* Executive Chairman Upa Lalzirliana chu May ni 19 Zirtawpni hian Bungtlang South kohhran ding thar tlawh turin a zin chhuak.
Executive Chairman hi Zirtawp zan hian Lungleiah a riak ang a, Sub Office Lunglei a tlawh bakah Lunglei khaw chhunga kohhran hruaitute nen inkawmna an nei ang.
Executive Chairman hi naktuk ni 20 Inrinni hian Diltang South Bial chhunga Kohhran ding thar Bungtlang South panin a zin chhuak leh ang a, May ni 22 Thawhtanni hian Aizawl a lo let leh ang.
* General Superintendent Rev. Thangliansanga chu May ni 19 Zirtawp zan atang hian Bazar kohhrana Upa Lallawmkima Ralte te chhungkua Pathian chawimawinaah Speaker a ni dawn a. Pathianni zan thleng hian rawngbawlna a nei ang.
* Rev T. Laldingliana Secretary General Missions Dept. chu May ni 19 Zirtawp zan atang hian Sairang Bial Missions Dept revival programme Dinthar kohhrana neihah Speaker a ni dawn a. Pathianni zan thleng hian rawngbawlna a nei dawn a ni.
* Upa Lalnuntluanga Chhangte Chairman, General SS Dept. chu May ni 20 Inrinni hian Thingfal Bial, SS Seminar neih pui turin a zin chhuak dawn a. Thawhtanni ah Aizawl a lo let leh ang.
Puipa Committee
Mizoram UPC Puipa Committee chuan Manipur buaina avanga harsatna tawk mek unaute tan tanpui pek an rel.
May ni 18 Ningani a Puipa Committee thut khawm hi Executive Chairman Upa Lalzirliana’n a kaihruai a. An thu rel langsar zual zingah Manipur State buaina avanga harsatna tawk mekte tanpuina thawnte, Lungverh rama General Headquarters ram enkawl chhunzawm dan turte leh General Headquarters hnuaia thawktu Service ennawn chungchangte a tel.
Puipa Committee chuan Manipur a harsatna tawk mekte tan Buhfai Bag 20, Tel Cases 10 leh Dal bag 5 thawn nise an ti a. Mizorama unau raltante pawh a theih ang anga lo buaipui nise an ti a ni.
Manipur buaina avanga harsatna tawk mekte leh raltlante pual hian May ni 14 Pathianni zan khan Puipa Committee ngenna angin ram pumah kohhran hoten thawhlawm an lakhawm tawh bawk a. Puipa Committee kaihhruaina hnuaiah ruahmanna fel tak siam niin, pawisa tlingkhawmte hi General Headquarters atanga sem chhuah tur a ni.
P&FB
Mizoram UPC Planning & Financial Board May ni 17 Nilaini a thu khawm chuan Kohhran ding thar pathum Sangau Kohhran Cheural Bial, Ailawng Kohhran Reiek Bial leh Bungtlang South kohhran Diltlang South Bial te chu Biak In hmun tur lei sak a rel a.
Meeting-ah hian Kohhran hrang hrang atanga Budget tukte, a luh that thu ngaihthlak niin, P&FB chuan Bial leh tualchhung te chungah lawm thu an sawi a ni.
Mizoram UPC P&FB thut khawm hi Chairman Upa Sawihlira’n a kaihruaia Kohhran hmalakna tur pawimawh tak tak sawiho niin, Puipa ten an ho a ni.
BIBLE HRILH FIAHNA BU SUB COMMITTEE
Mizoram UPC L&PB hnuaia din, Bible hrilh fiahna Bu Sub Committee chu May ni 15 Thawhtanni khan a vawi khat nan Upa Lalrinawma Sailo te in, Chaltlangah an thu khawm.
Sub Committee chuan Bible Hrilh Fiahna Bu chu kum 5 chhunga buatsaih fel hman tura hmalak nise an ti a, Bible bu hrang hrang hrilh fiahna ziaktu turte ruat fel nghalin, ziah dan kal phung leh tul leh pawimawhte an sawiho a ni.
