United Pentecostal Church
of Mizoram

GENERAL HEADQUARTERS HRUAITUTE PROGRAMME

Upa C.Lalropianga Executive Chairman chuan Hmartlang District inkhawmpui November ni 6 Inrinni a Kawnpui Biala neih tur a hmanpui ang.

Rev. C.Lalremsanga General Superintendent chu November ni 5 Zirtawpni khan Ramthar District inkhawmpui Barak Valley Bial Ankhasuah hmuna neih tur hmanpui turin a zin chhuaka, Rev Gospelthanga Bazar Bialtu in a tawiawm.

General Superintendent hi November ni 9 Thawhlehni hian Aizawl a lo let leh ang.

Rev. HC Lalthlamuana General Secretary pawh November ni 3 Nilaini khan Manipur District inkhawmpui hmanpui turin Saikot Bial panin a zinchhuaka, November ni 8 Thawhtanniah a lo let leh ang.

Rev PB Lalhmuliana General Treasurer chu Siaha District inkhawmpui hmanpui turin November ni 4 Ningani khan a zin chhuaka, ni 8 Thawhtanni ah a lo let leh ang.

Rev PC Laltanpuia Secretary General Missions Dept chu November ni 3 Nilaini khan Lawngtlai District inkhawmpui hmanpui turin a zin chhuaka,  Ni 4 Ningani khan inkhawmpui hi hman niin General Missions Dept Secretary hi

ni 6 Inrinni hian Aizawl a lo let leh a ni.

Rev Ngurthanpara Sailo, Area Secretary Southern Zone pawh Tripura District inkhawmpui hmanpui turin November ni 5 Zirtawpni khan a zin chhuak. Area Secretary hi November ni 11 Ningani hian a lo let leh ang.

Mizoram UPC hnuaia District parukah inkhawmpui neih mek a ni a, puan tawh angin General Headquarters hruaituten an hmanpui vek a ni.

Puipa meeting

Puipa committee ni 29 Zirtawpni a thukhawm chuan General Assembly ro rel inkhawm ni hnih awh tur programme hetiang hian a ruahman. December ni 9 Ningani ah ro rel inkhawm neih tur a ni a, ro rel hlanna leh thusawina hun Rev C.Lalremsanga General Superintendent-in a nei a nga, he hunah hian Rev HC Lalthlamuana General Secretary-in Ministerial Licence hlanna a nei bawk ang.

General Assembly ni hnihna December ni 10 Zirtawpni ah hian ro rel hlanna leh thusawina Rev PC Laltanpuia, Secretary General Missions Dept-in a nei a nga, mitthi sunna Rev PB Lalhmuliana General Treasurer-in a nei bawk ang. Ro rel thawh hnihna ah hian Ordination Service Rev C.Lalremsanga General Superintendent-in a buatsaih dawn a ni.

General Assembly ro rel inkhawm hi Mizoram UPC Executive Chairman Upa C.Lalropiangan a kaihruai dawn a, Home Mission leh Foreign Missions pualin thawhlawm lakkhawm a ni ang.

Foreign Mission Board

Foreign Missions Board October ni 29 Zirtawpni a Conference Hall-a  thukhawm chuan, Myanmar rama thawktu harsatna tawk mek Pastor Daipiangthanga te chhawmdawl dan tur leh Shan Field Tangyan Township-a Crusade buatsaih dan turte an sawiho a, Matupui Myanmar Field a kan thawktu, Pastor Daipiangthangate chuan Myanmar ramin buaina atawh mek avangin harsatna an tawk nsa hle a, an awmna hmunah buhfai lei tur a awm mumal tawh lova, a awm chhun pawh a man a to tawh

em avangin Foreign Missions Board chuan chhawm dawlna cheng sangnga pek nise an ti a, General missions Dept. Chairman Upa Sawihlira’n tanpuina sum cheng sangnga a thawh nen avaiin cheng singkhat thawn an rel a ni.

Heng bakah hian Myanmar ram Shan field a Tangyan township-ah Crusade buatsaihna tur atan cheng singkhat sangnga Foreign missions crusade fund atanga pek an pass bawk.

Tangyan township hmuna Crusade buatsaih turah hian thingtlang khaw lam atanga crusade hmang tur zawng zawngte chu rambuai avangin Tangyan kohhran biak in ah riah luh tir vek an ni tawh a ni.

Myanmar ram buaina avang hian kohhran hote pawhin harsatna an tawk meka, tawngtaipui an ngai hle a ni.

L&PB

Literature & Publication Board chuan November ni 2 Thawhlehni khan lehkhabu tlangzarh inkhawm Conference Hall-ah an neia, he hunah hian lehkhabu pahnih ‘Maranatha’ Rev Thangliansanga ziah leh ‘A ti tlata’ Rev R.Laldawngliana ziahte chu

Rev C.Lalremsanga General Superintendent chuan a tlangzarh. Lehkhabu tlangzarh inkhawm hi L&PB Chairman Rev C.Liansanga’n a kaihruaia General Treasurer Rev PB Lalhmuliana’n hunserh hmangin unaunu Malsawmdawngliani, Bungkawn chuan zai rawngbawlna a nei a ni.

‘A ti tlata’ tih lehkhabu hi Upa F.Vanlachama’n khuh hawnna a neia, ‘Lalpa'n a tih tlat chuan keini a siam mihringte chuan kan tih tlat a ṭul tih thu leh Lalpa'n kan chhandamna tura a tih tlat hi ṭul ka ti tlat lo kan lo ti ve tur a ni lo, tih thute ngaihthlak a ni.

Maranatha tih lehkhabu chu Rev HC Lalthlamuana General Secretary chuan khuh hawng velehin, hun hnuhnung ziahna lehkhabu zoram mipuite mamawh chhiar tur kan nei hi a hlu hlea, chaklo chung pawha chhiar zawh hram ngai khawpa hlu a ni, a ti.

L&PB buatsaih lehkhabu tlangzarh inkhawm hi Rev Vanlalsipaia’n tawngtaina in a tin a ni.

‘A ti tlata’ tih hi Rs.100 man a ni a,

Maranatha hi bu khat Rs.200 a ni bawk.

Mizoram UPC bookroom-ah lei theih reng a ni e.

Education Board

Education Board November 3 Nilaini a, Conference Hall-a thukhawm chuan Board hnuaia sikul enkawlna leh kaihhruaina turte, Sihhmuia sikul building sak mek hmalak chhun zawm dan turte an sawiho a, Kum 2022 Budget an ruahman bawk.

Mizoram UPC Education Board meeting hi Upa Lalnuntluanga Chhangte Board Chairman chuan a kaihruaia, Mizoram UPC puipa ten an telpui a ni.

Education Board chuan November 4 Ningani khan Executive Chairman Upa C.Lalropianga hovin, Sihhmui a School building sak mek an tlawha, Bethani Childrens Home Superintendent-in lo dawngsawngin, hmalak zel dan turte an sawiho a ni.

Assembly Centre

General Assembly hmanna tur Pandal sak tan mek a ni.

Kumin Mizoram UPC inkhawmpui lian ber thlengtu Bawngkawn Bial chuan November ni 4 Ningani khan Assembly Organising Committee kaihhruaina hnuaiah Assembly Centre, Zonuamah Pandal sain hnatlang an nei a, bial chhung atangin thawk chhuak an thahnem hle.

Pandal sak tan hma hian inkhawm tawi buatsaih a ni a, Organising Chairman Upa H Lalrintluanga’n a kaihruaia hunserh Rev. F Lalnghakliana’n a hmang a ni. Pandal sak hnatlangah hian Bawngkawn Bial, Chawlhhmun Bial leh Pandal Structure Committee Bawngkawn Bial pawn a mite nen mi 83 an thawkchhuaka, hemi ni hian a relpui sak zawh a ni.