United Pentecostal Church
of Mizoram

General SS Department

General SS Department Executive Board chu November ni 18 Nilaini khan Conference Hall, General Headquarters Office-ah an thukhawm a,

Puipate Rev C.Lalremsanga General Superintendent, Rev Hc Lalthlamuana General Secretary leh Rev Gospelthanga General Treasurer-te chuan an telpui.

Rev F.Lalnghakliana, Chairman General SS department kaihhruai thukhawm chuan kumin chhunga Board meeting neih tawhte an thlir let a, kum 2023 PTSS zirlai tur leh a ziaktu tur thlanna an nei.

Kum 2023 PTSS Zirlai atan Exodus Lehkhabu thlan a ni a, buatsaih turin Rev Hc Lalthlamuana General Secretary chu ruat a ni bawk.

Meeting chuan kum 2021 atangin SS Hall sak tanpuina tihpun nise a ti a,

Rev Zoramthara ziak chawhnu zirbu chu Kum 2021 Naupang SS chawhnu inkhawm zirlai atan a thlang bawk.

Meeting-ah hian Seminar neih pui tura sawmna lo lutte thlirho a ni bawk a, hrileng avanga hun tawn mek thlir chungin bawhzui an tum a ni.

General PYD

Social Wing Committee General PYD bul tumin

mi bik chawimawina leh thisen pe ṭha lawmman semna buatsaih a ni.

November ni 14 (Inrinni) khan Conference Hall, General Headquarters Office-ah programme hi buatsaih a ni a, PYD member zinga hlawhtlinna chang leh Khawpui chhung bial PYD tana Social Wing Committee-in Blood Donation Camp-a buatsaih a Thisen pe thate hnenah chawimawina Citation hlan an ni.

He hun hi T.Upa H. Lalbiaksanga, Chairman SWC chuan a kaihruai a, Thisen Pek ṭulna tih thupui hmangin Mesak Vanlalthlana, Vice Chairman, SWC chuan thu a sawi bawk.

PYC member zirna leh eizawnna a hlawhtling mi 7 chu chawimawi an ni a,

Rev. Gospelthanga, General Treasurer, MUPC leh T. Upa Lalroenga, Ex-officio, SWC te chuan Citation an hlan a ni.

SWC in an chawimawi mi pasarih te chu:

i) T.Upa Dr. Zonunmawia, Durtlang Mualveng

Hlawhtlinna : Assistant Professor, Dept. of Pol. Science. PUC

ii) Dr. Daniel Lalawmpuia, Bethlehem Veng

Hlawtlinna : Assistant Professor, Dept. Of Economics, PUC

iii) Dr. Phoebe Lalremruati, Zonuam

Hlawhtlinna: Ph.D, Dept. Of Zoology, MZU

iV) Lalrosanga. Lawngtlai

Hlawhtlinna : ATI Topper, 2019

v) Emmanuel Lawmchullova, Diakkawn, Kolasib

Hlawhtlinna : M.Sc, Geography Gold medallist, MZU

vi) Malsawmliana, Vairengte.

Hlawhtlinna : ATI Topper, 2020

vii) Isaac Paul lallungmuan, Kangvai

Hlawhtlinna : Kum 12 mi lek ni a Class X passed te an ni.

Heng bakah hian

June Ni 27, 2020 (Inrinni)-a Civil Hospital Aizawl tana Thisen petu te, Khawpui chhunga Bial 9 leh Sairang Bialte hnenah Citation hlan a ni bawk a,

Dinthar Bial ten pe tam berin Unit 39 an pe a, Blood Donation Camp-a thisen pek zawng zawng hi Unit 264 niin, mipa 200 leh hmeichhia 64 an ni.

Citation sem zawh hian Upa Vanlaldinthara, President, GPYD hnen atangin fuihna thu ṭha tak ngaihthlak a ni bawk.

LAWNGTLAI DISTRICT

Lawngtlai District inkhawmpui rorelna tluang taka neih zawh a ni.

November ni 13 Zirtawpni khan Lawngtlai District Inkhawmpui rorelna chu

Upa C.Tialvunga, Lawngtlai District Secretary chenna In-ah neih a ni a,

Rev.R.Laldawngliana, bialtu Pastor chuan a kaihruai a ni.

Lawngtlai District inkhawmpui rorelna chuan

Kum 2021 District Inkhawmpui chu Lawngtlai bial-ah a nghat a,

"Kum 2021-ah Southern Zone-a District pathum Lawngtlai, Lunglei leh Siaha District-te chuan joint revival neih tura hmalak nise an ti bawk.

Kum 2022 ah Lawngtlai district din champha Kum 25-na (Silver jubilee) lawmna chu District huap a hman nise an ti a, Silver Jubilee celebration Organising committee din an rel bawk a ni.

District rorelna chuan "Ram Bei Committee (RBC) din chhunzawm zel nise a ti a,

Kum 2020-2021 budget atan ₹.30,000 (Singthum) a ruahman bawk.

Executive committee a thlen chhoh tur agenda pahnih an pass bawk a ni.

Serchhip District

Kum 2020 Serchhip District inkhawmpui pawh tluang taka neih zawh a ni a,

Kum danga vantlang inkhawm nena neih thin chu, hrileng avanga fimkhur na kalpui a ngaih tak avangin Online hmanga neih a ni.

Online kaltlanga rorelna inkhawm hi November ni 15 (Pathianni) khan neih a ni a,

District chairman Tirhkoh C.Lalhmingliana'n a kaihruai a, Rev C.Lalremsanga General Superintendent chuan a telpui bawk.

Rorelna hi Online-in Voice message hmanga neih a ni a, Agenda 15 chhawp chhuah zingah Pariat (8) chu pawm a ni a,

Kum 2021 budget atan Rs 130000/- (Nuaikhat leh singthum) chu an ruahman bawk.

Kum 2021 District inkhawmpui chu Lungpho Bial ah nghah a ni.

MANIPUR DISTRICT

Manipur District inkhawmpui rorelna November Ni 18 (Nilaini) hmanga neih chu tluang taka zawh fel a ni.

Kum 2020 District Inkhawmpui nghahna Senvon-ah Lockdown kalpui a nih avangin

Churachandpur Bial, Rengkai Kohhranah neih a ni a,

Revival inkhawm erawh hman theih a ni lo a ni.

Rorel palai an kal tha hle a,

Kum 2019 leh 2020 inkhawmpui inkara boralte sunna hun Pastor Alex Thangrolien, Imphal bialtu chuan a nei bawk.

Rorel ni hian Manipur District Inkhawmpui minute bu kum 2006-2019 chhung a mi chu Pathian hnena hlanna, District Superintendent Pastor Lalnunzama'n a nei a.

Ram thim pual thawhlawm lak khawm a ni bawk.

Rorel ṭan hma hian, kum 2019 leh 2020 inkhawmpui inkara member la lut tam ber Imphal bial hnenah lawmpuina hlan a ni a, mi thar 41 an sengkhawm a ni.

Manipur District inkhawmpui chuan

Kum 2021 District Inkhawmpui chu Senvon bialah a nghat a,

mithar lalut tam ber bial hnenah lawmman pek leh nise an ti a,

District rorelna chuan General lama thlen chhoh tur

tur agenda 4 an ruahman bawk a ni.

Manipur Dictrict chhungah hian,

Bial 4, Kohhran 18 awmin

Member 1,269 an awm mekin,

Upa & T.Upa mi 101 awmin, Ministerial Licence nei mi 23 an awm bawk a ni.

Manipur District chhungah hian Kum 2019 leh 2020 inkhawmpui inkarah

Mi thar 87 seng an ni bawk.

LUNGLEI DISTRICT

Lunglei District pawhin November ni 13 Zirtawpni khan Rorel Inkhawm Ramthar Veng Kohhran Biak inah an nei.

Upa PL Biakmawia, Lunglei District Chairman chuan rorel inkhawm a kaihruai a,

District Committee member ten ro an rel a ni.

Kum 2021 District inkhawmpui chu November Pathianni vawihnihna hmanga neih turin

Mualṭhuam 'N' Bial ah nghah a ni a,

Pentecostal Crusade Committee (PCC) rawngbawlna bawhzui zel dan turte leh

Financial Campaign neih te chu Lunglei District inkhawmpui rorelna langsar zualte an ni a,

General lama thlen chhoh tur Agenda 5 an passed bawk.

Lunglei District inkhawmpui chuan kum 2020-2021 Budget atan (cheng nuaikhat singsarih sanghnih zali sawmthum paruk) ₹172436 an ruahman bawk a ni.

Inkhawmpui rorelna ah hian

General Missions pualin thawhlawm ₹1820 lakkhawm a ni bawk.

Rorel Inkhawm neih zawhah hian District Committee an thukhawm nghal a,

Kum 2021-2022 Lunglei District Hruaitu thlanna neih hun turte an ruatfel a, Ministerial License dil tute Interview an neih pui bawk.

Lunglei District ah hian Bial 6 awmin, Kohhran 28 a ding mek a,

Kohhran Upa 91 leh Tual Upa 71 awmin, Ministerial License nei mi 18 leh Pensioner mi 2 an awm bawk.

Kumin chhungin Lunglei District chhungah Mi thar 89 sengkhawm an ni a, Lal Isua hminga Baptisma chang thar mi 101 an awm bawk.

Tun dinhmunah member hi 2463 an awm mek a,

Lunglei District chhungah hian Pathian chawimawina tum 22 kum 2019 leh 2020 inkhawmpui inkarah hian neih a ni bawk a ni.

Upper Assam

Upper Assam Mission field-ah mi thar seng khawm leh a ni.

November ni 15 Pathianni khan upper Assam Mission field chhunga Mesaki khua a chhungkaw khat member paruk awmna chu Kohhran dang atangin Company kohhranah seng an ni a,

Lawmluh takte chenna in thar chu Kohhran hoten Pathian hnena hlanna an nei nghal bawk.

KARBI ANGLONG FIELD

Karbi Anglong Field-a Phailong khuaah Kohhran dang atangin mi pahnihin Lalpa Isua hmingin Baptisma an chang.

November Ni 14 & 15 khan Tirhkoh Nelson Vaiphei te chuan Mizoram UPC la awm lohna Phailong khuaah rawngbawlna an nei a, Pathian thuthlung puanchhuahna te neiin, an khaw Lal fanu mal leh tlangval pakhat chuan Pathian thuthlung hmuin, Lalpa Isua hming in Baptisma an chang a, Field Pastor, Nelson Vaiphei chuan he rawngbawlna hi a buatsaih a ni.

Karbi Anglong Field a kohhran te chuan he lai hmunah hian ram lak beihpui thlak a, Kohhran a din ngei theih nan hmalak an tum mek a ni.

Tripura District

November ni 15 Pathianni khan Sabroom bial Bornorai-Kami kohhranah Hindu sakhua atangin mi pakhat chu Lalpa Isua hminga baptisma chantir niin, bialtu pastor Majenda Marak chuan Mizoram UPC-ah a seng lut bawk.

SAIRANG BIAL

Sairang bial PYD chuan Ni 17 Thawhlehni khan kum 25 an tlin champha Silver Jubilee lawmna hun an hmang.

Silver Jubilee lawmna hi Organising Sub committee-te dinin, Sairang Bial PYD chuan kum tir atang khan ropui taka neih tumin an ur lawk a, ruahmanna thui tak kalpui anih hnuah Covid 19 hrilengin harsatna a siam tak avangin tum lawk angin a lawmna hun an buatsaih thei lo a ni.

Sairang Bial PYD Silver Jubilee lawmna hi Sairang Headquarters Kohhran Biak In ah hman a ni a, Sawrkar leh Khawtlang VLTF te ruahmanna zawm chungin, Bial chhung a member sawm bikte chauhin he hun hi an hmang a,

T.Upa H.Laltanpuia Chairman, Silver Jubilee Organising Sub Committee chuan kaihruaiin, Bialtu Pastor C.Lalrosiama’n Silver Jubilee Lung phun hawnna a nei a, Bial chhung atanga ruat bik ten Silver Jubilee dar vuakna an nei bawk.

Sairang Kohhran Biak In ah inkhawmna hunserh hman chhunzawm a ni a, Bial PYD hruaitu lo ni tawhte chawimawina Citation hlan niin, Upa C.Malsawmsanga Chairman Bial Kohhranpui chuan Pathian thuchah a sawi a ni.

Bial hruaitu lo ni tawhte atangin thusawi tawi ngaihthlak a ni bawk a, Silver Jubilee lawmna thingpui ruai chu kalkhawmten inkhawm banah an kilho bawk.

LUNGLEI 'S' BIAL

November ni 15Pathianni khan Lunglei ‘S’ Chanmari Kohhran Missions Department te chuan Hrangchalkawn Kohhran an tlawh a, Bialtu Pastor B.Lalchhanhima’n hovin, member thahnem tak an feh chhuak. Hrangchalkawn Kohhran te nen inkhawmna hlim awm tak neiin, Chanmrai Chanmari Kohhran Missions Department te hian Dekchi an hlan bawk.

SIAHA BIAL

Siaha Bial chuan November ni 13-16 chhung khan Amotlah Kohhranah Bial huapin Revival inkhawm an hmang.

Revival hi ni 13 Zirtawp zan atang khan neih a ni a, Upa Lalthlamuana Hnamte, Chaltlang Aizawl leh Kohhran Driver unauap VL Khawngaihzuala ten an hmanpui a, Bial chhung a kohhran member thahnem tak kalkhawmin, Siaha District Superintendent Pastor Lalhmingsanga, Niawhtlang bialtu chuan a telpui bawk.

Revival inkhawm hi bialtu Pastor F.Lalthakima'n a kaihruai a, Tirhkoh Lalnunthara, Upa. Lalthlamuana Hnamte leh Pastor Lalhmingsanga ten thuhril rawngbawlna an nei a ni.

Inkhawmna neih apiangin

Amotlah khuaa Chanchin Tha meichher chhi ênga, a thihni thlenga rinawm taka Thuthlung vuantu, Unaunu C. Chite puala hla phuah 'Lalpa voh bik Chite,' tih hla chu Unaunu Lalramhmachhuani New Siaha chuan a sa thin bawk.

Amotlah kohhran ding thar lawmna leh Pathian chawimawina atan Upa Lalthlamuana Hnamte chuan Rs.60000/- (Sing ruk) Kohhrante hlanin, Ni 14 Inrinni khan Pathian faka inpawl hona an nei chhunzawm a, tlai lamah kalkhawm ten ruai an kil ho a ni.

Ni 15 Pathianni tlaiah Mual inkhawm nei lehin Upa C.Lalropuia Bial Chairman chuan a kaihruai a, Tk. Lalnunthara'n Pathian thu puan chhuahna a nei bawk.

He Bial huap revival Programme Ni 16 Thawhtanni thleng khan chhunzawm ani a, Siaha Bial chhunga kohhran mipui kalkhawm ten hlim takin an hmang a ni.

Revival chhung hian Unaupa Omega Lalhminghluna leh Unaunu Lalzaitinthangi New Siahate chuan zaia rawngbawlna an nei thin a ni.

Amotlah Kohhran tan Unaupa Cheitha-te chhungkua chuan Biak In hmun an pe.

Siaha Bial chhunga Kohhran ding thar Amotlah kohhranten Biak In hmun tur an neilo tih hriaiin, Unaupa Cheitha-te chhungkua chuan a thlawnin an chenna in leh ram chu biak in sakna atan an hlan a, "Biak in kan neih theihna tur a nih chuan keini chu di inah pawh kan awm mai ang," Unaupa Cheitha chuan a ti bawk.

Hetiang a kohhran hmangaihtu kan nei hi ropui kan ti hle tiin, Amotlah kohhrante chuan thuchhuah an siam a, an lawm hle a ni.

Kohhran tana mi inphal chhungkuate hi Upa Lalthlamuana Hnamte chuan ropui a tih em avangin, a ma mi mal sum atangin Rs.20,000/- (Sing hnih) a pe bawk.

Unaupa Cheitha in phal taka Biak In hmun ram a pek bakah hian, a bul maia ram pakhat chu Mizoram UPC Planing and Financial board kal tlangin Ni.16.11.2020 Thawhtanni lei belh a ni a, General aiawhin Upa Lalthlamuana Hnamte chuan ram leina atan Rs.2,80,000/-( Nuaih hnih leh sing riat) a hlan a ni.

Bial Sunday School:

Siaha Bial Sunday School; Board chu Ni 7 Inrinni khan New Siah East II Kohhran Biak Inah an thukhawm a,

Kum tawp Exam chungchang a hmalak dan turte an ngaihtuah a ni.

General SS board rorelna bawhzuiin, Kum 2020 Sunday School kum tawp exam chu November Ni 29 hian Bial chhung Kohhran ten an nei dawn ani.

Bial PYD Baord thukhawm pawhin,

Bial chhung preaching point pahnih New Siaha East II leh Amotlah Kohhran PYD-te hnenah Rs.3000/- (Sang thum) ve ve pek an rel bawk.