HRUAITUTE PROGRAMME :
General Superintendent Rev. Thangliansanga chu Headquarters kohhrana Pathian hnena lawmthusawi chawimawina Programme vawiin April ni 22 Inrinni atanga naktuk Pathianni zan thlenga hman turah rawngbawlin hun a hmang ang, Pathianni zing bik erawh Bazar Bial Inkhawmpuiah Pathian thuchah sawina a nei thung ang.
General Secretary Rev. Saienga Sailo chu Bawngkawn Bial Inkhawmpui Bawngkawn kohhrana neih turah naktuk Pathianni zan thleng hmanpuiin rawngbawlna a nei ang.
General Treasurer Rev. Zoramthara pawh Chanmari West kohhran a Pathian hnena lawmthusawina Programme-ah naktuk Pathianni zan thleng rawngbawlin hun a hmang bawk ang. General Treasurer hian tunkar liamta April ni 16 Pathianni hmang khan Lengpui Bial chhunga Dilzawl kohhran Biak in sak thar chu Pathian hnena hlanna leh hawnna a nei a, Lengpui Bial Inkhawmpui hmanpuiin thuhril rawngbawlna a nei nghal bawk. General Treasurer hi Upa V. Lalthangchuanga Khawthlang District Chairman chuan a tawiawm a ni.
Upa Andrew Laldingliana, General Mission Chairman chuan April ni 16 Pathianni hmang khan Vathuampui Bial Mission Revival cum Seminar Vaseikang kohhrana neih chu a hman pui a, Hmawngbu Bial chhunga Lunghauka kohhran leh Dumzau tlanga Apostolic Missions School a tlawh nghal bawk.
Media & Publicity Board Chairman Upa Lalthlamuana Hnamte chu tunkar liamta April ni 15 Inrinni khan Kawnpui Banglaveng a Pathian chawimawina neihah Pathian thuhril rawngbawlna neiin hun a hmang. Ani hi tunlai hian rawngbawlin tlang hrang hrangah a fehchhuak nasa hle a, nimin April ni 21 Zirtawpni khan N. Vanlaiphai lamah rawngbawlna nei turin a zinchhuak leh nghal a ni.
---------------------
PUIPA MEETING :
Mizoram UPC Puipa Meeting vawi 357-na chu tunkar April ni 19 Nilaini chawhma dar 11am khan General Secretary Room ah neih a ni a, Executive Chairman Upa Lalzirliana’n kaihruaiin, kumin chhunga kohhran dintharna heng, Ailawng, Reiek Bial; Sangau, Cheural Bial; Bungtlang South, Diltlang S Bial; Ultachera, Manughat Bial-ah te bul an tanna atana sum pek chungchang te, Bial thar pathum hawn belh tura hmachhawp rorelna sang zawka thlen chungchang te, Ruantlang Bial chhunga Khawmawi kohhran a rawngbawl tu rawih chungchang te relin, Hebrew leh Greek tawng zir tur dilna rawn lutte enin an thlang bawk.
Mizoram UPC te hian Pathian hruaina changin kumin chhung hian hmun 7-ah kohhran thar din a ni tawh a ni.
EDUCATION BOARD :
Education Board te chuan kum in chhunga meeting vawi 2-na chu tunkar April ni 20 Ningani zan khan General Treasurer Quarters, Khatlaah an nei. Chairman Upa K. Lalsangzuala’n he meeting hi kaihhruaiin, Education Board hnuaia kohhran School enkawl mek mamawh hrang hrang ngaihtuah a, tihchangtlun dan tur an rel a ni.
