Hruaitute rawngbawlna:
#General Superintendent Rev. P. Lalrinawma chu May ni 17 Zirtawpni khan Shillong Bial tlawhin a zin chhuak a, Pathianni hian Jowai kohhranah hun a hmang ang. General Superintendent hi Cameraman Zirtir Lalhruaichhunga’n a tawiawm a, May ni 20 Thawhtanni hian Aizawl an lo let leh dawn a ni.
#General Secretary Rev. T. Laldingliana chuan Pentecost Day May ni 19 chu Bungkawn Bial Lawipu kohhrante a hmanpui ang.
#General Treasurer Rev. Zoramthara chuan Pathianni zan hian Bazar Bial, Dawrpui kohhran te Pentecost Day a hmanpui bawk ang.
#General SS Department Secretary Rev. HT Vanlalengmawia chu May ni 17 Zirtawpni khan Khawbung Bial SS Seminar cum revival hmanpui turin Dungtlang panin a zin chhuak a, Tirhkoh JH Muandawnga leh zaithiam Mimi Vanlalhriati ten an tawiawm. Rev. HT Vanlalengmawia leh a thiante hi May ni 20 Thawhtanni hian Aizawl an lo let leh ang.
General Missions Dept.
General Missions Department Executive Board chu May ni 16 Ningani khan Board Chairman Upa Lalthlamuana Hnamte te In, Zemabawkah an thu khawm a. Missions Field-a hmalakna tur hrang hrang an sawiho.
General Missions Dept. Executive Board chuan Arunachal Field Kimin Biak In sak that an rel a, Department in cheng nuai khat (Rs. 1 lakh) an sanction bak zawng chu Chairman Upa Lalthlamuana Hnamte te chhungkua chuan an tum tur thu meeting-ah hian tarlan a ni.
Heng bakah hian Pentecost Mission School Machudhuara N. Bengal Field-a Staff Quarters sak an pass bawk a, General Missions Dept Executive Board Meeting hi Mizoram UPC Puipa General Secretary Rev. T. Laldingliana leh General Treasurer Rev. Zoramthara ten an ho a ni.
GENERAL SUNDAY SCHOOL DEPARTMENT
General Sunday School Department hruaitute chuan Manipur buaina avanga harsatna tawk mek kohhran chhungkua tlawhin tanpui sum an hlan.
General SS Dept aiawhte hi group 2 ah inthenin May ni 5 Pathianni hmang khan Group 1 Rev. Zoramthara General Treasurer Team-te chuan Churachandpur ah kalin tanpuina sum an lo hlan tawh a, Group 2 General Sunday School Department Chairman Upa Lalnuntluanga Chhangte leh Secretary Rev HT.Vanlalengmawi te team chu May ni 10 - 12 chhung khan Kangpokpi tlawhin an zin chhuak a, an ni hi Rev Lalngaizuala, EBM, General Sunday School Department leh Pastor PC Lalliansanga, Manipur District Superintendent te chuan an tawiawm a ni.
General SS Dept hruaitute hian L. Phaikot khua leh Leimakhong khua frontline a awmte chu tlawhin ṭanpuina an pe a, L.Phaikot Releif Camp leh Leimakhong Area Protection Committe (LAPC) te hnenah tanpuina sum hi an hlan a, Inrinni zanah L. Phaikot khua-ah Pathian biak inkhawm neih puiin Pathianniah Leimakhong khua tlawh lehin Pathian biak hona an nei a ni.
Pathianni chawhnuah General SS Dept hruaitute hi National Games Village, Imphal aṭanga raltlante an awmna hmunah an tlawh bawk a, Kangchup Twikun aṭanga raltlan Sapermaina khuaa awmte an tlawh leh bawk.
Heng bakah hian Kangchup Area Protection and Development (KAPD) te leh Kangchup Frontline a awmte hnenah ṭanpuina an pek bakah kohhran mi damlo na zual mi pahnihte hnenah tanpui sum an hlan bawk a ni.
L&PB
Mizoram UPC Literature & Publication Board chu May ni 15 Nilaini khan Conference Hall, Mizoram UPC Office-ah an thu khawm a, Board Chairman Rev. HC Lalthlamuana’n a kaihruai.
L&PB chuan Archive Cell hmalakna, Kohhran member bio-data dah thatna tur software siamna atan budget an ruahman a, tualchhung atanga kohhran member record leh document hluite, General Headquarters-a theh lut tura hma lak thar leh an rel bawk.
Heng bakah hian General PYD-in thawnthu bu an tih chhuah tur endiktu turte, LAD thupui bu endiktu turte leh General Sunday School in Naupang chawhnu zirbu an chhuah tur endiktu turte an ruat a, kum 2024 Beihrual bu endiktu tur te an ruat bawk.
L&PB chuan General PYD thawnthu bu endiktu atan Upa Lalthlamuana, T. Upa Lalengmawia Colney leh Upa Laltanpuia Chawngthu te an ruat a, LAD thupui bu endik tu atan Upa Lalthlamuana, Board Secretary, Rev. H. Lalrawnkima leh Upa RD Rothanzauva te an ruat biawk. General SS Dept buatsaih NPSS chawhnu zirbu endiktu atan Upa Lalthlumuan,, Rev. HT Vanlalengmawia, Upa Lalrinawma Sailo te an ruat bakah kum 2024 Beihrual zirbu endik turin Upa Lalthlaumana, Rev. PB Lalhmuliana leh T. Upa Misaela Lalremtluanga te an ruat bawk.
L&PB thu khawm chuan “Mizorama Pentecost Kohhran Sulsutute” tih lehkhabu a buatsaih chu tlangzarh inkhawm neih a rel bawk a, June ni 16 Pathianni chawhnu hian Tuikual kohhran Biak In ah Lehkhabu hi tlangzarh a ni ang.
#Literature & Publication Board hnuaia committee peng Bible hrilh fiahna sub committee chu May ni 7 Thawhlehni zan khan Dinthar Pastor Quarters-ah an thu khawm a,
L&PB in Bible hrilh fiahna bu a tih chhuah turah Volume ṭhen dan turte an rel.
Bible hrilhfiahna sub committee chuan Bible hrilhfiahna bu chu Volume 1 leh 2 a then an rel a, Bible bu chhung Hrilh fiahna bu la awmlo ziaktu tur an ruat bawk.
Heng bakah hian Bible Hrilh fiahna bu ziaktu turte inkaihhruaina dan an ruahman bawk a ni. Bible Hrilhfiahna bu sub committee chuan Bible bu chhunga Lehkhabu hrang hrang hrilhfiahna awmsa te zirchiana, siam that ngai awmte siam rem an rel bawk a ni.
M&PB
Mizoram UPC Media & Publicity Board chu an chairman Upa K. Saitluanga hovin May ni 16 Ningani zan khan Committee Room Mizoram UPC Office ah an thu khawm a, General Secretary Rev. T. Laldingliana’n a telpui.
Media & Publicity Board chuan Media kaltlanga kohhran rawngbawlna zau zawk neih dan turte, Mizoram UPC Studio tihchangtlungna tur atana hmachhawp awmte leh Media hmalakna a chak lehzual theih nana Media cell thawm chak dan kawngte an sawiho a ni.
PANDAL STRUCTURE COMMITTEE
Mizoram UPC Pandal Structure Committee chu May Ni 14 Thawhlehni zan khan General Superintendent Quarters-ah an thu khawm a, Pandal structure dahna tur godown sak bul ṭan an rel. Heng bakah hian Pandal stucture thawm that ngai repair dan turte leh
Pandal structure inkaihhruaina dante ennawnin he thutkhawm hi Mizoram UPC Puipa General Superintendent Rev. P. Lalrinawman a ho a ni.
General LAD
General LAD hruaitu te chuan Ruantlang bial LAD Seminar cum revival an hmanpui.
May ni 10-12 Pathianni hmang khan seminar cum revival hi Khawmawi/Ṭiau, Myanmar ram chhungah neih a ni a, General LAD hruaitute chuan he hun hi hmanpuiin, Seminar ah hian unaunu RMS Dawngkimi, President General LAD leh unaunu F.Lalthansangi, Secretary General LAD te chu Resource person an ni a, revival inkhawmah unaunu RMS Dawngkimi, President General LAD chu Speaker a ni.
General LAD hruaitute hi Executive Board member-te K.Lalengpari, Lalrinmawii,Elizabeth Lalengkimi leh zaithiam unaupa Vanlalhruaia, Dinthar ten an ṭawiawm bawk.
Seminar hi May ni 11 Inrinni nilenga neih niin thupui pahnih "Kohhranah leh chhungkuaa nu pawimawhna" tih leh "Administration leh Leadership" tih thupui zirho a ni a, Inrinni zan atang khan revival programme hman chhunzawm a ni.
Ruantlang Bial LAD seminar cum revival ah hian Pathianni chawhma inkhawmah mi thar 8 te chu kohhran dang atangin Pastor Lalhmumsiama, Bialtu Pastor in Mizoram UPC ah a lawm lut bawk a ni.
He Seminar cum revival hlimna atang hian mi engemaw zatin Thlarau thianghlim baptisma an chang a, a tuk May ni 13 Thawhṭanni khan ran talha Pathian chawimawina Khawmawi kohhran chuan an neih chhunzawm a, unaunu RMS Dawngkimi, President Gen.LAD chuan thuhril rawngbawlna neiin, Thawhtanni zan thleng khan revival inkhawm an neih chhunzawm a ni.