United Pentecostal Church
of Mizoram

General Superintendent

General Superintendent-in Tripura District-ah mi thar 190 Mizoram UPC ah a lawm lut.

August ni 22-24 Pathianni hmang khan Tripura District chhunga Darchawi bial leh Agartala bial tlawhin Rev. P. Lalrinawma, General Superintendent chu a zin chhuak a, Agartala Bial Ganga Prasad leh Kwasa Rai atangin August ni 24 Inrinni khan mi thar 97 te chu kohhran dang atangin Mizoram UPC ah a lawm lut a, khaw hnih atanga mi thar lawmluhte hian biak in an rawn luh pui bawk a ni.

A tuk ni 25 Pathianniah Darchawi bialah kal lehin General Superintendent chuan Khathangha khua ah mi thar 21 Mizoram UPC ah a lawmlut leh a, lawmluh zinga a mi Mirtung Joy- te chhungkua chuan biak in hmun tur kohhran an pe nghal bawk a ni.

August ni 25 Thawhtanni khan Agartala Bial Salka Para khuaah mi thar 72 chhungkaw 15 te chu General Superintendent in a lawm lut leh a, Rev. Biakhmunrem, Tripura District Supervisor chuan he hun hi telpui bawk a ni.

General SS Dept.

Rev. Lalngaizuala Secretary, General SS Department chu August ni 29 Zirtawp zan atang hian Armed Veng South kohhrana Pathian chawimawina ah speaker a ni dawn a, Pathianni zan thleng hian thuhril rawngbawlna a nei dawn a ni. 

L&PB PYD

August ni 27 (Nilaini) khan General Headquarters Committee room-ah, Literature & Publication Board leh General PYD te chuan Joint meeting an nei a, Rev. Hc Lalthlamuana, Chairman L&PB-in he thut khawm hi kaihruaiin, August ni 7 & 8-a 'Thu leh hla kutpui' Vanapa hall-a neih zawh tak thlirletna an nei a, harsatna awm lova tluang taka an nei zo thei leh kohhran mipui ten an hlut chu lawmawm an ti hle a ni.

Joint meeting chuan kum tin thu leh hla tih hmasawnna tur programme siam chungchang an ngaihtuah bawk a, kum 2026 chhung hian 'Thu leh hla kutpui' neih leh an rel a ni.

Vehicle Board

Mizoram UPC Vehicle Board August ni 26 a thu khawm chuan kohhran lirthei yamaha Motorcycle SZ-RR registration number MZ01 Q 6843 chu tih ral an rel a, September ni 29 thleng lilam hun chhung hawn a ni. 

Lirthei lilam tur hi a chhan theihna hniam ber chêng Singhnih Sangnga (₹ 25,000/-) a ni a, 

chhang duh chuan chhanna zat, chhangtu hming, veng/khua leh phone number chiang taka ziakin, Rev. Rokhuma, General Treasurer, Vehicle Incharge hnenah General Headquarters Office hun chhungin thehluh tur a ni.

Lirthei lilam chhannate hi September Ni 30 chawhnu dar 1:00 ah hawn a ni dawn a, Lirthei enchiang duh tan General Headquarters Office, Zonuamah office hun chhûngin a en theih reng a ni.