Mizoram UPC General Headquarters chuan November ni 30 Nilaini khan Conference Hall-ah Rev B. Kapmawia, Chaltlang Bialtu Pastor, Superannuation pension a chhuak tur an thlah.
Rev B. Kapmawia thlahna inkhawm hi Upa C. Lalropianga Executive Chairman chuan a kaihruai a. Hunserh Rev T. Laldingliana, Secretary General Missions Dept chuan hmangin. Service report General Secretary Rev Saienga Sailo hnen atangin ngaihthlak a ni bawk.
Rev B. Kapmawia hi kum 1983 khan NEI UPC hnuaiah General Licence pek niin, Kum 1996 November ni 1 khan Mizoram UPC Pastor atana lak a ni a. A service chhung hian Pastor Bial 7 a enkawl a, kum 1997-99 chhung khan Lunglei Sub HQ Associate Secretary nihna a lo chelh tawh bawk a ni.
Superannuation Pension-a chhuak Rev B. Kapmawia thlahna inkhawmah hian General Headquaretrs hruaitute bakah, Aizawl khawpui chhunga Pastor awmte leh Pensioner-te an tel kim hle a. General Headquarters aiawhin Rev PB Lalhmuliana’n thil pek hlanna a nei a, Rev HV Lalzamlovan Pastor Welfare aiawhin lawmpuina Citation a hlan bakah, Press Board hmingin Chairman Tihrkoh K. Vanlalhluna’n lawmpuina thu ziak a hlan bawk.
He hunah hian thlahna thuchah General Superintendent Rev Thangliansanga hnen atangin ngaihthlak a ni a, mipui lam atangin thlahna thu tawi ngaihthlak a ni bawk.
Rev B. Kapmawia thlahna inkhawm hi Rev B. Lalchhanhima’n malsawm tawngtainain a khar a ni.
Pastor lakna
Mizoram UPC hnuaia Fixed Pay Pastor pathum lakna Written Exam chu December ni 1 Ningani khan Conference Hall General Headquarters Office Zonuam-ah neih a ni a. Diltu mi 18 an awm.
Pastor hna diltute hian December ni 6 Thawhlehni khian Kum 2022 Pastoral Board thutkhawmah Personal Interview an nei leh dawn a. Hemi ni hian result tihchhuah nghal a ni ang.
Fixed Pay Pastor lak tur post pathum zinga post khat hi Myanmar ram chhung bik atan a dah a ni.
General News
Mizoram UPC kum tawp ro relna sang neih hun tur hetiang hi a ni.
Boundary Commissions December ni 3 Inrinni chawhma-ah
Nomination Committee December ni 3 Inrinni chawhnuah
Pastoral Board December ni 6 Thawhlehni ah
Executive Committee December ni 7 & ni 8 Nilaini leh Ninganiah
General Assembly ro rel inkhawm December ni 9 & ni 10 Zirtawpni leh Inrinni ah te neih a ni dawn a.
General Assembly tih loh ro relna dang zawng hi Conference Hall General Headquarters Office-ah neih a ni ang.
General Missions Dept.
General Missions Department Executive Board chu November ni 29 Thawhlehni khan General Headquarters Office Conference Hall-ah an thu khawm a. Puipa ten hovin Chairman Upa Andrew Laldingliana’n a kaihruai.
General Missions Dept Executive Board thu khawm chuan Department hmalakna tur pawimawh tak tak an sawiho va. Missions Field-a rawngbawlna chak leh zuala kalpui dan turte an ngaihtuah.
An thurel langsar zual zingah Susila Devi, Surjanagar a native worker chu January 2023 atang hian
Group IV ah kaisan tir a ni a. General Missions Dept-in kum 2023 Calendar a buatsaih chu copy khat Rs 50 a hralh chhuah tur a ni.
Pentecost Missions School, North Bengal Field, Mechuadhura a mi chu School building thar kum 2023 a sak tan te, North Eastern India Area-II leh North Bengal Area Supervisor post ruak pahnih hnawh khah a nih theih nana Pastoral Board-a dilna thlente chu General Missions Dept. Executive Board chuan a ngaihtuah bawk a ni.
Foreign Missions Board
Mizoram UPC Foreign Missions Board chu Chairman Rev Thangliansanga kaihhruaina hnuaiah December ni 1 Ningani zan khan General Superintendent Quarters-ah an thukhawm a. Foreign Missions Field a rawngbawlna kal mekte thlir hovin, Chak zawka hmalak dan turte an sawiho.
Foreign Missions Board thutkhawmah hian Foreign Missions Board Manual, Upa Andrew Laldingliana, Chairman General Missions Dept buatsaih chu thlirho a ni a. Executive Committee a thlen atan an pawm a. Cambodia Missionary R. Lalnunkimin zau zawka rawngbawlna a kal pui theih na turin sum sanction an rel bawk. Heng bakah hian Foreign Missions Board hnuaia thawktute lawmman leh hamthatnate ennawn a ni.
