General Superintendent Rev Thangliansanga chuan December ni 18 Pathianni hian Ramhlun South kohhran Biakin hlanna a nei dawn a. Pathianni zan thleng hian Ramhlun South Biak in ah thuhril rawngbawlna a neih chhunzawm ang.
General Treasurer Rev PB Lalhmuliana chu December ni 18 Pathianni chawhma hian Headquarters kohhranah a inkhawm dawn a. Thuhril rawngbawlna a nei ang. General Treasurer hian Pathianni zanah Durtlang Mel 5 kohhranah thuhril rawngbawlna a nei bawk dawn a ni.
General Missions Department Secretary Rev T. Laldingliana chu December ni 14 Nilaini khan Agra field tlawhin a zin chhuak a. General Missions Department Treasurer MS Dawngliani’n a tawiawm.
Missions Department Secretary hian Pathianni hian Delhi field tlawhin Delhi kohhranah hun a hmang dawn a. December ni 20 Thawhlehni hian Aizawl an lo let leh ang.
Puipa
Mizoram UPC Puipa Committee December ni 13 Thawhlehni khan an thukhawm a, Hruaitu hlui leh thar charge inhlan hun atan Janaury ni 13 an ruat.
Puipa Committee thutkhawm, Executive Chairman Upa C. Lalropianga kaihhruai chuan, Kohhran chhungkua a chhiat tawk, Chhingpuii, Champhai Zion Veng leh Rualneihliana, Darlawn te chu Relief Fund atangin tanpuina sum pek an remti a. Ministerial Licence renew diltu mi 12 te chu an dil anga Licence renew an phal sak bawk. Heng bakah hian Mizoram UPC Printing Press room tur chu chak zawka sak chhunzawmte, Fixed Pay Pastor pathum lak thar, January ni 5, 2023 ah General Superintendent hova Training neih puite leh kum tawp kohhran sum Audit neih hun atan January ni 18 atanga ni 20, 2023 chu an ruat bawk.
Puipa Committee chuan kum 2023 atana hruaitu thlan tharte charge inhlan inkhawm hi January ni 6, 2023 hian Conference Hall, General Headquarters Office-ah neih a rel a. Inkhawm hi General Superintendent-in a kaihruai dawna, Puipa kal chhuak tur Upa C. Lalropianga, Executive Chairman, General Treasurer Rev PB Lalhmuliana te bakah Puipa thlan thar Upa Lalzirliana, Executive Chairman leh Rev Zoramthara, General Treasurer-te hnen atangin thu sawi ngaithlak a ni ang.
General Assembly a tiak
Mizoram UPC inkhawmpui lian ber General Assembly chu December ni 11 Pathainni zan khan a tiak a, inkhawmpui ro relna chuan fa neih tam a rel.
General Assembly vawi 28-na hi December ni 9 Zirtawpni atang khan Mizoram UPC Assembly Centre Zonuama Pandal sakah ro rel inkhawma bul tan a ni a. Zirtawpni leh Inrinniah nilenga ro relna a hun hman niin, Zirtawp zan atanga Pathianni zan thleng khan revival inkhawm neih a ni a, ruat bik ten thuril rawngbawlna neiin, Rev. R. Lalparvula, Rev HC. Lalthlamuana,
Rev. Jeremy Lee Lang ALJC palai, Rev. HT Vanlalengmawia leh Rev PB Lalhmuliana General Treasurer-te Hnen atangin Pathian thuchah ngaihthlak a ni. Mizoram UPC General Assembly neih chhung hian General Superintendent Rev Thangliansangan inkhawm a kaihruai a. Pathianni-ah Ordination Service neih niin, General Superintendent hian Pastor 4 a ordain-a, mi 26 te hnenah Ministerial Licence a hlan bawk.
Mizoram UPC inkhawmpui lian ber ro relna chuan kohhran mipuite zingah fa nei tam tura in zirtirna neih uar nise an ti a, sacrament uain ram pum huapa in ang khat hman anih theih nana hmalakte, Genesis bu atanga Thupuan bu thleng, hrilhfiahna a bu a siamte, Missionary Hmeichia ten rawngbawlna zau zawk an neih ve theih nan Ministreial Licence pek ni se tih rawtna awmte chu an pawm a. NC Hills Bial ni thin Halflong Bial a thlak leh Lunglei North Bial chu Rahsi veng bial tia thlak rawtnate, Govt Complex kohhran, Ainawn veng kohhran tia hming thlakte an pawm bawk. General Assembly ro relna ang chuan Kum 2023 atang hian Edenthar kohhran Chaltlang Bial a awm thin chu Bawngkawn bialah a bet tawh dawn a, General Assembly ro relna chuan Mizoram UPC Bookroom enkawltu tur Board hran din a rel bakah Apostolic Theological Institute-ah Correspondence Course zirna hawn belh rawtnate chu an pawm a ni.
Mizoram UPC inkhawmpui lian chuan kum 2023 budget atan cheng nuai sanghnih zahnih sawm riat pali singli sangkhat leh zahnih (Rs. 22,84,41,200/-) chu a pawm, kum 2023 General Assembly hi ruat lawk sa angin Durtlang Bial in an thleng dawn a ni.
General Assembly hmanna Pandal chu December ni 13 Thawhlehni atang khan thiah tan a ni a. Pandal sak mawhphurhna la tu Ainawn veng kohhran te he hunah hian hnatlangin. Zirtawpni khan thiah hna hi zawh fel a ni a. Pandal structure hi Baptist kohhran Pavalai pawl inkhawmpui neihna tur Hnahthial lamah phurh phei a ni.
Planning & Financial Board
Mizoram UPC Planning & Financial Board December ni 15 Ningania thu khawm chuan. Kohhran budget-te thlir hovin, siam rem ngaite an sawihova. Mizoram UPC in rawngbawlna kawnga hma a lak leh zelna turte an rel bawk.
Planning & Financial Board chuan, kum 2022 Budget an neihte an tlin thei chu lawmawm an ti a. Pathian leh Kohhran mipuite chungah lawm thu an sawi a ni.
OFFICE KHAR INKHAWM
Mizoram UPC General Headquarters Office, kumin atana kharna leh hruaitu kalchhuak tur thlahna Inkhawm chu December ni 19 Thawhtanni chhun dar 12 hian Conference Hall-ah neih a ni dawn a.
Programme hman zawhah Office hi khar zui a ni ang. He mi ni hian chawhma lam thleng chauh Office hi dawr theih a ni dawn a.
Kum thar January ni 6 Zirtawpni-ah General Headquarters Office-hi hawn leh tur a ni.
