vawk inches 50 a lian pahnih chu kohhranah an pe a,
thlarau boruak hlim tak hnuaiah kohhran hoten hun an hmang ani.
Crusade atang hian mithar pakhat kohhran dang atangin Mizoram UPC-ah lawmluh a ni a, sual ngaihdamna tui baptisma chantir nghal a ni.
February Ni 3 Thawhtanni zingah, Ruantlang Kohhran Committee chuan Isua hming a inkutsuihlote pualin inneih that runpui a buatsaih a,
hemi ni hian Pastor Lalhmachhuanan nupa tuak 9-te a inneih that tir a ni.
February Ni 1 ni vek hian Zokhawthar Kohhranah Unaupa Lalrochhara te chhungkua chuan Pathian chawimawina an nei a, Pastor Lalhmunsiaman rawngbawlna a nei a, kohhran hoten hlim takin hun an hmang a ni.
Keifang Bial
Keifang Bialah February ni 5 (Nilainizan) khan kohhran dang atangin mithar paruk Mizoram UPC-ah lawmluh an ni a, lawmluhte hi chhungkaw khat a mi vek niin, chhungkaw pa ber hi Unaupa Jonathan Pulamte a ni a,
Heng mitharte hi, Bialtu Pastor C. Lalramnghakan Mizoram UPC-ah a lawmlut a ni.
BETHLEHEM BIAL
Bethlehem Bial PYD inkhawmpui vawi 26-na chu February ni 2 Pathianni hmang khan Zoar Kohhran Biak In-ah neih a ni.
He inkhawmpui hi January ni 31 Zirtawp zanah tan a ni a, Upa Lalrinchhana, President Bial PYD kaihhruaina hnuaiah neih a ni.
Inkhawmpui chhung hian thlarau Baptisma chang thar mi engemawzat awmin, bial chhung thalaiten harhna an chang nasa hle a ni.
Bethlehem Bial PYD inkhawmpui rorelna chuan
Kum 2020 chhung hian Bial huap a PYD Meet buatsaih a rel a, ruahmanna kalpui mek a ni.
PYD Day March ni 4 chu Bial PYD ten Luanchhuah nan hman nise a ti a, Vantlang tan a thil tha tih ni atan hman an tum ani.
Bial chhunga kohhran ding thar Mualpui Preaching Point ah kum 2020 chhung a Bial PYD hmingin a luanchhuahna neihte inkhawmpui chuan a rel bawk.
Bethlehem Bial PYD inkhawmpui chuan Kum 2020 Budget atan cheng nuaikhat singruk sangthum sawmli (Rs 163,040/-) an pawm bawk.
Inkhawmpui tan zan hian Zai leh Quiz hmangin PYD ten intihsiakna an nei a,
Inrinni zan atanga Pathianni zan thleng khan solo, tantu leh thuhriltu ruatte chuan rawngbawlna an nei bawk.
Bethlehem Bial PYD inkhawmpui chu ni 2 Pathianni zan khan a tiak a ni.
February Ni 5 Nilaini zan khan Financial Board Chairman Upa J Lalramliana chuan Bethlehem Bial a Salem Veng Kohhran Biak In sak mek a hmunah enin kohhran hote a tlawh a,
Thusawina neiin, Mizoram UPC hmalakna hrang hrang report a pe a ni.
Chairman chuan Salem Veng Kohhranin Biak In sa chung a, Sawmapakat Budget an neih cheng nuaihnih dawn a an khum thei chu lawmawm a tih thu a sawi bawk.
Mualpui Preaching Point te pawhin General lam atanga tanpuina an hmuh hmangin Biak In hmun an lei a, tunah hian inkhawmna an peih fel tawh a ni.
Mualpui ah hian kum 2018 kalta atang khan Bialtu Pastor Rev PC Parlianan rammut rawngbawlna neiin, Tk A Lalhmingsanga’n a chhunzawm a, mi 28 chauh a bul tanin,
Tun dinhmunah hian member 70 an lawi mek a ni.
Thenzawl Bial
Thenzawl Bial PYD inkhawmpui vawi 7-na chu January Ni 31 – February ni 2 Pathianni hmang khan Vengpui Kohhranah tluang tak a neih zawh a ni.
Inkhawmpui hi Zirtawp zan aṭanga ṭanin, Bialtu Pastor leh ruat bik rawngbawltu ten thuhrilna an nei a, Inrinniah Rorel Inkhawm neih a ni bawk.
Kum 2021 Bial PYD Inkhawmpui Kanan Kohhran a hmante,
Bial huap a Revival leh Seminar neihte,
Zirlai tiṭha Chawimawina/ Lawmpuina pekte leh
ATI a luanchhuan te chu Thenzawl Bial PYD inkhawmpui rorel langsar zualte an ni.
Inrinni zan atang a Pathianni zan thleng revival inkhawm neih a ni a, Thenzawl Bial PYD inkhawmpui chu Pathianni zan khan a tiak a ni.
KAWRTHAH BIAL
Kawrthah bial L.A.D inkhawmpui vawi 25–Na chu January ni 24–26 chhung khan Kawrthah Biak in ah hman a ni.
He inkhawmpuiah hian Unaunu Lalthazuali, Chawlhhmun chu Speaker-ah hman a ni a,
Aizawl atangin mi 4 in an tawiawm.
Ni 25 (Inrinni) khan Biak in ah rorel inkhawm an nei bawk.
Kawrthah Bial LAD Inkhawmpui neih chhung hian Unaunu Esther Lalthuthlungi Ramhlun Vengthar leh Unaupa Vanlalhruaia Dinthar te chhuan zai a rawngbawlna an nei thin a ni.
Ni 27 (Thawhtanni) khan Upa C.Rozamvela te chhungkua chuan Pathian chawimawina an nei a, Unaunu Lalthazuali chuan thuhril rawngbawlna a neih chhunzawm a ni.
February Ni 7–9 chhung hian W.Bunghmun kohhranah, Kawrthah Bial P.Y.D inkhawmpui Vawi 25–Na chu neih a ni dawn a, Pastor RT.Rodingpuia Bialtu Pastor leh Tirhkoh Zionramngaihzuala Kawrtethawveng te chuan thuhril rawngbawlna an nei ang.
KOLASIB VENGLAI BIAL
Kolasib Venglai bial a Tumpui Kohhran Biak In chu sak chhunzawm mek zel a ni a, tunlai hian kohhran mipuiten chhun leh zanah hnatlangin Biak In sak hna an thawk thin a,
Tumpui kohhran a in tinte chuan Pathian chawimawi nan, an neih angte Kohhranah thawhkhawmin, ran talh a Pathian hnenah lawmthu sawina neih an tum bawk a ni.
Kolasib Venglai Missions Department te pawhin, Birpara Biakin sa a hnatlang turin ruahmanna an siam bawk a, February thla tawp lam hian Bialtu Pastor hoin mithahnem tak Birpara Biak In sa turin kal an tum ani.
N.MUALCHENG BIAL
February Ni 1 Inrinni khan Unaunu Khawlchungnungi te chhungkua chuan N.Mualcheng kohhranah Pathian chawimawina an nei a, Unaupa Vanlalruata Falkawn chu Speaker ah hman a ni.
Speaker rawngbawlna Pathianin mal a sawm a, kohhran a mi hlate leh lamtual thleng hleitheilo te pawhin lawmna thar an chang bawk.
Aibawk Bial P.Y.D. President Unaupa Lalropara hovin mi 6 laiin speaker hi an tawiawm a ni.
Ni 3 Thawhtanni khan, chawimawina kuangawmin kohhran hoten nilengin Pathian fak a zaihona an nei bawk.
N Mualcheng Bial chuan General atangin Pastor Quarters repair na tur ₹ 1,00,000/- an dawn hmangin, ni 6 Ningani khan Bial huap hnatlang neiin Pastor Quarters hi thawmthat a ni.
BAWNGKAWN BIAL
Bawngkawn Bial PYD inkhawmpui vawi 25-na chu February ni 2 Pathianni zan khan tluang tak a hman zawh a ni.
He inkhawmpui hi Bawngkawn kohhran Biak Inah hman a ni a,
Bialtu Pastor Rev P.B.Lalhmuliana bakah bial chhung a thalai ruat bik ten thuhril rawngbawlna an nei a, zaithiam ten zai rawngbawlna an nei bawk.
Inrinni nilengin rorel a ni a,
Tk Lianhmingthanga, President Bial PYD chuan inkhawm kaihruaiin,
Kum 2021 Bial PYD inkhawmpui Shalom kohhran a March ni 7 Pathianni hmang a neihte,
Kum 2020 chhung a Seminar cum revival leh mual inkhawm neihte,
Pastor Quarters mamawh lei nan a cheng 20,000/- budget a dahte,
Kum 2020 chhung a Bial huap a camping buatsaih bakah,
Bial hming a Missionary support nan cheng 6,000/- pekte chu Bawngkawn Bial PYD inkhawmpui rorel langzar zualte an ni a,
Kum 2020 budget atan cheng nuaihnih singruk sangkhat zakua sawmruk (Rs.2,61,960/-) an pawm bawk.
Inkhawmpui Report atanga a landanin, Bawngkawn Bial ah hian PYD member mi 298 an awm mek a ni.
GENERAL HEADQUARTERS THU THAR| 5TH OCTOBER 2024
04 Oct, 2024
GENERAL HEADQUARTERS THU THAR | 27TH SEP 2024
27 Sep, 2024
