Mizoram UPC hnuaia District pali Siaha District, Upper Myanmar District, North Mizoram District leh Hmarthlang District-te chuan October ni 31 Zirtawpni zan atang khan inkhawmpui an nei a, Puipa ten an hmanpui. District inkhawmpui hian November ni 2 Pathianni thleng a awh ang.
Hmarthlang District inkhawmpui hi Vairengte Headquarters-ah neih a ni dawn a, General Superintendent Rev. P. Lalrinawma’n a hmanpui a ni.
North Mizoram District inkhawm chu Bazar Bial Armed Veng South kohhranah nghah a ni thung a,
General Secretary Rev. T. Laldingliana’n a hmanpui bawk.
General Treasurer Rev. Rokhuma’n Siaha District inkhawmpui hi hmanpuiin, Cheural kohhranah neih mek a ni.
Executive Chairman Upa F. Lalremmawia chu October ni 31 Zirtawpni khan Mualthuam North LAD Seminar cum revival hmanpuiin a zin chhuak.
Rev. Lalruatfela, Secretary, General Missions Department chuan November ni 2 Pathianni hamng hian Thingsulthliah Bial Missions revival a hmanpui dawn a, November ni 1 Inrinni hian a zin chhuak bawk.
General Missions Dept.
General Missions Department Conference vawi 13-na LPS Arena Falkland a hman chu tluang taka neih zawh a ni.
General Missions Conference hi October ni 24 atanga ni 26 Pathianni hmanga a neih a ni a. Pathian biak inkhawm Zirtawp zan atang khan revival-a hman tan niin Mizoram pawn atanga Conference palai lo kal hi 200 bawr vel an ni a, conference tan zan hian Pastor Lalhmangaihzuala, Guwahati Field hnen atangin Pathian thu chah ngaihthlak a ni.
General Missions Department Conference-ah hian Pastor Aurobindo Mushahary, Uttar Pradesh Field. Rev. P. Lalrinawm General Superintendent. Pastor Nelson Vaiphei, Agra Field leh Upa Lalthlamuana Hnamte, Chairman General Missions Department-te chuan thuhril rawngbawlna an nei a ni.
General Missions Department Conference vawi 13-na ro relna chuan General Missions Conference chu Aizawl khawpui chhung bialah rotation-a inthlen chhawk a rel a, inkhawmpui thlengtu puihan Rs. 1,50,000/- hman mek chu Rs. 6,00,000/- ah tih san an rel bawk.
Nagathol Kohhran Missions Field hnuaia dah rawtna Mizoram UPC ro relna sang zawka thlente, kum 2026 ah Missions Support Bial tina neihte, Missions Field-ah Biak In sakna atan kohhran In tinah Rs.100 khawn rawtnate, Hindi Bible School Online a kalpuite, Second Sunday zan inkhawmah Missions Field leh Misisonary-te puala tawngtaina neihte leh India ram chhunga kohhran la din lohna hmunah Missionary a tam thei ang ber tirh chhuahte chu General Missions Department conference vawi 13-na ro rel inkhawm thu pawm langsar zualte an ni a,kum 2026 budget atan cheng nuai zathum sawmriat pakua an pawm bawk a ni.
Kum 2027 General Missions Department inkhawmpui chu a hun ngai October Pathian ni hnuhnung ber hmanga neih leh tur a ni dawn a, Inkhawmpui nghahna hmun tur chu General Missions Board ngaihtuah atan dah a ni.
ATI
Mizoram UPC Bible zirna College, Apostolic Theological Institute, Durtlang chuan October ni 30 Ningani khan Graduation Day an hmang a, B.Th Degree nei thar mi 9 awmin, Lamminlen Kipgen chu O Grade-ah passed-in pakhatna a ni.
Kum 2025 ATI Graduation Day inkhawm hi Principal Rev. Ngurthanpara Sailo chuan a kaihruai a, Hunserh Rev. Rokhuma General Treasurer chuan hmangin ATI Board Chairman Upa Vanlalruata leh ATI Student Union President Ramdinmawia te hnen atangin thu sawi ngaihthlak a ni.
Report leh result, Dean Rev. B. Lalchhanhima hnen atangin ngaihthlak a ni a. Graduate-te Certificate hlanna leh Tawngtai sakna Mizoram UPC General Superintendent Rev. P. Lalrinawma’n a nei a ni.
ATI Graduation Day-ah hian Upa F. Lalremmawia Mizoram UPC Executive Chairman hnen atangin thu sawi ngaihthlak a ni a, Graduate Topper hnena pek thin DL Nunpuia Award leh zirlai zinga mark hmu sang ber hnena pek thin Vanlalthlangdika Award chu Lamminlen Kipgen hnenah Rev. Chhunglawma’n a hlan a ni.
Kumin hian ATI-ah zirlai mi 49 awmin First year-ah zirlai 21, Second Year-ah zirlai 19 leh Third Year-ah zirlai 9 an awm a, an vai hian hlawhtlinna an chang vek a ni.
HYSSOP RECREATION CENTRE BOARD
Hyssop Recreation Centre Board chu October ni 28 Thawhlehni khan Committee Room general Headquarters Office-ah an ṭhukhawm a.
Upa Vanlaldinthara, Board Chairman chuan kaihruaiin kum 2026 atana Budget an ruahman.
Hyssop Centre chu Mizoram Sawrkar hnuaia Firm & Societies-ah registration neih an rel a, Dan hnuaia registration tih ngai leh tul dangte pawh chak zawka bawhzui an rel a ni.
Heng bakah hian Hyssop Recreation Centre Board hminga Bank Account hawnte leh Hyssop Recreation Centre din anih theih nana tul leh pawimawh bawhzui ngai awmte chu chak zawka bawhzui a hmalak an rel a ni.
Hyssop Recreation Centre Board thutkhawm hi Mizoram UPC General Superintendent, General Secretary leh General Treasurer ten chuan an ho a ni.
Education Board
Mizoram UPC Education Board chu October ni 27 Thawtanni khan General Treasurer Quarters-ah an thu khawm a, Board Chairman Upa Lalnuntluanga Chhangte chuan a kaihruai a, Mizoram UPC Puipa ten an ho.
Education Board thu khawm chuan kum 2026 Budget-atan cheng nuai sawmthum panga leh singthum (Rs.3,530,000/-) P&FB pawmpui atan an ruahman a, kum 2026 ah BEREMS a thawk turin zirtirtu lak belh an rel bawk.
Berems Building sak chhunzawmte, Board hminga School Calendar siamte, zirlai harsa tanpuina mi pahnih hnena pekte leh Education Board-in a enkawl mek School hrang hrang a fee chungchangte chu Mizoram UCP Education Board thutkhawm thu ngaihtuah langsar zualte an ni.
Mizoram UPC Education Board hnuaiah hian School Panga a awm mek a.
Apostolic Missions School, Dumzau
BEREMS, Sihhmui
Apostolic Missions School, Senvon
Missions School, Naisingpara leh
Missions School, Khasnam Para te an ni.
Bookroom Board
Mizoram UPC Bookroom Board chu October ni 28 Thawhlehni zan khan General Treasurer Quarters ah an thu khawm.
Bookseller kum khat atan zel a lak anih angin, kum 2026 chhunga thawktu tur lak thar chungchang meeting-ah hian sawiho a ni a, Mizoram UPC Bookroom Assembly Centre, Zonuam a sawn thlak rawtna, rorelna sang a thlente leh kum 2026 Bookroom Board Budget-te chu an thu rel langsar zualte an ni.
General Headquarters
Mizoram UPC General Headquarters Office a thawk tur, Office Assistant Grade III pakhat lakna written examination leh Practical Test chu October ni 30 Ningani khan General Headquarters Office-ah neih a ni a, diltu mi 35 zinga mi 30 te chuan Examination hi an hmachhawn a ni.
Written Examination a ti tha mi 5 te chuan November ni 18 Thawhlehni ah Personal Interview an hmachhawn leh ang.
GENERAL LAD
General LAD chuan luan chhuah programme hmangin Missionary 126 te hnenah thil pek an hlan.
October ni 25 (Inrinni) zan khan General Missions Department inkhawmpuiah General LAD-in
LAD Day ip atanga thawhlawm tlingkhawm hmangin luan chhuahna an nei a, Penticost Missions school a thawktu zawng zawngte leh Missions Field a thawktu mi 126 hnenah pawisa fai an hlan a ni.
GLAD hian kum tinin Missionary-te tana hian General Assembly-ah luan chhuah programme an hmang thin a. Kuminah erawh Missions Conference-ah he hun hi hman a ni.
GLAD hruaitute hian Foreigna missions hnuaia Missionary -te pualin General Assembly-ah luan chhuah programme hi neih leh an tum a ni.
