Kum Chanve ro relna sang
Mizoram UPC kum chanve ro relna sang thutkhawm, ni thum awh chu tluang taka neih zawh a ni.
Mizoram UPC Pastoral Board leh Executive Committee thutkhawm hi June ni 25 Thawhlehni atang khan Conference Hall, General Headquarters Office-ah neih tan a ni a.
A ni khatna ah hian Pastoral Board thu khawmin, Mizoram UPC hnuaia District 13 aiawh te leh Mizoram UPC Puipa bakah Executive Committee in a ruat bikten ro an rel a, Pastoral Board thutkhawm hi General Superintendent Rev. P. Lalrinawma’n a kaihruai a ni.
Mizoram UPC Pastoral Board chuan kum 2024 January – May thla chhunga Mizoram UPC hnuaia Pastor Bial vawng, monthly report leh Pastor tanglai performance-te chu uluk takin an thlirhova,
Mizoram UPC sum leh pai dinhmunte, member pun dan leh kohhran thar din chungchang report, General Secretary leh General Treasurer ten he thutkhawmah hian an pe bawk.
Mizoram UPC dan leh hrai, Pastor-te in enkawlna bik chu ennawnin, Pastor tanglai bawrhsawmna avanga an service thawk tha hlei theilote chungchangah, dan leh hrai awmsa thlir nawnin siam that ngai leh belh ngaite an sawihova, kum 2024 chhung hian Pastor pakhat lak thar an rel bawk a ni.
Mizoram UPC General Secretary report atanga a lan danin Kumin kum chanve chhung hian Mizoram UPC hnuaiah kohhran thar 7 din a ni.
June ni 25 Thawhlehni zan khan Boundary Commission an thu khawm bawk a.
Kum 2025 a Zemabawk Bial then tur chungchang chu an thurel langsar zual niin, Zemabawk Bial chu Bial hnihah Zemabawk Bial leh Zemabawk North Bialahte then an rel a. Bial boundary tur pawh siam rem nghalin Zembawk Bialah hian Zembawk kohhran, Falkland kohhran leh Dinthar kohhrante an awm dawn a, Bial thar piang tur Zemabawk North Bialah hian Zemabawk North kohhran chu Bial Headquarters niin Zemabawk West, Zemabawk South, Tuirial leh Airfield kohhran te an awm thung dawn a ni.
Mizoram UPC kum chanve Executive Committee nihnih awh chu Executive Chairman Upa Lalzirliana kaihhruaina hnuaiah June ni 26 Nilaini khan Conference Hall General Headquarters Office-ah tluang taka neih zawh a ni a, Manipur State buaina avanga kohhran member harsatna tawk mekte awm khawmna tur ram lei an rel a, Assembly Hall sakna tur Loan lian tham tak lak an pass.
Kum chanve Executive Committee chuan Education Board-in Zirlaite Puitu a duan chu pass-in he mi zulzui hian zirlai harsa zawkte sum leh pai hmanga tanpuina pek an rel bawk a, Tirhkoh title mumal zawka ziah dan turte an duan bakah Bookroom inkaihhruaina ennawnin siam that ngaite an siam tha a ni.
Heng bakah hian Mizoram UPC hnuaia thawktu lak belh chungchang an ngaihtuah bawk a, Media Cell a thawk tur OA III level post pakhat leh Press a thawk tur Printer leh Binder post pakhat ve ve hnawhkhah an rel a, Office Staff-te zingah Jr. Grade atanga Sr. Grade a kaisang turin mi pahnih pawmin, Sr. Grade atanga Selection Grade-ah mi pasarih kaisan an remti bawk. Executive Committee chuan kohhran Driver pathum Temporary a thawk mekte chu June ni 1, 2024 atanga a ngheta (Confirm) rawih turin an rel bawk.
Mizoram UPC ro relna sangah hian Service rules ennawn niin thawktu Pastor-te leh Office Staff-te Dam lohna leh harsatna hrang hrang avanga hna thawk tha theilote, an awm zel dan tur leh enkawl dan tur Executive Committee hian ruahmanna thar a duang bawk a ni.
Mizoram UPC kum chanve Executive Committee chuan Planning & Financial Board kaltlanga Kolkatta-ah Building lei an pass a. Sitting allowance, kohhran Upate (Fulltime a thawktu nilo) General huap meeting-a telte chu pek an rel bakah General Headquarters Reserve Fund hmanga, New Champhai, IOC Vairengte, Sabual leh Khawmawi ah Biak In hmun lei an rem ti a,
Fulltime Evangelist-te rawng an bawlna hmuna Bialtu Pastor-te nena thawhhona tha zawk a awm theih nan, Executive Committee hian inkaihhruaina a duang thar thar bawk a ni.
Mizoram UPC Executive Committee-ah hian Member 74 an awm a, kum chanve thutkhawmah hian 59 an tel thei a ni.
Puipa
MIZO PROFESSIONAL FOOTBALLER-TE LEH MIZORAM UPC PUIPA TE INKAWM
Mizoram UPC Puipa te chuan June ni 24 Thawhtanni khan Mizoram UPC thalai zinga Professional Footballer awm mekte, Samuel Lalmuanpuia, Isak Vanlalruatfela, Lalrinliana Hnamte, R. Lalbiakliana leh F. Lalrozama te chu an hlawhtlinnate lawmpuina leh tawngtaisakna an nei.
General Superintendent Rev. P. Lalrinawma, General Secretary Rev. T. Laldingliana leh General Treasurer Rev. Zoramthara te chuan he hunah hian fuihna thu an sawi bawk a, professional footballer-te nen hian inkawm hona hun tha tak an nei zui a ni.
Education Board
Dumzautlanga Apostolic Mission school tan Zemabawk bial missions dept luang chhuak.
Dumzautlang Apostolic Missions School Headmaster Quarters luah lai mek, a chhiat tawh em avanga repair ngai chu a sak thatna tur Zemabawk Bial, Missions Dept chuan ₹20,000/- School Headmaster, Tk. David Zothanmawia hnenah June ni 23 Pathianni khan an hlan a, he hun hi Mizoram UPC Education Board Secretary Upa Dr. Zonunmawia’n a telpui a ni.
Mizoram UPC Education Board chuan Zemabawk Bial Missions Dept.-te chungah lawm thu an sawi a ni.
Gen LAD
General LAD chuan Kum 2023 Executive Board ro relna bawhzuiin, Aizawl Civil Hospital-ah an luang chhuak.
June ni 27 Ningani khan General LAD Office Bearers-te chu Nursing Superintendent Office, Aizawl Civil Hospial-ah an leng a, he hunah hian General LAD hmingin tanpuina sum fai ₹. 50,000/- an hlan a ni.