General Headquarters hruaitute rawngbawlna:
General Superintendent Rev Thangliansanga chu May ni 14 Inrinni zan aṭang hian Dinthar bial in revival inkhawm an neih turah thuhril rawngbawlna a nei dawna, Pathianni zan thleng hian Dinthar kohhran Biak inah he hun hi hman a ni ang.
General Secretary Rev Saienga Sailo chu Kolasib Diakkawn Bial Missions Dept Revival Inkhawmah thuhril rawngbawlna nei turin May ni 14 Inrinni hian a zin chhuaka, Pathianni zan thleng he hun hi hman a ni dawna, General Secretary hi Thawhtanni hian Aizawl a lo let leh ang.
General SS Dept. Secretary Rev B. Lalchhanhima chu May ni 13 Zirtawpni khan Lunglei South leh Lungsen Bial-ahte Sunday School Campaign nei turin a zin chhuaka, Rev B. Lalchhanhima hi May ni 17 Thawhlehni hian Aizawl a lo let leh ang.
General Missions Dept Chairman Upa Andrew Laldingliana chu May ni 15 Pathianni hian Tanhril kohhranah Missionary Support Campaign a nei ang.
Puipa Committee
Mizoram UPC Puipa Committee chu May ni 11 Nilaini khan Conference Hall, General Headquarters Office-ah an thukhawma, Executive Chairman Upa C. Lalropianga’n kaihruaiin Mizoram UPC hmalakna tur pawimawh tak tak an sawiho.
An thurel langsar zual zingah Mizoram UPC Dan pui bu chhut thar lehte, Kolasib Diakkawn bial New Builum hmuna Preaching Point ding thar hnena tanpuina pekte, Kum 2022 Pastor-te rammut thla (August)-ah Pastor-te ram mutna tura bul tan nan Crusade Fund atangin Sum sanction nise tih leh Revival Team ten rawng an bawlna kawnga chak zawka hma an lak theih nan Revival Committee-te thuneihna pek belh tha an ti a, Southern Zone, Sakawrdai bial leh Sairang bial ten Crusade Fund an dil chu pek an remti bawk.
Puipa Committee chuan June thla atanga December, 2022 chhunga Crusade fund atangin heng hmunah te hian tirhkoh rawih nise an ti a, Tuidam, Kawrthah bial
Tuirial, Zemabawk bial
Sihthiang, Rengdil bial
Saikhawthlir, Bairabi bial
Sangau , Cheural bial
Hruitezawl, Hmawngbu bial
Mautlang, Vathuampui bial
Zehtet, Lungsen bial
Thentlang, Serchhip bial leh Ngaizawl, Khawzawl Vengthar bialah te.
Heng bakah hian Puipa Committee chuan Rev. Hrangchuanthanga May ni 1 a Superannuation pension a chhuak chu, a thlahna hun May ni 20 hian Conference Hall, General Headquarters Office-ah buatsaih nise an ti a,
Ro relna sang zawk a thlen tur engemaw zat an rel bawk a ni.
General Missions Dept
General Missions Dept Executive Board chu May ni 12 Ningani khan Dept. Secretary Quarters-ah an thukhawma, Mizoram UPC Missions Field-a hmalakna tur hrang hrang sawihovin, Chairman Upa Andrew Laldingliana’n a kaihruai.
An thu rel langsar zual zingah Agra hmuna kohhran ram tur leite, Garo Hills Dadengiri ah Biak In hmun tur ram leite Karimganj leh a chheh velah Missionary tirhte, Mission field-a thawktute mamawh hrang hrang ngaihtuah leh thawm that ngaite thawm nise tihte a tela, heng bakah hian General Missions Dept Executive Board chuan Agra Field Pachgain Khera Kohhran thar enkawl turin Prince Dilip Kumar chu Worker atan an la bawk.
Worker lak thar lawmman tur hi Upa K Lalthantluanga, Zonuam te chhungkua chuan thlatin Rs 8000/- an tum dawn a ni.
General Missions Dept Executive Board chuan he mi ni hian Voluntary Missionary-a kal duhte Interview a neihpui bawka, Eden Parmawii, a pa Rev H. Lalrawnkima, Tuikhuahtlang Pentecost Mission School (PMS) North Bengal Area a thawk tur leh Tk Lalrinchhana, apa C.Vanlalchhuanga (L) Bualpui N, Karbi Anglong Field-a thawk turte in an la a ni.
Gen PYD
Mizoram UPC Literature & Publication Board leh Literature Committee, Gen PYD tangkawpa buatsaih Pentecost Fak Zai top 20 inelna, zan khatna chu May ni 12 Ningani zan khan Dinthar kohhran Hall-ah neih tan a ni.
Pentecost Fak Zai top 20 ah hian mi 22 awmin zan khatna ah hian mi 11 inlanin Intihsiakna an neia, Zirtawp zanah thawh hnihna neih leh niin Mi 11 ten intihsiakna an nei leh a ni.
Pentecost Fak zai hi General PYD You Tube channel-ah Live a pek chhuah thin a ni a, Zan khatna hi May ni 14 Inrinni zan dar 8:00 ah Zonet Bawhbelah pek chhuah a ni anga, Zan hnihna hi May 15, Pathianni zan dar 8:00-ah Zonet Bawhbelah pek chhuah a ni bawk ang.
Pentecost Fak zai Top 10 a tlingte hi General PYD kaltlangin Social Media-ah vawiin Inrinni hian tar chhuah an ni dawna, karleh ni 19 leh ni 20 Ningani leh Zirtawpni zan dar 7:30 hian Top 10 intihsiakna neih leh a ni ang.
