Upa Andrew Laldingliana, Executive Chairman chuan March ni 8 Pathianni hmang khan Rengdil Bial inkhawmpui a hmanpui a, Upa J.Lalramliana Chairman, Planning & Financial Board chuan a tawiawm.
General hruaitute hian Darchawi leh Kanchanpur Kohhran Tripura District-te chu an tlawh bawk.
Rev C.Lalremsanga, General Superintendent chu Kawrthah Bial inkhawmpui hmanpui tur leh W.Bunghmun Kohhran Biak In thar Pathian hnenah hlan a hawng turin March ni 13 Zirtawpni hian a zin chhuak a, Pathianni a cham a nga, March ni 16 Thawhtanni ah a lo let leh ang.
General Superintendent hi Kawrthah Bial inkhawmpuiah Speaker a ni dawn a ni.
Rev Hc Lalthlamuana, General Secretary chuan Headquarters Bial Kohhranpui inkhawmpui March ni 15 Pathianni hmang a Lawipu Kohhran a neih tur a hmanpui ang.
Rev Gospelthanga General Treasurer chu March ni 13 Zirtawpni vek hian Hreichuk Kohhran Biak In thar, Kanghmun Bial a mi chu hawng turin a zinchhuak a, Pathianni thleng a cham ang.
Rev C.Ramsangvawra, Secretary General SS Department chu Bilkhawthlir Bial SS Seminar neihpui turin Zirtawpni ni 13 hian a zinchhuak a, Saiphai Kohhranah Seminar hi an nei ang.
General SS Department Secretary hi Tk Liansangkima leh Upa F.Lalremmawia ten an tawiawm a ni.
GENERAL PYD
General PYD executive board meeting vawi 186-na neih a ni.
March Ni 6 (Zirtawpni)-zan khan General PYD Executive Board vawi 186-na chu Unaupa Mesak Vanlalthlana, EBM GPYD te in Bungkawn vengah neih a ni a, meeting hi Upa Vanlaldinthara, President, GPYD chuan kaihruaiin, Mizoram UPC Kohhran (Puipate) aṭangin Rev.HC Lalthlamuana, General Secretary chuan a telpui.
Meeting-ah hian
General PYD Treasurer Unaupa F.Lalnuntluanga hnen aṭangin Financial Report ngaihthlak a ni a, GPYD hnuai a Committee peng hrang hrang, Pentecost Meichher, Social Wing Committee leh Documentation Committee ten hma an lakna hrang hrang leh Financial Report an pe bawk.
General PYD Executive Board chuan Kum 2020 chhung a Bial leh tualchhung hrang hrangin GPYD hruaitute inkhawmpui leh Jubilee hmanpui tur a an sawm thin chu lawmawm an ti a, kumin hian Bial leh Tualchhung hrang hrang hmun 10 General PYD hruaitute inkhawmpui leh programme dang hmanpuiin an zinchhuak a ni.
Mizoram UPC Literature & Publication Board leh General PYD Joint Committee in September ni 26 & 27 chhung a Oneness Literature meet neih tur a ruahmanna a siam tawh chu,
Meeting chuan Programme draft siam phawt a, General PYD Executive Board neih leh hun a thlirho atan a dah bawk.
General PYD in April ni 18 & 19 Pathianni hmang a
Lawngtlai Bial, Chanmari Kohhran Biak In a Live Crusade a buatsaih turah Programme hman dan turte duan a ni a,
Meeting-ah hian Live Crusade a Thusawitu tur mi 3, zai a rawngbawlna nei turte leh mawhphurhna hrang hrang nei turte ruat nghal a ni.
MANIPUR DISTRICT
Manipur District hruaitu thlanna chu March ni 6 Zirtawpni khan Rengkai Kohhran Biak In-ah neih a ni a,
Mizoram UPC General Superintendent Rev C.Lalremsanga’n inthlanna hi a neihpui a ni.
Kum 2020-2021 chhung a Manipur District hruaitu atan heng mite hi thlan an ni a,
District Chairman Upa Lalvullien, Rengkai.
District Superintendent Pastor Lalnunzama, Saikawt.
District Secretary Upa Lunlalsiem Vaiphei, L. Phaikot leh
District Treasurer atan Upa S. Lalsonlien, Venglai te an ni.
Heng bakah hian
Executive Committee Member atan
1. Pastor K. Lalhmingsangzuala, Rengkai leh
2. Upa Lalneikung, Rengkai te chu thlan an ni a,
Pastoral Board member atan Upa Ngurpaullien, Damdiei chu thlan a ni bawk.
Barak Valley
Barak Valley Bial inkhawmpui chu February 28 atanga March ni 1 chhung khan Zokhawthiang Kohhranah hman a ni a, March ni 2 & 3 Thawhtanni leh Thawhlehni hmang khan Tirhkoh Ngurlianvela, Bial Chairman leh Upa Laltuaksanga Zokhawthiang te chuan Pathian chawimwina an nei bawk.
Inkhawmpui leh chawimawina neih chhung hian Tk.Lalthuthlunga (Kangrengdor), Tk.Abraham L Zote (Cachar-Dolakhal), unaupa Rualtinkhuma (Zemabwk) leh unaupa Lalramzuala (Muallian) te chuan thuhril rawngbawlna an nei a ni.
Kum 2021 Bial inkhwmpui chu Kangrengdor kohhranah nghah a ni a,
Bial huap a camping neih an tum bawk.
Barak Valley Bial inkhawmpui chu March ni 1 Pathianni zan khan a tiak a ni.
Ni 6 Zirtawp zan khan Bialtu Pastor W. Amenthanga'n Zokhawthiang Biakin thar Pathian hnenah hlanin a hawng bawk.
March ni 7 Inrinni zan khan Tk. Abraham L. Zote rawngbawlna hmun Cachar-Dolakhalah kohhran dang atangin mithar 11 chhungkaw hnih a mi chu Bialtu Pastor W. Amenthanga'n Mizoram UPC-ah a lawmlut a, Bialtu Pastor hi Tk. Lalthuthlunga, Kangrengdor, Upa James Lalnunsanga, Hmarkhawlian leh Rev L. Ramhlun Varte te chhungkua chuan an ṭawiawm a ni.
Cachar Dolakhal kohhran-ah hian Pathianni zan thleng hun an hmang a, Unaupa Lalramzuala, Muallian, Tk. Lalthutlunga, Karengdor, Rev. L. Ramhlun Varte leh Tk. Abraham L.Zote ten thuhril rawngbawlna an nei bawk
LAWNGTLAI BIAL
March ni 7 Inrinni khan Lawngtlai Chandmary Kohhran Biak Inah Rawngbawltute leh an kawppuite pualin bial huap seminar buatsaih a ni a,
Upa Lalengzauva, Bial Chairman chuan he Seminar hi kaihruaiin, Rev.R.Laldawngliana bialtu Pastor-in a hmanpui bawk.
He Seminar-ah hian thupui paruk zirho a ni a:
Rawngbawltute mawhphurhna,
Rawngbawltute leh an kawppuite mawhphurhna, Rawngbawltu leh chhungkua tihte,
Rawngbawltute leh taihmakna,
Rawngbawltute leh thianghlimna
Rawngbawltute leh thilpek rawngbawlna
Rawngbawltute leh thawhhona,
Tih thupui hmang tein,
Upa Lalengzauva, Bial chairman,
Rev.R.Laldawngliana Bialtu Pastor,
Upa LH.Chungnunga, Bial secretary,
Upa S.Sangduna, District chairman,
Upa K.Lalreia, Bial Treasurer leh Upa R.Darhmingliana te chuan kalkhawmte zirtirna an pe a ni.
Lawngtlai Chandmary Kohhranah hian March ni 8 Pathianni chawhma Inkhawmah kohhran dang atangin Chhungkaw khat member paruk awmna chu Bialtu Pastor Rev R Laldawngliana'n Mizoram UPC-ah a lawmlut bawk.
BETHLEHEM BIAL
February Ni 28 Zirtawp zan aṭang khan Bethlehem Bial chuan Bial Missions Department Inkhawmpui Salem Veng Kohhran ah an hmang a,
Inkhawmpui tan zan hian Bialtu Pastor Rev PC Parliana'n Inkhawmpui hawnna a nei a, Bial Kohhranpui Hruaituten an hmanpui bawk.
Rev Dr Ngurthanpara Sailo, Area Secretary Southern Zone chu inkhawmpui chhung hian Speaker-ah hman ani a, Rawngbawl tur a koh kan nih ang ngei a, Lalpa tan a theihtawp chhuah a tul zia’ Speaker hnen atang hian ngaihthlak thin a ni.
Inrinni ni 29 khan rorel inkhawm an nei a,
kum 2020 chhung a hmalakna tur hrang hrangte chhawpchhuakin ruahmanna engemaw zat an siam bawk.
Bethlehem Bial Missions Department inkhawmpui chu March ni 1 Pathianni zan khan a tiak ta ani.
March ni 7 (Inrinni) khan Bethlehem Bial PYD te chuan Bial inkhawmpui rorelna bawhzuiin,
Bethani Childrens Home, Sihhmui ah luanchhuahna an nei.
Bethlehem Bial PYD member 27 thawkchhuakin, Sihhmui Biak In bul a lei laih ngaite laiin a ṭul ang ang thawkin an hnatlang a,
Bethani Children’s Home Compound-a huan sâm fai ngaite an sam fai bawk.
Heng bakah hian Bethani Childrens Home chhung an tifai bawk a ni.
Bethlehem Bial PYD te hian, Buhfai, Dal leh Alu bakah ei tur thahnemtak Home ah hian an pe bawk a, tlai lamah chawhlui an kilho bawk a ni.
Bethlehem Bial LAD te pawh Ni 7 Inrinni khan Kanghmun west Kohhran tlawhin an fehchhuak a, Pathianni thleng hun an bawk.
SAIRANG BIAL
Sairang bial PYD Inkhawmpui vawi 25 na chu, March Ni 6-8 Pathianni hmang khan W. Serzawl kohhranah neih a ni.
Inkhawmpui palai mi 120 chuang riak lutin, lang a kal mi engemaw zat an awm bawk.
Bial chhunga rawngbawltu ruat bik ten inkhawmpui chhung hian thuhril rawngbawlna an nei a ni.
Sairang Bial PYD inkhawmpui rorelna chuan
Kum 2021 Inkhawmpui chu Sairang Dinthar kohhranah a nghat a,
Bible ralchhan Timothea 1&2 hmang a neihte,
Thuthlung lam hawi Hoarding hmun remchang lai a tarte,
General PYD Board tihlen nise, General PYD Board a thlen turte chu inkhawmpui rorel langsar zualte an ni a,
Kum 2020 Budget pumpui atan Rs. 1,89,470/- an pawm bawk a ni.
Sairang Bial PYD Inkhawmpui neih chhung hian mual inkhawm neih a ni bawk a,
Silver jubilee logo T. Upa H. Laltanpuia Jubilee Sub-committee Chairman chuan a tlangzarh bawk.
SIAHA BIAL
Siaha Bial Missions Department Inkhawmpui March Ni 6 - 8 chhung a
New Siaha Kohhran a neih chu tluang tak a hman zawh a ni.
Inkhawmpuiah hian Bial chhung a rawngbawltu ruat bikten thuhril rawngbawlna neiin, inkhawmpui hlawhtling tak an hmang.
Ramthim pual sum tuak nan a, Inkhawmpui ah kut thiam thil lakkhawmte,
Kum 2020 chhung a New Siaha East II Preaching Point ah Bial huap Missions Revival neihte,
Bible track hmang a Chanchin Tha theh darhte,
Kum 2020 chhung a Missions Field atan Rs.10000 (Singkhat) a luan chhuah nise tihte chu Siaha Bial Missions Department inkhawmpui rorel langsar zualte an ni a,
Kum 2020 - 2021 Budget atan Rs.200,000 ( Nuaih hnih) pass a ni bawk.
Churachandpur Bial
Churachandpur Bial Kohhranpui & Missions Dept te chuan Joint Conference March ni 6-8 Pathianni hmang khan Rengkai Kohhranah neih a ni a,
Mizoram UPC General Superintendent Rev C.Lalremsanga, Uaunu R.Robuangi, Unaunu PC Rodingpuii, Tk Lalnunthara leh Tk Lienhmingthang ten an hmanpui.
He inkhawmpuiah hian General Superintendent Rev C.Lalremsanga leh Bialtu Pastor K. Lalhmingsangzualan thuhril rawngbawlna an nei a, unaunu Lucy, Tk Lalnunthara Chaltlang, Aizawl leh Rengkai PYD ten zai a rawngbawlna an nei bawk.
Pathianni zing inkhawmah Missions pual thawhlawm Rs.12,100/- lakkhawm a ni a,
Missionary Support Campaign Pastor Koko Lalmalsawma, Manipur Missions field Pastor-in a nei bawk a, Rs 52,200/- hmuh a ni.
Churachandpur Bial inkhawmpui rorelna chuan
Kum 2021 Bial Inkhawmpui L. Venglai ah a nghat a,
Pastor Quarters-ah Refrigerator dahte an pawm bawk.
Churachandpur Bial kum 2020 Budget pumpui atan Rs 59,000/- rorelna chuan a pass a ni.
Kum 2021 atang a Missions Department inkhawmpui a hran a neihte,
Kum 2021 Missions Department Inkhawmpui L. Muolhoiphai kohhran a nghahte,
Bial huap Missions Revival neihte chu Churachandpur Bial Missions Department inkhawmpui rorel langsar zualte an ni a,
Kum 2020 Budget atan Rs 48,000/- an pass bawk a ni.
Serchhip Bial
Serchhip Bial Hebron tualchhungah Upa Lalzamlova Pautu te chhungkua chaun March ni 7 (inrinni) khan ran talhin Pathian chawimawina an nei a, Speaker-atan Pastor Lalnghinglova, Serchhip bialtu chu hman a ni a
Speaker rawngbawlna nung tak hnuaiah kohhran hoten hlawk takin hun an hmang a ni.
JIRI Bial
Jiri bial PYD chuan March ni 4 PYD day chu bial huapin Zoar kohhranah an hmang a,
vawk talhin ruai nen an hmang a, Day hmang tur hian mi 50 chuang Zoar ah hian an riak lut a ni.
PYD Day lawmni hian Day thuchah chhiar chhuah a ni a,
General pyd buatsaih seminar paper zir ho a ni a, Pastor K.Rohmingthangan zirtirna a pe a ni.
PYD te hian chawhnu lamah intihhlimna an neih bakah
Zan lamah Revival inkhawm an hman chhunzawm bawk.
Jiri Bial chhung a Bialtu Pastor leh Tirhkohte rawngbawlna kal zelah kohhran dang atangin mipakhatin Bialtu Pastor kutah Sual ngaihdamna Baptisma a chang a, Tirhkoh Johnson chuan nau hlan rawngbawlna a neih bakah mipakhat Baptisma a chan tir bawk a ni.
Bialtu Pastor te hian tunlai hian Zairawn khuaah mithar sengkhawm tumin rawngbawlna an kalpui mek bawk.
Hmawngbu Bial
Hmawngbu Bial thar chu March ni 8 Pathianni chawhma inkhawm ah Rev Gospelthanga, General Treasurer Mizoram UPC chuan Pathian hnenah hlanin a hawng.
Hmawngbu Bial hi Vathuampui Bial atanga in dang niin, heng khua Hmawngbu, Tuithumhnar,
Lunghauka leh Dumzautlangte chu Hmawngbu Bialin a huamte an ni a, Pastor F.Lalnienga chu Bialtu niin, tunah hian a thutchilh mek a ni.
Bial thar hawn rual hian, Pathianni chawhnuah General SS Department lam atangin Rev C.Ramsangvawran Seminar a buatsaih bawk a, Inrinni ni 7 khan General LAD ten Seminar an neih pui bawk.
Hmawngbu Bial chhung a Lunghauka leh Dumzautlangahte Mizoram UPC hnuai a Education Board chuan School din tumin ruahmanna a siam a, Education Board hruaitute Tk Ch.Lalhmingmuana Chairman leh member Upa K.Lalmuankima ten heng khuate hi an tlawh bawk a ni.
Hmawngbu kohhranah hian member thar chhungkaw pakhat mi pariat awmna chu General Treasurer hian Mizoram UPC ah a lawmlut bawk.
Hmawngbu Bial hian March ni 8 Pathianni hmang khan inkhawmpui vawi 1-na an hmang nghal a, General lam hruaitute hian hmanpuiin, thuhril rawngbawlna an nei bawk a ni.
Hmawngbu Bial thar hawnni hian Kohhran ten ruai buatsaihin tlai lamah an kilho bawk.
Chawlhhmun Bial
Chawlhhmun Bial a Govt. Complex Kohhran PYD te chuan Silver Jubilee Khuhhawnna leh meidet inkhawm March ni 2 Thawhtanni zan khan an nei.
Govt.Complex PYD te chuan Mizoram UPC din thar leh anih hnu a PYD din champha Kum 25 na Silver Jubillee khuhhawnna leh Meidet inkhawm chu an kohhran Biak In ah an hmang a,
He inkhawm hi C.Biakhmingthanga Chairman,Silver Jubilee Organising Committee chuan a kaihhruai a, Upa Andrew Laldingliana Executive Chairman, Mizoram UPC chuan Jubilee hawnna a nei a ni.
Hemi zan hian Upa Lalnuntluanga Sailo, PYD Adviser hnen atangin Pathian thuchah ngaihthlak ani bawk.
Inkhawm banah Jubilee meidet a ni a, PYD member thahnemtak kalkhawmin an hlut hle a ni.
Govt. Complex PYD Silver Jubilee hawnna ah hian PYD member bakah Kohhranpui hruaitute, PYD hruaitu lo ni tawhte leh Kohhran mipui thahnem takin an telpui bawk.
Jubilee lawmna hi kum tluan a hman turin ruahmanna an kalpui a,
A lawmna pui ber hi October ni 31 (inrinni) chhunah Jubilee lung hawnna neiin, ruai nen ropui tak a hman an tum a ni.
Khawhai Bial
Khawhai Bial chhung a Biate Kohhranah March ni 7 Inrinni khan
Upa Lawmzuala te chhungkua chuan Pathian chawimawina an nei a, Tk. Lalvensanga Bialtu Pastor charge la mek chu Speaker-ah hman ani.
He chawimawina ah hian Bial chhung mipui an kal tha hle a, kohhran hoten hlawk takin hun an hmang.
N.Vanlaiphai Bial
March ni 7 Inrinni khan N.Vanlaiphai kohhran Biak in ah Bial LAD hmalaknain ‘Leadership’ leh ‘Thianghlimna’ tih thupui hmang a Seminar buatsaih a ni a,
General LAD hruaituten an hmanpui.
He Seminar hi General LAD Secretary Unaunu Romawii leh Executive Board Member unaunu Lalmuanpuii leh unaunu Sappari ten hmanpuiin zirtirna an pe a ni.
N.Vanlaiphai Bialtu Pastor-in a telpui bawk a, Bial chhung LAD member 58 seminar-ah hian an kalkhawm a ni.
Inrinni zan aṭang a Pathianni Zan thleng khan Revival programme hman chhunzawm a ni a, General LAD hruaitute hian thuhril rawngbawlna neiin, Pathian Thlarau awmpuina hnuaiah hlim takin hun an hmang a ni.
Manja Field
Karbi Anglong Field Manja hmunah ni 8 Pathianni khan Bialtu Pastor Nelson chuan member thar pahnih kohhran dang atangin Mizoram UPC ah a lawmlut.
Dinthar Bial
Khawthlang District inkhawmpui rorelnain Zotlangah Tirhkoh rawngbawl tur rawih nise a tih chu, tihlawhtling a ni a, March ni 8 Pathianni chawhnu inkhawmah, rawngbawl tur a lak Tk. Laldingngheta N. Vanlaiphai lawmluhna Dinthar Kohhran Biakinah neih a ni.
He lawmluhna inkhawm hi Bial Chairman Upa H Lalrinlianan a kaihruai a, Bialtu Pastor Lalhmunnghetan a lawmlut a,
Rawngbawl tur a lak thar Tirhkoh Laldingngheta hnen atangin Pathian thuchah ngaihthlak a ni bawk.
LUNGLEI 'S' BIAL
March ni 5 (Ningani) zan a Lunglei 'S' Bial PYD Board meeting Upa J.Lalzekima, Bial PYD President kaihhruai chuan
March ni 27-29 chhung a Bial PYD Inkhawmpui an neih dan turte duangin,
Kum 2020 atana Pentecost Meichher copy tam thei ang ber lak dan turte an sawiho a, hmalakna pakhat atan Pentecost Meichher Copy tam thei ang ber Sponsor a, zau zawk a thehdarhna turte an sawiho bawk.
Lunglei 'S' Bial PYD chuan kum 2020 chhung atan Pentecost Meichher copy 135 sponsor leh nise an ti a ni.
March ni 6 (Zirtawpni) zan khan Pastor Quarters ah Bial committee te an thukhawm bawk a,
Upa PL Biakmawia, Bial Chairman kaihruai meeting chuan November thla a Lunglei District Inkhawmpui Lunglei 'S' Bial in a thlen tur chu Ramthar Veng Kohhranah a nghat a,
Lunglei ‘S’ Bial chhunga Ram beih dan turte leh thu pawimawh tak tak an rel ani.
Lunglei ‘S’ Bial Sunday School Department-in Bial chhung Kohhran hrang hrangah Sunday School pualin Seminar neih nise a tih chu March ni 8 (Pathianni) chawhnu khan Bial hruaituten ruahmanna siamin an thukhawm a,
'Social Media leh Naupangte' tih leh 'Sunday School hmasawnna tura zirtirtute mawhphurhna' tih thupui chu zirho atan an thlang a ni.
Sunday School pual a Seminar hmasa ber hi March ni 15 (Pathianni) hian Chanmari Kohhranah an nei ang.
Lunglei 'S' Bial Sunday School Department te hian March ni 21 (Inrinni) hian District Park, Zobawk ah Sunday School meet an nei bawk a nga, NPSS lam ten intihhlimna chi hrang hrang nen hun an hmang dawn a ni.
Ni 8 (Pathianni) liam ta khan Lunglei ‘S’ Bial Hruaitute chuan Hrangchalkawn Kohhran an tlawh a,
Upa PL Biakmawia, Bial Chairman chuan thuhril rawngbawlna a nei.
Inkhawm banah Hrangchalkawn Kohhrante nen Joint Committee an nei bawk.
Zan lamah Lunglawn Kohhran tlawh lehin Upa F.Lalliansanga, Bial Secretary chuan thuhril rawngbawlna a nei thung a ni.
Electric Veng Kohhran Lunglei ‘S’ Bial te chuan kohhran kum 25 tlin lawmna Silver Jubilee hmang turin an inbuatsaih mek a,
Organising Committee te dinin, a lawmna pui ber hi December ni 12 khian an hmang ang.
Electric Veng Kohhran hi Lunglei khawpui a Mizoram UPC dinna hmasaber a ni a, Ni 12 December, 1995 khan Mizoram UPC lo piangin member 120 a bul tan a ni a, tunah hian member 380 chuang Electric Veng Kohhranah hian an lawi mek a ni.
Silver Jubilee inbuatsaihna kal zelah
March ni 9 & 10 khan Village Council ten inhlawhna an siamsak hmangin Biak In panna kawng Cement Concrete-in a chhung a, hnatlang thawkchhuak an thahnem hle a ni.
Electric Veng Kohhran hian Biak In an sak chhunzawm mek zel bawk.
Lunglei ‘S’ Bial a Ramthar Veng Kohhrante pawhin tunlai hian Biak In chung sak chhunzawmin hnatlang an nei mek a, Biak In chhak leh thlang lam bang an rem mek bawk a ni.
March ni 12 (Ningani) LAD Day chu Lunglei 'S' Bial LAD te chuan Electric Veng Kohhranah Bial huapin an hmang a,
Intihlimna hrang hrang neiin tlai lamah chawhlui an kilho nghal a ni.
N.MUALCHENG BIAL
N.Mualcheng Bial LAD inkhawmpui chu March Ni 6-8 chhung khan E.Lungdar kohhranah tluang tak a hman a ni.
Ni 7 Inrinni ah rorel inkhawm an nei a,
Kum 2021 Bial LAD inkhawmpui N.Mualcheng kohhran a nghahte,
Inkhawmpuiah hian Lengkhawm zai leh Bible Quiz neih nise tihte chu rorel langsar zualte an ni a,
Bialtu Pastor R.Chawngkhuma chu Speaker-atan an ruat bawk.
N.Mualcheng Bial LAD inkhawmpui chuan Kum 2020 budget atan Rs.50,450/- a ruahman a ni.
VAIRENGTE BIAL
March Ni 11 (Nilaini) khan Vairengte Bial LAD te chuan Bible school a hman tur
Steel almirah an pe a, ATI zirlaite ei tur chhang tuihnai tak an pe bawk.
Heng thil pek hlanna hi Vairengte Bial LAD aiawhin Unaunu Rosangzuali (President) leh Unaunu R. Lalthanpari (Treasurer) te chuan an hman pui a ni.
Headquarters Bial
Headquarters Bial LAD te chuan March ni 12 Ningani khan Day lawmna Central YMA Hall, Tuikhuahtlangah an hmang.
Day lawmna inkhawm hi hun hnihah then a ni a, Chawhma inkhawm hi unaunu Ngurdingpuii Sailo, President Headquarters Bial LAD chuan a kaihruai a,
Unaunu Lalrinthari Assistant Secretary, Bial LAD chuan Day thuchah chhiarchhuahna a nei bawk.
Day lawmna hun hmasa ah hian Solo, Bible chang insawisiakte ngaihthlak a thlirho a ni a, Bial LAD in Bible ralchhan a buatsaih lawman semna an nei bawk a ni.
Chawhnu lamah Headquarters Bial LAD te chuan variety programme hmangin Day lawmna an hmang chhunzawm a, Unaunu Ms.Dawngliani, Secretary Bial LAD chuan a kaihruai.
Bial chhung a Kohhran hrang hrang LAD te leh mimal atangin thiam thil hmuhnawm tak tak thlirho a ni a, kalkhawm te an hlimin hlawk takin hun an hmang a ni.
Headquarters Bial LAD ten Day an lawmna inkhawm hi General LAD hruaitute, President Laldingliani leh Treasurer C.Zoramchhani ten an hmanpui a,
Tlai lamah kalkhawm ten ruai an kilho bawk.
EDUCATION BOARD-IN THAWKTU LA THAR
15 Nov, 2024
ATI GRADUATION DAY HMAN A NI
31 Oct, 2024
DISTRICT 6-AH INKHAWMPUI HMAN A NI DAWN
31 Oct, 2024
