Area Secretary
Rev Dr.Ngurthanpara Sailo Area Secretary Southern Zone chu November ni 28 &29 Pathianni hmang hian Thingfal Bial tlawhin a feh chhuak ang.
Planning & Financial Board
Mizoram UPC Planning & Financial Board chu Ni 26 Ningani khan
Conference Hall General Headquarters Office-ah an thukhawm a,
P&FB Chairman Upa J.Lalramliana’n a kaihruai.
Meeting-ah hian rorelna sang zawk Executive Committee a thlen tur Agenda engemaw zat sawiho a ni a, Mizoram UPC Financial rules-te ennawnin, kum thar Budget turte an ruahman a ni.
P&FB thutkhawm ah hian Mizoram UPC Puipa te an telkim thei a ni.
General Missions Department
General Missions Department Executive Board chu November ni 27 Zirtawpni khan Conference Hall General Headquarters Office-ah an thukhawm a, Upa Sawihlira Chairman General Missions Department chuan kaihruaiin Puipate Rev C.Lalremsamga General Superintendent, Rev Hc Lalthlamuana General Secretary leh Rev Gospelthanga General Treasurer-te chuan an telpui.
Executive Board thukhawm chuan Kum 2021 Budget Estimate, Kum 2021 General Conference neih dan turte, General Board chungchangte leh Field hrang hrnag atanga Agenda lo lutte an ngaihtuah a ni.
General Missions Department Executive Board chuan kum 2021 General Conference chu Ocotber ni 4 Pathian ni hmanga neih nise an ti a, General Missions Conference thlen dilna hi February 2021 thla thleng Bial hrang hrang tan hun an hawng bawk.
November ni 4 a neih tura ruahman General Board thutkhawm, Lockdown avanga neih theih tak loh chu meeting chuan a ngaihtuah tha leh a, hrileng avanga kan hun tawn mek thlir chung leh, kum a tawp tak mai dawn avangin General Board chu kumin atan neih loh mai nise an ti a ni.
Missions Department Executive Board thukhawm chuan Filed hrang hrang a hmalak zel dan turte, thawktute enkawl dan turte an sawiho bawk a,
Kum 2021 General Missions Department Budget pumpui atan cheng nuai zahnih sawmnga pariat, singkhat sangli (Rs. 258.14 lakh) an ruahman a ni.
General SS Department
General SS Department ruahmannain November ni 29 Pathian ni hian ram pumah Puitling SS kum tawp exam neih ani dawn a, General atangin zawhnate hi Bial hrang hrangah thawnchhuah a ni a, Bial tin ten an mahni remchan dan angin exam hi an kalpui ang.
Kohhran thenkhat NPSS kum tawp exam nei tur engemaw zat an awm bawk.
Covid 19 hrileng avangin Kohhran thenkhat exam buatsaih theilo tur an awm bawk a. rualkhai taka Exam hi kalpui theih a ni dawnlo a ni.
ATI
Delhi kohhran chuan Mizoram UPC Bible zirna Apostolic Theological Institute hman atan sound system tha tak an pe.
Sound System hi Rs.45000/- man vel a ni a, Delhi Kohhran chungah ATI Staff leh zirlaite an lawm hle a ni.
Headquarters Bial
Headquarters Bial Bungkawn Kohhranah November 22 Pathianni zan khan kohhran dang atangin mithar pakhat seng a ni.
He lawmluhna inkhawm hi Kohhran Committee kaihhruainain Sr. Upa Chalmawia te chenna inah neih a ni a, mithar hi Kohhran chairman Upa FH Lalramliana'n Mizoram UPC-ah a seng lut a ni.
Headquarters Bial Sunday School Department Office Bearer-te chu November ni 23 khan an thukhawma, Kum 2020 Puitling Sunday School kum tawp exam chu neih ngei nise an ti.
Bial chhunga Kohhran thenkhatin kum tawp Exam hi online hmanga kalpui an tum a,
Online exam kalpui thei chiahlo te pawhin Kohhran intinah zawhna sem kuala exam kalpui turin ruahmanna an siam bawk.
General SS Department ruahman lawk angin November ni 29 Pathianni hian kum tawp Exam hi neih a ni ang.
Sabroom Bial
November ni 24 Khan Sabroom bial Maniram-kami ah Hindu sakhua atangin mithar 4 seng leh an ni a, bialtu Pastor Majendra Marak chuan Lalpa Isua hminga baptisma chan tirin, Mizoram UPC-ah a lawmlut a ni.
NIAWHTLANG BIAL
Niawhtlang Bialah ni 20 Zirtawpni Zan khan kohhran dang atangin Chhungkaw khat member 4 chu Niawhtlang Kohhranah Bialtu Pastor C. Lalhmingsanga'n a lawm lut a, nau hlan rawngbawlna neiin Naute pahnih Pathian hnenah a hlan nghal bawk.
A tuk ni 21 Inrinni Zing khan Kohhran dang atangin mi pakhat Bialtu Pastor hian Niawhtlang Kohhranah a seng leh bawk.
Niawhtlang Kohhranah hian ni 22 Pathian ni khan Baptisma khur hawn a ni a, Bialtu Pastor C.Lalhmingsanga’n rawngbawlna neiin, mi panga in Lalpa Isua hmingin sual ngaihdamna baptisma an chang a ni.
Pathianni tlai lamah Nau hlan rawngbawlna Bialtu Pastor C. Lalhmingsanga'n a neih chhunzawm a, nausen paruk Pathian hnenah hlan an ni.
Niawhtlang Kohhranah hian ni 23 Thawhtanni zan khan kohhran dang atangin chhungkaw khat member 3 te chu seng leh an ni a,
Ti hian Kum 2020 chhungin Niawhtlang bial ah mi thar 54 Mizoram UPC ah lawmluh an ni tawh a ni.
Tunlai hian Niawhtlang kohhrante chuan Pastor Quarter’s sak leh Biak in plaster hna thawkin, kohhran mipui hnatlanga thawkchhuak an thahnem thei hle a ni.
Niawhtlang III (km10) kohhranah pawh thalaiten hlimna an chang nasa hle a, chaw nghei tawngtaina chawlhkar khat chhung neiin, rawngbawlna a theih ang angin an kal pui mek a ni.
Senvon Bial
Senvon Bial Headquarters Senvon kohhran te chuan tunlai hian biak in sak hna ngawrh takin an thawk mek a, Mizoram UPC Planning and Financial Board in țanpuina chêng nuaikhat leh singnga a pêk hmangin a chung khuh hna leh țul dangte thawh mek a ni.
Senvon Kohhrante hian Christmas hma a Biak In hi luah hman ngei an tum a, Kohhranhote an phur hle a ni.
Kumin hian Senvon bialah mi thar 17 seng an ni tawh a, Sawma pakhat leh budget hrang hrang an neihte October thla khan an tlak vek tawh bawk a ni.
KOLASIB VENGLAI BIAL
Kolasib Venglai Bial Committee chu November ni 23 (Thawhtanni) khan Pastor Quarter’s ah an thukhawm a,
Kum 2021 a hmalakna tur hrang hrang an sawiho a ni.
Kum 2021 hi Kohhran siam thar kum anih angin, Bial chhunga Kohhran hrang hrangah Upa leh Tual Upa thlan a ni dawn a, chumi atana Upa leh T.Upa awm zat turte ruat fel niin, Kum 2021 -2022 chhungin Kolasib Venglai Bial chhungah Upa 26 leh Tual Upa 16 awm tura ruahman a ni.
Kolasib Venglai Bial ah hian Upa leh Tual Upa inthlanna chu January Ni 11-17, 2021 chhungin neih ani dawn a, Bial hruaitu inthlanna pawh January ni 18 2021 ah an nei bawk ang.
Bial Committee chuan Bialtu Pastor Rev P.Lalrinawma, Bial vawn hun chhung kum 5 a hman zawh dawn avangin, a thlahna hun buatsaih an rel bawk a, January ni 3, 2021 (Pathianni) ah Bial huapa thlahna hun hman a ni ang.
Kolasib Venglai Bial vawngtu thar Pastor lawmna inkhawm pawh January ni 10, 2021 (Pathianni) ah Covid 19 hrileng avanga hun tawn mek thlir chungin buatsaih an tum bawk.
PYD
Kolasib Venglai PYD te pawh tunlai hian sumtuak hnatlang an nei thin a, November Ni 26 khan ban khur laih hnatlang neiin Budget an neihte tlin ngei an tum hle a ni.
Kolasib Venglai LAD te chuan Biak in rawng hnawih thar nan Kolasib Venglai Kohhran Building Committee hnenah Rs.25000 an hlan a, Biak In rawng hnawih that hna hi tunlai hian Kohhran hoten an thawk mek bawk.
Khawzawl Vengthar Bial
Khawzawl Vengthar Bial, Neihdawn khaw chhungah November Ni 22 atang khan Pathian thuthlung puanna, bialtu Pastor Rev Saienga Sailo hoin Neihdawn Kohhrante chuan an nei a, an la chhunzawm mek zel a ni.
