GENERAL HEADQUARTERS HRUAITUTE PROGRAMME
Rev. Lalruatfela Secretary General Missions Dept. chuan June ni 21 Inrinni zan atang hian Zemabawk Bial Missions revival inkhawmpui a hmanpui dawn a, Pathian biak inkhawmah Speaker a ni ang.
Rev. Lalngaizuala Secretary General SS Dept. chu June ni 21 Inrinni hian Champhai Bial PYD revival inkhawmpui hmanpui turin a zin chhuak a. Pathianni zan thlEeng hian revival inkhawmah Speaker a ni ang. General SS Dept. Secretary hi June ni 23 Thawhtanni khian Aizawl a lo let leh dawn a ni.
KUM CHANVE RO RELNA
Mizoram UPC ro relna sang hrang hrang Kum chanve thutkhawm chu June ni 24 Thawhlehni atang hian neih tan a ni dawn.
Kum chanve thutkhawm hi Pastoral Board chuan an nei hmasa ber dawn a. June ni 24 Thawhlehni chawhma dar 10:30-ah an thu dawn a, he mi ni vek zan lamah Boundary Commission an thu ang.
June ni 25 Nilaini chawhma dar 10:00 ah Executive Committee thut khawm ni khatna neih a ni ang a, zan lamah Recruitment Board an thu khawm thung ang.
Kum chanve Executive Committee thut khawm nihnihna chu June ni 26 chahwma dar 10:00-ah neih chhunzawm a ni ang.
Heng kum chanve ro relna sangte hi Mizoram UPC Generqal Headquarters, Zonuam-ah neih a ni dawn a ni.
L&PB
Mizoram UPC Literature & Publication Board chuan Lehkhabu pahnih a ti chhuak.
June ni 20 Zirtawpni khan General Headquarters Office Devotion-ah L&PB in Lehkhabu a tihchhuah, ‘Puithiam Hna’ tih leh ‘Kohhran Upate Puitu’ tih chu Revise & Enlarge anih hnuah lei theih turin General Superintendent Rev. P. Lalrinawma’n a tlangzarh a Pathian hnenah a hlan.
Lehkhabu tlangzarh inkhawmah hian L&PB Chairman, Rev. Hc. Lalthlamuana chuan, lehkhabu pahnihte buatsaih dàn tlangpui sawiin, a hmasa aia chantlung leh kim zawk tura beisei a ni, a ti.
‘Puithiam hna’ leh ‘Kohhran Upate puitu’ tih bu te hi ₹100 ve ve a hralh chhuah tur an ni a,
Puithiam hna bu hi Licence neite (Ordination leh Ministerial Licence) hnenah chauh hralh chhuah a ni dawn a, L&PB Treasurer H. Zomuani, General Headquarters Office Staff hnenah tlangzarh ni atang hian lei theih a ni a, Book room-ah erawh lei theih a pho chhuah a ni dawn lo a ni.
‘Kohhran Upate Puitu’ bu erawh chu General Headquarters Office, Zonuamah leh Kohhran Bookroom Tuikhuahtlangah lei theih a ni dawn a, Upa leh Tual Upa zawng zawng te chu lei theuh tura beisei kan ni.
Gen LAD
ZMC POOR FUND A TAN GENERAL LAD LUANG CHHUAK.
Kum 2024 GLAD Inkhawmpui lian ro relna bawhzuiin June ni 17 (Thawhleh ni) khan ZMC Poor Fund-ah General LAD hmingin ₹ 50000/- a luan chhuah a ni a, Mizoram UPC LAD aiawhin General LAD Office Bearer ten ZMC a thawktute hnenah pawisa hi an hlan a ni.
Gen PYD
General PYD Social Wing Committee ngenna bawhzuiin Mizoram UPC Bial 5 atangin PYD ten thisen an pe tawh.
Social Wing Committee, General PYD in kumin chhunga thisen pe tura Bial tin PYD a ngen angin Headquarters Bial PYD, Lawngtlai Bial PYD, Serchhip Bial PYD, Zemabawk North Bial PYD leh Siaha Bial PYD te chuan thisen an pe a, heng bial 5 atang hian thisen Unit 88 pek a ni tawh a ni.
Headquarters Bial PYD te chuan March ni 4 khan Civil Hospital, Aizawl ah Thisen hi an pe a, Unit 13 pe in, April ni 26 khan a thawh hnih nan thisen pek runpui an nei leh a, unit 11 an pe a ni.
Lawngtlai Bial PYD te pawhin March ni 4 vek khan Lawngtlai New Vengpui Sunday School Hall-ah thisen pek runpui an nei a, unit 24 an pe a, hemi ni vek hian Serchhip Bial PYD te pawhin Serchhip Blood Bank ah thisen unit 17 an pe a ni.
Zemabawk North Bial PYD te chuan May ni 31 khan Civil Hospital, Aizawl a hman atan thisen unit 10 an pe bawk a, Siaha Bial PYD chuan June ni 6 khan Siaha District Hospital-ah thisen unit 13 an pe bawk a ni.
