Hruaitute rawngbawlna
General Superintendent Rev Thangliansanga chu October ni 28 Zirtawpni khan Keifang Bial Rulchawm kohhran Biak In Pathian hnena hlanna leh hawnna Nei turin a zin chhuak a. Area Secretary Rev PC Parliana’n a tawiawm.
General Superintendent hi Thawhtanni hian Aizawl a lo let leh ang.
General Secretary Rev Saienga Sailo chu Vairengte Bial LAD Seminar cum revival hmanpui turin October ni 28 Zirtawpni khan a zin chhuak bawk.
General Treasurer Rev PB Lalhmuliana chuan October ni 30 Pathianni chawhnua L&PB buatsaih Inneih hla in phuah siak lawmman semna inkhawm, Bazar kohhran Biak In a neih tur chu a hman pui ang.
Rev T. Laldingliana Secretary General Missions Dept chu October ni 29 Inrinni zan atang hian Bungkawn Bial Missions Dept revival inkhawmpuiah Speaker a ni dawn a. Pathianni zan thleng hian thuhril rawngbawlna a nei dawn a ni.
Rev B Lalchhanhima, Secretary General SS Dept chuan October ni 30 Pathianni hmang hian Hmunpui kohhran Lengpui Bial a tlawh dawn a. Sunday School Campaign a nei ang.
Puipa Committee
Mizoram UPC Puipa Committee chu October ni 27 Ningani khan Executive Chairman Upa C. Lalropianga te chenna in ah an thu khawm a. Kohhran hmalakna tur pawimawh tak tak an sawiho.
Puipa Committee chuan Assembly Centre Zonuama Main Office Building thar chu luah theih a peihfel anih tawh avangin, November ni 15 ral hma a General Headquarters Office Tuikhuahtlang chu sawn nise an ti a. Office thar hawnna hunserh urhsun tak a hman an rel bawk.
Puipa Committee ah hian Office hlui hman zui zel dan turte an sawiho bawk a. Kum 2022 General Assembly palai ALJC leh JNPC atanga lo kalte lo dawnsawn dan turte leh ro relna sang zawka ngaihtuah tur engemeaw zat an rel bawk a ni.
General Missions Dept
General Missions Dept Executive Board chu October ni 24 Thawhtanni khan General Headquarters Office Conference Hall-ah an thu khawm a. Chairman UPC Andrew Laldingliana’n kaihruaiin Mizoram UPC Puipa ten an ho a ni.
General Missions Dept. Executive Board Vawi 166 na chuan Karbi Anglong Field-a thawktu Group IV Tirhkoh Letgin Khongsai chu Group II ah a hlang kai a. Bihar Field Pastor Quarters leh North Bengal Field-a Pentecost Missions School Zirtirtu Quarters a hman tur Refrigerator pek an rem ti bawk.
Heng bakah hian Nagaland Field Meluri khua a Pastor Quarters sak zawh nan sum pek an remti a. Nov ni 19 leh ni 20 hmanga Workers Seminar cum Revival Guwahati a neih tur programme an ruahman bawk a ni.
General Missions Dept Executive Board thutkhawmah hian Karimganj leh a chheh vel a Missionary in tirh dan tur leh missionary posting turte ngaihtuah a ni a. Mizoram UPC Assembly Centre a Missionary Roxie A R Telie Dover-i hriatrengna lungphun siam chungchangte sawiho a ni bawk a ni.
Gen LAD
Mizoram UPC Tanpuitu hmeichhe pawl inkhawmpui lian October ni 23 Pathianni hmanga Sairang Playground-a neih chu tluang taka hman zawh a ni.
Kum 2022 General LAD Inkhawmpuiah hian Kum 2023 a Hmeichhe pawl hmalakna tur pawimawh tak tak engemaw zat rel a ni a.
Inkhawmpui thlengtu puihna tihsante, Bethani Childrens Home enkawlna atan ₹ 5,00,000 Budget-a dahte, Kum 2023 atanga hman turin Bethani Childrens Home pual member pakhatah ₹50 khawnte, Khuarel chhiat tuarte ṭanpuina atan Budget ₹ 1,00,000/- ruahmante, Kum 2023-ah Gen LAD hminga Cancer Hospital, Zemabawka ₹ 50,000/- a luanchhuahte, Missionary pual atana ₹ 50,000 a luanchhuahte, Kum 2023 ah ATI pual atan member pakhatah ₹30/- khawnte chu Kum 2022 General LAD inkhawmpui ro rel langsar zualte an ni a. Mizoram UPC ro relna sang zawk a thlen tur, Camping Centre changtlung zawk neih a nih theih nan leh Bethani Children’s Home-ah Aizawl District pawn lam mite dah an ni ve theih na tur atana chak taka hmalak nise tihte an rel bawk.
Kum 2023 General LAD Budget atan ₹ 26,73,000/- (cheng nuai sawmhnih leh paruk, singsarih leh sangthum) chu inkhawmpui chuan a pass bawk a ni.
General LAD kum 2022 inkhawmpuiah hian palai in report mi 2630 an awm a, riak lut mi 1630 awmin lang a kal hi mi 1000 an ni.
General LAD inkhawmpui hi kum khat dana neih a nih angin nakum hian inkhawmpui neih a ni dawn lova, Inkhawmpui awm loh kuma neih thin General Board chu Zemabawk N kohhranah neih a ni ang.
General LAD chuan inkhawmpui thlengtu Sairang Bialte inbuatsaihna ropui an tiin, zo tak mai a Sairang khawtlangin mikhual an thlennaah lawmthu an sawi a ni.
ATI
Mizoram UPC Pathian thu zirna Apostolic Theological Institute Silver Jubilee Closing Ceremony leh Graduation Day chu October ni 27 Ningani chhun khan ATI Chapel, Durtlangah hman a ni a. Kumina zirlai zoa chhuak tur mi 21 te hnenah graduation certificate hlan niin, Tirhkoh H. Lalrinsanga Khumtung chu zirlai zing a ti tha ber a ni.
ATI Silver Jubilee Closing ceremony leh Graduation day hi ATI Principal Rev. P. Lalrinawma chuan a kaihruai a, Durtlang Bialtu Rev C. Lalawmpuia'n hunserh hmangin inkhawm Pathian hnena hlanna hun a nei a.
Rev. Zoramthara, Dean, ATI chuan result puanna leh report pekna hun a hmang bawk.
ATI Graduation Day ah hian Mizoram UPC General Secretary Rev. Saienga Sailo chuan Graduate-te certificate hlanna a nei a, Rev PB Lalhmuliana, Mizoram UPC General Treasurer chuan zirlaite thilpek hlanna neiin, Mizoram UPC General Superintendent Rev. Thangliansanga'n Graduate tharte tawngtaisakna leh fuihna hun a hmang a.
Rawngbawlna kawnga chak thar lak zel chakna leh thingkittuin hreipui a tat hriam zel anga Pathian thu a in tat hriam zel turin zirlai kalkhawmte a chah a ni.
Mizoram UPC Bible School Graduation Day inkhawmah hian General Headquarters-a Department aiawh an tel kim hle a, sawm bikte hnen atangin thusawi tawi ngaihthlak a ni bawk.
Mizoram UPC Bible zirna ATI hi June 2, 1997 khan Durtlang Lal M Suaka in luah hawhin Durtlang Mual vengah bul tan a ni a. Tunah hian zirlai 48 awm mekin, ATI atang hian zirlai 333 Graduate an awm tawh a ni.
P&FB
Mizoram UPC Planning & Financial Board chu October ni 20 Ninagni khan an thu khawm a.
Kohhran hmalakna tur pawimawh tak tak sawihovin he thutkhawm hi Executive Chairman Upa C. Lalropianga’n a kaihruai.
Bethani Childrens Home Society Board budget siam rem chungchangte, Lawngtlai Bial AOC venga Biak In hmun leite, Tripura Supervisor Quarters tihchangtlun nan a Property leite, Imphal Bial Pastor Quarters thawm thatna tur sum sanction-te chu an thu rel langsar zualte a ni a.
Planning & Financial Board meeting hi Puipa ten an ho a ni.
