Foreign Missions Board
Mizoram UPC Foreign Mission Board chuan July ni 3 Pathianni chawhnu hian Nepal field Pastor thlahna inkhawm Dinthar kohhran Biak in ah an nei dawna, Foreign Mission Board Secretary Rev Saienga Sailo chuan Inkhawm a kaihruai ang.
He hunah hian Field Report, Rev. PB Lalhmuliana, Treasurer, Foreign Missions Board hnen atangin ngaihthlak a ni dawna, Tirhkoh K. Vanlalhmangaiha, Nepal Field Pastor atana lak thar hnen atangin thu sawi ngaihthlak a ni bawk anga, Rev. Thangliansanga, Chairman, Foreign Missions Board in Fuihna thuchah a sawi dawn a ni.
Nepal Field Pastor K.Vanlalhmangaiha thlahna inkhawm hi Mizoram UPC hnuaia Dept., Board leh Committee hrang hrang hruaitu ten an telpui dawn a ni.
General SS Dept. Chairman Tirhkoh Ch.Lalhmingmuana chu Mamit bial SS Dept-te SS Seminar leh Zirtirtu training neihpui turin July ni 1 Zirtawpni khan a zin chhuaka, Pathianni thleng a cham ang.
Pastoral Board
Pastoral Board kum chanve thutkhawm chu June ni 28 Thawhlehni khan General Headquarters Office Conference Hall-ah neih a ni a, General Superintendent Rev Thangliansanga kaihhruaina hnuaiah member 20 kal ten ro an rel.
Pastoral Board chuan Thingfal Bial, Area Secretary in a hmui mek chu July thla atang hian bialtu atan Pastor Lalruatkima, Senkiview, Itanagar-a awm mek chu a ruata, July ni 15, 2022 ral hmaa, Thingfal bial thleng tura tih a ni.
Heng bakah hian Myanmar District chhunga Tamu bialtu, Rev. Hrangchuanthanga May ni 1, 2022 a superannuation pension-a a chhuah tak avangin, Khampat bialtu, Rev. Lalrinenga chu Tamu bial lo hmui rih turin an ruat bawka, Chaltlang bialtu Rev. B. Kapmawia, December ni 1, 2022 a superannuation pension a chhuak tur pawh December thla chhung fixed pay-a rawih chhunzawm an rel a, Kum tawp Pastoral Board a ngaihtuah atan Fixed Pay Pastor pahnih lak belhte chu Mizoram UPC Pastoral Board kum chanve thutkhawm ro rel langsar zualte an ni.
Executive Committee
Mizoram UPC ro relna sang Executive Committee kum chanve thutkhawm chu June ni 29 Nilaini khan General Headquarters Office Conference Hall-ah neih a ni a, he meeting hi vawi 94-na niin Executive Chairman Upa C.Lalropianga’n a kaihruai a, Rev Saienga Sailo General Secretary hnen atangin report ngaihthlak a ni.
Executive Committee-ah hian Mizoram UPC Danpui siam that ngai awm te, Assembly Hall sak dan tur chungchang te, Fixed Pay Driver pathum lak belhte, Hebrai leh Grik tawng zirna hmun tur thlan chungchang leh Fellowship Card siam that bakah nimin lama Pastoral Board ro rel, bawh zui ngai te chu thu rel langsar zual te an ni.
Executive Committee chuan Grik tawng zirna hmun atan Apostolic Biblical Theological Seminary (ABTS) New Delhi chu a thlanga, Hebrai zirna atan Ulpan in Israel a thlang bawka Kum 2023 atanga Hebrai leh Grik tawng zir turte hi tirh nise an ti a ni.
Mizoram UPC Recruitment Committee-in Fixed Pay Driver atan a lo lak tawh
Lalramhmachhuana, a pa F. Liannguauva, Nursery veng, Aizawl.
Lianhmingthanga, a pa Neihrawn, Electric veng, Aizawl.
Khawngaihzuala, a pa Hrangchhuana, Chawnpui, Aizawl te chu July ni 1, 2022 atanga rawih tan turin a pawmpui bawk.
Executive Committee-ah hian member 58 an tel a ni.
FLAM nen inkawm
June ni 27 chawhnu dar 1:00 ah khan Mizoram UPC General Headquarters Office-ah Former Legislature Association of Mizoram (FLAM) hruaitute chu, Mizoram UPC General Superintendent, Rev Thangliansanga kawmin an leng luta, Nakkum (2023) November thlaa MLA inthlan lo awm turah Inthlanna thianghlim a awm theih nana hmalakho dan tur an sawipui.
FLAM hruaitute chuan he ram leilung hi Pathianin kan ram atana min pek, chenna atana ram dang kan neih loh a ni a. Pathian kaihhruaina hnuaia mi tak tak chinin an kaihhruai a tulzia thu leh ram vei a tulziate General Superintendent hnenah hian sawiin, Kohhran hote pawhin chutiang mi chu rawn chhawp chhuak tura an duh thute an tarlang a.
Mizoram UPC General Superintendent chuan FLAM hruaitute hnenah hian, Mizoram UPC hi chuan Party politics-ah hian a Kohhran ang chuan eng role mah play an tum loh thu te, kan memberte zingah Party hrang hranga awm an awm thu erawh tar langin, chung mite pawh chu Pathian tih chunga ram rawng bawl tura an hrilh thin thu a sawi a. Hun lo kal zelah pawh, Mizoram UPC Pastorte chuan engtin nge kan mite hian van ram an kai theih ang tih hi kan thupui ber a nih reng tur thuin a lo chhang a, Contract leh ther hlo beiseina lakah fihlim tlat tura inzirtir Kohhran kan ni thute a hrilh a ni.
FLAM hruaitute hi an President Pu Liansuama hovin Dr. JV Hluna, Pu K.Liantlinga leh Pu Rochhunga Ralte te an ni a, Mizoram UPC General Superintendent hi Rev PB Lalhmuliana, General Treasurer in a tawiawm a ni.
M&PB
Media & Publicity Board chu June ni 30 Ningani khan Chairman Upa Lalthlamuana Hnamte te in ah an thukhawma, Media kaltlanga kohhran hmalakna tur pawimawh tak tak an sawiho.
M&PB meeting chuan July ni 11 atanga ni 19 chhung hian Live Crusade buatsaih a rela, zan dar 8 ah YouTube leh Television Network kaltlanga Live a pek chhuah tum a ni.
Gen LAD
General LAD Executive Board chu June ni 30 Ningani khan an President Lalchhandami te in ah an thu khawma, Mizoram UPC Puipa General Superintendent Rev Thangliansanga leh General Treasurer Rev PB Lalhmuliana ten an ho.
He thutkhawmah hian kum 2022 General LAD inkhawmpui hman dan tur Programme-te duan a ni a, August thla ral hmaa Bial report leh Agenda, Bial tin ten thehluh an ti a ni. Kum 2022 General LAD inkhawmpui hi
Sairang Dawrveng Playground-ah October ni 21-23 chhung hian neih a ni dawn a ni.
Gen PYD
General PYD buatsaih Quiz chu June ni 30 Ningani zan khan Ignite Studio-ah zawh fel a ni a, Bethlehem Vengthlang PYD te pakhatna an ni.
Final round-ah hian Bethlehem Vengthlang PYD aiawh Lalramthara leh PC Vanlalhriata
Thingsulthliah pyd aiawh Lalbiakthianga leh R. Lalmuanawma ten Tirhkohte Thil tih bu hmangin intihsiakna an neia, Bethlehem Vengthlang PYD te hian point 220 an hmu a, Thingsulthliah pyd te hian point 170 an hmu a,
Lawmman pakhatna dawngtu Bethlehem Vengthlang PYD hnenah hian Rs. 30,000/- leh Memento Tirhkoh Ch. Lalhmingmuana’n a hlana, pahnihna Thingsulthliah pyd te hnenah hian Rs.15,000/- leh memento
Upa Lalrinawma Sailo in a hlan thung a ni.
General PYD Quiz Grand Finale hi Rev Zoramthara, Dean ATI chuan telpuiin, Hunserh a hmanga, Upa Vanneia Pudaite President General PYD hnen atangin thu sawi tawi ngaihthlak anih bakah Fak zai Top 3 ten mipuite zaiin an awi bawk a ni.
General PYD Quiz Grand Finale hi General PYD YouTube Channel-ah leh Zonet Zawlbukah Live a pek chhuah a ni.
