GENERAL MISSIONS DEPT
General Missions department, General board vawi 5-na tluang taka neih zawh a ni a, kum 2025 Budget atan cheng nuai zathum sawmruk leh pakua leh sang kua an pass.
September ni 18 Nilaini khan Bungkawn kohhran Biak In ah General Missions Department chuan General Board thutkhawm a vawi 5-na an nei a, Department Chairman Upa Lalthlamuana Hnamte chuan a kaihruai.
General Missions Board ro rel inkhawm hi Rev. P. Lalrinawma, General Superintendent-in Pathian hnenah hlanin a tawngtai a, General Board-ah hian Rev. Lalruatfela, General Missions Secretary leh Lalhmangaihzuali, General Missions Treasurer ten report an pe a ni.
General Missions Board ah hian Agenda 24 chhawp chhuah a ni a,
Rajasthan a Missionary tirhte,
Missions field-a hman tur Hla bu siamte,
General Missions Department Inkhawmpui lian, Aizawl khawpui chhung a nghah thinte leh kum 2025 Budget pumpui atan cheng 3,69,09,000/- te chu an thu rel langsar zualte a ni a,
General Missions Board member-atan Area Supervisor-te chu an ruat thar bawk.
General Missions Department, General Board-ah hian ro rel palai mi 65 an kal a ni.
General Missions Department Secretary Report a a lan danin, Mizoram UPC hnuaiah Missions Field 20 a awm mek a, chungte chu Area 5 ah thenin Missionary 125 leh Voluntary Missionary 6 rawih mek an ni a, Missions Field ah hian Kohhran 106 awm mekin, kum 2023-2024 chhung hian mi thar 436 kohhranah lawm luh an ni tawh a ni.
General Board neih zawh hnu hian zan lamah revival inkhawm an neih chhunzawm a, Area Supervisor te hnen atangin Field Report ngaihthlak niin General Missions Department Chairman Upa Lalthlamuana Hnamte chuan thuhril rawngbawlna a nei a, unaunu Lalthazuali, Thuampui chuan zai rawngbawlna a nei bawk a, Aizawl khawpui chhung leh pawn atangin revival inkhawm hmanpuitu hi an thahnem hle a ni.
GENERAL LAD
Mizoram UPC Tanpuitu Hmeichhe pawl Ladies Auxiliary Department Executive Board chu September ni 16 Thawhtanni khan General Headquarters Office Conference Hall-ah an thu khawm a, Inkhawmpui lian October ni 25-27 chhunga an neih tur atana Agenda te leh kum 2025 Budget Estimate thlirhona an nei.
Meeting hi President unaunu RMS Dawngkimi’n a kaihruai a, Puipa Rev. Zoramthara General Treasurer-in a ho a ni.
General LAD Executive Board chuan sum pek chhuah tur an neihte a rang lama pek chhuah an rel a, Hnahthial Bial LAD te sawmna angin seminar hmanpui nise an ti a, Ruantlang hmuna kum 2024 General LAD inkhawmpui an neih turah, kalna neilo te tan Bus hire an rel bawk a ni.
GENERAL PYD
Mizoram UPC thalai pawl Pentecostal Youth Department, General Board chu September ni 21 Inrinni hian Dinthar kohhran Biak In ah neih a ni dawn a, ro rel inkhawm hlanna Mizoram UPC General Superintendent Rev. P. Lalrinawma’n a nei ang.
General PYD hian inkhawmpui lian kum khat danah a neih thin avangin kumin hian inkhawmpui aiawh ro relna General Board hi nei a ni dawn a ni.
Inrinni zan atanga Pathianni zan thleng hian General PYD chuan revival inkhawmpui Dinthar Biak In ah an neih chhunzawm dawn a, Tirhkoh Emmanuel Lalthianghlima, Tuidam, Rev.T.Laldingliana, General Secretary, Mizoram UPC, Tirhkoh Malsawmliana, Khawzawl Vengpui leh Upa R.Vanlalruata, President, GPYD te hnen atangin Pathian thu chah ngaihthlak a ni ang a, revival inkhawmpui hi General PYD YouTube channel leh Zonet Bawhbel-ah te Live a pek chhuah a ni ang.
L&PB
Mizoram UPC L&PB chu September ni 19 Ningani khan Conference Hall General Headquarters Office-ah an thu khawm a, Mizoram UPC chanchin chhuitu tur Consultation Committee din an rel.
He meeting hi Board Chairman Rev. Hc Lalthlamuana’n a kaihruai a, Mizoram UPC chanchin ziahna rin tlak leh mumal zawk, a bua chhuah a nih theih nana hma la tu tur Committee dinin, heng mite hi an ruat.
Chairman-ah Rev. R. Laldawngliana, Chawlhhmun
Secretary atan Upa R. Lallawmzuala, Model Veng
Member-ah
Rev. Ngurthanpara Sailo, Durtlang
Rev. Chhunglawma, Thuampui
Rev. Vanlalsipaia, Chhinga veng
Upa F. Lalremmawia, Model veng
Upa R. Lalsanga, College veng
Upa Lalnuntluanga Chhangte, Zonuam
Upa C. Hmingthandanga, Kawnpui leh
Upa Vanlaldinthara, Durtlang
Heng bakah hian L&PB chuan Kum 2025 Kohhran Calendar buatsaih leh nise an ti a, Rev. T. Laldingliana General Secretary Mizoram UPC, Upa Lalrinawma Sailo member leh Upa R.D. Rothanzauva Press Manager-te chu a tul angte buaipui turin an ruat nghal a ni.
Thuhthlung zirbu Rev. C. Lalremsanga ziah chu en diktu tur an ruat bawk a, Upa Lalthlamuana, Secretary L&PB, Rev. H. Lalrawnkima leh Rev. HV Lalzamlova ten endik hna an thawk dawn a, kum 2025 ATI zirbu endiktu tur L&PB meeting hian a ruat nghal bawk a ni.
MRB ATANGIN SCOOTER DAWNG
Mizoram Rural Bank Khtala Branch te chuan Mizoram UPC te nena thawh hona tha tak an neih avanga lawmthu sawi nan September ni 20 Zirtawpni khan Two wheeler Yamaha Ray Scooter chu Mizoram UPC General Treasurer Rev. Zoramthara hnenah Pu Lallawmzuala, General Manager Head Office Mizoram Rural Bank chuan a hlan a ni.
NORTH MIZORAM DISTRICT
North Mizoram District hruaitute chuan September ni 15 Pathianni khan, kum 2024 District Inkhawmpui nghahna hmun Ṭhiak Kohhran an tlawh a, Pathian biak inkhawm an neih pui.
Pathianni chawhma inkhawm hi Aibawk bialtu Pastor C. Lalramnghaka chuan a kaihruai a. Upa K. Lalsangzuala, District Treasurer hnen atangin Pathian thu chah ngaihthlak a ni.
Pathianni chawhma inkhawm banah North Mizoram District hruaitute leh Ṭhiak kohhran Upa te chuan in kawm hona an nei bawk a, District Inkhawmpui thlir lawknate neiin, hmalakna tur pawimawh tak tak an sawi ho a ni.
Pathianni chawhnu inkhawmah Upa Lalrinchhana, District Secretary chuan thuhril rawngbawlna a nei thung a, Pathianni zan inkhawmah Rev C. Lalremsanga, District Superintendent hnen atangin Pathian thu chah ngaihthlak a ni bawk.
KHAWTHLANG DISTRICT
Khawthlang District Office Bearer, September ni 14 Inrinni khan Upa K. Rosangzuala District Treasurer-te In ah an thukhawm a, November Ni 8-10 Pathianni hmanga Khawthlang District Inkhawmpui Sairang YMA Hall-a an neih tur atana tul leh pawimawhte an sawihova, inkhawmpui programme te duangin mawhphurhna nei turte an ruat a ni.
LUNGLEI DISTRICT
Lunglei District Commitee chu September ni 16 Thawhtanni khan Chanmari kohhran Biak In, Lunglei South Bial ah an thu khawm a, November ni 1-3 chhunga District inkhawmpui Rahsiveng Kohhran biak In a an neih tur chungchangte thlir lawkin, inkhawmpui atana inbuatsaihna tur hrang hrangte an sawihova, hmalakna tur pawimawh tak tak an rel bawk.
Lunglei District Commitee hi District Chairman Upa PL Biakmawia'n a kaihruai a. Rev.C.Liansanga (Area Secretary Southern Zone) chuan a ho a ni.
TUICHANGRAL DISTRICT
Tuichangral District Revival Board September ni 19 Ningani khan Ruantlang kohhran Biak inah an thu khawm a, Tuichangral District Revival Board inkaihhruaina siam te, Revival Board OB post siam belh District committee-a thlen te an rel a.
An district chhunga Revival Team te rawng bawlnate thlirhovin, revival Team te rawng bawlna aṭanga kohhran ten malsawmna an dawng chu lawmawm an tih thu an tarlang.
Tuichangral District revival Board hnuaiah hian
Khaw 14 ah Rawng bawlna neih a ni tawh a, chung atang chuan mi thar 21 kohhranah lawm luh an ni tawh a, mi 23 ten Lalpa Isua hmingin sual ngaihdamna Baptisma an chang tawh a ni.
