General Headquarters hruaitute Programme
General Superintendent Rev Thangliansanga chu Pathianni hian a lawina Dinthar kohhranah a inkhawm dawna, Pathianni zanah thuhril rawngbawlna a nei ang.
General Secretary Rev Saienga Sailo chuan tunlai hian Chaltlang Bial a hmui hriha, Pathianni hmang hian Bial fan programme a nei dawna, Ramhlun Sports Complex kohhran a tlawh ang.
Tirhkoh Ch. Lalhmingmuana, Chairman Gen SS Dept chu April ni 24 Pathianni hmang hian Tumpui kohhran Kolasib Bialah SS Campaign nei turin a kal ang.
General SS Dept
General SS Department Executive Board chu April ni 19 Thawhlehni khan Conference Hall, General Headquarters Office-ah an thu khawma, Chairman Tirhkoh Ch. Lalhmingmuana’n a kaihruaia,
General Superintendent Rev Thangliansanga’n a ho.
Meeting chuan General SS Dept hmalakna a June ni 17-19 chhunga Manipur District huam chhung SS Dept te tan Children’s meet buatsaih an rel a, kum tawp SS exam zawhna siam tu turte an ruat fel bawk.
Heng bakah hian SS Hall sak tanpuina kohhran 19 hnenah pek an remti a, Tripura Kanchandpur ten SS Zirlaibu Kau Bru tawnga lehlin an dilna chu rem tih sakin, Rom, Korinth leh Tirhkohte Thiltih bu te chu lehlin hmasak tura tih a ni.
General SS Dept Executive board chuan Bial pathum Bungkawn, Lungpho leh Hreichhuk bialte SS Seminar neih pui nise an ti bawka, Bungkawn bialte April ni 26 hian Seminar an neih pui dawn a ni.
Assembly Centre Committee
Assembly Centre Committee chu April ni 21 Ningani khan an Chairman Tirhkoh Liansangkima kaihhruaina hnuaiah Assembly Centre Zonuamah an thukhawma, Mizoram UPC Main Office Building Centre a sak mek thlirhona leh hmalak zel dan turte an sawihova, Puipa atangin Executive Chairman leh General Superintendent ten meeting hi an ho a ni.
General Headquarters Office sak mek hi chak taka bawhzui chhoh zel a ni a, hruaitute ruahmanna ang chuan kumin hian luah hman tura beisei a ni.
General PYD
General PYD Literature Committee chuan April ni 14 Ningani khan Zonet nen thawh dunna Thuthlung an ziaka, Mizoram UPC Literature & Publication Board leh GPYD Literature Committee tangkawpin an buatsaih tur zai intihsiakna, Pentecost Fak Zaiah Zonet hian media partner hna an thawk dawn a ni.
GPYD Literature Committee leh Zonet inremna ang chuan Zonet hian top 20 chin chung lam inelna chu an television channel-ah chhuah man chawi ngai loin a thlawn vekin an chhuah sak dawn a, heta tanga advertisement lang tur pawh GPYD Literature Committee chan pual tur a ni ang.
Grand Finale hi live-a en theih tura pekchhuah a ni dawn a, hemi atan hian Zonet chuan an hmanrua/khawlte chu a thlawnin GPYD Literature Committee hi an hmantir dawn bawk a ni.
Zonet Office, Zarkawta pawl pahnih inremnaah hian GPYD Literature Committee aiawhin chairman John Zothansanga a tel a, Zonet-in thawhpui tura an sawmna an lo pawm chu lawmawm a ti a, "Thu leh hla hmanga rawngbawl kan tumna kawngah nasa takin min chhawk zangkhai a, Zonet chungah kan lawm tak zet a ni," a ti.
Zonet director LV Lalthantluanga pawhin, "GPYD Literature Committee hmalaknaa kan lo tel ve thei hi kan lawm a, Zonet chu PYD-te tana a tih ve theih chinah a inhawng reng dawn a ni," a ti bawk.
Pentecost Fak Zai a tel duhte tan April 24 thleng registration hawn a ni.
MIZORAM UPC ṬHALAI TEN THISEN PE
Mizoram UPC ṭhalai pawl Pentecostal Youth Department (PYD) chuan March ni 16, Inrinni khan Central YMA Hall-ah Blood Donation Camp an nei. He Blood donation Camp hi General PYD hnuaia Social Wing Committee te buatsaih niin, Central YMA hall, Tuikhuahtlangah ZMC staff ten an kal chilha, Mizoram UPC Pastor Bial 5 atangin PYD te hian thisen unit 62 an pe a, thisen petute hi Mipa – 57 leh Hmeichhia – 5 an ni.
