Hruaitute rawngbawlna:
General Superintendent
Mizoram UPC General Superintendent-in member thar 28 lawmlut.
May ni 19, Pathianni khan Shillong bial chhunga Jowai kohhrana lawi turin Rev. P. Lalrinawma General Superintendent chuan mi thar Chhungkaw 7, member 28 te chu kohhran dang atangin Mizoram UPC ah a lawm lut. Mizoram UPC General Superintendent hi May ni 17 Zirtawpni khan Shillong Bial fangin a zin chhuak a, May ni 20 Thawhtanni khan Aizawl a lo let leh a ni.
General Superintendent Rev. P. Lalrinawma hi Lawngtlai Bial revival Crusade-a thuhril rawngbawlna nei turin May ni 31 Zirtawpni khan Lawngtlai panin a zin chhuak a, Revival crusade hi May ni 31 zan atanga June ni 2 chhunga neih tur a ni a, General Superintendent hi Imphal Bialtu Pastor PC Lalliansanga leh Zirtir Lalhruaichhunga Media incharge ten an tawiawm a. Rev. P. Lalrinawma hian a cham chhungin Sangau kohhran a tlawh bawk ang.
General Superintendent hi June ni 5 Nilaini hian Aizawl a lo let leh dawn a ni.
General Treasurer
General Treasurer Rev. Zoramthara chu May ni 31 Zirtawpni khan Pailapool tlawhin a zin chhuak a, Zirtawp zan a riak. General Treasurer hian vawiin Inrinni hian Vairengte Bial seminar cum revival hmanpui turin Vairengte a pan leh ang. Rev. Zoramthara hian Vairengte bial revivalah hian thuhril rawngbawlna a nei dawn a, a nupui unaunu Zosangzuali leh zaithiam Vanlalduhsaka Kolasib ten an tawiawm a ni.
General Headquarters Relief Fund sem a ni
Mizoram UPC Puipa committee chuan khuarel chhiatna hrang hrang avanga in lehlo chante leh chhang dang avanga tanpui ngai chhungkaw engemaw zat hnenah General Headquarters Relief Fund atangin tanpui a thawn chhuak.
May ni 29 Nilaini khan General Superintendent Rev. P. Lalrinawma leh General Treasurer Rev. Zoramtharate chu tanpuina sum hlanin an fehchhuak a.
General Superintendent hian Thuampui Bial Zuangtui kohhran a lawi Unaupa Remlalnghaka te In sak thar, Cyclone Remal avanga ruah surin a hnawl chhiat vek chu a hmunah kalin tanpuina Rs 10000/- a hlan a, Headquarters kohhrana lawi Pu Vanlalzawna Khatla, te chenna in leiminin a tihchhiat chu a hmunah tlawh bawkin tanpuina cheng sangthum a hlan.
He mi ni vek hian General Treasurer Rev. Zoramthara chuan thli leh ruahin chenna in a tihchhiat Pu Vanlalchhuanga Misisons Veng Headquarters kohhran a lawi chu cheng 3000 tanpuina a hlan a, heng bakah hian Melthum leimin avanga chhiatna nasa tak thlenna hmunah kalin, Melthum Local Council hnenah Rs 5000/- a hlan a, Republic YMA- hnenah Rs. 2000/- a hlan bawk.
General Headquarters Relief Fund atang hian Kanchanpur Bial, Khasnampara khuaa Deboki Reang te chenna In kang ral vek chu tanpuina Rs 5000/- thawn a ni a,
Cheural Bial, Bungtlang (Myanmar) khuaah thli leh rialin, chhungkaw ngate chenna In chung a den chhiatte hnenah tanpuina Rs 3000/- țheuh pek an ni bawk.
Heng bakah hian Bilkhawthlir Bial, Buhchangphai Forest venga awm unaunu Lalţanpuii, Pathian thuthlung avanga a chhung ten an hnawhchhuah chu țanpuina Rs 5000/- pek niin, Buhchangphai Forest venga rawngbawla awm mek Estheri Revival Team member unaunu C. Lalrinfeli, dam lo tanpui nan Rs 5000/- General Headquarters Relief Fund atanga pek a ni.
GENERAL LAD
General LAD hruaitute'n Khawbung Bial LAD Seminar cum Revival an hmanpui.
May ni 24- ni 26 Pathianni hmanga Khawbung Bial LAD Seminar cum revival Dungtlang Kohhran Biak In a neih chu tluang taka hman zawh a ni a, General LAD hruaitute he hunah hian telin Seminar resource person an nih bakah Pathian biak inkhawmah thuhril rawngbawlna an nei.
Khawbung Bial LAD revival inkhawm hi Zirtawp zân aṭang khan neih tan a ni a, unaunu Tlangthangpuii Vice President, Khawbung Bial LAD chuan Pathian biak inkhawm a kaihruai a, unaunu Lalhlimpuii, EBM General LAD chuan thuhril rawngbawlna a nei a ni.
A tuk Inrinni nilengin Seminar an neih chhunzawm a, seminar hi hun hnihah then niin, chawhma session-ah hian ‘Nu Mawhphurhna’ tih thupui unaunu K.Vanlalhriatpuii, Asst. Secretary, GLAD hovin kalkhawm ten an zir a, Chawhnu hunah unaunu F.Lalthansangi Secretary, GLAD chuan Administration & Leadership tih thupui hmangin zirtirna a pe thung a ni.
Seminar-ah hian Khawbung Bial atangin LAD member mi 70 chuang an tel thei a,
Khawbung Bialtu Pastor bakah Bial Kohhranpui Chairman, Bial Kohhranpui Secretary, Tirhkohte leh Upa engemaw zátin seminar-hi an telpui bawk a ni.
Khawbung Bial LAD revival inkhawm chu Inrinni zan aṭanga Pathianni zan thleng khan neih chhunzawm a ni a, Inrinni zan hian unaunu K.Vanlalhriatpuii Asst. Secretary, GLAD chuan htuhril rawngbawlna a nei a,
Pathianni chawhma inkhawmah unaunu RMS Dawngkimi President, General LAD hnen atangin Pathian thu chah ngaihthlak a ni bawk a ni.
Pathianni chhun inkhawmah unaunu F. Lalthansangi Secretary, GLAD chuan thuhril rawngbawlna nei velehin, Pathianni zan inkhawmah unaunu RMS Dawngkimi’n President, GLAD hnen atangin Pathian thuchah ngaihthlak a ni leh a ni.
Khawbung Bial LAD revival neih chhung hian Inkhawm apiangin zaithiam tak takten zaiin rawngbawlna an neih bakah Pathianni zan khan Sunday school naupang te atangin Worship Dance hmuhnawm tak thlirho a ni bawk a, Khabwung Bial LAD seminar cum revival hi Pathianni zan hian a tiak a ni.
General PYD
GPYD hruaitute chuan May ni 27 Thawhtanni zan khan Aizawl khawpui chhunga Bial hrang hrang PYD an tlawh.
General PYD hruaitute hi hmun thumah inthenin, a thawh khatna atan Bazar Bial, Chaltlang Bial leh Dinthar Bialte an tlawh a, GPYD kumpuan thupui 'Thuthlunga Rinawmna' (Sam 44:17) thu hmanga in fuih tharna hun an neih pui a, thalai inkhawm an tha hle a ni.
Bazar Bial PYD te chuan he hun hi Armed Veng South Biak inah thlengin, Tk. Isak Malsawmtluanga, EBM (GPYD) chuan thuhril rawngbawlna a nei a, Chaltlang Bial PYD in Ramhlun Sports Complex-ah thleng thungin, Unaupa H. Reuben Lalbiakpuia, EBM (GPYD) chuan rawngbawlna a nei thung a, Dinthar Biak inah Dinthar Bial PYD chuan inkhawm buatsaihin, T. Upa Mesak Vanlalthlana, Asst. Secretary (GPYD) hnen atangin Pathian thu ngaihthlak a ni bawk.
GPYD hruaitute hian thla khatah Bial pathum zel tlawh turin ruahmanna an siam a, thalaite thuthlunga rinawm tura infuih thar a nih reng theih nan hmalak zel an tum a ni.
General PYD Quiz
Bible Quiz zawh fel a ni a, Salem Veng kohhran PYD an thiam ber.
May ni 30 Ningani zan khan Mizoram UPC Conference Hall, Zonuam ah General PYD Bible Quiz Final inelna hi neih a ni a, Rev. HT Vanlalengmawia, Secretary General Sunday School Dept, Quiz Final intihsiakna Question siamtu ni bawk chuan Hunserh hmangin, programme Pathian hnenah a hlan a. General PYD President Upa R.Vanlalruata hnen atangin thu sawi ngaihthlak a ni bawk a ni.
General PYD Bible Quiz hi Zonet Bawhbel, LPS 5 ah leh General PYD Youtube channel-ah live a tih chhuah a ni a, a hmun ah hian mi 130 bawr vel chhimtu an awm bawk a ni.
Quiz Final round hi unaunu Emilia Lalnunpuiin zei takin a kaihruai a, Quiz Master Lalnunmawii che vel a hmuhnawmin, a kaihhruaina hnuaiah Salem veng PYD te leh Durtlang Mel -5 PYD te chuan Final round ah hian intihsiakna an nei a, point 170 hmutu Salem veng PYD te chu pakhatna an ni a, Trophy leh pawisa fai cheng singli an dawng a, Durtlang Mel-5 PYD te hian point 135 an hmu thung a, Trophy leh pawisa fai cheng singhnih sangnga an dawng a ni.