United Pentecostal Church
of Mizoram

General Superintendent Rev Thangliansanga chu Lawngtlai District inkhawmpui hmanpui turin November ni 17 Ningani khan Lawngtlai panin a zin chhuak. General Superintendent hi Rev Chhunglawma Retd leh Rev F. Lalhmachhuana Retd ten an tawiawm a ni.

General Treasurer Rev PB Lalhmuliana chu Home Missions Field Workers, Seminar cum Revival hmanpui turin November ni 18 Zirtawpni khan Guwahati panin a zin chhuak. General Treasurer hi November ni 21 Thawhtanni hian Aizawl a lo let leh ang.

Rev T. Laldingliana Secretary General Missions Dept. chu November ni 17 Ningani khan Guwahati Field Iangkholi hmuna,  Missions Workers Seminar cum Revival hmanpui turin a zin chhuak bawk.

Home Missions Field Workers Seminar cum revival hi November ni 19 leh ni 20  Pathianni hmang hian neih a ni dawn a ni.

Rev B. Lalchhanhima Secretary General SS Dept. chuan November ni 20 Pathianni hian Orphanage Sunday pual thu sawina hun Headquarters kohhranah a nei ang.

Rev PC Parliana Area Secretary pawhin November ni 20 Pathianni hmanga Lawngtlai District inkhawmpui neih tur a hmanpui ang.

Planning

Mizoram UPC Planning & Financial Board chuChairman Upa Lalzirliana hovin November ni 16 Nilaini khan General Headquarters Office-ah an thu khawm a, Kohhran kal zelna atana hmalakna tur pawimawh tak tak an sawiho.

Meeting-ah hian MUPC-in hmachhawp hrang hrang a neihte thlir ho a ni a.  Rawtna engemaw zat ro relna sang zawka thlen tur ngaihtuahin, Board chuan Pastor Quarters hmun hnihah lei an rel bawk.  P&FB meeting hi Puipa ten an telpui a ni.

ATI

ATI hriattirna.

ATI Board vawi 196-na chuan kum 2023 ATI lut thar turte Personal Interview neih hun atan February ni 15 2023 a ruat a. Registration Day ni 17 ah neih zui a ni anga, kum 2023 Session hi February ni 20, 2023 ah tan tur a ni.

KHAWTHLANG DISTRICT

Khawthlang District Inkhawmpui vawi 25-na tluang taka hman zawh a ni.

November ni 11 atanga ni 13 Pathianni hmanga neih District inkhawmpui hi Dinthar Bial chuan thlengin, Dinthar kohhran biak in ah neih a ni a. Inkhawmpui neih chhung hian District Superintendent Pastor C. Lalrosiama'n Pathian biak inkhawm a kaihruai a ni.

Khawthlang District inkhawmpui hi Mizoram UPC General Superintendent Rev. Thangliansanga’n a hmanpui a, a hnen atang hian Pathianni chawhma inkhawmah Pathian thu chah ngaihthlak a ni a. Zirtawpni zanah Rev. Biekchuoilo, Kawrthah bialtu Inrinni zanah Pastor Rualthanmawia, Lengpui bialtu Pathianni chhunah Upa FT Manliana, Mamit H/S Veng leh Pathianni zanah Rev. HV. Lalzamlova, Chawlhhmun bialtu ten thuhril rawngbawlna an nei bawk.

November ni 12 Inrinniah ro rel inkhawm neih a ni a. Palai ruat bik mi 153 ten ro relin, District Chairman dam lohna avângin, a aiah Upa Lalnuntluanga Chhangte District Treasurer chuan ro rel inkhawm a kaihruai a.

District chhungah Tirhkoh rawih chhunzawm rawtnate, Kum 2023-ah Tirhkoh Training/Seminar neih nise tihte, Ro rèlna sang zawka thlen tûr. Kohhran dana inkutsuih thei chin kum bithliah rawtnate, Bookroom enkawltu tur Board din rawtna te. Ram pumah fa nei tam tura inzirtir ni se tihte. Govt. Complex kohhran chu Ainawn veng kohhran tia thlâk ni se tihte. ATI-ah regular-a kal thei lote tan correspondence course zirna siam rawtnate chu An thurel langsar zualte a ni a. Kum 2023 Budget an ruahman bawk.

Khawthlang District inkhawmpui hi ruat lawk sa angin Kum 2023-ah Kawrthah bialin an thleng dawn a. Kum 2024-ah Sairang bialin, kum 2025-ah Lengpui bialah te ruat lawk a ni bawk a ni.

Khawthlang District inkhawmpuiah hian Pathianni chawhmaah General Missions Dept Cahirman Upa Andrew Laldingliana’n Missions Campaign a nei a. District pual Home Mission pual, Bethani Children’s home pual leh

Foreign Missions pual thawhlawmte lakkhawm a ni. Inkhawmpui hi Pathianni zan thleng khan kohhran hoten revival nen hlim takin Pathian biak hona an nei a. Pathianni zan khan a tiak a ni.

Khawthlang District chhungah hian Pastor bial 8 awmin, Kohhran 46 leh Preaching Point 5 a awm mek a ni.

LUNGLEI DISTRICT

Lunglei District Inkhawmpui vawi 28-na pawh November ni 11 atanga ni 13 Pathianni hmang khan Hnahthial Electric Veng kohhran Biakin neih a ni a. Mizoram UPC Puipa Rev. PB Lalhmuliana, General Treasurer-in a hmanpui.

Lunglei District inkhawmpui hi Pastor RT Lalṭanpuia, District Superintendent kaihhruaina hnuaiah Hlim taka hman niin, Pastor HV Lalzuithanga (Thingsai Bialtu), Tk. Lalnuntluanga, Serchhip, Tk.TC Lalchhawnzauva, District Treasurer, Rev. PB Lalhmuliana, General Treasurer, Pastor RT Lalṭanpuia, District Superintendent leh Rev. PC Parliana Area Secretary ten thuhril rawngbawlna an nei a, Inkhawmpuiah hian District pual, Bethani pual, PCC pual,General Missions pual leh Foreign Missions pual thawhlawm lakkhawm a ni.

November ni 12 Inrinni zingah Lunglei District chhunga Tirhkohte pualin Retreat neih a ni bawk a. He hunah hian Tirhkoh 9 an tel thei a, Rev.PB Lalhmuliana General Treasurer- chuan he hun hi hovin Seminar a neih pui a ni.

Lunglei District inkhawmpui hi Pathianni zan thleng khan Pathian thlarau Awmpuina hnuaiah hlim taka hman a ni a. Pathian biak inkhawmah Zai miten zai rawngbawlna an nei thin bawk.

Lunglei District inkhawmpui ro rel, Upa K.Lalzarliana,District Chairman kaihhruaina hnuaia neih chuan, kum 2023 District Inkhawmpui chu Thingsai Bialah an nghat a. Inkhawmpui thlengtu puihna tihsante leh, General Assembly a thlen tur Agenda 8 an passed a. kum 2023 Budget an ruahman bawk a ni.

Lunglei District ah hian Pastor Bial 7 awmin, Kohhran 33 leh Preaching Point 3 a awm mek a. Inkhawmpui leh inkhawmpui inkarah member thar 140 kohhranah lawm luh an ni a. Lalpa Isua hminga Baptisma chang thar mi 87 an awm bawk.

Lunglei District inkhawmpui neih zawh tuk November ni 15 Thawhlehni khan, Rev.PB Lalhmuliana, General Treasurer leh Lunglei District chhunga Pastor zawng zawngte leh District Hruaitute kaltlangin, Pathian chawimawina neih a ni a. Rev.Lalngaizuala (Lunglei North Bialtu) leh Rev.Lalhmunngheta (Lunglei South Bialtu) te'n thuhril rawngbawlna an nei a, inkhawmpui palai engemaw zat he hun hmang hian an cham zui bawk a ni.

SERCHHIP DISTRICT

Serchhip District inkhawmpui November ni 11 atanga ni 13 chhunga N.Vanlaiphai headquarters kohhran biak inah neih chu Tluang taka hman zawh a ni a. General Secretary Rev Saienga Sailo chuan a hmanpui.

Serchhip District inkhawmpuiah hian Pastor Lalnunzama (Lungpho bialtu), Pastor KC.Ramnunmawia (Dist. Treasurer), Rev.Saienga Sailo (General Secretary), Pastor Vanlalruata (N.Mualcheng bialtu), Pastor C.Lalramnghaka (Dist. Supt) leh Tk.Lalmuansanga Serchhip ten thuhril rawngbawlna an nei a. District chhunga zaithiam ten inkhawm apiangin zai rawngbawlna an nei bawk.

Inrinniah Dist. Chairman Upa K.Denghmingthanga kaihhruaina hnuaiah Palai ten ro an rel a. kum 2023 inkhawmpui chu N.Mualchengah an nghat.

Dist chhungah ram beih nan budget siamte, Dist. Relief Fund neih chhunzawm a, kalphung ngheta neih rawtnate. Inkhawmpui thlengtu puihna tihsante chu Serchhip District inkhawmpui ro rel langsar zualte an ni a.

General Assembly a thlen tur Agnenda pahnih an pass bakah Kum 2023 Budget an ruahman bawk. Serchhip District inkhawmpui neih chhung hian Pathianni tlaiah District chhunga Tirhkohte tan seminar neih a ni a. Inkhawmpui hi Pathianni zan khan a tiak a ni.

Serchhip District-ah hian Pastor Bial 7 a awm mek a ni.

HMARChHAK DISTRICT

Hmarchhak District inkhawmpui November ni 13 Pathianni hmanga  Zemabawk kohhran Biak Ina neih chu tluang taka hman zawh a ni.

District Inkhawmpui hi November ni 11 Zirtawp zan atang khan hman tan a ni a. Zirtawpni chhunah Hmarchhak District chhunga Tirhkoh-te training neihpui an ni bawk. Tirhkoh training hi District Chairman Tirhkoh Lalsanglura’n a kaihruai a. Rev. B Kapmawia Chaltlang Bialtu chu Resource Person niin, he hunah hian Tirhkoh 23 awm zingah mi 17 an tel thei a ni.

 Hmarchhak District inkhawmpui neih chhung hian Pathian biak inkhawm Rev. V Rothuamluaia District Supt chuan a kaihruai a. Pastor Laltholeha N.Khawlek Bialtu, Upa H.Lalrintluanga Bawngkawn, Upa C Lalropianga Executive Chairman, Rev. Zoramthara ATI Dean leh Tirhkoh Lalsanglura District Chairman te chuan thuhril rawngbawlna an nei a ni.

Pathianni chawhma Inkhawmah District chhunga Inkhawmpui leh Inkawmpui in kara Boral te sunna hun Rev.C Lalawmpui District Treasurer chuan a hmang a. Ramthim pual appeal-na hun Rev.T Laldingliana, General Mission Dept Secretary chuan a nei bawk.

Hmarchhak District Inkhawmpui neih chhung hian zai thiam ten zai rawngbawlna an nei bawk a. Revival nen inkhawmpui hi Pathianni zan thleng khan hlim taka hman a ni.

Hmarchhak District inkhawmpui ro relna chuan Kum 2022 District inkhawmpui Darlawn Bialah a nghat a. Inkhawmpui thlengtu Rotation an hman lai chu tidanglamin. 2024 inkhawmpui, Chaltlang Bial-ah 2025 inkhawmpui, Sakawrdai Bial-ah 2026 inkhawmpui, Bawngkawn Bial ten an thleng dawn a ni.

Kum 2023ah District hmalaknaa Tirhkoh rawihte, District inkhawmpui thlengtu puihna tihsante an rel bakah Ro relna sang zawka thlen turin District Office Bearer te Executive Committee ah lut ve tur leh District in Mi pahnih Executive member atan a thlan thin tih tawpte, Mizoran UPC Media & Publicity Board chu Borad puitling a hlan kai nise tihte. Mizoram UPC hnuaia District inkhawmpui a rual a hman rawtnate,

Mizoram UPC kohhran ni pawimawhte urhsun taka hman a nih theih nana Guide Line mumal tak siam rawtnate, Bial, District leh General Assembly inkhawmpuiahte Lalpa zanriah Sacrament rawngbawlna buatsaih chhunzawm zel nise tih rawtnate chu, Hmarchhak District inkhawmpui ro rel langsar zualte an ni a Kum 2023 Budget an ruahman bawk.