United Pentecostal Church
of Mizoram

ATI Board

ATI Board October ni 20 Thawhlehni a ATI Office Durtlang a thukhawm chuan,

Bible school kal zel dan tur an ngaihtuaha,

Mizo section chu February 2021 ah tan nise, zirlai luh tumte tan, dilna thehluh hun chhung hi January ni 31 thleng an hawng a,

Personal Interview February ni 3 ah neih a ni a nga, February ni 5 ah Registration Day an hmang ang.

English Section pawh 2021 September thla ah ṭan a ni ang.

ATI Board rorelna ang chuan

Kum 2023 aṭangin ATI a Bible zir tumte chu zirna lamah Pawl 12 passed chinah bithliah a ni tawh bawk.

ATI Board chuan kum 2021 Budget- atan Rs.30,88,000/- (cheng nuai sawmthum singriat sangriat) a ruahman a ni.

ATI Board meeting hi Mizoram UPC puipate, Upa Andrew Laldingliana Executive Chairman, Rev C Lalremsanga General Superintendent, Rev Hc Lalthlamuana General Secretary leh Rev Gospelthanga General Treasurer te chuan an telpui.

General LAD

Kum 2020 General LAD inkhawmpui vawi 26-na chu October ni 22 Ningani khan tluang taka neih zawh a ni.

Kum dang a vantlang inkhawm revival nen a hman thin chu, Covid 19 hrileng avangin kumin hian rorel inkhawmna chauh neih a ni a, Bethlehem Vengthlang Kohhran biak in ah rorel niin, Thlengtu lam atangin Bialtu Pastor Rev Pc Parliana’n palai lawmna hun a hmang.

Rorelna chuan Kum 2021 General Board thutkhawm chu Headquaters Kohhranah a nghat a,

Inkhawmpui neih loh kumah Rorel Inkhawm neih nise a ti bawk.

Rorel palai tur zat ruat nghalin, Bial LAD Office Bearer-te bakah, LAD member 100 chin awmna ah mi 2, 100 chin chunglamah mi 4 nise an ti a, hei hi Mizoram UPC rorelna sang Executive Committee-ah pawmpui tur atan thlen chhoh tur a ni.

Kum 2021-ah rampum huap nileng tawngtai neihte,

Rampum huapa khuarel chhiatna tawk te tanpui nan Relief fund-ah Rs. 50,000/- dahte,

Kum 2021 ah Bethani Children's Home tanpui nan LAD member pakhat zelaah Rs. 30/- khawn leh nise tihte leh LAD Day Ip atanga sum hmuh General LAD intuamhlawm nana hman mek chu Missionary-te tanpui nan a hman nise tihte chu rorel dangte an ni a,

Heng bakah hian Thla thar chawnghei tawngtai neih chhunzawm zelte,

Missionary puala luanchhuah nan budget ah Rs. 50,000/- dahte an passed bawk.

General LAD inkhawmpui rorelna chuan kum 2021 budget atan Rs. 15,67,000/- (nuai sawmpanga singruk sangsarih) an ruahman bawk.

Nakkum hi lnkhawmpui neih loh kum anih avangin Budget engemaw zata tihhniam ani.

General LAD inkhawmpui vawi 26-na hi Mizoram UPC puipate, Upa Andrew Laldingliana Executive Chairman, Rev C.Lalremsanga General Superintendent, Rev Hc Lalthlamuana General Secretary leh Rev Gospelthanga General Treasurer te chuan an hmanpui a,

Executive Chairman hian inkhawmpui hlanna a nei a , General Superintendent in Member boral sunna hun hmangin General Secretary hian Thupui Bu a tlangzarh bawk.

Rorel inkhawm tluang taka neih zawh anih hnuin General Treasurer-in malsawm tawngtaina neiin, inkhawmpui rorelna chu tih tawp a ni.

General LAD Executive Board chu Ni 23 Zirtawpni khan Conference Hall General Headquarters Office-ah an thukhawm bawk a, kum 2020 inkhawmpui rorelna bawhzui dan turte an sawiho a ni.

Bethani Board

Bethani Children’s Home Society Board chu November ni 12 Ningani khan

Conference Hall, General Headquarters Office-ah an thukhawma, Upa H.Lalrintluanga Chairman Bethani Children’s Home Society Board chuan kaihruaiin,

Kum 2021 Budget Estimate thlirhona leh hmalak dan tur hrang hrang an ngaihtuah.

Meeting chuan Kum 2021 Budget atan Rs 43,79,200.00 (cheng nuai sawmli pathum, singsarih, sangkua leh zahnih) chu ruahmanin, Planning & Financial Board-ah pawmpui tura thlen nise an ti a,

Heng bakah hian Kitchen cum Dining Hall sak chhunzawm dan turte, November ni 15 Orphanage Sunday lo thleng tur puala thawhlawm lakkhawm dan turte an sawiho bawk a, Board meeting chuan Orphanage Sunday pual hian Bial hrang hrangte hma lak pui turin an ngen a ni.

Bethani Children’s Home Society Board meeting hi Puipa atangin Rev C.Lalremsanga General Superintendent chuan a telpui a ni.

GENERAL PYD

General PYD Executive Board chu November ni 12 (Ningani) khan Durtlang Mel-5, Mizoram UPC Biak Inah an thu khawm a,

Rev Hc Lalthlamuana General Secretary chuan a telpui.

Upa Vanlaldinthara, President, General PYD kaihhruai thukhawm chuan,

Kumpuan zirbu chungchang an ngaihtuah a,

Ruahmanna te siamin, kum 2021-2022 PYD Kumpuan thupui "Taihmakna" zirbu chu a rang lama Literature & Publication Board ah thlen chhoh nise an ti a,

heng bakah hian meeting chuan Literature Committee a din a,

kalphung tur leh kaihhruaina duangin,

Budget Estimate an ruahman nghal a,

Meeting-ah hian Kum 2021 General PYD Budget ruahman fel a ni bawk.

General PYD Executive Board meeting-ah hian

General PYD hnuaia Committee peng Social Wing Committee leh Documentation Committee te aṭangin sum leh pai dinhmun bakah hma chhawp hrang hrang an neih te report ngaihthlak a ni bawk.

HMARTHLANG DISTRICT

Hmarthlang District inkhawmpui chu vantlang inkhawm awmlo a hman a ni.

Hrileng avangin kum dang anga rorelna leh revival inkhawm hmanga neih thin chu

Rorelna chauh neih niin, District Committee ten ro an rel a ni.

Hmarthlang District rorel inkhawm chu Diakkawn Kohhran Biak In, Kolasib ah neih a ni a,

kohhran hruaitu boral tate sunna hun Pastor T.Laldingliana District Treasurer chuan a hmang a, Rorel palai kum 70 chin chunglam te hnenah chawimawina thilpek hlan a ni bawk.

Kum 2021 District Inkhawmpui chu Kawnpui bialah nghah a ni a,

Kum 2020 District Inkhawmpui Thawhlawm, General Missions pual a dah a nih angin, kumin inkhawmpuiah lakkhawm theih nilo mahse District inkhawmpui rorelna chuan General Missions Department hnenah Rs 10000/- pek nise an ti a,

Executive committee-a thlen chhoh tur agenda pakhat an pass bawk.

Hmarthlang District inkhawmpui rorelna chuan Kum 2021 budget atan Rs 1,58,112/- a ruahman bawk.

Inkhawmpuiah hian Ministerial licence dil mi 2 te chu recommend tha an ti a, Executive Committee ah ngaihtuah a ni ang.

Sawmapakhat budget Rs 14,770,000/- an neih atangin Rs 12,541,223/- leh

Missions Department budget Rs 8,74,000/- an neih ah Rs 6,26,534/- Hmarthlang District hian an chhunglut tawh a ni.

Hmarchhak District

Hmarchhak District inkhawmpui rorelna pawh November ni 12 Ningani khan District hruaitute chuan Upa H.Zosangliana, District Chairman te chenna in ah an nei a,

District hmalakna tur hrang hrang bakah General a thlen chhoh tur Agenda 9 an pass bawk.

Hmarchhak District inkhawmpui rorelna chuan kum 2021 Budget atan Rs 2,09,000 an pawm a, nakkum inkhawmpui hi Durtlang bial ah nghah a ni.

Inkhawmpui a License dil mi pathum (3) te chu recommend nise an ti bawk.

Hmarchhak District inkhawmpui rorelna hi Rev.Gospelthanga General Treasurer chuan a hmanpui a ni.

Tripura District

Tripura District chhunga South Hichachara-ah Hindu sakhua atangin mi pakhat Lalpa Isua hmingin Baptisma chan tir a ni a, Baptisma chang thar hi Mita Tripura niin, a chhung ten vawi engemawzat baptisma a chang tur chu duh lovin Baptisma rawngbawlna atangin an koh haw thin a ni.

Pathian thuthlung a hmuh avangin harsatna karah pawh huaisen takin October ni 29 khan Twisama ah Lalpa Isua hmingin bialtu Pastor A.Vanlalpara Reang chuan baptisma a chan tir ta a ni.

Tripura District Committee chu October ni 30 khan Khumlung Kohhran Biakin ah an thukhawm a,

Kum 2021 District budget atan Rs 61000 an ruahman a,

Kum 2021 District inkhawmpui chu Darchawi bial ah an nghat bawk.

Ramthar District

Ramthar District Inkhawmpui vawi- 10na chu tluang taka hman zawh a ni.

November ni 6-8 chhunga neih Ramthar District Inkhawmpui chu Jiri Bial, Phaitual kohhranah hman a ni a, Ramthar District-ah hian Bial 4 awmin heng Bial chhunga Kohhran hrang hrangte hi State 4 (Assam, Meghalaya, Mizoram leh Manipur) huam chhunga mite an ni.

Inkhawmpui chhung hian Inrinni zanah Tirhkoh Lalthuthlunga – Kangrengdor

Pathianni Chawhmaah Tirhkoh Lalruotsang – Kangrendor

Pathianni zanah Tirhkoh Abraham L. Joute, Dolakhal Treasurer Ramthar District-te chuan thuhril rawngbawlna an nei a,

Unaunu Elina Traite-Hmarkhawlien, Unaupa Amita-Sonai leh unaunu Hoineo-Zoar te chuan zaia rawngbawlna an nei bawk.

Ramthar District inkhawmpui Rorelna chuan

Kum 2021 District inkhawmpui chu November ni 5–7 chhunga neih turin Barak Valley Bial, Akhasuo kohhranah a nghat a,

Ramthar District hruaitute leh Board member-te tan Adminstration chungchang Seminar buatsaih an rel bawk.

Kum 2021 District Budget atan Cheng 40,000/- (Singli) leh Conference Fund atan Cheng 2,400/- (Sanghni le Zali) an ruahman bawk.

Ramthar District inkhawmpui hi November ni 9 Thawtanni khan chhunzawm a ni a, Unaupa Kampasiam (Phaitual) te chhungkua chuan Pathian Chawimawina an nei a ni.

Covid 19 hrileng avangin inkhawmpui palai an kal tam thei lova, District hruaitute Pastor K. Rohmingthanga- Superintendent, Tk. Lalawmpui- Chairman leh Tk. Abraham L. Joute Treasurer te chuan telpuiin inkhawmpui hi an kaihruai a, palai mi 100 bawr velin inkhawmpui hi an hmang a ni.

SAIKAWT BIAL

Saikawt Bial chhunga Department te chuan, Budget an neih te an tlak vek tawh a, Assembly Budget leh Sawmapakhat tlak tumin tan an la mek bawk.

October ni 17 Inrinni khan Saikawt Bial a Ngurte Kohhranah Upa Lianthup Hai Sungku te chhungkua chuan Pathian chawimawina an nei a,

Ni 18 Pathianni thleng Revival hman chhunzawm a ni.

Chawimawina inkhawm hi Pastor Lalnunzama’n a kaihruai a,

Pastor K.Lalhmingsangzuala Churachandpur Bialtu chuan thuhril rawngbawlna a nei a ni.

Pathian chawimawina inkhawmah hian kohhran mipui kal an tha in, hlawk takin an hmang a ni.

Saikawt bial PYD chuan Tour Programe an hman thin chu, Ni 16 Zirtawpni zan khan Ngurte kohhranah a tawpna leh kharna hun an hmang.

He hun hi P-Moria kohhranahah bul ṭan in, Saikawt, Muolvaiphei ah te hun hman chhoh zel a ni a, a tawpna hi Ngurte kohhranah tluang takin an hmang thei a, Bial chhung PYD member kal an tha in, hlim takin an hmang zo thei a ni.

Saikawt Bial SS Department chuan November ni 8 - ni 15 chhung hian SS Tour Programme neih an tum bawk.

KHAWZAWL VENGTHAR BIAL

Khawzawl Vengthar Bial SS Department inkhawmpui rorelna chu October Ni 10 Inrinni khan tluang taka neih zawh a ni a, Vengthar kohhran in an thleng a ni.

Rorel palai mi 36 kal khawmin, Tualchhung tin atangin report ngaihthlak a ni.

Khawzawl Vengthar Bial SS Department inkhawmpui rorelna chuan Kum 2021 bial Inkhawmpui chu Neihdawn kohhranah nghah a ni a,

Bial budget atan ₹ 32,370/- an ruahman bawk.

Rorelna chuan Kumin inkhawmpui a intihsiakna tur thu leh hlate chu hman theih anih tak loh avangin kum 2021 inkhawmpui intihsiakna atan rin nghal mai nise an ti a ni.

Khawzawl Vengthar Bial SS Department inkhawmpui rorel ni hian Missions Department pualin thawhlawm khawn a ni bawk.

Unaunu Vanlalruati, Hermon kohhran a lawi chuan Kum 2019 January Ni 1 atang a bul tanin,

Pathian lehkhabu thianghlim Thuthlung hlui bu chu ziah chhuah hna a thawk a,

November Ni 3, 2020 hian ziak zo in,

Thuthlung hlui bu ziah chhuah nan hian Ball pen 85 a hmang zo a ni.

Tunlai hian Khawzawl Vengthar bial chhunga kohhran hrang hrang Tualte, Chawngtlai leh Hermon te chuan Biak in sak hnatlang an nei ngawrh hle a,

Vengthar kohhrante pawhin Biakl In thutthleng tha tak an nei thar bawk.

Kawnpui Bial

Kawnpui Bial SS Department inkhawmpui rorelna chu October ni 10 khan

Kawnpui Hmarveng Kohhran Biak In ah neih a ni a,

Kum 2021 inkhawmpui chu Kawnpui Banglaveng kohhran ah nghah a ni.

Rorelna chuan

Pastor Quarters thawm that nan Rs 3,000 Budget a ruahman a,

General S.S Executive Board rorelna bawhzuiin, NPSS leh Puitling SS zirtirtute tan zuk leh hmuama fihlimna kawnga hmalak nise an ti bawk.

Kawnpui Bial SS Department chuan kum 2021 Budget pumpui atan Rs 73,670/- a ruahman a ni.

KEIFANG BIAL

Keifang Bial chhungah mi thar sengkhawm mek zel an ni a,

October ni 18 Pathianni khan Unaunu C. Lalramsangi chu kohhran dang atangin, Bialtu Pastor C. Lalramnghaka’n Mizoram UPC ah a lawmlut.

Tawizo Kohhran ah pawh

Ni 18 zan khan Baptisma Rawngbawlna buatsaih a ni a,

Mi pathum in Bialtu Pastor C. Lalramnghaka kutah Lalpa Isua hmingin Baptisma an chang a ni.

Bialtu Pastor hian nausen pakhat Pathian hnenah a hlan bawk.

He mi zan vek hian Unaupa Ramthanpuia chu Kohhran dang atangin, Bialtu Pastor C. Lalramnghaka’n Mizoram UPC -ah a seng bawk a ni.

UPPER ASSAM FIELD

Upper Assam Field-ah October ni 21 Nilaini khan Tk.Lalsanglura Chaltlang te chhungkua kaltlanga Company khua a Crusade neih atangin, ringlo mi Pali (4) chhungkaw khat a mi leh kohhran dang atangin chhungkaw khat mi Paruk (6) te chu Mizoram UPC ah seng luh an ni a,

Lalpa lsua hming a baptisma chantir an ni.

Crusade neih kal zelah hian October ni 25 Pathianni khan Hindu sakhua atangin mi pakhat chu Lalpa Isua hminga Baptisma chan tir leh a ni a, Tirhkoh Itonyodu chuan he rawngbawlna hi a nei a, mithar hi Mizoram UPC-ah seng luh nghal a ni.

Tezpur Field-ah pawh November ni 1 khan mi thar pakhat chu Sessa-Panbari , Tezpur field, (Upper Assam bial chhung) hmunah sual ngaihdam nan Isua Krista hmingin baptisma chan tir a ni bawk.

SIAHA BIAL

October Ni 18 Pathianni khan Phura, Siaha Bialah Unaupa L.Laichai te nupa chu kohhran dang atangin Tk.K.Lalthansanga'n Mizoram UPC ah a senglut bawk.

BETHLEHEM BIAL

Bethlehem Bial SS Committee chu October ni 17 khan Zoar Kohhran Biak In, Republic Vengthlang ah an thukhawm a, Bialtu Pastor Rev. PC Parliana’n a telpui.

He meeting hi Upa, K. Tlanghmingthanga Chairman Bial SS Department chuan a kaihruai a,

Bial chhunga SS hmalakna tur hrang hrangte an sawiho a ni.

Bethlehem Bial Sunday School Department kum 2021 budget atan Rs. 110800/- (cheng nuaikhat singkhat zariat) a ruahman a,

Kum 2021 Bial Sunday School Department Inkhawmpui chu Bethlehem Vengthlang Kohhran ah nghah a ni bawk.

Kum 2021 inkhawmpui a intihsiakna tur buaipuitu atan Item Selection Committee din an rel bawk a ni.

Bial Committee chuan kum 2021 chhungin Sunday School Zirtirtute tan Training cum Seminar buatsaih nise a ti a,

2020 kum tawp Puitling Sunday School exam pawh tualchhung tin mahni remchan dan ang a kalpui mai nise an ti bawk a ni.

BILKHAWTHLIR BIAL

Bilkhawthlir Bial PYD chuan an din cham kum 25 na Silver Jubilee chu October ni 16-17 chhung khan Kualmawi Kohhran Biak Inah an lawm a, hripui leng avangin he hun hi a nawlpuia hmang lovin sawm bik mi tlemte an kalkhawm a, Rev Pc.Laltanpuia Secretary, General Missions Department chuan a telpui bawk.

Ni 16 (Zirtawp) zanah Jubilee hawnna leh Jubilee meidet inkhawm neih a ni a, Pastor Lalrinmawia Varte, bialtu Pastor chuan Jubilee hawnna neiin, Unaupa Lalnunpuia Pachuau, Bial PYD President chuan Jubilee mei det a chhi eng a ni.

Ni 17 (inrinni) chawhma dar 10 ah Jubilee dar vuak leh lungphun hawn inkhawm hman a ni a, bial PYD hruaitu lo ni tawh ten dar vuain, Rev.P.C. Lalṭanpuia, bial PYD President hmasa ber chuan Lung phun hawnna a nei a ni.

Chawhnu lamah hruaitu hluite puala inkhawmna hun buatsaih a ni a, he hunah hian bial PYD hruaitu lo ni tawh zawng zawngte hnenah chawimawina hlan niin, Jubilee Souvenir 'Rephidim' chu Pastor Lalrinmawia Varte, bialtu Pastor chuan a tlangzarh bawk.

Bilkhawthlir bial PYD hi October ni 17, 1995 khan din a ni a, Rev. PC. Lalṭanpuia Secretary General Missions Department chu Bial PYD President hmasaber a ni a, tunah hian PYD member 307 an awm mek a ni.

Chhattisgarh Field

Chhattisgarh Field-ah October ni 21 khan Kohhran dang atangin Pastor Chatrapal Das leh a member 12 te chu Lalpa Isua hminga baptisma chan tir an ni a, Missionary Ramesh Manikpuri chuan Mizoram UPC-ah a seng lut nghal a, Lawmluhte hi Damanadard khua a cheng an ni.

LUNGLEI 'S' BIAL

Lunglei ‘S’ Bial Kohhranpui leh Bial Department ṭangkawp chuan

October ni 16 (Zirtawpni) khan Bialtu Pastor Quarters ah Refrigerator ₹31,000 man an lei chu an dah.

October ni 16 zan khan Pastor Quarters ah Bial PYD Board an thukhawm a,

Upa J.Lalzekima, Bial PYD President chuan a kaihruai.

Bialtu Pastor, Bial Chairman leh General PYD Assistant Secretaty te chuan an telpui bawk.

November thla a Bial PYD puala fehchhuahna neih dan turte leh hmalakna tur pawimawh tak tak an rel a ni.

October ni 18 Pathianni chawhnu khan Pastor Quarters ah Bial Committee an thukhawm bawk a, Upa PL Biakmawia, Bial Chairman chuan kaihruaiin, Lunglei District Inkhawmpui Rorelna Lunglei 'S' Bialin a thlen tur chungchang leh thu pawimawh tak takte an ngaihtuah a,

Covid 19 hrileng avangin Lunglei District Inkhawmpui vawi 26 na chu Inkhawmpui pangngaia nei lovin November ni 6 (Zirtawpni) hian Ramthar Veng Kohhran Biakin, Lunglei 'S' Bialah rorelna chauh neih a ni ang.

Lunglei 'S' Bial chuan kum 2020 atan Sawmapakhat Target ₹ 28,00,000 an neih aṭangin October thla thleng hian ₹ 29,22,368 an chhunglut tawh a, General Missions Department ah Target ₹ 2,52,500 an neih aṭangin ₹2,01,110 an chhunglut tawh bawk a ni.

Niawhtlang Bial

Niawhtlang Bial ah The Blue Mountain Operation kalpui a ni a,

October ni 21 Nilaini khan, rawngbawlna nei tur in Niawhtlang III ah, Southern Zone Area Secretary Rev Ngurthanpara sailo a kal a, Hnahthial bialtu Pastor Rualthammawia, F. Lalneihthangi Asst Secrertary General PYD, Christina Lalremruati Missionary to China, Mimi Vanlalhriati kolasib, Tirhkoh Lalhmudika Mualthuam N, C. Lalawmpuia leh Lalnunpuii Aibawk te chuan an tawiawm.

He rawngbawlna hi ni 22 zan atang khan tan a ni a, Kohhran dang atangin mithar paruk lawmluh an ni a, a tuk ni 23 ah mithar pathum lawmluh leh an ni bawk.

Ni 23 Zirtawp zan atang khan T.Upa Lalkulhsanga te chhungkua chuan ran talhin Pathian hnena lawmthu sawina an nei a,

Rev Ngurthanpara Sailo chuan thuril rawngbawlna a nei a ni.

The Blue Mountain Operation kal zelah hian ni 27 Thawhlehni Khan Unaunu Tialbuaii te chhungkua chuan Pathian chawimawina an nei veleh a,

Area Secretary chuan rawngbawlna chhunzawmin,

kohhran dang atangin chhungkaw khat member 9 awmna chu Mizoram UPC ah sengluh leh an ni.

He Operation hi Niawtlang Bial chhung atan

October ni 28 Nilaini khan tihtawp rih a ni a, mithar 18 sengkhawm an ni.

Ti hian Niawhtlang bial ah kum 2020 chhungin Mi thar kohhran dang atang a seng tawh zat chu mi 46 an tling tawh a ni.

The Blue Mountain Operation chu Cheural Bialah chhunzawm a ni a,

Ni 28 Nilaini zan khan Cheural kohhranah mithar panga chhungkaw khat a mi chu Kohhran dang atangin Area Secretary Rev Ngurthanpara sailo chuan Mizoram UPC ah a lawmlut a, nau hlan rawngbawlna neiin, Nau pahnih Pathian hnenah a hlan a ni.

He rawngbawlna kaltlang hian ni 30 khan Thingfal Bialah mi thar pathum seng leh a ni a,

Ti hian The Blue Mountain Operation atangin Southern Zone Area-ah Mi thar 26 Mizoram UPC ah seng an ni.

Lower Assam Field

Ocotber ni 11 khan Lower Assam Field ah Kohhran thar pakhat formed a ni.

Kohhran thar hi Urguttu Kohhran tih a ni a, he lai hmunah hian Kumin March thla khan mithar 12 lawm luh niin, tun dinhmunah Chhungkaw 5, Member 24 te chu an lawi mek a ni.

Kohhran thar hi Unaupa Raska Hembrom chuan a enkawl dawn a, October ni 2 khan Lower Assam Field Committee chuan Field Meeting ah an lo nemnghet tawh a ni.

October ni 27 Thawhlehni khan Chandrapur Kohhran ah Unaupa Jakob Kisku rawngbawlna atangin Mithar 2 Mizoram UPC ah seng luh an ni a, Field Pastor, Andrew Singson chuan Isua Hmingin Sual ngaihdamna baptisma a chantir a ni.

Agra Field

Agra Kohhranah November ni 8 Pathianni khan Hindu sakhua ațangin chhungkaw 1 member 5 te chu Mizoram UPC-ah lawmluh an ni.

Lawmluh chhungkua nu ber hi hun rei tak ata tawh ramhuaiin a tih buai a ni a,

An sakhua Mandir leh puithiam tam tak rawna an beidawn hnuah,

Agra Kohhranin Tuikual Kohhran Aizawl ten sum an pek hmanga Crusade an buatsaih chu an chhim ve a, inkhawm service zawh hnuah Field Pastor KC Angelvena’n Pathian thute hrilhin,

Tawngtaina te a nei a, Pathian hnathawh lo thlengin, Lal Isua hmingin ramhuai chu hnawhchhuah a ni ta a ni.

Agra Field Pastor chuan an chenna in lamah kal chilhin thuril rawngbawlna a nei chhunzawm a, sim na leh sual ngaihdam na thu leh

Lal Isua chauh Pathian dik awm chhun a ni tih thute zirtirin, an nupa hian Lal Isua hmingin Baptisma chan tir an ni a, an fate pathum pawh Pathian hnenah hlan an ni bawk.

Hindu sakhua zuitute atanga beihna leh hekna a hluar thu Field Pastor KC.Angelvena chuan a sawi a, Kohhran hote tawngtai puina an mamawh hle a ni.

Vairengte Bial

Vairengte Bial Phainuam Kohhranah November ni 8 (Pathianni) vek khan mi thar pahnih (nupa) te chu Bialtu Pastor Rev HC Jacoba'n Kohhran dang atangin a seng bawk.