United Pentecostal Church
of Mizoram

General Treasurer Rev PB Lalhmuliana chu November ni 21 Pathianni hian Sairang Bial W.Serzawl kohhran a tlawh dawna, thuhril rawngbawlna a nei ang.

General Missions Department Secretary Rev.P.C.Laltanpuia chu November ni 20 Inrinni hian, Missions Campaign nei turin Champhai leh Ruantlang Bial tlawhin a zin chhuak a, Ni 22 Thawhtanniah Aizawl a lo let leh ang.

General Headquarters thu thar:

General Assembly hmanna tur Pandal sak zawh a ni.

Kum 2021 Mizoram UPC ro relna sang ber General Assembly hmanna tur Pandal chu November ni 4-a Assembly Centre, Zonuamah sak tan chu, a thlengtu Bawngkawn Bial Organising Committee-te kaihhruaina hnuaiah November ni 16 Thawhlehni khan sak zawh a ni .

Kumin hian revival inkhawm tel lova hman tur a nih avangin kum dang aia te zawkin Pandal hi rel a ni a,

70x76 feet a liana sak a ni.

General Assembly hi November ni 9 & 10 chhung hian hman a ni ang.

General Sunday School Department

General Sunday School Department chuan kum 2022 Puitling zirlai bu chu lei theih turin a ti chhuak ta. Nakkum Puitling zirlai tur hi Tirhkohte Thiltih Zirna a ni dawn a, a ziaktu hi Mizoram UPC Bible School Apostolic Theological Institute-a Lecturer Rev Vanlalsipaia a ni a, a bu chhungah hian zirlai 38 awmin, Mizoram UPC bookroom-ah bu khat Rs. 70-a lei theih a ni.

General SS Dept chuan kum 2022 Naupang zirlai bu tur pawh a peih fel tawh bawk a, Mizoram UPC Bookroom-ah lei theih reng a ni.

Planning & Financial Board

Planning & Financial Board chu November ni 17 Nilaini khan, Mizoram UPC Conference Hall-ah an thu khawm a, Chairman Upa Lalzirliana kaihhruaina hnuaiah Mizoram UPC kohhran hma lakna tur pawimawh tak takte relin, sum sanction ngaite sawi ho a ni.

Planning & Financial Board meeting chuan Assembly Centre Committee hnenah Office Building sak chhunzawmna tur sum sanction a rem ti a,

Mizoram UPC Press Board, Media & Publicity Board leh Shillong Bial Pastor Quarters property lei chungchangte an rel bawk.

Heng bakah hian General Missions Dept. atanga Budget siam rem an dilna te chu Planning & Financial Board hian a pawmpui a, Kum 2022 Mizoram UPC kohhran budget pumpui ruahman chu thlir hovin, Ro relna sang zawk Executive Committee-a thlen chhoh atan an pass-a; hei hi Mizoram UPC ro relna sang ber General Assembly-ah la ngaihtuah leh tur a ni ang

Siaha District

Siaha District inkhawmpui vawi 24-na, November ni 6 Inrinnia New Siaha East II kohhran biak ina neih chu tluang taka hman zawh a ni a, General Treasurer Rev. PB.Lalhmuliana’n a ho a ni.

Siaha District inkhawmpuiah hian Pathian biak inkhawm tel lova ro relna chauh neih a ni a, District Chairman Upa B. Darchuha’n ro rel inkhawm a kaihruai.

Siaha District inkhawmpui ro relna chuan, kum 2022 District inkhawmpui chu Cheural bialah a nghat a, kum 2022-ah District revival neih an rel bawk. Heng bakah hian, Siaha District Crusade Committee (SDCC) pual atan Bial tinah budget siam ni se tih leh, General Assembly-a thlen tur thil thenkhatte rel a ni.

Hmarchhak District

Hmarchhak District inkhawmpui chu, ni 14 Pathianni hmang khan Dutlang Mel-5 kohhran biak inah tluang taka neih zawh a ni a, General Sunday School Department Secretary Rev B.Lalchhanhima’n a hmanpui.

Hmarchhak District inkhawmpui hi ni 13 Inrinni khan ro relna hmanga neih tan a ni a, District Chairman Tirhkoh Lalsanglura’n ro rel inkhawm a kaihruai.

District ro relna chuan kum 2022 District inkhawmpui chu Zemabawk bialah a nghat a, kum 2022 atan District hminga Tirhkoh rawih chhunzawm zelte an pass bawk.

Heng bakah hian General Assembly-a thlen turin, Bawngkawn bial leh Zemabawk bialte chu bial hniha then ni se tih te, General Assembly thlengtu puihna tih san rawtna te, bial inkhawmpui a ruala hman vek tawh ni se tih te rel a ni.

Kum 2022 budget an ruahman bawk.

Hmarchhak District inkhawmpui hi ni 14 Pathianniah, Pathian biak inkhawm neia chhunzawm a ni a, District Superintendent Rev.V Rothuamluaia’n inkhawm a kaihruai a, Pathianni chawhma inkhawmah General Sunday School Department Secretary Rev.B.Lalchhanhima’n thu hril rawng bawlna hun a hmang a, chawhnu lamah Chaltlang bialtu Rev.B.Kapmawia hnen atangin Pathian thu ngaihthlak a ni bawk.

Pathianni chawhma inkhawmah hian Upa Lalthlamuana Hnamte chuan General Missions Department pual atan thawhlawm appeal neiin, thawhlawm cheng sing thum sang kua za ruk sawm hnih (Rs.39,620/-) lak khawm a ni a, chawhnu lamah Bethani Children’s Home pualin thawhlawm lak khawm a ni bawk.

Inkhawmpui chhung hian zai thiam tak takte’n Pathian fakna hla sain zai rawng bawlna hun an hmang thin a ni.

Hmarchhak District inkhawmpuiah hian District chhunga Tirhkohte tan ni 13 Inrinni zingah training buatsaih a ni a, Rev F.Lalnghakliana’n zirtirna a pe a ni.

Hmarchhak District inkhawmpui hi General Superintendent Rev C.Lalremsanga leh, Rev Zoramthara

ATI Dean-te’n an hmanpui bawk a, inkhawmpui hi Pathianni khan a tiak a ni.

SERCHHIP DISTRICT

Serchhip District inkhawmpui chu November ni 12 Zirtawpni khan Zoar kohhran biak in, New Serchhipah hman a ni a, Mizoram UPC General Superintendent Rev C. Lalremsanga’n a hmanpui.

District inkhawmpui hi Pathian biak inkhawm tel lova ro relna hmang chauhva neih a ni a, hemi hunah hian kum 2019 leh kum 2021 District inkhawmpui inkara boral mi 39 te sun an ni a, District Superintendent Pastor C. Lalramnghaka’n mitthi sunna serh a hmang a ni.

Serchhip District inkhawmpui ro relna hi District Chairman Upa K. Denghmingthanga’n a kaihruai.

District Relief Fund siam  te, Serchhip District Crusade Committee neih chhunzawm zel te, District budget ruahman te chu Serchhip District inkhawmpui ro rel langsar zualte an ni a, General Assembly-a thlen tur Thingsai bial Lunglei District-a bet tura rawtna te an pass bawk.

Kum 2022 Serchhip District inkhawmpui chu North Vanlaiphai bialah neih a ni ang.

Serchhip District inkhawmpui ro rel neih zawh a nih hnu hian District Committee-te thu khawmin, Ministerial Licence diltu chu interview neihpui a ni a, Ro relna sang zawka thlen turin a dilna hi put luh tha an ti a ni.

Serchhip District inkhawmpui report atanga a lan danin, Serchhip District chhûngah hian, Pastor bial-8 a awm a, kohhran 41 leh preaching point 1 awmin, inkhawmpui leh inkhawmpui inkarah mi thar 101 Mizoram UPC-ah lawm luh an ni.

Khawthlang District

Khawthlang District Inkhawmpui Vawi-24na November ni 13 & ni 14 Pathianni hmanga Mamit Bial Headquarters kohhran Biak In a hman chu tluang taka neih zawh a ni.

Khawthlang District inkhawmpui ro rel inkhawm hi Mizoram UPC Executive Chairman Upa C. Lalropianga’n hmanpuiin, District Chairman Upa K. Lalmuankima kaihhruaina hnuaiah palai mi 160 ten Ni 13 Inrinni khan ro an rela, thu rel chhawpchhuah 12 ngaihtuah a ni.

Khawthlang District inkhawmpui ro relna chuan Kum 3 chhung inkhawmpui neihna hmun tur hetiang hian a ruahmana, Kum 2022 - Dinthar Bial, Kum 2023 - Kawrthah Bial, Kum 2024 - Sairang Bial ah te District inkhawmpui hi nghah a ni.

Damparengpui a Tirhkoh Quarter chei thatte, kum 2022 chhung a District hminga khaw pathumah Tirhkoh rawih nise tihte leh ro relna sang zawka thlen chhoh tur Mizoram UPC hian Hebrai leh Greek tawng, a bik taka zir tur intirh ve ni se tihte, Mizoram UPC hian Jerusalem-ah Missionary dah turin hma la rawh se tihte chu Khawthlang District inkhawmpui ro rel langsar zualte an ni a, kum 2022 budget an ruahman fel bawk.

Heng bakah hian inkhawmpui chuan Ministerial Licence diltu mi 2 te chu Committee sang zawkah recommend turin a rel bawk a ni.

A tuk Pathianni ah Khawtlang District Committee-te thukhawmin Inkhawmpui ro rel bawhzui ngaite an sawihoa, kum 2022 chhung a khaw pathumah Tirhkoh rawih nise tih inkhawmpuiin a pass chu, District committee chuan a hmun tur thlang felin Mamit Bial - Damdiai, W.Phaileng Bial – Damparengpui leh Rengdil Bial – Zamuangah te Tirhkoh rawih nise an ti a, kumthar District Committee neih hun atan January ni 26, 2022 an ruat bawk. District Committee hi Dinthar S.S. Hall ah neih a ni ang.

Khawthlang District inkhawmpui report atanga a lan danin District chhungah Pastor Bial 8 a awma,

Kohhran puitling 46 leh Preaching Station 4 a awm mek a ni.