United Pentecostal Church
of Mizoram

Mizoram UPC General Missions Department inkhawmpui lian chu vawiin khan Bethlehem Vengthlang kohhran Biak Inah neih a ni a, Covid 19 hrileng avangin kum danga revival inkhawm nena hman ṭhin chu kumin hian ro rel inkhawm hmang chauhva neih a ni.

General Missions Dept. Inkhawmpui ro relna hi Chairman Upa Sawihlira’n a kaihruaia, Executive Chairman Upa C.Lalropianga’n inkhawmpui hlanna neiin, General Missions Department Secretary Rev PC Laltanpuia leh Upa K.Rosangzuala, Treasurer te hnen atangin report ngaihthlak a ni bawk.

.

Inkhawmpui ro relna ah hian Department hmalakna tur pawimawh tak tak sawiho niin, kum 2023 inkhawmpui neih hun turte leh nimin lama General Board thu pass te chu thurel langsar zualte an ni.

Mizoram UPC General Missions Department inkhawmpui hi kum khat dana neih ṭhin a ni a, inkhawmpui ro relna chuan kum 2023 inkhawmpui neihna hmun tur chu General Board ngaihtuah atan a daha, nimin lama General Board-in Upper Assam Field hmun hnihah then nise a tih pawh inkhawmpui ro relna hian a pawmpui bawk. Heng bakah hian Area pahnih North Eastern Area leh Eastern India Area General Board-in hmun hnihah then an rel chu inkhawmpui hian a pawmpui bawka, Mizoram UPC ro relna sang ber General Assembly ah ngaituah leh tur a ni ang.

Mizoram UPC General Missions Department inkhawmpui lian ro relna hi Mizoram UPC Puipate

Upa C.Lalropianga Executive Chairman, Rev C.Lalremsanga General Superintendent, Rev HC Lalthlamuana General Secretary leh Rev PB Lalhmuliana General Treasurer ten an telpui a, vawiin ni vek hian inkhawmpui hi a tiak a ni.