General Headquarters hruaitute programme:
General Superintendent Rev Thangliansanga chu September ni 16 Zirtawp zan atang khan Bungkawn kohhrana Pathian chawimawinaah speaker a ni a. General Superintendent hian Pathianni zan thleng Bungkawn kohhranah hian rawngbawlna a nei ang.
PLANNING & FINANCIAL BOARD
Mizoram UPC Planning & Financial Board chu September ni 13 Thawhlehni khan Mizoram UPC Office Conference Hall, Zonuam ah an thu khawm a, Board Chairman Upa Lalzirliana’n kaihruaiin Puipa ten an ho. P&FB meeting-ah hian Main Office building sak mek chhunzawmna tur atana sum sanction chungchangte chu Thu ngaihtuah langsar zual a ni a. Kum 2022 January atanga June thla audit note thlirho niin, Ro relna sang zawk Executive Committee a ngaihtuah atan DA tihpun chungchangte sawiho a ni bawk. Heng bakah hian Biak In sak tanpui dilna lo lutte, Press Board property lei chungchangte, Pastor Quarters repair fund dilna te leh kohhran Hmunhma tih ral leh lei chungchangte an sawihova. Meeting chuan Saron kohhran Biak In hmunte, Imphal Bial National Game Village-a Biak In hmun leh Leimakhong a kohhran ram te chu Zirchianna report an thlirho hnuah a tul anga hmalak an rel a ni.
General Missions Dept
General Missions Dept Executive Board chu September ni 14 Nilaini khan Chairman Upa Andrew Laldingliana kaihhruaina Hnuaiah Mizoram UPC Office Conference Hall-ah an thu khawm a, Puipa ten an ho. General Missions Dept Executive Board chuan Mizoram UPC Assembly Centre-ah RA Doveri hriatrengna lungphun siam chungchangte, Mission Field-a thawktute pualin joint worker meet leh revival Guwahati hmunah buatsaih nise tihte an rel a, Agra leh Chhatisgarh Filed-ah ram lei nise tih leh Tezpur Field-ah worker pakhat lak belh tha an ti bawk. Heng bakah hian Guwahati Field, Iangkholi a Store room sak zawh na tur leh Delhi Field, Uttarakhand quarters property lei na atan sum pek chhuah nise an ti a, Meeting-ah hian Mission Field-a hmalakna tur pawimawh tak tak sawiho a ni.
Gen LAD
General LAD Executive Board chu September ni 15 Ningani khan Tirhkoh Zemliana te in Dintharah an thu khawm a, Mizoram UPC Puipa ten an ho. Meeting-ah hian October ni 21 atanga ni 23 Pathianni hmanga General LAD Inkhawmpui Sairanga an neih turah, inbuatsaihna kalpui dan turte an sawihova, Inkhawmpui Agenda lo lutte leh kum 2023 Budget Estimate-te an thlirho bawk. General LAD Executive Board chuan inkhawmpuiah hian kum 2023 Thupui Bu chu tlangzarh nise an ti a, Rs.50 a hralh chhuah tur a ni ang. heng bakah hian sum sanction ngaite sawihovin, a tul anga hmalak an rel a ni.
