United Pentecostal Church
of Mizoram

CHUNGTLANG BIAK IN THAR, GENERAL SUPERINTENDENT-IN PATHIAN HNENAH HLANIN A HAWNG 

October ni 5, Inrinni khan Reiek Bial a Chungtlang Biak in thar hawnna inkhawm buatsaih a ni a,  Rev. R.  Lalnghaksanga, Reiek bialtu chuan inkhawm hi kaihruaiin, Upa Lalremtluanga, Kohhran chairman in mikhual lawmna hun a hmang a, Building sak dan report T. Upa Rothangpuia Kohhran Secretary hnen atangin ngaihthlak a ni a,  T. Upa Lalzawmliana, Building chairman-in lawmthu sawina a nei thung a ni.  

Chungtlang Biak In thar hawnna inkhawmah hian Upa Lalzirliana, Executive Chairman leh Rev. Zoramthara, General Treasurer ten thu an sawi a, Biak In thar Pathian hnena hlanna hun Rev. P. Larinawma, General Superintendent, Mizoram UPC chuan neiin Biak in thar hi a hawng a, thu hril rawngbawlna a nei zui a ni.

Biak In thar hawnna inkhawm hi General Headquarters atangin Upa Lalnuntluanga Chhangte, Chairman, General Sunday School Department chuan a hmanpui bawk a, a ni bakah hian  Rev. H.  Laltlankhuma, Kanghmun bialtu, Pastor PC. Lalliansanga, District Superintedent, Manipur District, Kanghmun bial leh  Reiek bial Upate bakah Bial chhung Kohhran member ten an hmanpui a, tlai lamah Biak in thar lawmna ruai an kilho a ni.

Chungtlang Biak In tharah hian October ni 6 Pathianni zan thleng khan Revival inkhawm neih chhunzawm a ni a,  Rev. P. Lalrinawma, General Superintendent chuan thuhril rawngbawlna a nei  a ni.

Chungtlang Biak in hi kum 2018 June ni 16 ah a lungphum niin Biak in sak nan hian Loan 19,50,000/- lak a ni a, Planning leh Financial Board atangin cheng 5,00,000/- dawn a ni bawk. Biak In sak nan hian avaiin cheng 40,00,000/- vel sen a ni.