United Pentecostal Church
of Mizoram

June ni 27, 2022 chawhnu dar 1:00 ah khan Mizoram UPC General Headquarters Office-ah Former Legislature Association of Mizoram (FLAM) hruaitute chu, General Superintendent, Rev Thangliansanga kawmin an leng luta, Nakkum (2023) November thlaa MLA inthlan lo awm turah Inthlanna thianghlim a awm theih nana hmalakho dan tur an sawipui. 

FLAM hruaitute hian he ram leilung hi Pathianin kan ram atana min pek, chenna atana ram dang kan neih loh a ni a. Pathian kaihhruaina hnuaia mi tak tak chinin an kaihhruai a tulzia thu leh ram vei a tulziate an sawi a, chutiang mi, kan ramin a mamawh em em lai chuan, Kohhran hote pawhin chutiang mi chu rawn chhawp chhuak tura an duh thute an sawi a. 

Mizoram UPC General Superintendent chuan FLAM hruaitute hnenah hian, Mizoram UPC hi chuan Party politics-ah hian a Kohhran ang chuan eng role mah play kan tum loh thu te, kan memberte zinga Party hrang hranga awm an awm thu erawh tar langin, chung mite pawh chu Pathian tih chunga ram rawng bawl tura an hrilh thin thu a lo sawi a. Hun lo kal zelah pawh, a bikin kan Pastorte phei chuan engtin nge kan mite hian van ram an kai theih ang tih hi kan thupui ber a nih reng tur thute sawiin, Contract leh ther hlo beiseina lakah fihlim tlat tura inzirtir Kohhran kan ni thute a lo hrilh a ni.

FLAM hruaitute hi an President Pu Liansuama hovin Dr. JV Hluna, Pu K.Liantlinga leh Pu Rochhunga Ralte te an ni a, Mizoram UPC General Superintendent hi Rev PB Lalhmuliana, General Treasurer in a tawiawm bawk a ni.