General Secretary Rev Saienga Sailo chu Khawhai Bial Inkhawmpui Tlangpui kohhrana hmanpui turin May ni 12 Zirtawpni hian a zin chhuak a. General Secretary hian May ni 15 Thawhtanni hian Tlangpui kohhrana Pathian chawimawina programme a hmanpui nghal ang.
Rev Saienga Sailo hi a tuk ni 16 Thawlehni hian Aizawl a lo let leh dawn a ni.
General Treasurer Rev. Zoramthara chuan May ni 14 Pathianni zan hian Chaltlang kohhranah Thuhril rawngbawlna a nei ang.
Upa Andrew Laldingliana, Chairman General Missions Dept chu May ni 13 Inrinni hian New Delhi Janukpuri kohhran thar Pathian hnena hlanna nei turin a zin chhuak a, Rev. H. Lalthankima Kolasib Venglai Bialtu in a tawiawm.
General Missions Dept. Chairman hian a cham chhungin Agra Field a tlawh bawk ang a, May ni 16 Thawhlehni hian Aizawl a lo let leh ang.
Rev. HT Vanlalengmawia Secretary General SS Dept chuan May ni 14 Pathianni chawhnu hian Durtlang Mel 5 kohhran biak in ah, Durtlang Bial SS Seminar a neih pui ang.
Puipa Committee
Mizoram UPC Puipa Committee May ni 9 Thawhlehni khan General Secretary Office-ah an thu khawm a. Manipur buaina avanga zohnahthlak harsatna tawk mekte chhawmdawl dan tur an sawiho.
Puipa Committee chuan Manipur State tualchhung buainaah remna leh muanna a awm thuai theihna atan ram pum huap tawngtaina hun May ni 14 Pathianni zan hian kohhran inkhawmah neih tha a ti a. He mi rual hian Manipur-a buaina tawk mekte leh Mizoram-a raltlante puala thawhlawm lakkhawm an rel a ni.
Puipa Committee chuan Kohhran tinte he hun hi ngai pawimawha tawngtaina hun hmang theuh tur leh an puala thawhlawm lakkhawm te chu May ni 19 hma a mahni Bialtu Pastor-te hnena thehlut theuh turin a ngen bawk a ni.
Heng bakah hian Puipa committee chuan Myanmar ram buaina in ziaawm lam a pan hleih theih loh avangin Upper Myanmar District hnenah chhawmdawlna sum fai Rs.40,000/- pek an rel bawk a.
General Headquarters Relief Fund atangin tanpuina sum fai vanduaina tawk mi 2 leh Bial pathum hnenah Biak In leh SS hall thawmthatna pek nise an ti bawk.
Mamit Bial a Preaching Point hawn thar New Nalzawl hnenah Puipa Committee chuan tanpuina pek nise an ti a, heng bakah hian kohhran hmalakna tur pawimawh tak tak an sawiho a ni.
Gen LAD
General LAD hmalaknain May ni 6 Inrinni zan khan, Manipur buaina avanga zo hnahthlak unau mangang mekte tan leh remna leh muanna a awm thuai theih nan ram pum huapa tawngtaina hun kohhran hrang hrangah hman a ni.
Education Board
Mizoram UPC Education Board chu May ni 9 Thawhlehni khan Board Chairman Upa K. Lalsangzuala kaihhruainain Committee room-ah an thu khawm a.
Mizoram UPC hnuaia School enkawl mek chungchangte leh hmachhawp awm mekte chu an thu rel langsar zual a ni. Education Board chuan Hajachera, Tripura-a sikul chu Kasnampara-ah sawn an rel a, Sihhmuia sikul tur sakna hmanrua tihral chungchangte leh Lunghauka, Hmawngbu biala zirtirtu rawih mek, rawih chhunzawm zel dan turte chu meeting ah sawiho a ni.
Education Board thutkhawm hi Puipa ten an telpui a ni.
Recruitment Committee
Mizoram UPC Recruitment Committee chuan May ni 10 Nilaini khan Fulltime Evangelist post ruak hnawhkhahna tur lakna Personal Interview a buatsaih a. Fulltime Evangelist pathum Recruitment Committee chuan la tharin, Thawktu lak tharte hi Mizoram UPC ro relna sang kum chanve Executive Committee-ah pawmpui tura thlen leh tur an ni.
