GENERAL HEADQUARTERS HRUAITUTE PROGRAMME
Rev. T. Laldingliana, Secretary General Missions Dept. chuan July ni 24 Pathianni hmang hian Rawpuichhip kohhrana Pathian chawimawina a hmanpui dawn a, Pathian biak inkhawmah thu hril rawngbawlna a nei ang.
Tirhkoh Ch. Lalhmingmuana, Chairman General SS Dept. chu July ni 22 Zirtawpni khan Hnahlan Bial, SS Seminar neih pui turin a zin chhuak a, Dept. Treasurer C. Lalbiakhluni’n a tawiawm. General SS Dept. hruaitute hi Thawhtanni hian Aizawl an lo let leh ang.
Puipa Committee
Puipa Committee 340-na chu July ni 20 Nilaini khan Executive Chairman Upa C.Lalropianga kaihhruaina hnuaiah neih a ni a, Kum 2022 kum chanve Executive Committee leh Pastoral Board neih zawh tak an thlir let a, ro rel bawh zui dan turte sawihovin Kohhran hmalakna tur hrang hrang an ngaihtuah.
Puipa Committee chuan Relief Fund dilna an hmuhte chu an dil ang a pek tha an ti a, Churachandpur Bial, Rabung Bial leh Hnahlan Bial te hnenah Crusade Fund pek an remti bawk.
Heng bakah hian Puipa Committee chuan Kum 2023 a Pastor Seminar neih hun atan March ni 8 leh ni 9 a ruat a, Mizoram Sawrkar atanga Profession Tax chungchang a lehkha an dawnte bawhzui dan tur an sawiho bawk a ni.
Assembly Centre Committee
Assembly Centre Committee chu July ni 20 Nilaini khan Assembly Centre-ah an thu khawm a, Chairman Tirhkoh Liansangkiman kaihruaiin, Mizoram UPC Puipa ten an ho a ni.
Assembly Centre Committee chuan Mizoram UPC Main Office Building sak mek chu Kumin chhunga luah a nih theih nan chak taka bawhzui nise an ti a, Assembly Centre a hmalakna tur pawimawh tak tak an sawiho bakah General PYD ten Assembly Centre-a inkhawmpui neih an dilna chu Committee chuan an dil ang hian an rem tih sak a ni.
Bethani Board
Bethani Childrens Home Society Board chu July ni 21 Ningani khan Mizoram UPC Office Conference hall-ah an thukhawm a, Vice Chairman Upa C. Vanlalhruaia’n meeting hi a kaihruai.
Meeting-ah hian Bethani Childrens Home a hmalak dan tur chungchang ngaihtuah a ni a, study table leh Dining table siam te, Building renovation chungchangte chu an thu rel langsar zualte an ni a, meeting hi Mizoram UPC Puipa Rev Thangliansanga General Superintendent leh Rev Saienga Sailo General Secretary ten an ho a ni.
L&PB
Mizoram UPC Literature & Publication Board chuan July ni 17 Pathianni chawhnu khan lehkhabu tlangzarh inkhawm Bawngkawn kohhran biak in ah a buatsaih.
Lehkhabu tlangzarh inkhawm hi Rev. C.Liansanga Chairman, L&PB chuan a kaihruai a, Rev C.Ramsangavawra, Bawngkawn Bialtu-in inkhawm Pathian hnen a hlanna hun neiin hunserh a hmang a, L&PB Secretary T. Upa Misael Lalremtluanga hnen atangin report ngaihthlak a ni.
L&PB-in lehkhabu tlangzarh tura a chhawp chhuah te hi ‘Mi nung pathum nge pakhat’ Rev R. Laldawngliana ziak leh ‘Lengkhawm hla leh a phuahtu Pentecost mi hranghluite’, Upa Lalthlamuana ziakte an ni a. tlangzarhna hun hman anih hma hian Lehkhabu sawi hawnna neih hmasak a ni a, ‘Mi nung pathum nge pakhat’ bu chhung sawi hawnna Rev. B. Lalchhanhima, Secretary General SS Dept. chuan neiin, ‘Isua chhandamna thu pek zawm a, amah tawk tur a kan inbuatsaih a tul zia, lehkhabu ah hian tarlan a nih thute a sawi a ni.
‘Lengkhawm hla leh a phuahtu Pentecost mi hrang hluite’ tih chu Upa R. Lalropuia’n sawi hawnna hun nei ve lehin, he lehkhabu chhunga hranghlui hla phuah thiam mi parukte chanchin a tarlang a. Vawiin thleng a Mizo Kristian ten an hla kan la sak kham theih loh phuahtu an ni tih sawiin an hla phuah pawh eng emaw zat a tarlang a ni.
Lehkhabu sawi hawnna neih zawh anih hnu hian lehkhabu pahnihte hi Rev Saienga Sailo, General Secretary chuan tlangzarhna hun neiin, Pathian hnenah a hlan a ni.
L&PB lehkhabu tlangzarh inkhawmah hian ‘Lengkhawm hla leh a phuahtu Pentecost mi hrang hluite’ tih ziaktu T. Upa Lalthlamuana hnen atangin lehkhabu a sual chhuah dan chanchin ngaihthlak a ni a. Literature Awareness Campaign Upa Vanlaldinthara, Member L&PB chuan a nei bawk.
He hunah hian Mizoram UPC General level Board/Department aiawh an tel kim hle a, programme hman zawh a nih hnuah Rev. P.Lalrinawma , Principal ATI chuan tawngtawinain inkhawm a ti tawp a ni.
Foreign Mission Board
Foreign Mission Board chu July ni 22 Zirtawpni khan an thu khawm a, Foreign Mission Field-a hmalak zel dan tur leh Missionary-te mamawh hrang hrang phuhruk dan turte an ngaihtuah.
Meeting hi Foreign Mission Board Chairman Rev. Thangliansanga’n a kaihruai a ni.
