General Headquarters hruaitute Programme:
General Superintendent Rev. Thangliansanga chu August ni 5 Zirtawp zan atang khan Headquarters kohhran Chairman Tirhkoh Liansangkima te chhungkua Pathian chawimawina ah thuhril rawngbawlna a nei a, Pathianni zan thleng hian hun a hmang ang.
General Treasurer Rev. PB Lalhmuliana chu August ni 5 Zirtawpni khan Upa Lalnuntluanga Chhangte, Education Board Chairman nen Sihhmui a School Building sak mek an tlawh a, hnathawh dante an enfiah.
General Treasurer chuan August ni 7 Pathianni hian Zemabawk West kohhran leh Chanmari West kohhran te a tlawh dawn a, Pathianni chawhnuah Zemabawk West kohhranah hun hmangin zan lamah Chanmari West kohhranah thu hril rawngbawlna a nei thung ang.
Upa Andrew Laldingliana, Chairman General Missions Dept. chu August ni 9 Thawhlehni hian North Bengal Field tlawhin a zin dawn a. Pentecost Mission School Building sak that ngaite a hmunah enfiahin, North Bengal Area Audit a neih pui ang.
Upa Andrew Laldingliana hi August ni 15 Thawhtanni hian Aizawl a lo let leh dawn a ni.
Rev T. Laldingliana, Secretary General Missions Dept chu August ni 6 Inrinni zan atang hian Bethlehem Bial Mission Revival inkhawmpuiah thu hril rawngbawlna a nei dawn a, Pathianni zan thleng hun a hmang ang.
Rev. B. Lalchhanhima, Secretary General SS Dept. chu August ni 7 Pathianni hmang hian Thenzawl kohhran a tlawh dawn a, SS Campaign a nei ang.
Rev PC Parliana Area Secretary chu August ni 5 Zirtawpni khan rammut rawngbawlna neih dante enpuiin, Area fangin a zin chhuak a, Lawngtlaiah ah hun hmangin Pathianni hian Diltlang South kohhrante a tlawh ang a, Thawhtanni zan hian Thingfal kohhrante a tlawh leh ang.
Area Secretary hi August ni 8 Thawhlehni hian Lunglei panin a let leh dawn a ni.
Hla Bu committee
Mizoram UPC kohhran hla bu ennawntu Committee chu August ni 4 Ningani khan Mizoram UPC General Headquarters Conference Hall-ah Hla bu chhut thar dan tur ngaihtuahin a vawi khatna atan Workshop an nei a. He workshop hi L&PB Chairman Rev C.Liansanga’n a kaihruai a, he committee Secretary Upa R. Lalropuia chuan minute leh Recommendation an siamte ziakin a chhinchhiah thung.
Hla bu ennawnna turah hian hnam dang tawnga hla awmte chu a phuahtu pian kum leh thih kum, a hla awmna hla bu hming leh a number tarlan vek tum a ni a. Hla let lingtu pawh an pian kum leh an thih kum tarlan vek tum a ni bawk. Hla buah hian hla thluk chauh hmanga Mizo irawm chhuak Hla awm te chu lettu tia dah lovin phuahtu tih leh a thluk lakna ziah lan a ni ang a Hla lehlinna thu pawh uluk taka ennawna siam that vek tum a ni bawk.
He Mizoram UPC hla bu chhut thar tur hi Mizo hla bu, Biak Ina sak ho tura chhuah awm tawh zawng zawng zinga a rin tlak ber tura ruahman a ni a. He workshop ni khatnaah hian hla 50 an en hman a. He hla bu workshop hi General Superintendent Rev Thangliansanga’n a ho a ni.
Mizoram UPC kohhran hla bu ennawntu Committee chuan thla tin chawlhkar khatna leh Chawlhkar thumna Ningani apiangin Workshop hi neih thin an tum a ni.
General PYD
July ni 29 Zirtawpni khan Directorate of Hospital & Medical Education Office Conference Hall, MINECO-ah nihnih awh state level consultative workshop MSACS leh UNICEF te tangkawp buatsaih chu neih a ni a, he hunah hian General PYD aiawhin RD.Lalremtluanga, Chairman, Social Wing Committee chu a tel a, ‘On carrying out Gap analysis in adolescent HIV/AIDS issues in Mizoram’ tih thupui hmangin State level consultative workshop hi neih a ni.
He worshop-ah hian kalkhawmte hi Group 3 ah inthen in, project pahnih (2) siam tir an ni a.
Society, Organisation, leh religious group-te hian HIV/AIDS hi engtin nge an do a, awareness plat form an siam thin tih leh awareness an neihin engtin nge an kalpui thin a, eng hmanrua te nge an supply tihte a ni a.
Workshop-ah hian HIV/AIDs do na kawngah pawl hrang hrangte tang ho tur leh programme buatsaihte ngai pawimawh lehzual turin an inchah uar hle a ni.
HMARCHHAK DISTRICT
Hmarchhak District Committee chu July ni 28 Ningani khan Bawngkawn kohhran Biak Inah an thu khawm a District Chairman Tirhkoh Lalsanglura’n a kaihruai.
District Committee-ah hian Hmarchhak District-in Khawlian khua a rawngbawl a rawih mek Tirhkoh Laltansiama’n report a pe a. Khawlian khuaah mi thar thahnem tak lawmluh an ni tawh thu leh Kohhran Biak In sak mek chu luah theih a peih fel a nih tep thute a tarlang a. Rawngbawlna kawng a hmachhawp hrang hrang an neihte a hnen atang hian ngaihthlak a ni.
Hmarchhak District Committee chuan Kum 2022 Hmarchhak District Inkhawmpui, November ni 11 atanga ni 13 Pathianni hmang a Zemabawk Biak In a neih dan turte an ruahman a, thu hriltu turte leh chanvo hrang hrang nei turte an ruat.
District inkhawmpui neih chhung hian Pathian biak inkhawm Rev V.Rothuamluaia District Supt.-in a kaihruai dawn a, November ni 11 Zirtawp zanah inkhawmpui hlanna hun Rev C Ramsangvawra Bawngkawn Bialtu in a nei ang.
Inkhawmpui tan zan hian Bial tin Secretary report ngaihthlak a ni dawn a, Inrinni chhunah District Chairman Tirhkoh Lalsanglura kaihhruaina hnuaiah ro rel inkhawm neih a ni ang.
Pastor Laltholeha, N. Khawlek Bialtu Upa H Lalrintluanga, Bawngkawn, Rev Zoramthara, Dean ATI, Tirhkoh Lalsanglura, District Chairman te chu thuhril rawngbawlna nei tur a ruat an ni a, Pathianni chawhma inkhawm ah thu hril rawngbawlna nei turin General Headquarters atangin hruaitute an beisei bawk.
Hmarchhak District inkhawmpuiah hian November ni 11 Zirtawpni hian Tirhkoh training neih a ni anga, he mi ni vek hian Licence dilte tan Exam buatsaih a ni dawn a, Zirtawp zan inkhawm banah Personal Interview neih pui an ni ang.
Heng bakah hian mawhphurhna hrang hrang chelh turte pawh District committee hian an ruat bawk.
Hmarchhak District-ah hian Kum 2022 chhungin mi thar 172 chuang Mizoram UPC ah lawm luh an ni tawh a ni.
