Puipa Programme

General Superintendent Rev Thangliansanga chu October ni 14 Zirtawp zan atang khan Bethlehem Vengthlang kohhran Biak in a Rev PC Parlianate chhungkua  Pathian chawimawinaah thuhril rawngbawlna a nei a. Pathianni zan thleng hian rawngbawlna hi a nei ang.

 General Secretary Rev Saienga Sailo chu October ni 14 Zirtawp zan atang khan Chanmari West kohhran PYD Revival Crusade-ah rawngbawlna a nei a. Pathianni zan thleng hian hun a hmang ang.

General Treasurer Rev PB Lalhmuliana chu October ni 15 Inrinni hian Tripura panin a zin chhuak a. Ngaisingpara Mission School, Khumlung Supervisor Quarters leh Tuikumba a kohhran hmunhmate a a tlawh ang. General Treasurer hi Upa Lalnuntluanga Chhangte,  Mizoram UPC Education Board Chairman-in a tawiawm a. October ni 18 Thawhlehni hianAizawl an lo let leh ang.

Puipa  committee

Mizoram UPC Puipa Committee chu October ni 13 Ningani khan Executive Chairman Upa C. Lalropianga kaihhruaina hnuaiah an thu khawm a. Kohhran hmalakna tur tul leh pawimawh tak tak sawihovin,

Fixed Pay Pastor lakna Examination neih hun atan December ni 1, 2022 an ruat. Puipa Committee chuan General Assembly Organising Committee hnenah thlengtu puihna Rs. 5,00,000/- sanction a remti a. Mamit Bial Vawngawnzo Preaching point ding thar hnenah tanpuina sum pek tha an ti bawk.

Assembly Centre-a kohhran hmunhma chu tangkai zawka hman a nih theih nan a Master Plan Architect-te nen a mumal taka siam a, kum tawp General Assembly a pho chhuah tha an ti a ni. Heng bakah hian Puipa Committee chuan Bial hrang hrang atanga dilna leh rawtna lo lut enegmaw zat an ngaihtuah bawk.

General Missions Dept.

Mizoram UPC Missions Department rorelna sang General Board chu October ni 12 Nilaini khan  Dinthar kohhran Biak inah neih a ni a. Chairman Upa Andrew Laldingliana'n kaihruaiin, Mizoram UPC Puipa ten an ho.

General Board-ah hian Mizoram UPC Missions Dept. hmalakna tur agenda pawimawh tak tak chhawp chhuaha sawiho a ni a. Kum 2023 General Conference neih hun leh neihna hmun tur chu Executive Board ngaihtuah atan an dah.

General Missions hmalaknain Missions Filed-ah Biak In sak nan Kohhran chhungtinah Rs. 20 theuh khawn an rel a. General Missions Department Chairman, Secretary leh Treasurer-te Incumbency Chart siamte. Missions Filed-a thawktute transfer and posting School Session mila kalpui nise tihte. Central Area chhunga awm Chhattisgarh Field, North Eastern India Area a sawn luhte chu an thurel langsar zualte a ni a.

Heng bakah hian General Missions Department Manual siam ṭhat rawtna engemaw zat sawihovin, ro relna sang zawka thlen tur Agenda engemaw zat an pass bawk a. Kum 2023 Budget atan cheng nuai zahnih sawmsarih pakua, singkua sangli zanga (Rs 27,994,500.00) an pawm bawk a ni.

Mizoram UPC General Missions Dept. hnuaiah hian Mizoram State pawnah  Area panga (5) awmin, Field 16 a awm mek a ni.

Gen LAD

General LAD inkhawmpui lian inbuatsaihna pawh chak taka kal pui mek zel a ni a. Inkhawmpui neihna tur pandal pawh sak chhunzawm mek zel niin. Inkhawmpui thlengtu Sairang Bialte chhun leh zanah hnatlangin an bei ngawrh hle a. Bial pawn atangin hnatlanga thawk chhuak mi thahnem tak an awm reng bawk.  General LAD chuan inkhawmpuiah hian bial tinte flag keng theuh tur leh General hruaitute hnena submit vek turin turin a ngen a,

Inkhawmpui lian pual hian rampum huap chawnghei ṭawngṭai Oct ni 18 Thawhlehni hian LAD member ten nei theuh turin a hriattir bawk.

 North Mizoram District

North Mizoram District inkhawmpui chu September ni 30 atanga October ni 2 chhung khan Chungtlang kohhran Biak inah neih a ni a, Mizoram UPC General Secretary Rev Saienga Sailo chuan a hmanpui. Inrinni ah ro rel inkhawm an nei a. Kum 2023-ah Hmuifangah rawngbawltu rawih chhunzawmte, ro relna sang zawka thlen tur, Kohhran hmun ramte ṭangkai taka hman a nih theih nana hmalak ṭha an ti a. Kum 2023 Budget an passed bawk.

North Mizoram District inkhawmpuiah hian Rev H. Laltlankhuma, Rev H. Lalrawnkima, Rev Saienga Sailo, Rev C. Lalremsanga leh Tirhkoh Liansangkima ten thu hril rawngbawlna an nei a. Pathianni zanah inkhawmpui hi a tiak a, Kum 2023 North Mizoram District Inkhawmpui chu Headquarters Bialah nghah a ni.

North Mizoram District inkhawmpui report-a a landanin, Inkhawmpui leh inkhawmpui inkarah hian District chhungah mi thar 170 kohhranah lawm luh an ni.

Tuichangral District

Tuichangral District inkhawmpui chu October ni 7 atanga ni 9 Pathianni hmang khan Khawbung Bial Dungtlang kohhran biak in ah tluang taka neih zawh a ni a. Mizoram UPC General Superintendent Rev Thangliansanga’n a hmanpui.

Tuichangral District inkhawmpuiah hian Zirtawp zan atangin Sermon inkhawm neih a ni a, Revival nen hlim taka hman niin Upa Lalbiakmawia’n thuhril rawngbawlna a nei a. Inrinni zanah Pastor Lalhmachhuana, Pathianni chawhmaah General Superintendent Rev Thangliansanga, Pathianni chawhnuah Pastor K. Lalawmpuia leh Pathianni zanah Pastor Lalhmunthara ten thuhril rawngbawlna an nei bawk.

Inrinni ah ro rel inkhawm an nei a. Kum 2023 Tuichangral District inkhawmpui chu Khawzawl vengtharah nghah a ni. District inkhawmpui thlengtu puihna tihsante.  Kohhran hlabu Android Application a siam tur a L&PB a thlen te, Sacrament a kan hman thin Uaiin hi rampum huapa in ang khata mumal taka hman a nih theih nan General Headquarters-in ruahmanna siam rawh se tihte, General Headquarters a thlen tur Mizoram UPC hian Genesis atranga Thupuan hrilfiahna a bu a siam nise tihte, General Assembly Agenda atan Upa Ordain neih ni rawh se tihte chu Tuichangbral District inkhawmpui ro rel langsar zualte an ni a.

Ro relna sang zawka thlen tur Dan pui kaihhnawih leh agenda engemaw zat an rel bakah Kum 2022- 2023 District budget an ruahman bawk a ni. Tuichangral District inkhawmpuiah hian palai kal an tha hle a.

Riak lut mi 700 chuang awmin Inkhawmpui Palai zinga upa ber hi Sr Upa Neihliana, Vaphai Kum 93 mi a ni.