United Pentecostal Church
of Mizoram

CAMBODIA MISSIONARY THLAHNA INKHAWM NEIH A NI

Dated 13th February 2022 

Foreign Missions Board, General Headquarters buatsaihin, Cambodia a Missionary kal tur R.Lalnunkimi  thlahna inkhawm vawiin Pathianni chawhnu dar 1:30 khan Govt.Complex kohhran Biak In ah  hman a ni. 

Missionary thlahna inkhawm hi Rev Saienga Sailo, Secretary Foreign Missions Board chuan a kaihruai a, Foreign Missions Board hmalakna leh Field hrang hrang report ngaihnawm tak a pe nghal bawk. 

Rev. Chalhuaia'n inkhawm Pathian hnenah hlanin, Missionary to Cambodia R.Lalnunkimi hnen atangin Lalpa'n a koh dan leh kohna chhang tura harsatna a tawhte ngaihthlak a ni a, ngaithlatute thinlung a khawih tak zet a ni.

Missionary thusawi zawh hian a puala thilpek lak khawm niin, ₹ 17,000/- chuang hmuh a ni a, thil pek lakkhawm chhung hian Ramherliani W/o Upa Andrew Laldingliana chuan nung takin Pathian fakna hla a sa a ni.
Missionary thlahna inkhawmah hian Chawlhhmun Bial kohhranpui, Bial Department hrang hrang leh Govt.Complex Tualchhung Department hrang hrang ten R. Lalnunkimi hi thil pek an hlan bawk.

Rev. PB. Lalhmuliana, Foreign Missions Board Treasurer chuan fuihna thu ṭha tak  sawiin, Rev HV Lalzamlova, Chawlhhmun Bialtu Pastor-in ṭawngṭainain inkhawm a ti tawp a ni.

He inkhawmah hian Pastor pension tawh te, khawpui chhung Pastor-te leh ATI Lecturer-te, General huap Board leh Committee member engemaw zat an tel a, Chawlhhmun Bial chhung aṭangin kohhran mipui ṭhahnemtak an tel a, Inkhawm banah Govt. Complex kohhranin thingpui ruai an buatsaih chu kalkhawm ten an kil a ni.

Beisei anga a awm theih chuan Missionary hian Dt.15.2.2022 (Thawhlehni) hian Mizoram a chhuahsan dawn a ni.