United Pentecostal Church
of Mizoram

July 3, 2022 Pathianni chawhnu dar 1:30 khan Mizoram UPC Foreign Mission Board hnuaia Nepal Field Pastor atana lak, Pastor K. Vanlalhmangaiha thlahna inkhawm Dinthar kohhran biak inah neih a ni. 

Thlahna Inkhawm hi Rev Saienga Sailo, Secretary Foreign Mission Board chuan a kaihruaia, Rev PB Lalhmuliana, Treasurer Foreign Mission Board chuan Foreign Mission Field report a pe a, Rev Thangliansanga, Chairman Foreign Mission Board chuan thlahna hun hmangin fuihna thuchah a sawi a, Pastor K. Vanlalhmangaiha tawngtai sakna hun a hmang bawk a ni.

Pastor thlah tak K.Vanlalhmangaiha hnen atangin thu sawi ngaihthlak a ni bawka, kum 2014 atanga Voluntary Missionary-a Pathian rawngbawl hna a lo thawh tan thute ngaihthlak a ni a, kohhran hote hnenah Nepal Field-a rawngbawl thei tura kawng a in hawng chu lawmawm a tih rualin, tawngtaina a hre reng tur leh nasa leh zuala Pathian hnena dil pui turin kohhrante a sawm nghal a ni.

Foreign Mission Board hnuaiah hian Field paruk (6) awmin, thawktu mi 15 an awm mek a.
1.    Bangladesh Field - Thawktu 8
2.    Shan Field, Myanmar – Thawktu 2
3.    Matupui Field, Myanmar – Thawktu 1
4.    Cambodia Field – Thawktu 1
5.    China Field – Thawktu 1 
6.    Nepal Field – Thawktu 2 te an ni.

Pastor K.Vanlalhmangaiha hi July 6 Nilaini hian Nepal panin a chhuak dawna, Birtamode, Nepal hmunah in bengbelin rawngbawlna atan dawn a ni.

Nepal Field-ah hian tun dinhmunah kohhran pahnih Kalkate leh Danabari kohhrante awmin, Kalkate kohhranah member 54 vel an awm mek a. He kohhran hi boral ta Pastor Santa Rai enkawl ṭhin kha a ni a, Danabari kohhranah hian Noel Chamling hovin member 60 vel an awm mek bawk a ni.