Rev C.Lalremsanga General Superintendent chu March ni 5 Ningani khan Manipur District Hruaitu thlanna neihpui tur leh Churachandpur Bial inkhawmpui hmanpui turin a zinchhuak.
Rev Gospelthanga General Treasurer chu ni 4 Nilaini khan Hmawngbu Bial thar hawng turin a zinchhuak.
General Treasurer rual hian Eeducation Board hruaitute chuan Dumzautlang a School din tur enfiahin an kal bawk a ni.
Rev Pc Laltanpuia, Secretary General Missions Department chu March ni 4 khan Birpari Field tlawhin a zinchhuak a, Birpara Biak In thar a hawng ang.
Missions Secretary hian Sikkim, Dimapur leh Manja Field-te a tlawh bawk ang.
Rev Pc Laltanpuia hi Serchhip Bial Missions Department hruaitute leh Christina Vanlalremruati, China Missioanry te chuan an tawiawm a ni.
Rev C Ramsangvawra, Secretary General SS Department chu ni 4, Nilaini vek khan Hmawngbu Bial SS Seminar neihpui turin a zinchhuak bawk.
Rev Dr.Ngurthanpara Sailo, Area Secretary chu ni 6-8 chhung a Zemabawk Headquarters Kohhran a Pathian chawimawina ah Speaker a ni ang.
General PYD
General PYD hnuai a Documentation Committee hmalaknain, March ni 3 Thawhlehni zan khan
Mizoram UPC Bible School, Apostolic Theological Institute (ATI) ah Seminar neih a ni.
He Seminar inkhawm hi Rev.Zoramthara Dean, ATI chuan kaihhruaiin, Seminar thupui ah "Document vawnthat pawimawhna leh kan tih tur" tih hman a ni a, Resource person ah T.Upa Gideon Vanlalhnehsaka Secretary, Documentation Committee chu hman a ni.
H.Lalnunpuii Financial Secretary, Documentation Committee chuan zai rawngbawlna a nei bawk.
General PYD atangin F.Lalnuntluanga Treasurer, General PYD, Upa H.Lalhmachhuana Editor, Pentecost Meichher bakah Documentation Committee member atangin mi 13 te chuan Seminar hi an hmanpui a ni.
CHALTLANG BIAL
Chaltlang Bial Missions Department inkhawmpui tluang tak a hman a ni.
February ni 28 atanga March ni 1 Pathianni hmang a neih zawh tak Chaltlang Bial Missions Department inkhawmpui vawi 17-na chu Chanmari West Mizoram UPC biak in ah hman a ni a, Bial chhung kohhran hrang hrang atangin palai an kal tha hle a ni.
Inrinni February ni 29 khan rorel inkhawm an nei a,
Kum 2021 Chaltlang bial mission inkhawmpui Ramhlun Sport Complex Kohhran a nghahte,
Kum 2020 chhung a Chaltlang bial Mission Department hmalakna a Revival Chaltlang kohhran a neihte,
Kumin chhung a Bial hming a luan chhuahte, chumi atan a Rs.50,000 ruahmante,
Leh Kum 2020 chhung ngei a Missionary pual a chaw nghei tawngtai inkhawm buatsaihte chu Chaltlang Bial Mission Department inkhawmpui rorel langsar zualte an ni a,
Kum 2020 Budget pumpui atan cheng nuai nga, singnga sangruk sawmthum paruk (Rs.5,56,036/-) an pawm bawk.
Chaltlang Bial Missions Department hian kum 2019 khan sum leh pai hmangin Mizoram pawnah nasa takin rawngbawlna an nei a,
Chhatisgarh, Agra Preaching point, Manipur,
Uttarakhand leh Arunachal Pradesh Mission Filed-ah te Bial hming a luan chhuahna an lo nei tawh a ni.
KHAWHAI BIAL
Khawhai Bial LAD inkhawmpui vawi 26-na chu March ni 1 Pathianni hmang khan Lungtan Kohhranah neih a ni a, inkhawmpui chhung hian Tk Lalawmpuia Sailo chu Speaker ah hman a ni a,
Inkhawmpui thupui atan ‘Thianghlimna’ (1 Peter 1:16) thu chu thlan a ni.
He inkhawmpui hi unaunu Lalthannguri Sailo, President Khawhai Bial LAD chuan a kaihruai a, Inrinni February ni 29 khan rorel inkhawm an nei bawk.
kum 2021 Bial LAD Inkhawmpui Tlangpui kohhran a hmante,
kum 2020 Pastor Quarter's Budget atan ₹ 5000 dahte,
Bethani Children's Home leh Apostolic Theological Institute-a Bial hming a luanchhuahte
Chu Khawhai Bial LAD inkhawmpui rorel langsar zualte an ni a,
Kum 2020 Budget Pumpui atan ₹ 70,088 an pawm bawk.
Inkhawmpui chhung hian kum 2019 a Buhfaitham tham thate hnenah chawimawina lawmman pek an ni bawk a ni.
Speaker hi mi pali in an tawiawm a, an zing a mi T.Upa Lalpianpuia Keitum chuan inkhawmpui chhung hian zai rawngbawlna a nei thin bawk.
Pathianni Zan laiah Thuthlung puanna kawng zawh an nei bawk a, a tuk Thawhtanni March ni 2 khan Senior Upa Lalena te chhungkua chuan Pathian Chawimawina kohhranah an nei a, Tk. Lalawmpuia Sailo chuan thuhril rawngbawlna a neih chhunzawm ani.
March ni 4 PYD DAY chu Khawhai Bial PYD chuan Bial huapin an hmang a,
Khawhai Kohhran Biak Inah
DAY thuchah chhiar chhuahna an nei a, General PYD buatsaih Seminar paper zirhona an nei bawk.
Chawhnu lamah infiamna hmanga intihhlimna hun an hman chhunzawm a, kalkhawm ten ruai an kilho a ni.
Khawhai Bial PYD chuan Zan lamah inkhawm neih chhunzawmin,
Revival programme hman a ni a, Bialtu Pastor charge la mektu Tk Lalvensanga hnen atangin Pathian thu ngaihthlak a ni.
Hemi zan hian Quiz hmang a intihsiakna an nei bawk.
Day lawmna ah hian Bial chhung atangin PYD member mi 100 chuang an kalkhawm a ni.
Hnahthial Bial
February ni 28- March ni 1 chhung khan Hnahthial Chanmari Kohhran Biak In ah, Hnahthial bial PYD Inkhawmpui hman a ni a,
Bialtu Pastor Rualthanmawia chu Speaker niin, thuhril rawngbawlna a nei a ni.
Inkhawmpui thlengtu Chanmari Kohhran PYD –te inbuatsaihna a thain, inkhawmpui palai kal ten hlim takin hun an hmang a ni.
Hnahthial Bial PYD inkhawmpui rorelna chuan
Kum 2020 ațang chuan Hnahthial Bial PYD leh LAD te Joint Inkhawmpui nei tawh nise a ti a,
October ni 8 hian Hnahthial bial PYD kum 25 tlin lawmna (Silver jubilee) buatsaih nise a ti bawk.
Bial PYD hming a Missionary support neihte,
Bial huap Seminar buatsaihte,
Leh Bial PYD Meet neihte chu inkhawmpui rorel langsar zualte an ni bawk.
Hnahthial Bial PYD inkhawmpui chu March ni 1 Pathianni zan khan a tiak a ni.
Bazar Bial
Bazar Bial Țanpuitu Hmeichhe Pawl (LAD) te chuan Bial inkhawmpui vawi 25-na tluang takin an hmang.
He inkhawmpui hi February ni 28 Zirtawpni khan neih tan a ni a,
Inkhawmpui tan zan hian Rev.R.Lalnghaksanga Bialtu Pastor chuan inkhawmpui hlanna a nei a, unaunu Lalfamkimi, Vice President, Bial LAD chuan inkhawm a kaihruai a ni.
Zirtawp zan hian Bazar Bial chhung a Kohhran hrang hrang LAD te chuan Lengkhawm zai leh Bible Quiz hmang a intihsiakna an nei bawk.
Inrinni nilengin rorel inkhawm neih a ni a,
Bial LAD hming a luanchhuah nise, kum 2020 chhungin Referal Hospital-ah Almirah dahte,
Pentecost Meichher Sponsor te, Bial LAD Revival neih te leh Pastor Quarters budget atan Rs 10,000 dah te chu Bazar Bial LAD inkhawmpui rorel langsar zualte an ni a,
kum 2020 budget atan cheng Nuaikhat singli sangkhat zariat sawmli (Rs 141,840/-) an pawm bawk.
Revival inkhawm hi Inrinni zan ațang khan Pathianni zan thleng hman a ni a,
Tirhkoh R. Lalbiakdika, Chungtlang chu Speaker-ah hman a ni a, inkhawmpui thupui ‘Thianghlimna’ tih thupui hmangin thuhril rawngbawlna a nei a ni.
Rawngbawltu hi unaupa H.Lalnunthara, Reiek chuan a țawiawm a, inkhawmpui chhung hian Zai a rawngbawlna a nei țhin bawk.
Bazar Bial LAD te chuan kum 25 an tlin champha lawmna
Pathianni chawhma inkhawm banah neiin, Silver Jubilee Dar vuak a ni a, Bial kohhranpui hruaitute, Bial LAD hruaitu leh Board member bakah Bial LAD hruaitu lo ni tawh ten Jubilee dar hi an vua a ni.
Kalkhawm mipuiten Silver Jubilee lawmna Thingpui ruai an kilho bakah,
Silver Jubilee pual a Cake siam chu zai a ni bawk.
Pathianni chawhnu inkhawmah Silver Jubilee pual a programme siam a ni a, Organising Committee Chaiman unaunu Lalnunmawiin inkhawm a kaihhruai a, Jubilee Souvenir thirlawkna unaunu Pc Rodingpuii'n a nei bawk.
Jubilee pual a Souvenir buatsaih chu Rev.R. Lalnghaksanga Bialtu Pastor chuan a tlangzarh a ni.
He inkhawmah hian Lalmuanpuii Ralte leh Rebec Laldinmawii, Bazar te chuan zai a rawngbawlna an nei bawk.
He Silver Jubilee programme hi Bazar Bial lo enkawl tawhte atangin
Rev.Chhunglawma, Rev.Vanlalsipaia leh Rev.Zoramthara ten an hmanpui a ni.
Kum 2020 inkhawmpui report atang a, a landanin Bazar Bial ah hian LAD member 201 an awm mek a, heng zingah hian zuk leh hmuam a fihlim mi 34 an awm.
Kum 2019 chhung a Buhfaițham, țham tam ber chu Khawlthangi Armed Veng South LAD President a ni a, no 15,467 a țham a ni.
Kum 2021 Bazar Bial Țanpuitu Hneichhe Pawl inkhawmpui chu March Pathianni hmasa ber hmangin Armed Veng South Kohhranah hman a ni ang.
Thingsai bial
Thingsai Bial Kohhranpui inkhawmpui chu Cherhlun Biak In ah March ni 1 Pathianni hmang khan neih a ni a,
Tk. Lalbiaknia, Jonathana Team chu Speaker-ah hman a ni.
Speaker hi unaute Lalnunhlima leh Biakthanga, team member ten an tawiawm a,
Govt. Complex, Aizawl atangin zaithiam Sangtei leh Mahriat ten an hmanpui bawk a ni.
Inkhawmpui chhung hian thlarau thianghlim baptisma changthar mi engemawzat awmin,
speaker rawngbawlna nung tak hnuaiah inkhawmpui chu tluang tak a hman zawh a ni.
Thingsai Bial inkhawmpui rorelna chuan Bial chhung a kohhran la din lohna Khua ah Kohhran din anih theih nan hmalak nise an ti a, Rs 50,000/- budget an ruahman bawk.
March ni 2 Thawhtanni khan Upa Hautluanga leh T.upa Zohranga te chhungkaw hnihte chuan Pathian chawimawina an nei a, kohhran hoten revival an hman chhunzawm a ni.
Zemabawk Bial
Zemabawk bial PYD te chuan March ni 4 Nilaini khan PYD Day pualin thisen an pe.
Thisen pek inkhawm hi Zemabawk North Kohhran NPSS hall ah neih a ni a,
Unaupa F.Lalnuntluanga Treasurer, General PYD chuan a telpui a , hunserh a hmang a ni.
Civil Hospital Blood Bank a thawktute chuan Zemabawkah hian kalchilhin, Zemabawk Bial PYD atangin mipa 18 leh hmeichhia 4 ten thisen an pe a ni.
Zemabawk Bial PYD te hian zan lam ah Zemabawk west biakin ah variety programme an hmang bawk.
KOLASIB DIAKKAWN BIAL
Kolasib Diakkawn Bial PYD inkhawmpui chu February ni 28 atanga March ni 1 chhung khan Vengthar kohhran biak inah neih a ni.
Inkhawmpui tan zan hian tualchhung hrang hrang atangin report ngaihthlak a ni a, lengkhawm zai leh Bible quiz hmangin intihsiakna an nei bawk.
Ni 29 Inrinni ah rorel a ni.
Inrinni zan atangin revival inkhawm neih a ni a,
unaupa Son Hanghal chuan thu hril rawngbawlna a nei.
Pathianni chawhma inkhawmah Bial mission Department, Chairman Upa PC Lalzuithanga'n mission tan appeal-na a nei a, Bialtu Pastor Rev.R.Lalparvula’n thuhril rawngbawlna a nei thung.
Pathianni chawhnuhah T.Upa Samuela'n thu hril rawngbawlna a nei bawk.
Pathianni zan inkhawmah Upa T.Lalnunsanga, Bial chairman hnen atangin Pathian thuchah ngaihthlak a ni a, Bial chanchinbu Sinai campaign neih niin, Article/sermon ziak tha ber leh ziak hnem ber hnenah lawmmna sem a ni a, Lengkhawm zai leh Bible Quiz intihsiakkna lawmman sem a ni bawk.
Ni 1 Pathianni zan khan inkhawmpui hi a tiak a ni.
Ni 2 (Thawhtanni) zan khan General PYD buatsaih seminar paper chu Bial PYD te chuan Diakkawn Kohhran biak inah an zirho bawk a,
Bial PYD Vice President Unaupa Kamliana Lhouvum chuan zirtirna a pe a ni.
KANGHMUN BIAL
Kanghmun bial PYD te chuan Ramthar Hreichuk Kohhranah Bial inkhawmpui tluang takin an hmang.
He inkhawmpui hi February Ni 28 – March ni 1 chhung khan neih a ni a, SILVER JUBILEE lawmna neih a ni bawk.
Inkhawmpui tan zan hian tualchhung hrang hrang report leh bial report ngaihthlak a ni a,
Inrinniah rorel inkhawm neih a ni.
Upa.David Lalpartlana (Ramhlun vengthar, Aizawl) chu inkhawmpuiah hian Speaker atan hman ani a, Unaupa ZDa (Edenthar Aizawl) chuan Speaker hi a ṭawiawm ani.
General PYD Hruaitute sawm an nih angina, T.Upa Lalroenga (General PYD Vice President) leh T.Upa H.Lalbiaksanga (EBM) te chuan an hmanpui a ni.
Jubilee pual hian Mizoram UPC dinthar leh anih aṭanga Bial PYD hruaitu lo nitawh mi 35-te hnenah chawimawina thuziak hlan an ni a, souvenir buatsaih a ni bawk.
He inkhawmpui hi ni 1 Pathianni zan khan a tiak a ni.
Kum 2021 Kanghmun Bial PYd inkhawmpui chu Lungphun Kohhranah neih a ni ang.
Ruantlang Bial
February Ni 28 – March Ni 1 Pathianni hmang khan Ruantlang Bial Missions Department Inkhawmpui Vawi 17-na Ruantlang Kohhran Biak Inah hman a ni a,
Pastor Kc. Angelvena, Agra hmun a Missionary a awm mek chu Speaker-ah hman a ni.
Pathianni chawhma inkhawmah Missionary support campaign neih a ni a,
mi ṭhahnemngaite hnen aṭangin cheng nuaithum singli sangnga zariat (₹3,45,800/-) lakkhawm a ni.
Inkhawmpui rorelna chu ni 29 Inrinni khan Bial Missions chairman Upa. C. Thanngura kaihhruaina hnuaiah neih a ni a,
Kum 2021 Inkhawmpui Zotlang Kohhran a nghahte,
Kum 2020 chhung a financial campaign neih nise tihte,
Bial huap revival Ruantlang Biak In a neihte,
Bial chhunga Kohhran la din lohna khuaah din tura hmalak chhunzawm zelte,
Pastor Quarters tih changtlun nan a Budget ₹5000 dahte chu rorel langsar zualte an ni a,
Kum 2020 Bial Budget atan Rs.15,200 an pawm bawk.
Inkhawmpui report atanga a landanin,
Ruantlang Bial ah hian member 716 an awm mek a ni.
Mamit Bial
Mamit Bial PYD te chuan March ni 4 PYD Day khan thisen pe in Damdawiin-ah thilpek an hlan.
PYD Day denchhen hian Mamit Bial PYD te chuan Mamit District Hospital ah Thisen Unit - 15 (Mipa-10 leh Hmeichhia-5) ten an pe a, thisen pe tur a kal hi member 35 an ni.
Heng bakah hian District Hospital a hman tur Nebulizer pahnih an pe bawk.
Heng thil pek hlanna inkhawm hi Upa Hmingthantluanga'n a kaihruai a,
Bial Secretary Unaunu Lalthakimi'n thilpek hlanna a nei a ni.
He hun hi Bialtu Pastor Rev. H.Lalthankima'n a hmanpui a, Bial Chairman Upa J.Lalremruata'n thuchah tawi a sawi bawk.
Mamit Bial PYD hian District Hospital ah hian kumtin thil pek an hlan thin a,
Chhunzawm zel an tum bawk a ni.
LUNGLEI 'S' BIAL
February ni 19 (Nilaini) kha Mizoram UPC Day anih angin Lunglei 'S' Bial chhunga tualchhung Kohhrante chuan urhsun takin an hmang..
Electric Veng Kohhrante chuan chhun lamah Upa leh rawngbawltu leh Department OB te pualin Seminar an nei a,
Resource person Rev.Dr.Ngurthanpara Sailo, Area Secretary-Southern zone a ni.
Zan lamah Inkhawmna an neih chhunzawm a, Area Secretary hian thuhril rawngbawlna a nei a ni.
Mizoram UPC Day pual a cake siam chu hemi zan hian zai a ni bawk.
Ramthar Veng Kohhrante chuan zan lamah Inkhawmna neiin Pastor Lalruatfela, Guwahati a Missionary chuan Missions Appeal a nei a ni.
Tualchhung dangte pawhin zan lamah Day pual hian hun an hmang bawk.
February ni 22 (Inrinni) khan Unaupa Lalnithanga te chhungkua, Farm Veng te chuan Pathian Chawimawina an nei a, Rev.Dr.Ngurthanpara Sailo, Area Secretary chu speaker ah hman ani a.
Ni 23 (Pathianni) chawhnu inkhawmah Speaker hian mi 11 Isua hmingin Baptisma a chan tir bawk.
Ni 29 (Zirtawpni) zan khan Sr.Upa F.Thangliana (L) te In,Electric Vengah Lunglei 'S' Bial Silver Jubillee Souvenir Editorial Board te chuan meeting an nei.
He meeting hi T.Upa LH Lalhmingmuana,Souvenir Editor -in -Chief chuan kaihruaiin an thurel langsar zual zingah Souvenir bu hming turte, thlalak dah dan turte, Article ziak turte an rel bakah hmalak zel dan turte an sawiho a ni.
March ni 4 (Nilaini) PYD Day chu Lunglei 'S' Bial PYD te chuan zingkarah Civil Hospital, Lunglei ah hun an hmang.
Day lawmni hian Pastor Quarters ah Hunserh hman hmasak a ni a,
Upa J.Lalzekima, Bial PYD President chuan a kaihruai a,
Pastor B.Lalchhanhima, Bialtu Pastor chuan tawngtaina a nei.
Hemi hnu hian Civil Hospital, Lunglei a thawktute leh damlote tan Artui chhum leh Frooty an sem a,
Civil Hospital, Lunglei compound tihfaiin hun an hman chhunzawm a ni.
PYD Day pual a hnatlanna ah hian member 39 thawkchhuakin Bialtu Pastor leh General PYD Assistant Secretary ten an hmanpui a ni.
Dt.1st March,2020(Pathianni) khan Bialtu Pastorin Electric Veng Kohhranah nauhlan rawngbawlna a nei a.Hemi bakah hian Baptist Kohhran aṭangin member 1 a lawmlut nghal bawk a.Member thar hian Isua hmingin Baptisma a chang nghal bawk..
Keifang Bial
Keifang Bial a Tualbung kohhranah ni 4 PYD Day khan PYD hruaitu hlun chawimawina buatsaih ani a, Unaupa Nghakliana leh Unaunu Lalchamreii te hnenah chawimawina thilpek hi hlan a ni.
Unaupa Nghakliana hi kum 15 chhung PYD hruaihna a lo thawk tawh a, Unaunu Lalchamreii hi kum 12 chhung hruaitu a ni tawh bawk.
Heng chawimawi tak mi pahnihte hi Tualbung kohhran PYD te chuan an chhuang tak zet ani.
KHAWZAWL VENGTHAR BIAL
Khawzawl Vengthar Bial PYD inkhawmpui Vawi 25 na chu February Ni 28 – March ni 1 chhung khan Vengthar Kohhranah hman a ni.
Ni 28 Zirtawpni khan rorel inkhawm an nei a, Zan inkhawmah Tualchhung tin atangin Report ngaihthlak a ni bawk.
Inkhawmpui chhung zawng hian Bialtu Pastor lo ni tawh ten thuhril rawngbawlna an nei a, General PYD atangin Secretary leh EBM Tk.C.Lalrochhunga ten inkhawmpui hi an hmanpui a ni.
Inkhawmpui tan zan hian Rev.F.Rothiangan thuhril rawngbawlna a nei a,
Inrinni ah hian Khawzawl Vengthar Bial PYD Inkhawmpui Silver Jubilee lawmna neih a ni bawk.
Jubilee lawmna hi Mizoram UPC General Superintendent Rev.C.Lalremsangan a hawng a, Mi 25 thlan bikten Jubilee Dar an vua a, Tlai lamah Jubilee ruai an kilho ani.
Jubilee lawm ni hian General PYD Secretary T.upa Dr. Zonunmawian thuhril rawngbawlna a nei a, General PYD hmingin Jubilee lawmpuina Citation Bial PYD Secretary hnenah an hlan a,
Bial PYD hruaitu lo ni tawh leh Bialtu Pastor lo ni tawhte hnenah chawimawina thuziak Bial PYD hming in hlan a ni bawk.
Inkhawmpui chhung hian Tualchhung Pathum atangin PYD ten hla an rem thin a,
Vengthar Naupang SS ten Action Song an rem bawk a ni.
Khawzawl Vengthar Bial PYD inkhawmpui rorelna chuan
Kum 2021 inkhawmpui Hermon kohhranah a nghat a,
Pastor Quarters rawng hnawih that leh Study Table dah an pass bawk a,
Kum 2020 Budget pumpui atan ₹76,690 chu rorelna chuan a pawm bawk.
Khawzawl Vengthar Bial ah hian PYD member mi 222 an awm mek a ni.
Khawzawl Vengthar bial PYD chuan March ni 4 khan Day pualin Social work an nei a,
Vengthar PYD te chuan Khawzawl District Hospital ah leh Police Thana ah te Frooti an sem a ni.
BUKPUI BIAL
Bukpui Bial Missions Department inkhawmpui chu March ni 1 Pathianni hmang khan
neih a ni a,
General Missions Department Secretary Rev PC Laltanpuia chu Speaker-ah hman a ni a,
Missions Department Secretary hi Rev Chalhuaia leh Pastor Ramchhanmawia leh Lalhmachhuana ten an tawiawm a ni.
Khawmpui chhung hian Unaunu Lalthawmmawii leh Unaunu Lalnunkimi ten zai rawngbawlna an nei bawk.
Bukpui Bial Missions Department inkhawmpui rorelna chuan
Kum 2021 inkhawmpui Lungmuat kohhran ah a nghat a,
Bial hming a Missonary support neih nise a ti bawk.
He inkhawmpui hi Pathianni zan khan a tiak a ni.
Durtlang Bial
Durtlang bial LAD te chuan February ni 28- march ni 1 chhung khan Durtlang Ramthar biakin ah Inkhawmpui an hmang.
He inkhawmpuiah hian Speaker atan Trk. HS. Rosangliana. Sihphir a rawngbawl a awm chu hman a ni a. Tualchhung hrang hrang atangin LAD member tha hnem tak an kal khawm bak ah kohhran member ten inkhawmpui an tawiawm tha hle a ni.
Inrinniah Rorel inkhawm neih niin Budget pumpui atan Rs 1,44,900 an pass a ni.
Synod hospital charity fund atan cheng 3000 pekte,
ATI ah chawhmeh pek leh bookself pekte,
Chu inkhawmpui rorel langsar zualte an ni.
Durtlang bial PYD te chuan March ni 4 PYD Day chu Bial huapin an hmang a,
Zing karah Pastor Quarters leh a chheh vel sam fai hnatlang an nei a,
member thahnemtak an thawk chhuak.
Zan lamah Ramthar biakinah Leadership training an nei a,
Upa Vanlaldinthara General PYD President chu Resource Person a ni a,
Hruaitute mawhphurhna leh chanvo,
Sum enkawl dante zirtirna a pe a ni.
Lengpui Bial
Lengpui Bial LAD Inkhawmpui vawi 25-na chu February ni 28 – March ni 1 chhung khan Bial Headquarters, Lengpui Kohhranah hman a ni a,
Unaunu C.Renghlupuii Chaltlang chu Speaker a ni.
Speaker hi Unaunu Lalramhluni Aizawl,T.upa Lalnunmawia Tualbung leh zaithiam Unaunu Lalrinfeli Keifang te chuan an tawiawm a, bial (Kohhranpui) hruaitute, Bial PYD hruaitute leh Bial chhunga Kohhran Upa engemaw zat in he Inkhawmpui hi an hmanpui a ni.
He inkhawmpui ah hian buhfaitham tham tha te leh Bible ralchhan chhang tha te hnenah lawmman sem ani bawk.
Lengpui Bial LAD inkhawmpui rorelna chuan
'Nute pawimawh zia' tih thupui hmang a Seminar buatsaihte,
A.T.I ah luanchhuah nise tihte,
Pastor Quarters tihchangtlun nan budget Rs.20000/- dahte an pawm a ni.
Lengpui Bial LAD chuan Kum 2020 Budget pumpui atan Rs.66,600/- an nei bawk a ni.
NC Hills Bial
General LAD Treasurer leh Executive Board member-ten NC Hills Bial Seminar an neihpui.
General LAD Treasurer Unaunu C.Zoramchhani, Unaunu Laltanpuii, EBM leh Unaunu Sappari, EBM te chuan NC Hills Bial hi tlawhin Muolhoi Kohhran NC Hills Headquarters-ah Pathianni chawhnu (March ni 1) khan Bial LAD te Seminar an neihpui a,
Thianghlimna leh LAD te Mawphurhna tih thupui hmangin zirtirna an pe a ni.
General LAD hruaitu lo kal te hian Muolhoi Kohhran Naupang Sunday School Hall sakna turin
sum thanem tak an pe bawk.
Muolhoi Kohhran Naupang Sunday School Department te chuan Sunday School Hall thar sakna atan March ni 3 (Thawlenni) khan One Day Hotel an buaisaih a, bawngsa leh sangha siamin, sum thahnem tak an thawkchhuak a ni.
He One Day Hotel buatsaih na ah hian Naupang Sunday School Superintendent Unaupa Welson Thluchung, Secretary-cum-Treasurer unaunu Lalnunmawi Zote, Sunday School Zirtirtu te leh mi thahnem tak hnatlangin an thawkchhuak a ni.
Muolhoi Bial PYD chuan March ni 4 zan khan PYD Day an hmang a,
PYD President T.Upa Lalringsang Thiek chuan inkhawm kaihruaiin,
Unaupa Welson Thluchung, chuan thuhril rawngbawlna a nei a, PYD Day thuchah chhiar chhuahna Unaupa Lamhmathuoi Vaiphei, Bial PYD Secretary chuan a nei bawk.
REIEK BIAL
Reiek bial PYD-te chuan PYD Day pualin Bethani Children's Home-a an mamawh leina atan ₹ 3000 an hlan.
Reiek bial chhung a tualchhung hrang hrang PYD te chuan PYD Day an hmang.
Reiek PYD te chuan zan lamah hmangin Pastor Quarters-ah hun an hmang.
Day lawmnaah hian PYD member bakah kohhran nu leh pate pawhin an telpui a,
Day thu chah chhiar chhuahna te neiin, Reiek bial vawngtu Pastor PC. Lalliansanga'n fuihna thuchah a sawi bawk.
PYD te hian Thuthlung hla sa in zaihonate an nei a ni.
Chungtlang PYD-te pawhin Day lawmna atan Bethani Children's Home an tlawh a, Bethani tan chawhmeh leh hmunphiah eng emaw zat leh pawisa fai ₹ 2500 an pe.
PYD Hmeichhia ten buh an thlei sak a,
Mipa lamin Sihhmui biak in kawt an lai zawl bawk.
Tlai lamah Bethani Children's Home-a thawktute nen PYD Day lawmna ruai an buatsaih chu an kilho a ni.
KOLASIB VENGLAI BIAL
Kolasib venglai Missions Department hmalakna in W.Bengal ah Bialtu Rev.P.Lalrinawma leh Upa.Lalthanzauva Missions Department Chairman Venglai leh PYD an vaiin mi pariat te chuan Biakin sa in Work Camp an nei mek a, Biak in bang remin tunlai hian hnatlang an bei ngawrh hle a ni.
Kolasib bial Thinglian hmun a Tirhkoh rawih tur Unaupa Lalzedinga chu Kolasib Venglai LAD te chuan buaipuiin, kohhran in tinah a mamawh tur lakkhawm hnatlang an nei a, pawisa fai Rs.1600 an hlan tel bawk.
Thinglian ah hian Tirhkoh Quarters tur hi bial huap hnatlanga sak a ni a, luah theih a peih fel tep a ni.
Kolasib Venglai bial PYD te chuan PYD Day March ni 4 chu Saihapui K ah Infiamna chi hrang hrang hmangin an lawm a, member 70 chuang kal khawmin, tlai lam ah chawhlui kilhona an nei bawk.
Aibawk Bial
Aibawk Kohhranah March ni 5 zan khan Bialtu Pastor H. Laltlankhuma chuan kohhran dang atangin chhungkaw khat member panga (5) awmna a lawm lut a ni.
Dinthar Bial
Dinthar Bial chhungah March ni 4 PYD day chu Bial PYD inkhawmpuiin a pass angin, tualchhung tinin mahni remchan dan angin an hmang a,
Dinthar PYD ten zan lamah inkhawmna neiin, F. Lalnuntluanga Treasurer General PYD chuan fuihna thu a sawi a, inkhawm banah thingpui leh a hmeh an kilho a ni.
Tuikual PYD te pawhin Day cake an siam chu a zaina hun an buatsaih bawk a,
Dawrpui vengthar PYD te pawhin Day pual hian Bible Track an sem bawk.
Kanan leh Hunthar PYD te pawhin Day lawmna hi a huhoin an hmang a, PYD Day Cake zaiin, hlim takin hun an hmang a ni.
GENERAL HEADQUARTERS THU THAR| 5TH OCTOBER 2024
04 Oct, 2024
GENERAL HEADQUARTERS THU THAR | 27TH SEP 2024
27 Sep, 2024
