HRUAITUTE RAWNGBAWLNA :
Mizoram UPC General Superintendent Rev. P. Lalrinawma chu Bukpui, Saipum, Hmarkhawlian, Bilkhawthlir, Kolasib Diakkawn leh Kawnpui Bialah te Pastor Quarters sak mek leh sak tur te enpui turin June ni 5, Inrinni khan a zin chhuak a, July ni 7 Thawhtanniah Aizawl alo let leh ang.
Rev. C. Liansanga, Secretary, Southern Zone chuan July ni 6 Pathianni hian Lunglei S Bial chhunga Chanmari kohhranah Financial training a neihpui ang.
--------------------------------------
Mizoram UPC bible zirna, Apostolic Theological Institute (ATI) zirlai te chuan kum tina an lo tih thin danin, July ni 2, Nilaini khan Synod Hospital Durtlang tan thisen unit 28 an pe.
Thisen pe hi Mipa 27 leh hmeichhia 1 an ni a, Synod Hospital blood bank a thawk ten ATI Campus Durtlangah kal chilhin thisen hi an lak sak a ni.
Kumin chhung hian General PYD Social Wing Committee te hmalakna in Thisen pek runpui neih chhoh mek a ni a, hemi denchhen hian Headquarters Bial PYD, Lawngtlai Bial PYD, Serchhip Bial PYD Zemabawk North Bial PYD, Siaha Bial PYD, Dinthar Bial PYD, Bilkhawthlir Bial PYD leh Chaltlang Bial ten a vaiin thisen Unit 221 pek a ni tawh a ni.
GENERAL LAD :
General LAD Executive Board meeting vawi 198-na chu June ni 27 Zirtawpni chawhma dar 11 khan Upa H. Zosangliana in chaltlangah an thukhawm a, General LAD President Unaunu C. Renghlupuii’n kaihhruaiin, kum 2025 General LAD Board cum Revival October ni 18-19 chhunga Lengte kohhrana neih tur a, thu pawimawh hrang hrang an rel a, hemi puala report form leh Agenda te chu August ni 15 ral hmain bial tin te thehluh vek nise, an ti a; Lengte kohhran hi August ni 9-ah tlawh nise an ti bawk.
Kum 2026 General LAD inkhawmpui lian thlenna tur Lunglei South bial te chu July ni 25-27 chhung hian tlawh nise an ti bawk.
