General news
Mizoram UPC rorelna sang, Pastoral Board, Executive Committee thutkhawm leh Assembly rorelna December ni 7 atang hian neih a ni dawn.
Pastoral Board thutkhawm vawi 92-na hi December ni 7 Thawhtanni hian Conference Hall, General Headquarters Office-ah neih a ni dawn a,
Pastor transfer leh Posting chungchangte ngaihtuah a ni ang.
Heng bakah hian Ordination License dil leh Fixed pay Pastor lakna a written exam beitute Personal Interview an neih pui bawk ang.
Ni hnih awh, Executive Committee thutkhawm vawi 62-na chu December ni 8 leh ni 9 chhung hian, Conference Hall-ah neih chhunzawm a ni bawk ang.
A tuk ni 10 leh ni 11 hian Mizoram UPC rorelna sang ber General Assembly rorelna chu Armed Veng ‘S’ Kohhran Biak In ah Executive Chairman Upa Andrew Laldingliana kaihhruaina hnuaiah neih a ni thung dawn a ni.
Pastor lakna Exam
Mizoram UPC hnuaia Fixed Pay Pastor pahnih lakna Written Exam chu December ni 3 Ningani khan Conference Hall General Headquarters Office-ah neih a ni a, Diltu mi 17 awmin, mi 14 in exam an bei a, chhan hrang hrang avanga exam theilo mi pathum an awm.
Thawktu lakna exam neih hma hian hunserh hman a ni a, Mizoram UPC puipaten telpuiin, Rev C.Lalremsanga, General Superintendent chuan Exam hmachhawn turte hriat tur leh fuihna thu tawi a sawi a ni.
Exam beitute hian paper pathum chhangin, paper pakhat chhan nan Minute 40 hun siam a ni.
Fixed Pay Pastor lakna Written Exam hmachhawn tu mi 14 te hian December ni 7 a Pastoral Board thutkhawm hunah Personal Interview an hmachhawn leh ang.
SS Exam
Kum tawp SS exam chu November ni 29 Pathianni khan Bial hrang hranga kohhranten tluang takin an nei a, hrileng avangin Kum dang aiin Exam beitu erawh an tlahniam hle a ni.
Covid -19 avanga inkhuahkhirhna kalpui Khua ahte, Kohhran thenkhat exam buatsaih theilo an awm nual a, hriat theih chinah Biak In a exam kalpui thei an awm laiin, Online kaltlang leh mahni In lama zawhna chhang a tam zawk an ni.
Biak In sak nan pawisa pe
December ni 3 Ningani khan Unaunu Hrangchhungi M/o Upa Lalthlamuana Hnamte, Chaltlang chuan Falkland Kohhran Zemabawk Bial, Biak In sak nan cheng nuaikhat (1 Lakh) General Headquarters Office-ah kalin a hlan a, Puipate Rev C.Lalremsanga General Superintendent leh Rev Gospelthanga General Treasurer-te chuan an lo dawng a ni.
Falkland Kohhranah hian General PYD rawihin, Tirhkoh Lalnunthara Ralte chuan rawngbawlna a nei meka, Kohhran puitling ding tawhin, tunah hian Kohhran member mi 74 an awm mek a ni.
SIAHA BIAL
Siaha Bial Committee chu
November Ni 27 Zirtawpni khan New Siaha Kohhran Biak Inah an thukhawm a,
Bial chhung hmalakna tur pawimawh tak tak sawiho a ni.
Siaha Bial Committee chuan New Siaha East II Preaching point chu, Bial Inkhawmpuiin thuneihna a pek angin Kohhran puitlingah hlankai a rem ti a, Kohhran hlanna inkhawm hi December ni 27 ah hman a ni dawn a, hemi rual hian New Siaha East II Biak In Pathian hnena hlanna neih a ni bawk ang.
Amotlah Kohhran erawh Preaching point a la nih chhunzawm dawn ani.
Kum 2021 Siaha Bial leh Tualchhung hruaitu thlanna chu February, 2021 hmaa inthlanna neih fel nise an ti a,
Bial chhung Amotlah leh Phura hmunah kum 2021 atan rawngbawltu Tirhkoh dah tura hmalak nise an ti bawk.
Siaha Bial Committee chuan
Kum tawp bial sum Audit neih hun atan January Ni 15, 2021 a ruat a ni.
Meeting-ah hian Amotlah Preaching point Biak In sak bul tan nan a,
Upa.Lalthlamuana Hnamte Chaltlang Aizawl in Rs.1,00,000/- (Nuaihkhat) a pek chu Amotlah kohhran hruaitute hnenah Bialtu Pastor F.Lalthakima’n a hlan nghal a ni.
Ruantlang
Ruantlang Bial chuan tunlai hian Pastor Quarters an sa mek a,
November ni 28 khan Bial huap hnatlang neiin Slab an chhung a,
Ruantlang Kohhran mipui bakah Bial chhung atangin Melbuk leh Zotlang Kohhran hruaitute leh member thahnem tak an thawkchhuak a ni.
Hnatlang ei in atan Unaunu Khawmpuithangi, Melbuk leh unaunu Lalmingchhuani Melbuk te chuan bawnghnute leh pawisa thannem tak an pe bawk.
In sakna Bungrua phurh saka, phal taka hmanrua hawh tirtute chungah Ruantlang Bial te an lawm hle a ni.
Kawnpui Bial
Kawnpui Bial Committee chu November ni 30 khan an thukhawm a,
Bial chhunga hmalakna tur hrang hrangte an sawiho.
New Khamrang biakin hmun tur leina atan a, Bial hruaituten General Headquarters a sum an dil chu pawmpui a ni a,
Bial chhung atanga ATI luh dil leh
Tirhkoh License renew dilte chu recommend nise an ti bawk.
Kum 2021 Hmarthlang District inkhawmpui Kawnpui Bial a nghah chu,
A thleng duh Kohhran te tan dilna hun hawn a ni a,
Hmarthlang District inkhawmpui thlen dilna hi January 2021 thla chhung hawn a ni.
Meeting chuan Kum 2021 hi inthlan kum anih angin, kohhran leh bial hruaitu thlanna chu
January ni 23 Inrinni hmaa zawh fel nise an ti a, hrileng avanga fimkhurna kalpui a ngaih avangin Kohhran tin te chu Khawtlang inkaihhruaina zawm chunga inthlanna buatsaih turin a ngen bawk.
Kawnpui Bial ah hian Upa 24 leh Tual Upa 19 an awm mek a ni.
Chhattisgarh field
December ni 2 khan Chhattisgarh Field-ah kohhran dang atangin mi pali (4) te chu Lalpa Isua hminga Baptisma chantir an ni a, Mizoram UPC ah seng luh an ni.
Thingfal Bial
November ni 29 Pathianni khan Thingfal kohhranah mi thar pahnih seng leh an ni a, Rev Dr. Ngunthanpara Sailo, Area Secretary chuan Mizoram UPC-ah a lawmlut a ni.
DURTLANG BIAL
November ni 29 Pathianni Chawhma khan, Durtlang Mel-5 Kohhran Biak Inah Durtlang Bial Silver Jubilee Souvenir tlangzarh a ni.
Souvenir tlangzarh Inkhawm hi Upa Vanlaldinthara, Chairman, Silver Jubilee Organizing Committee leh Souvenir Committee Chairman ni bawk chuan a kaihruaia, Rev C. Lalawmpuia, Durtlang Bialtu Pastor chuan hmanpuiin, hunserh a hmang.
Unaupa K.Lalthanpuia, Secretary, Silver Jubilee Organizing leh Souvenir Committee in report a pe a, Unaupa John Zothansanga'n Souvenir Preview-na a neih hnuah, Upa Lalnunsanga, Bial Chairman chuan Silver Jubilee Souvenir a tlangzarh a ni.
He inkhawm tawiah hian Upa Lalduhsaka, Bial Secretary leh Treasurer hmasa ber ni bawk hnen ațangin Jubilee thuchah ngaihthlak zui a ni.
Souvenir tlangzarhna inkhawmah hian Durtlang Bial Kohhran hruaitu hmasa berte
Rev. Vankhuma
Bialtu Pastor hmasa ber
Upa Liantawna
Bial Chairman hmasa ber
leh Upa Lalduhsaka
Bial Secretary & Treasurer hmasa ber te chu
chawimawina Citation hlan an ni.
