Hruaitute Programme:
General Secretary Rev. Saienga Sailo chu Chaltlang Bial Mission Inkhawmpui Naktuk February ni 27 Pathianni hmanga Edenthar Biak Ina neih turah rawngbawlna neiin hun a hmanpui ang.
Rev. B. Lalchhanhima General Sunday School Secretary chu Aibawk Bial Thiek kohhranah naktuk Pathianni hian Sunday School Campaign neiin hun a hmanpui bawk ang.
Staff Meeting neih a ni :
Mizoram UPC General Headquarters Office Staff te chuan tunkar February ni 17, Ningani khan Conference Hall Tuikhuahtlang-ah Meeting an nei.
He meeting hi General Superintendent Rev. Thangliansanga chuan kaihruaiin, kum 2022 chhunga hmalakna tur hrang hrang leh tul pawimawh dangte sawi ho niin, Lunglei Sub-Office, Bethani Children Home leh ATI Staff te atanga aiawh te telin, anni hnen atang hian report ngaihthlak a ni bawk.
Missionary thlahna neih a ni:
Cambodia Missionary R. Lalnunkimi thlahna inkhawm February ni 13 Pathianni khan neih a ni.
Foreign Missions Board, General Headquarters buatsaihin, Cambodia a rawngbawl tur R.Lalnunkimi thlahna inkhawm chu February ni 13 Pathianni chawhnu khan Govt. Complex kohhran Biak In ah neih a ni a, Rev Saienga Sailo, Secretary Foreign Missions Board chuan inkhawm hi a kaihruai a, Foreign Missions Board hmalakna leh Field hrang hrang report ngaihnawm tak a hnen atang hian ngaihthlak a ni bawk.
Rev. Chalhuaia chuan inkhawm Pathian hnenah hlanin, Missionary to Cambodia R.Lalnunkimi hnen atangin Lalpa'n a koh dan leh kohna chhang tura harsatna a tawhte ngaihthlak a ni a, mipui kalkhawmte thinlung a khawih tak zet a ni.
Missionary thusawi zawh hian a puala thilpek lakkhawm niin, He mi chhung hian Ramherliani Govt. Complex chuan nung takin Pathian fakna hla a sa a, Chawlhhmun Bial kohhranpui, Bial Department hrang hrang leh Govt. Complex Tualchhung Department hrang hrang ten Missionary hi thilpek an hlan bawk.
Missionary thlahna inkhawmah hian Rev. PB. Lalhmuliana, Treasurer Foreign Missions Board chuan fuihna thu ṭha tak sawiin, Rev HV Lalzamlova, Chawlhhmun Bialtu Pastor-in ṭawngṭainain inkhawm a titawp a ni.
He hunah hian Pastor pension tawhte, khawpui chhunga Pastor-te leh ATI Lecturer, General huap Board leh Committee member engemawzat an tel a, Chawlhhmun Bial chhung aṭangin kohhran mipui ṭhahnemtak an tel.
Cambodia Missionary R. Lalnunkimi hi February ni 15 (Thawhlehni) khan Mizoram a chhuahsan a ni.
North Mizoram District
North Mizoram District chuan February ni 15, Thawhlehni chawhma dar 11:00 khan Headquarters Kohhran Sunday School Hall ah Hmuifang a rawngbawltu tur interview a lakna an nei a, Tirhkoh Lalnunhlua, Kawnpui chu la in, March ni 1 hian a rawngbawlna hmun turah lut turin an rel bawk
