United Pentecostal Church
of Mizoram

July 17 Pathianni chawhnu dar 1:30 khan Mizoram UPC Literature & Publication Board chuan Lehkhabu tlangzarh inkhawm Bawngkawn kohhran biak in ah a buatsaih.

Lehkhabu tlangzarh inkhawm hi Rev. C.Liansanga Chairman, L&PB chuan a kaihruai a, Rev C.Ramsangavawra, Bawngkawn Bialtu chuan inkhawm Pathian hnen a hlanna hun neiin hunserh a hmang a, L&PB Secretary T. Upa Misael Lalremtluanga’n report a pe a ni.

He hunah hian lehkhabu pahnih ‘Mi nung pathum nge pakhat’ Rev R. Laldawngliana ziak leh ‘Lengkhawm hla leh a phuahtu Pentecost mi hranghluite’, T. Upa Lalthlamuana ziahte chu tlangzarh tur a chhawp chhuah a ni. ‘Mi nung pathum nge pakhat’ bu chhung sawi hawnna Rev. B. Lalchhanhima, Secretary General SS Dept. chuan neiin, ‘Isua chhandamna thu pek zawm a, amah tawk tur a kan inbuatsaih a tul zia, lehkhabu ah hian tarlan a nih thute a sawi a. ‘Lengkhawm hla leh a phuahtu Pentecost mi hrang hluite’ tih chu Upa R. Lalropuia’n sawi hawnna hun nei ve lehin, he lehkhabu chhunga hranghlui hla phuah thiam mi parukte chanchin a tarlang a. Vawiin thleng a Mizo Kristian ten an hla kan la sak kham theih loh phuahtu an ni tih sawiin an hla phuah pawh eng emaw zat a rawn tarlang a. ‘Eng pawh nise, preview-na mai a nih avangin a chip chiar chu he lehkhabu hi i lei hunah i han chhiar ang a, i tuipui dan tur zia mai chu(h), sawi lawk chi pawh ni nghal lo chuan!’ tiin lehkhabu sawi hawnna hun hi a khar a. Heng lehkhabu pahnihte hi Rev Saienga Sailo, General Secretary chuan tlangzarh na hun neiin, Pathian hnenah a hlan a ni.

L&PB lehkhabu tlangzarh inkhawmah hian ‘Lengkhawm hla leh a phuahtu Pentecost mi hrang hluite’ tih ziaktu T. Upa Lalthlamuana hnen atangin lehkhabu a sual chhuah dan chanchin ngaihthlak niin, Literature Awareness Campaign Upa Vanlaldinthara, Member L&PB chuan a nei bawk a. He hunah hian Mizoram UPC General level Board/Department aiawh an tel kim hle a, programme hman zawh a nih hnuah Rev. P.Lalrinawma , Principal ATI chuan tawngtawina in inkhawm a ti tawp a ni.