General Missions Department Secretary Rev T. Laldingliana chuan ni 6 Pathianni hian Chawlhhmun Bial Missions Dept inkhawmpui a hmanpui dawna, Pathianni chawhma inkhawmah thuhril rawngbawlna a nei dawn a ni.
Bethani Children’s Home Society Board
Mizoram UPC hnuchham enkawlna Bethani Children's Home, Sihhmui a thawktu tur Home Father lakna chu January ni 28 Zirtawpni khan Conference Hall, General Headquarters Office-ah neih a ni a, thawktu lakna hi online kaltlanga buatsaih niin Home Father atan hian unaupa Kapzathang Singson S/o Jangkholen Singson, Phaituol chu lak a ni.
M&PB
M&PB chuan February ni 1 Thawhlehni khan Casual Announcer pali lakna Personal interview, Conference Hall Mizoram UPC General Headquarters Office-ah a buatsaiha, heng mite hi lak thar an ni.
Unaunu Lalrindiki D/o C. Lalduhawma, Durtlang Mualveng
Unaunu Catherine Lallawmpuii D/o Lalremzuali, Tlangnuam
Unaunu Vanlallawmawmi D/o Tual Upa Lalnunsanga, Durtlang Leitan
Unaupa Vanlalhmachhuana S/o Tirhkoh VL Hmangaiha, Tlangnuam
M&PB hian Casual Announcer hi kum khat atan a la thin a ni.
Vehicle Board
Mizoram UPC Vehicle Board chu Upa H. Lalrintluanga, Chairman kaihhruaina hnuaiah February ni 3 Ningani khan Conference Hall General Headquarters Office-ah an thukhawma Mizoram UPC puipa ten an telpui.
Vehicle Board meeting chuan Mizoram UPC hnuaia Driver-te lirthei vawn dan tur leh inthlak kual dan turte, motor thar lei chungchang leh motor hlui tihral dan turte an rel a, Driver-te tana infuih tharna hun March ni 15 hian buatsaih an tum bawk a ni.
MANIPUR DISTRICT
Manipur District Superintendent thlanna chu January ni 31 Thawhtanni khan Mizoram UPC General Superintendent Rev Thangliansanga kaihhruaina hnuaiah neih a ni.
Manipur District Superintendent ni lai Pastor Lalnunzama, District danga a insawn tak avangin a aiawh thlanna hi Rengkai kohhran Biak inah neih a ni a, kum 2022 chhunga Manipur District Superintendent atan Pastor Pc Lalliansanga, Imphal Bialtu chu thlan a ni.
