General Headquarters hruaitute rawngbawlna:
General Superintendent Rev. Thangliansanga chu August ni 19 Zirtawp zan atang khan Thuampui kohhrana Pathian chawimawinaah Speaker a ni a, Pathianni zan thleng hian thuhril rawngbawlna a nei ang.
General Secretary Rev Saienga Sailo chu August ni 19 Zirtawpni khan Imphal Bial tlawh turin a zin chhuak a, Financial Campaign a neih bakah Kohhran hmun hmate enfiahin Pathianni thleng a cham ang.
General Secretary hi Upa Vanalaldinthara, member P&FB in a tawiawm a ni.
Rev T.Laldingliana, Secretary General Missions Dept chuan Dinthar Bial Mission revival August ni 20, zanin atanga Dawrpui Vengthar kohhran a neih tur a hmanpui dawn a, Pathianni zan thleng hian Pathian biak inkhawmah thuhril rawngbawlna a nei ang.
Rev B. Lalchhanhima, Secretary General SS Dept. chu August ni 19 Zirtawpni khan Rabung Bial, SS Seminar cum Revival neih pui turin a zin chhuak a, Pathianni a cham anga, ni 22 Thawhtanni ah Aizawl a lo let leh ang.
Puipa Committee
Mizoram UPC Puipa committee vawi 341-na chu August ni 17 Nilaini khan General Headquarters Office Conference Hall-ah neih a ni a, Executive Chairman Upa C. Lalropianga’n a kaihruai.
Puipa committee chuan kohhran hmalakna tur hmachhawp pawimawh tak tak bakah Kum chanve Pastoral Board leh Executive Committee thu rel bawhzui ngai awmte an sawiho va. Kohhran ding thar tanpuina, Crusade Fund leh Relief Fund pek chhuah dan turte, General Assembly ro rel inkhawm leh kum tawp Pastoral Board leh Executive Committee neih hun turte chu an thu rel langsar zualte an ni.
Puipa Committee chuan Kohhran ding thar Lungpher kohhran, Cheural bial, July ni 10, 2022-a din,
Tuisentlang kohhran, Vathuampui bial, July ni 15, 2022-a din leh
Vapar kohhran, Hnahlan bial August ni 6, 2022-a ding tharte hnenah tanpuina Rs.30,000/- theuh pek an remti a, Siaha District Crusade Committee leh NC Hills Bial MissionS Dept. te hnenah Crusade fund pek an rel bawk.
Kohhran chhungkua a chhiatna leh harsatna tawk mek Kohhran pakhat leh mimal pali te hnenah tanpuina Relief Fund atangin pek nise an ti bawk a ni.
Mizoram UPC Puipa Committee chuan Kumin General Assembly ro rel inkhawm neih hun atan December ni 9 leh ni 10 Zirtawpni leh Inrinni an ruat a, Kum tawp Pastoral Board neih hun atan December ni 6 Thawhlehni leh Executive Committee neih hun atan December ni 7 leh ni 8 an ruat bawk a ni.
P&FB
Mizoram UPC Planning & Financial Board chu August ni 15 Thawhtanni khan Upa Lalzirliana, board chairman te in, Chanmari West-ah an thu khawm a. Puipa ten an ho.
Meeting-ah hian Kohhran hmalakna tur pawimawh tak tak sawiho a ni a, Sum sanction ngaite thlirho niin, Mizoram UPC hnuai a Committee/board leh Dept bakah Bial atanga sum hman dilna lo lutte chu an thu rel langsar zualte an ni a, Assembly Centre Zonuam hmun a Assembly Centre sakna leh Main Building sak chhunzawm dan turte leh Bethani childrens Home-a bathroom leh toilet thawm that chungchang leh an mamawh hrang hrangte an rel bawk a ni.
General PYD
General PYD inkhawmpui lian neihna tur Pandal chu August ni 13 Inrinni khan Assembly Centre Zonuamah sak tan a ni.
Pandal sak thawh khatnaah hian Aizawl khawpui chhunga Pastor Bial panga Chawlhhmun, Chaltlang, Bazar, Dinthar leh Bawngkawn Bialte hnatlangin Mi 240 an thawk chhuak a, an ni bakah hian General Headquarters hruaitute, General PYD EBM te leh Pandal Committee atangin hnatlang eng emaw zat an awm bawk.
Pandal sak hnatlang hi August ni 15 khan thawh chhunzawm leh a ni a, hemi ni hian Aizawl khawpui chhung a Bial panga Zemabawk, Durtlang, Headquarters, Bungkawn leh Bethlehem Bialte an hnatlang thung a. Mi 215 thawk chhuakin Mizoram UPC Puipa te leh Bialtu Pastor ten an telpui bawk a ni.
General PYD Pandal sak hnatlang hi August ni 20 Inrinni hian neih leh a ni dawn a. Aizawl khawpui chhunga Pastor Bial atangin thalai pawl ten an sak chhunzawm ang. Mizoram UPC thalai pawl General Pentecostal Youth Department inkhawmpui hi Sept ni 23 atanga ni 25 chhung hian neih a ni dawn a ni.
