General Secretary Rev. T. Laldingliana chu August ni 7 Ningani khan Dilkawn Bial Pastor Quarters sak thar tur, a hmun hmate enfiaha ruahmanna siam pui turin a zin chhuak a, Bial hruaitute nen inkawmna an nei. General Secretary hi August ni 8 Zirtawpni khan Aizawl a lo let leh a ni.
Rev. Lalngaizuala Secretary General, SS Department chuan August ni 10 Pathianni hamng hian Dungtlang kohhran SS Pentecost Naupang Pual hmanpui turin vawiin August ni 9 Inrinni hian a zin chhuak. SS Secretary hi August ni 11 Thawhtanni hian Aizawl a lo let leh ang.
Gen LAD
GLAD hmalakna in, Ruihhlo dona leh a thatloh zia in zirtirna neih chhunzawm mek zel a ni.
Mizoram Sawrkar Social Welfare Department leh kohhran hrang hrang joint meeting-in a rel angin General LAD aiawha Master trainer te chuan Mizoram UPC Bial hrang hrangah ngawrh takin ruihhlo dona leh a that loh zia in zirtirna an nei mek zel a.
Programme hman tawhna hmun hrang hrang atanga hmasawnna rah duhawm tak tak hmuh tur awm thin chu General LAD chuan lawmawm an ti hle a ni.
GENERAL PYD
General PYD hruaitute leh ATI zirlaiten inkhawmpui lian pualin tawngtai hona hun an hmang.
August ni 1 (Zirtawpni) khan General PYD hruaitute chuan ATI tlawhin zirlaite nen Pathian biak hona an nei a. He hun hi T.Upa Mesak Vanlalthlana, Secretary GPYD-in a kai hruai a, ATI zirlaite nen hun hmang hovin kum 2025 General PYD inkhawmpui pualin ṭawngṭai hona an nei a, Upa Dr. Zonunmawia, President GPYD hnen aṭangin fuihna thu ngaihthlak a ni.
Pathian biak hona inkhawm an neih zawh hnu lamah ATI zirlaite nen intih hlimna an neih chhunzawm bawk a, tlai lamah General PYD buatsaih chawhlui an kilho bawk a ni.
General PYD chuan ATI zirlaite hman tur Volleyball an pe bawk a, Zan lam thlengin General PYD leh ATI zirlaite hian hun an hmang ho a ni.
THU LEH HLA KUTPUI
Mizoram UPC Literature & Publication Board leh General PYD tangkawpa buatsaih Thu leh Hla kutpui zan hnih awh chu tluang taka zawh fel a ni.
August ni 7&8 Ningani leh Zirtawpni zanahte Thu leh Hla kutpui hi Vanapa Hall-ah hman a ni a.
Mal zai, Hla chham, fak lam,group zai, Lem chan leh thu sawi, mit leh beng ti tlai tak tak Bial hrang hrang atangin thlirho a ni a. Zaihona neih thin a ni bawk a ni.
Thu leh hla kutpui hi Mizoram UPC Puipate bakah General Headquarters hruaitu ten an hmanpui a, Vanapa Hall lenglo khawpin chhimtu an thahnem thin hle a ni.
General PYD leh L&PB tangkawpa buatsaih Thu leh Hla kutpui hi kum 2011 ah a hmasa ber atan hman tan a ni a, 2012, 2015, 2016 leh 2018 ah te hman a lo ni tawh a ni.
Bethani Childrens Home
Bethani Childrens Home-a thawktute chuan kohhran huang chhung atanga tanpuina pe a tlawh thintute chungah lawm thu an sawi.
Mizoram UPC Bial leh Tualchhung, mimal leh pawl thahnemngai te, tunlai hian Bethani Childrens Home-ah luan chhuah programme neia kal an thahnem thin hle a. August ni 6 Nilaini khan Dinthar Bial LAD te chuan tlawhin sum thahnem tak leh ei tur an pe a, tun hnaiah Sairang Bial tualchhung hrang hrang LAD leh PYD te chuan an bial inkhawmpui ro relna tihlawhtlingin Bethani Childrens Home-ah hian thil pek thahnem tak an lo pe tawh bawk a ni.
Tun dinhmunah Bethani Childrens Home-ah hian Naupang - 25 (Miap-15 leh Hmeichhia -10) kum 4-16 inkar an awm mek a ni.
