Rev. Lalngaizuala Secretary, General SS Department chu October ni 18 Inrinni hian Mualthuam North SS Department Pentecost naupang pual hmanpui turin a zin chhuak dawn a, October ni 20 Thawhtanni hian Aizawl a lo let leh ang.
General LAD
Mizoram UPC Tanpuitu Hmeichhe Pawl ro relna sang General Baord vawi 3-na chu vawiin October ni 18 Inrinni hian Lengte kohhran Biak In ah neih a ni dawn.
LAD General Board hi nizan atang khan Revival a bul tan a ni a Tirhkoh Ruatfamkima hnen atangin Pathian thuchah ngaihthlak a ni.
Vawiin General Board-ah hian C. Renghlupuii, President General LAD chuan inkhawm a kaihruai ang a, ro rel hlanna Upa F. Lalremmawia Executive Chairman-in a nei dawn a, Hyssop Centre pual Campaign neih a ni bawk ang.
Inrinni zan atanga Pathianni zan thleng hian revival nei chhunzawm a ni dawn a, Inrinni zan inkhawmah General LAD Secretary Mary Lalrinawmi’n thuhril rawngbawlna a nei dawn a, Pathianni zingah Mizoram UPC General Secretary Rev. T. Laldingliana, Pathianni chawhnuah Tirhkoh Michael Lalramchhana leh Pathianni zan inkhawmah General Superintendent Rev. P. Lalrinawma te hnen atangin Pathian thu chah ngaihthlak a ni dawn a ni.
General news
General Headquarters atanga Office Assistant-III post ruak diltute hnena hriattirna.
Applicant- mi 35 te dilna pawm vek a ni a.
Written Exam ni tura ruat lawk October ni 29 Nilaini chu Mizoramah Total Band a awm dawna hriat a nih avangin Written Exam hi a tuk October ni 30 Ningani ah sawn a ni a. Exam timing erawh a hun ngai, advertisement a chhuah tawh angin kalpui a ni ang.
Total Band hi thulh leh anih pawhin Exam hun tura ruat thar October ni 30 chu Written Test neih ni atan hman tlang tur a ni.
Hriat chian duh nei tan General Secretary Mizoram UPC biak pawh theih reng a ni e.
General PYD
General PYD chuan October ni 9 (Ningani) zan khan Hyve Aizawl City Hall, Tuikual South-ah MYC Talks - Breaking Barriers an hmanpui.
General PYD sawm an nih angin he hunah hian aiawh in tirh ni a, T.Upa Mesak Vanlalthlana, Secretary, GPYD; Lalnunpuia Pachuau, EBM (Chairman SWC); Ramnunpari, Treasurer, SWC; K. Vanlalhriatpuii, Asst. Secy, SWC leh Lallawmsanga, Member SWC-te an tel.
MYC Talks-ah hian thalaite mahni kea ding thei tura chona leh inzirtirna lam hawi ngaihthlak a ni.
Serchhip District
Serchhip District inkhawmpui vawi 23-na Thingsulthliah Community Hall-a hman chu tluang taka neih zawh a ni.
District inkhawmpui hi October ni 10 Zirtawp zan atang khan hman tan a ni a, Pathian biak inkhawm hi District Superintendent Pastor Lalnunzama'n a kaihruai a, inkhawmpui tan zan hian palai lawmna leh District inkhawmpui Pathian hnena hlanna Thingsulthliah Bialtu Pastor RT Laltanpuia'n a nei a ni.
Serchhip District inkhawmpui hi Mizoram UPC Executive Chairman Upa F. Lalremmawia’n a hmanpui a, a ni bakah hian District Chairman Upa H. Lalrintluanga, Rev. Saienga Sailo Serchhip Bialtu, Pastor Lalnunthara N. Vanlaiphai Bialtu, Upa K. Denghmingthanga leh Tirhkoh Lalnuntluangate hnen atangin inkhawmpuiah hian Pathian thu chah ngaihthlak a ni a, Serchhip District chhunga zaithiam ten zai rawngbawlna an nei thin bawk a ni.
Inrinni nilengin ro rel inkhawm VC II House Thingsulthliahah an nei a, palai mi 122 te chuan District hmalakna tur leh Mizoram UPC ro relna sang a thlen tur engemaw zat Agenda an pawm a, an thu rel langsar zual zingah ram pum huapa rawngbawlna chak leh zau zawka neih anih theih nan a Revival Team leh Tirhkoh rawihna tur Budget Rs. 150 Lakh (Nuai za sawmnga) dah rawtna te,
District Crusade Fund atanga Tirhkoh rawihte, District in enkawlna leh inkaihhruaina mumal zawka a bu a siamte a tel a ni.
Heng bakah hian Mizoram UPC ro relna sanga thlen tur rawtna engemaw zat an pawm bawk a.
General Assembly ro rel palai tih tlem rawtnate, General Assembly ro rel palai ni ve lo chhimtute thutna tur bik ruahmante, ATI-ah Account enkawl dan zirna Subject neih rawtnate chu Serchhip District inkhawmpuiah hian pawm a ni.
Serchhip District chhungah hian Bial 7 awmin,
Kohhran hi – 37 leh PP 1 a awm a, kum 2024 District inkhawmpui leh kum 2025 inkhawmpui inkarah
mi thar 101 kohhranah lawm luh an ni.
Kum 2026 Serchhip District inkhawmpui chu ruat lawk sa angin Thenzawl Bial in an thleng dawn a ni.
Tuichangral District
TUICHANGRAL DISTRICT INKHAWMPUI VAWI 30-NA TLUANG TAKA ZAWH FEL A NI
October ni 10-12 Pathianni hmang a Hnahlan Community Hall-a neih Tuichangral District inkhawmpui chu Pathian awmpuina hnuaiah hlim taka hman zawh a ni a, Rev. P. Lalrinawma, General Superintendent chuan a hmanpui.
Zirtawpni zan aṭangin Revival inkhawm an nei a, Inrinni nilengin Rorel inkhawm an nei thung a ni.
Rorel palai mi 162 te chuan District chhunga hman tur agenda bakah rorelna sang zawk a kal tur agenda pawimawh tak tak an rel a ni.
Tuichangral District Inkhawmpuiah hian General Superintentdent Rev. P. Lalrinawmaleh, Tk. H. Lalrintluanga, Khawhai bial, Tk. Lalrinzuala Laizo, Champhai bial, Upa KT Lalsiamliana, Khawzawl Vengpui bial, Pastor Lalhmangaihawma, Champhai bialtu leh Pastor TBC Lalfamkima, Dilkawn bialtu te chuan thuhril rawngbawlna an nei a, District chhunga zai mi ten fakna hla sa in zai rawngbawlna an nei bawk a ni.
Pathianni zingah District Committee an thu khawm a, Mizoram UPC ro relna sang Executive committee member atan Upa R. Zosangliana, Ruantlang bial chu thlan a ni.
District Secretay report aṭanga a lan danin Tuichangral District chhungah hian Bial 9 a awm mek a, tualchhung kohhran 54 awmin , kum 2024 inkhawmpui leh kum 2025 inkhawmpui inkarah Member thar 330 lawm luh an ni a, Lalpa Isua hminga Baptisma chang thar 292 an awm bawk a ni.
Tuichangral District inkhawmpuiah hian Pathianni zan inkhawm banah Baptisma rawngbawlna Rev. P. Lalrinawma, General Superintendent chuan a nei a, Pathianni zan inkhawm hlimna atangin
Pathian chawimawina puan a ni a, Pastor Lalnunthara, Hnahlan bialtu chuan kohhranah ran thawhin Pathian chawimawna Thawhtanni khan neih a ni a, Rev. P. Lalrinawma, General Superintendent chuan thuhril rawngbawlna neiin, zan inkhawm ah Pastor K. Lalhmingsangzuala, Rabung bialtu in rawngbawlna a nei thung a ni.
N. Mizoram District
North Mizoram District hruaitute chuan District Inkhawmpui an neihna hmun tur Armed Veng South kohhran an tlawh.
October Ni 12 Pathianni Chawhnu leh Zan hmang khan, North Mizoram District inkhawmpui October Ni 31 – November ni- 2 chhunga neihna hmun tur Armed Veng South Kohhran, Bazar Bial an tlawh a, Pathian biak inkhawm an hman pui.
Pathianni chawhnu Inkhawm ah hian Upa Lallawmkima Ralte, Secretary, N. Mizoram District chuan thuhril rawngbawlna a nei a, Inkhawm banah District Hruaitute leh Organising Committee te chuan inkawmhona neiin District Inkhawmpui pual a hmalak tawhnate thirho a ni a, tul leh pawimawh bawhzui ngaite an sawiho bawk a ni.
Pathianni zan Inkhawm ah Rev. C. Lalremsanga, Superintendent, N. Mizoram District chuan thuhril rawngbawlna a nei veleh a ni.
