Mizoram UPC Executive Chairman Upa Lalzirliana chu June ni 10 Inrinni hian Kolasib Venglai leh Kolasib Diakkawn Bial tlawh turin a zin chhuak. Executive Chairman hian Bial pahnih a kohhran hrang hrangte tlawh kualin Pathianni a cham a nga. Thawhtanni ah North Bukpui Bial a tlawh bawk ang.
General Superintendent Rev. Thangliansanga chu June ni 9 Zirtawp zan atang hian Bawngkawn kohhrana Upa H. Laltanpuia te chhungkua Pathian chawimawinaah Speaker a ni a. June ni 11 Pathianni zan thleng hian thuhril rawngbawlna a nei ang.
General Treasurer Rev. Zoramthara chu June ni 5 Thawhtanni khan Dumzautlang a kohhran Sikul a hmunah kalin a tlawh a, General Headquarters aiawhin sak thatna tur sum a hlan a. Hmawngbu Bial Pastor Quarters tlawhin thawm thatna tur sum a hlan bawk.
General Treasurer hian June ni 6 Thawhlehni khan Niawhtlang Bial Pastor Quarters sak mek a hmunah kalin a enpui bawk.
Rev. Zoramthara hi June ni 9 Zirtawp zan atang hian Bazar kohhrana Upa Lalramengzauva te chhungkua Pathian chawimawinaah Speaker a ni a. Pathianni zan thleng hian thuhril rawngbawlna a nei ang.
Rev. T. Laldingliana Secretary General Missions Dept chuan June ni 11 Pathianni hian Chawlhhmun Bial chhungah Missions Campaign a nei dawn a. Pathianni chawhmaah Tanhril kohhranah hun a hmang ang a, zan lamah Chawlhhmun kohhranah hun a hmang thung ang.
Rev. HT Vanlalengmawia Secretary General SS Dept chu June ni 10 Inrinni hian North Mualcheng Bial SS Seminar cum revival hman pui turin a zin chhuak. Gen SS Secy hi Pathianni a cham a nga, Thawhtanni ah Aizawl a lo let leh ang.
Puipa Committee
Mizoram UPC Puipa Committee June ni 9 Zirtawpni a thu khawm chuan Kum chanve ro relna sang neih tur atana in buatsaihna kal pui dan turte an sawiho.
Meeting hi Executive Chairman Upa Lalzirliana’n a kaihruai a, an thu rel langsar zual zingah Bial hrang hrang atanga Crusade fund dilna leh rawngbawltu rawih dilnate, Mizoram UPC Ni pawimawh bik tualchhung hrang hranga inkhairual zawk a hman a nih theih nan a in kaihhruaina mumal zawk zau thei ang bera tih chhuahte, General Headquarters Relief Fund sem chhuah chungchangte leh Pay revise chungchangte a tel a.
Heng bakah hian Manipur buaina avanga raltlan tanpuina pek chungchangte an sawiho bawk. Puipa Committee chuan Bial engemaw zatah kohhran a ding thar chu lawmawm an ti a, tanpuina pek dan turte meeting-ah hian an sawiho bawk a ni.
General PYD
GPYD chuan Thuampui Bial Seminar-cum-Revival a hmanpui.
June 2, Zirtawpni zan atanga June 4, Pathianni zan thlenga neih Thuampui Bial PYD Seminar-cum-Revival chu Thuampui kohhran Biak In ah tluang taka neih zawh a ni a. General PYD chuan he hun hi hmanpuiin, June 2, Zirtawpni zan khan GPYD buatsaih seminar paper, 'Hmasawnna' tih chu, Upa Mesak Vanlalthlana, Asst. Secretary, General PYD kaihhruaina hnuaiah
an zir.
A tuk June ni 3, Inrinni zan atangin revival inkhawm an neih chhunzawm bawk a, Upa Lalhruaitluanga, EBM, GPYD hnen atangin Pathian thu chah ngaihthlak a ni a, June 4 Pathianni chawhnuah T. Upa Mesak Vanlalthlana, Asst. Secretary, GPYD leh Pathianni zan inkhawmah unaupa John Zothansanga, Secretary, GPYD ten thuhril rawngbawlna an nei bawk.
Thuampui Bial PYD Seminar cum Revival hi June 4, Pathianni zan khan a tiak a ni.
General PYD buatsaih bible quiz competition neih chhoh mek zel a ni.
June ni 6 Thawhlehni zan atanga neih tan Bible Quiz intihsiakna hi Mizoram UPC Studio ah buatsaih a ni a. Intihsiakna neih tan zan hian Prelims Round hmachhawn
Bial leh tualchhung aiawh Team 25 an awm a. An zinga Group winner Team 8 leh Team point hmu sang 8 te chuan June ni 9 Zirtawp zan khan Last 16 round intihsiakna an neih chhunzawm bawk.
General PYD Bible Quiz intihsiakna hi June ni 13 Thawhlehni zan hian Quarters Final neih a ni ang a, June ni 16 ah Semi Final leh June ni 23 ah te Final neih a ni ang.
General PYD Bible Quiz hi General PYD Offcial YouTube channel-ah Live a pek chhuah thin a ni a, Semifinal leh Final hi LPS & Zonet-ah Live a pek chhuah a ni bawk ang.
General PYD Executive Board chu June ni 8 Ningani zan khan Mizoram UPC Conference Hall Zonuamah an thu khawm a. Manipur puala Charity Concert a sum lutte sem chhuah dan tur an rel.
General PYD Executive Board thukhawm chuan May ni 30 Thawhlehni zan a Manipur buaina avanga harsatna tawkte puala Charity Concert General PYD in a buatsaiha sum hmuh Rs. 3,40,696/- chu sem chhuah dan tur an rel a. Sum hmuh atanga cheng nuai khat (Rs.1,00,000/-) chu Central YMA hnena hlante, General PYD in Refugee camp tlawh a, Rs. 1,40,000/- semte leh Mizoram UPC General Headquarters Relief Fund-ah Rs.1,00,696/- chhun luhte an rel a ni.
Heng bakah hian kum 2023 General PYD inkhawmpui Serchhip Leisekawt Field-a neih tur chungchangte an sawiho bawk a. Inkhawmpui programme te duangin Thuhriltu turte an ruat. September ni 22 Zirtawp zanah Mizoram UPC General Secretary Rev. Saienga Sailo chuan Inkhawmpui hlanna a nei ang a. Serchhip Bialtu Pastor Lalnghninglova’n Palai lawmna hun a hmang bawk ang. General PYD inkhawmpui tan zan hian Tirhkoh lalbiaknia hnen atangin Pathian thu chah ngaihthlak a ni dawn a ni.
Inrinni zanah John Zothansanga, Secretary General PYD in thuhril rawngbawlna a nei anga, Pathianni chawhmaah Mizoram UPC General Treasurer Rev. Zoramthara,
Pathianni chawhnuah Pastor A. Lalhmingsanga, Bukpui Bialtu leh Pathianni zanah Rev. Thangliansanga, Mizoram UPC General Superintendent ten thuhril rawngbawlna an nei bawk ang. General PYD inkhawmpuiah hian Pathianni chawhnu inkhawmah member boral sunna hun Rev. HT Vanlalengmawia, Secretary General SS Dept chuan a nei bawk ang. General PYD Executive Board thukhawm chuan inkhawmpui pual hian September ni 18 Thawhtanni zanah ram pum huap tawngtaina hun neih an rel nghal a ni.
Heng bakah hian General PYD executive Board chuan inkhawmpui neih chhunga mawhphurhna hrang hrang chelhtu turte an ruat bawk.
General PYD Executive Board thutkhawm hi Mizoram UPC Puipa ten an ho a ni.
