United Pentecostal Church
of Mizoram

GENERAL ASSEMBLY A TIAK TA

Mizoram UPC ro relna sang ber General Assembly ni hnih awh chu December ni 9 Zirtawpni khan Assembly Centre, Zonuamah tan a ni. Ro rel inkhawm hi Mizoram UPC Executive Chairman Upa C.Lalropianga’n a kaihruai a, kohhran hmalakna tur pawimawh tak tak leh Mizoram UPC Danpui kaihhnawih Agenda 32 bakah kum 2022 Budget Estimate chhawp chhuah a ni.

General Assembly ro relna chuan kum 2024 General Assembly thlengtu atan Zemabawk bial a ruat a,

Kohhran ding thar (Bial Committee-in Preaching Point-a a dah chin) te chu, General Headquarters atanga tanpuina sum pek thin ni tawh rawh se tihte, Vengpui Kohhran, Lawngtlai tih chu New Vengpui Kohhran, Lawngtlai tia thlak an remti a ni.

Heng bakah hian Thingsai bial, Serchhip District-a awm thin pawh kum 2022 atang chuan Lunglei District-ah awm tura pass a ni a, Missions Field-ah Area pahnih North Eastern India Area II leh North Bengal Area te hawn belh an rel bawk.

Assembly Centre hmunah Assembly Hall sak thuai ni se tihte, Full Time Evangelist post pathum (3) siam belhte, hripui leng a ziaawm veleh Revival Team din thar leh a, rawngbawlna zau zawk neih chhunzawm te; Bawngkawn Bial chu kum 2023-ah leh Zemabawk bial chu kum 2025-ah bial hnih a then tura an pass bakah General Assembly chuan Danpui Commission atanga kohhran Danpui siamthat rawtna lo lut engemaw zat a siam tha a ni.

Mizoram UPC ro relna sang ber General Assembly chuan kum 2022 budget atan (Rs. 24,71,04,700/-)  cheng nuai sanghnih zali sawmsarih pakhat, sangli za sarih chu a pawm a ni.

Ruat lawk sa ang chuan nakum General Assembly hi Chawlhhmun Bialin an thleng ang.

Kumin Mizoram UPC inkhawmpui lian berah hian Pathian biakna leh revival inkhawm tellova ro relna chauh neih a ni a, palai ruat bik ten ro relin, nikhatnaah hian palai mi 530 an kal a, nihnihnaah palai 451 ten ro an rel a ni.

General Assembly ro rel kar lakah hian Ministerial Licence leh Ordination Licence hlanna neih a ni bawka, General Superintendent Rev C.Lalremsanga’n ro rel inkhawm ni khatna ah hian mi 18 te hnenah Ministerial Licence a hlana, Pastor 7 te nemnghehna Ordination Service nihnihna ah a buatsaih bawk.

Ordination Licence pek tharte

1)            Pastor Lalnunzama                      Saikot bial

2)            Pastor C. Ramchhanmawia         Upper Assam Field

3)            Pastor KC Ramnunmawia            Thingsulthliah bial

4)            Pastor Lalruatkima Itanagar         Arunachal Pradesh Field

5)            Pastor C. Lalbelhliana                  NC Hills bial

6)            Pastor K. Lalhmingsangzuala       Rabung bial

7)            Pastor C. Lalhmingsanga              Lungsen bial te an ni.

Inkhawmpui leh inkhawmpui inkara member boral (Tual Upa, Upa, Sr. Upa leh Pastor) mi 46 te sunna hunserh General Treasurer Rev. PB Lalhmuliana’n General Assembly ro rel nihnihnaah hian a hmang bawka, Mizoram UPC inkhamwpui lian hi December ni 10 Zirtawpni khan a tiak a ni.