General Missions Department
General Missions Department Executive Board chu, November ni 8 Thawhtanni khan Mizoram UPC Conference Hall-ah an thu khawm a, Mizoram UPC Executive Chairman Upa C.Lalropianga’n a tel pui.
General Missions Dept. Chairman Upa Sawihlira kaihhruai meeting-ah hian kum 2022 budget ruahman a ni a, General Missions Department Manual siam that ngai, endiktu tura ruatten rawtna an thlen chu thlir ho a ni bawk a; kum tawpa Mizoram UPC Executive Committee-ah ngaihtuah leh atan chhawp chhuah tura dah a ni.
Heng bakah hian Ministerial License renew chungchang te, Field hrang hranga hma lakna tur pawimawh tak tak leh, General Missions Department hnuaia thawktute hamthatna tur hrang hrangte an sawiho bawk a ni.
HMARTHLANG DISTRICT
Hmarthlang District inkhawmpui vawi 26-na chu Kawnpui Banglaveng kohhranah November ni 5 atanga ni 7 Pathianni hmang khan tluang taka neih zawh a ni.
District Superintendent Rev HC Jacoba kaihhruaina hnuaiah inkhawmpui hi hman a ni a, Pathianni chawhma inkhawmah District Treasurer Pastor Lalrinmawia Varte chuan member boral mi 9-te
sunna hun serh a hmang a, Bairabi bialtu Pastor T. Laldingliana chuan thu hril rawng bawlna hun a hmang a.
Pathianni chawhnu inkhawmah, inkhawmpui palai kum 70 chin chung lam kal mi 2-te chawi mawina hun hman a ni a, Kolasib Diakkawn bialtu Rev. Lalparvula hnen atangin Pathian thu chah ngaihthlak a ni.
Inkhawmpui chhung hian Sawrkar SOP-in zai a khap avangin zai hona neih theih ni lo mah se, inkhawm apiangin thlarau lam hlapui an rem thin a, zai thiamten zaia rawng bawlna hun an hmang thin bawk a ni.
Hmarthlang District inkhawmpuiah hian Inrinniah District Chairman Upa VL Thafala kaihhruaiin ro rel inkhawm neih a ni a, District Secretary Upa R. Lalmalsawma leh District Treasurer Pastor Lalrinmawia Varte te hnen atangin report ngaihthlak a ni.
Hmarthlang District inkhawmpui ro relna chuan Mizoram UPC ro relna sang zawka thlen tur agenda eng emaw zat an pass a, Mizoram UPC Executive Chairman Upa C.Lalropianga’n inkhawmpui ro rel hi a hmanpui a ni.
Kum 2022 Hmarthlang District inkhawmpui chu Kolasib Venglai Bialah hman a ni ang.
MANIPUR DISTRICT
Manipur District inkhawmpui Saikawt Biala nghah chu, November ni 5 atanga ni 7 chhung khan Saikawt kohhran biak inah hman a ni.
Inkhawmpui chhung hian District Superintendent, Pastor Lalnunzama’n Pathian biak inkhawm a kaihruai a, thlarau lam hla nen revival boruak tha tak hman thin a ni a,
Imphal bialtu Pastor PC Lalliansanga te, General Secretary Rev HC Lalthlamuana leh ATI Lecturer Rev HT Vanlalengmawia-ten thu hril rawng bawlna hun an hmang a; Unaunu Lalhmudiki’n zaia rawng bawlna hun a hmang thin bawk.
Pathianni chawhma inkhawmah Churachandpur bialtu Pastor Alex Thangrolien-a’n boral tate sunna hun serh a hmang a.
District chhunga Tirhkohte chu General Secretary Rev Hc Lalthlamuana’n seminar a neihpui bawk.
Manipur District inkhawmpui ro rel hi Nov.6 Inrinni khan, District Chairman Upa Lalvullien kaihhruaina hnuaiah neih a ni bawk a, Kum 2022 Manipur District inkhawmpui chu Imphal bialah an nghat.
Kum 2022 chhunga member la lut tam ber bial hnenah lawmman pek leh ni se tih te, General Assembly-a thlen tur rawtna thenkhat leh, kum 2022 budget te chu ro rel langsar zualte an ni.
Manipur District inkhawmpuiah hian, Imphal bial L. Phaikot hmuna voluntary missionary Tirkoh Marshall S. Mangminthanga chu District hminga Tanpuina hlan a ni.
Muolvaiphei hmuna tih dam rawng bawlna nei mek Unaunu Lalnunnemi leh, Imphal biala voluntary-a rawng bawl Tirhkoh Marshall Mangminthang te chu, General Headquarters relief fund atangin chhawmdawlna thil pek, General Secretary Rev Hc Lalthlamuana’n a hlan bawk.
Manipur District inkhawmpuiah hian District-in a lo rel tawh angin, Pastor bial zinga mi thar lawm lut tam ber Churachandpur bialte hnenah lawmpuina thil pek hlan a ni a, Churachandpur bialah hian inkhawmpui leh inkhawmpui inkarah mi thar 16 Mizoram UPC-ah lawm luh an ni.
NORTH BENGAL FIELD
North Bengal Field Conference vawi 4-na tluang taka hman zawh a ni.
North Bengal Field-a kohhran 10 te chuan, November ni 4 atanga ni 6 chhung khan Dangapara hmunah Field Conference an hmang a, palai 200 vel an kal khawm.
North Bengal Field Conference hi Area Supervisor Pastor Andrew Singson te, Kolkata Field atangin Pastor Vanlalchama te chhungkua, Sikkim Field atangin Pastor Lalmuanpuia Vaiphei te chhungkua leh, Guwahati Field atangin Tirhkoh Laldinsanga te nen member thahnemngai eng emaw zatin an hmanpui a, an hnen atang hian Pathian thu chah ngaihthlak niin, thlarau lam boruak nung tak nen hlim takin hun an hmang a, Lalpa Isua hmingin mi pahnih baptisma chantir an ni bawk.
Conference hman a nih theih nan hian North Bengal Field chuan General Headquarters atangin tanpuina sum an dawn bakah, Pu C.Lalramsanga Government Complex leh Upa Hmingchungnunga Venghlui te chhungkua chuan pawisa an pe bawk a, North Bengal Field-te an chungah an lawm hle a ni.
RAMTHAR DISTRICT
Ramthar District Conference vawi 11-na chu Barak Valley Bial, Ankhasuo Mizoram UPC Biak Inah November ni 5 atanga ni 7 chhung khan neih a ni a, Mizoram UPC General Superintendent Rev.C.Lalremsanga’n a hmanpui.
Inkhawmpui chhung hian Pathian biak inkhawmah Tirkoh Lalramzuala, Muallien, NC Hills Bial te; Pastor R. Lalnunthara, Shillong Bial Pastor leh, Mizoram UPC General Superintendent Rev. C. Lalremsanga-ten thu hril rawng bawlna hun an hmang a, Pathianni chawhmaah General Superintendent hian member boralte sunna hun serh a hmang a, Pathianni chawhnu inkhawmah Bazar bialtu Rev. Gospelthanga’n sacrament
rawng bawlna neiin hun a hmang bawk.
Ramthar District inkhawmpui ro rel inkhawm chu Ni 6 Inrinniah District Chairman Upa Jangkholen kaihhruaina hnuaiah neih a ni a, kum 2022 District inkhawmpui chu Shillong bialah nghah a ni.
Inkhawmpui chhung hian, Unaunu Mimi Vanlalhriati, Unaupa Sinlunga, Unaunu Baula Traite, Unaunu Elina Traite leh Unaupa Amita-ten zaia rawng bawlin hun an hmang a, Pathianni tlaiah Pastor W. Amenthanga, Barak Valley Bialtu chuan Lalpa Isua hmingin mi pathum baptisma a chantir bawk a ni.
Inkhawmpui a tiah hnuah Thawhtanni khan Unaupa Lalnghinglova te chuangkuain Pathian hnena lawm thu sawiin ruai buatsaih a ni a, inkhawmpui palaite pawh cham chhunzawmin, General Superintendent Rev C.Lalremsanga leh Bazar bialtu Rev Gospelthanga-ten thu hril rawng bawlna hun an hmang a ni.
Lawm thu sawi inkhawm hi Pathian thlarau awmpuina hnuaiah hlim takin an hmang a ni.
Tripura District
Tripura District inkhawmpui pawh November ni 5 atanga ni 7 chhung khan Darchawi kohhranah hman a ni a, Southern Zone Area Secretary Rev. Ngurthanpara Sailovin an District inkhawmpui hi hmanpuiin, inkhawmpui chhung hian thu hril rawng bawlna hun a hmang.
Tripura District inkhawmpui ro relna chuan General Headquarters Office atanga circular lo thlengte chu District Supervisor-in kokborok tawnga letin, a thawn darh thin ang tih leh, Executive Committee leh General Assembly-a thlen tur thil thenkhatte an rel a, kum 2022 budget an pass bawk.
Kum 2022 Tripura District inkhawmpui chu Kanchanpur bialah hman a ni ang.
