General Superintendent Rev Thangliansanga chu October ni 7 Zirtawpni khan Tuichangral District Inkhawmpui October ni 9 Pathianni hmanga, Khawbung Bial Dungtlang hmuna neih tur hmanpui turin a zin chhuak a. General Superintendent hi Thawhtanni ah Aizawl a lo let leh ang.
General Secretary Rev Saienga Sailo chuan October ni 8 Inrinni hian Govt Complex kohhran Biak In Pathian hnena hlanna leh hawnna a nei dawn a. Pathianni hian Lengpui Bial chhung kohhrante a tlawh bawk ang.
Tirhkoh Ch. Lalhmingmuana, Chairman General SS Dept chu October ni 7 Zirtawpni khan Ankhasuo-ah Barak Valley Bial SS Seminar cum Training neih pui turin a zin chhuak a. Pathianni a cham dawn a, October ni 10 Thawhtanni hian Aizawl a lo let leh ang.
Rev PC Parliana Area Secretary chu October ni 5 Nilaini khan Siaha Kohhran Silver Jubilee hmanpui turin a zin chhuak a. Rev Lalhmunngheta Lunglei South Bialtu in a tawiawm. Area Secretary hi October ni 7 Zirtawp zan atang khan Lawngtlai bial inkhawmpuiah Speaker a ni a. October ni 9 Pathianni zan thleng hian Thu hril rawngbawlna a nei dawn a. Ni 10 Thawhlehni hian Lunglei a let leh ang.
Gen SS Board
Mizoram UPC Sunday School Department ro relna sang ber General Board vawi 26-na chu October ni 5 Nilaini khan Mizoram UPC Assembly Centre Conference Hall Zonuamah neih a ni a. Chairman Tirhkoh Ch. Lalhmingmuana'n kaihruaiin, Mizoram UPC Puipa te an ho.
General Board-ah hian Mizoram UPC Sunday School Dept. hmalakna tur agenda pawimawh tak tak sawiho a ni a. Rorelna chuan Puitling SS zirlaibu tun aia uluk lehzuala endikna kalpui a, tih chhuah ṭhin nise an ti a,
Naupang SS zirbu te chu hralh chhuah an nih hmaa General SS hmalaknaa uluk zawk a endik ni se, tihsual palh awm te pawh en mil theih tura a tihdikna tihchhuah tel nise tihte an rel a. Naupang SS zirbu a Kohhran Ni pawimawh a syllabus te chu a rual tlang a zir a nih theih nan General SS Executive Board-in hma la rawh se tihte chu an thurel langsar zualte a ni a. Kum 2023 General SS Budget atan cheng nuai sawmhnih pasarih leh sangkhat zasarih (Rs. 27,01,700) an pawm bawk.
Mizoram UPC SS Dept. General Board-ah hian Kum 2023 Puitling SS Zirlai bu tur ‘Exodus Lehkhabu zirna’ chu pho chhuah a ni a, General Superintendent Rev Thangliansanga'n tlangzarhin Pathian hnenah a hlan a.
Kum 2023 Puitling SS Zirlaibu hi Rev HC Lalthlamuana ziak niin, bu khat hi Rs. 110 man a ni.
